व्यवस्थाविवरण 4

मूसा अन उपदेश

1“ईग, हे इस्त्राएल, जो जो आग्या अदिक नियम ना नीमी कलसोद चाहासतीन अवरी केळ कोमी, अदिक अऊर मा नळी; यदुर देल नीव जीत्ता ईत्तीर, अदिक जो द्याश नीम पित्तरगोळ्द परमेश्वर यहोवा नीमी कोळतान अदुर दा होगकु अदुर अधिकारी आगेगी. 2जो आग्या ना नीमी केळ्सतीन अदुर दा ना रा येनारा वाळुसेतीर, अदिक ना येनारा गोर्त माळेतीर; नीम परमेश्वर यहोवा अन जो जो आग्या ना नीमी केळ्सतीन अऊर्द नीव पालन माळेतीर. 3नीव रा तान कण्णगोळ देल नोळीर कि बालपोर इन कारण यहोवा येन येन माळ्यान; मतलब यास मंळसा बालपोर इन हींद आगेगीदुर आ सप्पा मुंदुर्द नीम परमेश्वर यहोवा नीम न्याड्या दा टु सत्यानाश माळ बुट्टुन; 4लेकीन नीव जो तान परमेश्वर यहोवा अन सांगुळ चिपकुसकु आईर सप्पा च्या सप्पा मुंदुर ईगास ताका जीत्ता आईर. 5केळी, ना रा तान परमेश्वर यहोवा अन आग्या अन अनुसार नीमी विधि अदिक नियम कलसीन, कि याता द्याश इन अधिकारी आगली होगतीर अदुर दा नीव आंदुर हीसाब देल नळी. 6इदुरसाटी नीव अवरी धारन माळेतीर अदिक मान्सेतीर; यतिकी दुसरा द्याशगोळ्द लॉकुर मुंद नीम दिमाक अदिक समझ इदुर देल अच प्रगट आदीत, मतलब आंदुर ई सप्पा विधिगोळी केळकु अंदार, कि निश्चय ई धोळ जाती बुद्धिमान अदिक समझदार आद. 7नोळी, याता हींग धोळ्द राज्य आद यदुर द्‍याव अदुर हींग हात्ती ईरतान ह्यांग नाम परमेश्वर यहोवा, याग कि नाव आऊक कारूतेव? आव नाम्द केळतान. 8बाक याता हींग धोळ्द राष्ट्र आद यदुर हात्ती हींग विधि अदिक नियम आव, ह्यांग कि ईद सप्पा व्यवस्था यदरी ना ईंद नीम मुंद ईटतीन?

9“ईद हापाळ जरूरी आद कि नीव तान बारा दा सचेत ईरी, अदिक तान मन इन धोळ्द चौकसी माळी, ईलारा हींग आगबाळुल जो जो मातगोळ नीव तान कण्णगोळ देल नोळीर अवरी मार्तोगी, अदिक अद जींदगी तिमुर साटी नीम मन दा होग्त ईरूल; लेकीन नीव अवरी तान चिकोर अदिक नातु नतरागोळी कल्सेतीर. 10जरूर माळकु आ दिशी इन मातगोळ यदुर दा नीव होरेब उन हात्ती तान परमेश्वर यहोवा अन मुंद निदुरकु ईरीर, याग यहोवा नान से अंदीदुन, ‘आ लॉकुरी नान हात्ती जमा माळ कि ना आंदरी तान वचन केळसाईन, यदुर देल आंदुर कलुल, कि यास दिन आंदुर धरती मा जीत्ता ईरूल आस दिन नान अंज्क मान्सतेला ईरूल, अदिक तान चिकोर चिणगेरगोळी भी ईदा कलसुल.’ 11याग नीव हात्ती होगकु आ पहाळी इन ल्यालमा निदुरदीर, अदिक अद पहाळी मुंदु टु बेक्की भिळोद, अदिक अदुर आच आकाश ताका पोहचुसतोगोद, अदिक अदुर नाकु दी अंधकार, अदिक बादल, अदिक घोर अंधार ईरोद. 12आग यहोवा आ बेक्की इन न्याड्या दा टु नीम से मातगोळ माळदुन; मातगोळ्द शब्द रा नीमी केळ बत्त लेकीन यातोदु रूप कांळ्सीदील, सिर्फ शब्द अच शब्द केळ बत्त. 13अदिक आव नीमी तान वाचा अन हत्तु वचन हेळकु अऊर्द मानसोद आग्या कोट्टुन; अदिक अवरी कल्ल इन येढ्ढ पाटीगोळ मा लिख्स बुट्टुन. 14अदिक नानी यहोवा आटा होती नीमी विधि अदिक नियम कलसोद आग्या कोट्टुन, इदुरसाटी कि याता द्याश इन अधिकारी आगली नीव आप्पाटी होगोर मा आईर अऊर दा नीव अवरी मान्सतोगी.

