व्यवस्थाविवरण 6

महान-आग्या

1ईद अद आग्या, अदिक आ विधीगोळ अदिक नियम हुव जो नीमी कलसोद नीम परमेश्वर यहोवा आग्या कोटान, कि नीव अवरी आ द्याश दा मान्सी यदुर अधिकारी आगली आप्पाटी होगदुर मा आईर; 2अदिक नी अदिक नीन पार अदिक नीन नातु यहोवा अन अंज्क मान्सतेला आऊन अव सप्पा विधीगोळ अदिक आग्यागोळ मा, जो ना नीनी केळ्सतीन, तान जींदगी तीम नळुतेला ईरूल, यदुर देल नी हापाळ दिन ताका बनुसकु ईत्या. 3हे इस्त्राएल, केळ, अदिक हींग अच माळोद चौकसी माळ; इदुरसाटी कि नीन भला आगुल, अदिक नीन पित्तरगोळ्द परमेश्वर यहोवा अन वचन इन अनुसार आ द्याश दा यल हाल अदिक शयद इन धारागोळ वाहुसताव नीव हापाळ आगेगी.

4“हे इस्त्राएल, केळ, यहोवा नाम परमेश्वर हुन, यहोवा ऊंदा आन; 5नी तान परमेश्वर यहोवा से तान पुरा मन, अदिक पुरा जीव, अदिक पुरा ताकत इन सांगुळ प्यार ईटेत. 6अदिक ई आग्यागोळ जो ना ईंद नीनी केळ्सतीन अव नीन मन दा बनस्कु ईरूल; 7अदिक नी ईवरी तान चिकोर चिणगेर इक समझुसकु कल्सतोगेत, अदिक मान्या कुर्तकु, हादी मा नळुतेला, मिंग्त, येळ्त, ईऊर्द चर्चा माळतोगेत. 8अदिक ईवरी तान कय मा चिन्ह अन रूप दा कटेत, अदिक ईव नीन कण्णगोळ न्याड्या टीका अन क्याल्सा कोळुल. 9अदिक इवरी तान तान मान्ना अन चौखट इन बाजुगोळ अदिक तान फाटकगोळ मा लिख्सेत.”

आग्या-उल्लंघन इन खिलाप चेतावनी

10“याग नीन परमेश्वर यहोवा नीनी आ द्याश दा पोहचुसुल यदुर बारा दा आव अब्राहम, इसहाक, अदिक याकूब हेसुर इनोर नीन पुर्वजगोळ से नीनी कोळोद किर्या तिंदुन, अदिक याग आव नीनी धोळ धोळ अदिक वळ्लेव नगर, जो नी बनुसीदील, 11अदिक वळ्लेव वळ्लेव पदार्थगोळ देल तुम्द मान्ना जो नी तुम्मुदील, अदिक अगुळ्द भायगोळ, जो नी अगळीदील, अदिक अंगुर इन बेलीगोळ अदिक जैतुन इन मार्र, जो नी हचीदील, ई सप्पा वस्तुगोळ याग आव कोळुल, अदिक नी तिनकु तृप्त आगुल, 12आग सावधान ईरेत, ईलारा हींग आगबाळुल कि नी यहोवा अक मार्तोग, जो नीनी गुलामी अन मान्ना मतलब मिस्त्र द्याश टु तेगुकु तंदान. 13तान परमेश्वर यहोवा अन अंज्क मान्सेत; आऊंदा स्यावा माळेत, अदिक आऊंदा हेसुर इन किर्या तिनेत. 14नीव पराया द्यावगोळ्द, मतलब तान नाकु दीकळव द्याशगोळ लॉकुर्द द्यावगोळ हींद आगबाळेतीर; 15यतिकी नीन परमेश्वर यहोवा जो नीन न्याड्या आन आव जलन ईटावाळा ईश्वर हुन; ईलारा हींग आगबाळुल कि नीन परमेश्वर यहोवा अन कोप नीन मा भळकुसुल, अदिक आव नीनी धरती मा टु नष्ट माळ बुळुल.”

16“नीव तान परमेश्वर यहोवा अन परीक्षा माळबाळेतीर, ह्यांग कि नीव मस्सा दा आऊन परीक्षा माळीदीर. 17तान परमेश्वर यहोवा अन आग्यागोळ, गवाहीगोळ अदिक विधीगोळी जो आव नीनी कोटान, सावधानी देल मान्सेतीर. 18अदिक जो क्याल्सा यहोवा अन नजर दा बेस अदिक सुहावना आद अदा माळतोगेत, यदुर देल कि नीन भला आगुल, अदिक याता उत्तम द्याश अन बारा दा यहोवा नीन पुर्वजगोळ से किर्या तिंदुन अदुर दा नी प्रवेश माळकु अदुर अधिकारी आगेग; 19कि नीनोर सप्पा दुश्मन नीन मुंदु टु दुर माळकु आगेगुल, ह्यांग कि यहोवा अंदीदुन.”

20“बाक मुंद याग नीन पार नीन से केळुल, ‘ई गवाहीगोळ अदिक विधी अदिक नियम, यऊर्द मानसोद आग्या नाम परमेश्वर यहोवा नीमी कोटान, ईऊर्द प्रयोजन येन आद?’ 21आग तान पार उन से अनेत, याग नाव मिस्र दा फिरोन उन दास ईरेव, आग यहोवा ताकतवर कय देल नामी मिस्र दा टु तेगुकु तंदुन; 22अदिक यहोवा नाम नोळतेला मिस्र दा फिरोन अदिक आऊन सप्पा घराना अक दुख कोळावाळा धोळ धोळ चिन्ह अदिक चमत्कार तोर्सदुन; 23अदिक नामी आव अल टु तेगुकु तंदुन, इदुरसाटी कि नामी ई द्याश दा पोहचुस्कु, यदुर बारा दा आव नाम पुर्वजगोळ से किर्या तिंदीदुन, इदरी नामी सोप्स बुळ. 24अदिक यहोवा नामी ई सप्पा विधीगोळ पालन माळोद आग्या कोट्टुन, इदुरसाटी कि नाव तान परमेश्वर यहोवा अन अंज्क मानसेव, अदिक ई रीती देल हमेशा नाम भला आगुल, अदिक आव नामी जीत्ता ईटुल, ह्यांग कि ईंद इन दिशी आयेव. 25अदिक अगर नाव तान परमेश्वर यहोवा अन नजर दा आऊन आग्या अन अनुसार ई सप्पा नियमगोळ्द मान्सदुर दा चौकसी माळेव, रा ईद नाम साटी न्याय ठहरूसीत.”