व्यवस्थाविवरण 5

हत्त आग्यागोळ

(निर्गमन 20:1-17)

1मूसा पुरा इस्राएलीगोळी कारसुसकु अंदुन, हे इस्राएलिगोळा, जो जो विधि अदिक नियम ना ईंद नीमी केळ्सतीन अव केळी, इदुरसाटी कि अवरी कल्तकु मान्सदुर दा चौकसी माळी. 2नाम परमेश्वर यहोवा होरेब पहाळी मा नाम से वाचा कटदुन. 3ई वाचा अक यहोवा नाम पित्तरगोळ से ईला, नाम से अच कटदुन, जो ईल ईगास ताका जीत्ता आव. 4यहोवा आ पहाळी मा बेक्की इन न्याड्या दा टु नीम लॉकुर से आमने सामने मातगोळ माळदुन; 5आ बेक्की इन अंजक्या मारा देल नीव पहाळी मा येरीदील, इदुरसाटी ना यहोवा दी नीम न्याड्या आऊन वचन नीमी हेळली निदुरकु ईत्तीन. आग आव अंदुन,

6नीन परमेश्वर यहोवा, जो नीनी गुलामी अन मान्ना मतलब मिस्त्र द्याश दा टु तेगुकु तंदान, आव ना हुईन.

7नी नानी बिटकु दुसरागोळी परमेश्वर माळकु मान्सबाळेतीर.

8नी तान साटी यातोदारा मूर्ति अगुळकु बनुस बाळेत, ना यारदारा प्रतिमा बनुसेत जो आकाश दा, या धरती मा, या धरती इन नीर इन ल्यालमा आद; 9नी आंदरी दण्डवत माळ बाळेत अदिक ना आंदुर उपासना माळेत; यतिकी ना नीन परमेश्वर यहोवा जलन ईटावाळा ईश्वर हुईन, अदिक जो नान से दुश्मनी ईटतार आंदुर चिकोर, नातुगोळ, अदिक पळनातुगोळी आप्प दादागोळ्द दुष्कर्मगोळ्द दण्ड कोळतोगतीन, 10अदिक जो नान से प्यार ईटतार अदिक नान आग्यागोळी मान्सतार आ हजारो मुंदुरगोळ मा करूणा माळतोगतीन.

11नी तान परमेश्वर यहोवा अन हेसुर व्यर्थ ताकोम बाळेत; यतिकी जो यहोवा अन हेसुर व्यर्थ ताकोंडान आव आंदरी निर्दोष ठहरूसतीदील.

12नी विश्राम दिन इक मान्सकु पवित्र ईटेत, ह्यांग नीन परमेश्वर यहोवा नीनी आग्या कोट्टुन. 13नी आर दिन रा मयनत माळकु तान सप्पा क्याल्सा कळी माळेत; 14लेकीन सातवा दिशी नीन परमेश्वर यहोवा अन साटी विश्राम दिन आद; अऊर दा नी यातोदारा भी क्याल्सा कळी माळ बाळेत, ना नीन पार, ना नीन पोर, ना नीन दास, ना नीन दासीगीत, ना नीन वस्ता, ना नीन गदा, ना नीन यातोदारा जनावर, ना यातोदारा परदेशी भी जो नीन फाटकगोळ्द बुळ्क ईरूल; यदुर देल नीन दास अदिक नीन दासीगीत भी नीन घाई विश्राम माळुल. 15अदिक ई मात इक याद ईटेत कि मिस्त्र द्याश दा नी खुद दास ईर्या, अदिक अल टु नीन परमेश्वर यहोवा नीनी ताकतवर कय अदिक वाळुस्द भुजा अन द्वारा तेगुकु तंदुन; ई कारण नीन परमेश्वर यहोवा नीनी विश्राम दिन मानसोद आग्या कोळतान.

16तान आप्प अदिक तान मोय इन आदर माळेत, ह्यांग कि नीन परमेश्वर यहोवा नीनी आग्या कोटान; यदुर देल जो द्याश नीन परमेश्वर यहोवा नीनी कोळतान अदुर दा नी हापाळ दिन ताका ईर सक्या, अदिक नीन भला आगुल.

17नी हत्या माळ बाळेत.

18नी व्यभिचार माळ बाळेत.

19नी काळ्लपनी माळ बाळेत.

20नी यारदारा खिलाप ख्वाटा गवाही कोळ बाळेत.