मूर्तिपूजा अन खिलाप चेतावनी

15“इदुरसाटी नीव सावधान ईरेतीर. यतिकी याग यहोवा नीम से होरेब पहाळी मा बेक्की इन न्याड्या दा टु मातगोळ माळदुन आग नीमी यातोदु रूप कांळ्सीदील, 16ईलारा हींग आगबाळुल कि नीव बिगळुसकु चाहे आरी चाहे आर्त इन, 17चाहे धरती मा नळावाळा यातोदारा जनावर, चाहे आकाश दा ऊळुसावाळा यातोदारा पक्षी इन, 18चाहे जमीन मा रेंगसावाळा यातोदारा जन्तु चाहे धरती इन नीर दा ईरावाळा यातोदारा मेन इन रूप इन यातोदारा मूर्ति अगुळकु बनुस बुळी, 19या हिंग आगबाळुल कि याग नीव आकाश दी कण्ण नेगुकु सुर्य, चंद्र, अदिक तारागोळी, मतलब आकाश इन सप्पा तारागण नोळी, आग बयकुसकु अवरी दण्डवत माळकु अऊर स्यावा माळली हती यवरी नीम परमेश्वर यहोवा धरती माकळोद सप्पा द्याश वाळेर्द साटी ईट्यान. 20अदिक नीमी यहोवा लोहा अन भठ्ठा घाई मिस्र द्याश दा टु तेगुकु तंदान, इदुरसाटी कि नीव आऊन प्रजा अन रूप घाई निज भाग ठहरूसी, ह्यांग ईंद प्रगट आद. 21बाक नीम कारण यहोवा नान देल सिट्टी बंदकु ईद किर्या तिंदुन, ‘नी यरदन आप्पाटी होग सकतीदील, अदिक जो उत्तम द्याश इस्त्राएलीगोळ्द परमेश्वर यहोवा आंदरी आंदुर्द निज भाग माळकु कोळतान अदुर दा नी प्रवेश माळ सकतीदील.’ 22नानी ईदा द्याश दा सायोद आद, ना यरदन आप्पाटी होग सकालीन; लेकीन नीव आप्पाटी होगकु आ उत्तम द्याश इन अधिकारी आगेदीर. 23इदुरसाटी नीव सावधान ईरी, ईलारा हींग आगबाळुल कि नीव आ वाचा अक मार्तकु, जो नीम परमेश्वर यहोवा नीम से कट्यान, यातोदारा दुसरा वस्तु उन मूर्ति अगुळकु बनुसी, यदरी नीम परमेश्वर यहोवा नीमी मना माळ्यान. 24यतिकी नीम परमेश्वर यहोवा भस्म माळावाळा बेक्की हुन; आव जलन ईटावाळा ईश्वर हुन.