21नी यारदारा हिंग्स उन लालच माळ बाळेत, अदिक ना यारदारा मान्ना अन लालच माळेत, ना आऊन केई इन, ना आऊन दास उन, ना आऊन दासीगीत इन, ना आऊन वस्ता या गदा अन, ना आऊन यातारा दुसरा वस्तु उन लालच माळेत.

22ईदा वचन यहोवा आ पहाळी मा बेक्की, अदिक बादल, अदिक घोर अंधकार इन न्याड्या दा टु नीम सप्पा मंडली से कारूकु अंदुन; अदिक ईदुर से यक्कुल मात्त येनु अंदिदील. अदिक अवरी आव कल्ल इन येढ्ढ पाटीगोळ मा लिख्सकु नानी कोट बुट्टुन.

लॉकुर अंजोद

(निर्गमन 20:18-21)

23“याग पहाळी बेक्की देल धदकुसोद, अदिक नीव आ शब्द अक अंधार इन बीच दा टु बर्त केळदीर, आग नीव अदिक नीम कुल नोर सप्पा मुख्य मुख्य मंळसा अदिक नीम पुरनियागोळ नान हात्ती बंदुर; 24अदिक नीव अनली हत्तीर, ‘नाम परमेश्वर यहोवा नामी तान तेज अदिक तान महिमा तोरस्यान, अदिक नाव आऊन शब्द बेक्की इन न्याड्या दा टु बर्त केळदेव; ईंद नाव नोळ कोंडेव कि अगर परमेश्वर मंळसा से मातगोळ माळतान तरी भी मंळसा जीत्ता ईरतान. 25ईग नाव येती सोत्तेव? यतिकी हींग धोळ्द बेक्की देल भस्म आगेदेव; अदिक अगर नाव तान परमेश्वर यहोवा अन शब्द मात्त केळेव, आग रा पक्का सोतोदेव. 26यतिकी सप्पा मंळसागोळ दा टु याव हींग आन जो नाम घाई जीत्ता अदिक बेक्की इन न्याड्या दा टु माताळतेला परमेश्वर उन शब्द केळकु जीत्ता ऊळ्दकु ईरूल?’ 27इदुरसाटी नी हात्ती होग, अदिक जो येनारा नाम परमेश्वर यहोवा अनुल अदरी केळ कोम; बाक जो येनारा नाम परमेश्वर यहोवा अनुल अदरी नाम से अनेत; अदिक नाव अदरी केळेव अदिक अदरी मान्सेव.”

28“याग नीव नान से ई मातगोळ अनीर आग यहोवा नीम मातगोळ केळदुन; आग आव नान से अंदुन, ‘ई लॉकुर जो मातगोळ नीन से अंदार ना केळीन; ईंदुर जो येनारा अंदुर अद बराबर अच अंदुर. 29भला आगाईत कि आंदुर मन हमेशा हींगा बन्सकु ईरूल, कि आंदुर नान अंज्क मान्सतेला नान सप्पा आग्यागोळ मा नळुतेला ईरूल, यदुर देल आंदुर्द अदिक आंदुर वंश इन हमेशा भलाई आग्त ईरूल! 30इदुरसाटी नी होगकु आंदुर से अंद कोम, कि तान तान ड्यारागोळ दा वापस होटोगी. 31लेकीन नी ईल्या नान हात्ती निदुरकु ईर, अदिक ना अव सप्पा आग्यागोळ अदिक विधीगोळ अदिक नियम यवरी नीनी आंदरी कलसोद बिद्दीत नीन से अनाईन, यदुर देल आंदुर अवरी आ द्याश दा यदुर अधिकार ना आंदरी कोळदुर मा आईन मान्सुल.’ 32इदुरसाटी नीव तान परमेश्वर यहोवा अन आग्या अन अनुसार माळदुर दा चौकसी माळेतीर; ना रा ऊम्मा कय दी डोक्केतीर अदिक ना डाक्या कय दी. 33याता हादी मा नळोद आग्या नीम परमेश्वर यहोवा नीमी कोटान आ सप्पा हादी मा नळुतेला ईरी, कि नीव जीत्ता ईरी, अदिक नीम भला आगुल, अदिक याता द्याश इन नीव अधिकारी आदीर अदुर दा नीव हापाळ दिनगोळ साटी बन्सकु ईरी.”