25“अगर आ द्याश दा ईरतेला हापाळ दिन बितुसदुर मा, अदिक तान चिकोर चिणगेर पैदा आगदुर मा, नीव बिगळुसकु यातोदारा वस्तु उन रूप इन मूर्ति अगुळकु बनुसी, अदिक ईत्ता रीती देल तान परमेश्वर यहोवा अन प्रति बुराई माळकु आऊक अप्रसन्न माळकोमी, 26रा ना ईंद आकाश अदिक धरती इक नीम खिलाप गवाह माळकु अनतीन, कि याता द्याश इन अधिकारी आगोर साटी नीव यरदन आप्पाटी होगदुर मा आईर अदुर दा नीव राटनेरी बिलकुल नष्ट आगेदीर; अदिक हापाळ दिन ईर ईला सक्कीर, लेकीन पुरा रीती देल नष्ट आगेदीर. 27अदिक यहोवा नीमी द्याश द्याश इन लॉकुर दा तितर बितर माळ्यान, अदिक याता जातीगोळ न्याड्या यहोवा नीमी पोहचुस्यान अऊर दा नीव थ्वाळासा अच मिक्केदीर. 28अदिक अल नीव मंळसा अन माळ्द हुळ्ली अदिक कल्ल इन द्यावगोळ्द स्यावा माळीर, जो नोळालुर, अदिक केळालुर, अदिक तिनालुर, अदिक वास ताकोमालुर. 29लेकीन अल भी अगर नीव तान परमेश्वर यहोवा अक ढुंढ्सीर रा आव नीमी सिक्केदान, शर्त ईद आद कि अगर नीव तान पुरा मन देल अदिक तान पुरा जीवा देल आऊक ढुंढसी. 30आखरी इन दिनगोळ दा याग नीव मुसीबत दा बिळी, अदिक ई सप्पा विपत्तीगोळ नीम मा बंदकु बिळुल, आग नीव तान परमेश्वर यहोवा दी तिर्गीर अदिक आऊन मानसीर; 31यतिकी नीन परमेश्वर यहोवा दयालु ईश्वर आन, आव नीमी ना रा बिट्टान अदिक ना नष्ट माळ्यान, अदिक जो वाचा आव नीन पित्तरगोळ से किर्या तिंदकु कट्यान अदरी मारूतीदील.

32“यागी टु परमेश्वर मंळसा अक पैदा माळकु धरती मा ईटदुन आगी टु हुडुकु नी तान पैदा आगा दिन ताका अन मातगोळ केळ, अदिक आकाश इन ऊंद क्वाना टु दुसरा क्वाना ताका अन मातगोळ केळ, येन हींग धोळ्द मात यागल्यारा आग्याद या केळदुर दा बंदाद? 33येन यातोदारा जाती यागल्यारा परमेश्वर उन वाणी बेक्की इन न्याड्या दा टु बरतेला केळकु जीत्ता ईत्त, ह्यांग कि नी केळ्या? 34बाक येन परमेश्वर मात्त यातोदारा जाती इक दुसरा जाती इन न्याड्या दा टु तेगुली नेळु कटकु परीक्षा, अदिक चिन्ह, अदिक चमत्कार, अदिक लळाई, अदिक बली कय, अदिक वाळुस्द भुजा देल हींग धोळ भयानक क्याल्सा माळ्यान, ह्यांग नीम परमेश्वर यहोवा मिस्र दा नीम नोळतेला माळ्यान? 35ईद सप्पा नीनी तोर्सकु आग्याद, इदुरसाटी कि नी जानस्या कि यहोवा अच परमेश्वर हुन; आऊक बिटकु मात्त याऊ हई हैलेच. 36आकाश दा टु आव नीनी तान वाणी केळ्सदुन कि नीनी शिक्षा कोळुल; अदिक धरती मा आव नीनी तान धोळ्द बेक्की तोर्सदुन, अदिक आऊन वचन बेक्की इन न्याड्या दा टु बरतेला नीनी केळ बरूल. 37अदिक आव जो नीन पित्तरगोळ से प्यार ईटदुन, ई कारण देल आंदुर हींद आंदुर वंश इक निवळुस बुट्टुन, अदिक प्रत्यक्ष आगकु नीनी तान धोळ्द सामर्थ्य अन द्वारा मिस्र दा टु इदुरसाटी तेगुकु तंदुन, 38कि नीन से धोळ्द अदिक सामर्थी जातीगोळी नीन मुंदु टु तेगुकु नीनी आंदुर द्याश दा पोहचुसुल, अदिक अदरी नीन निज भाग माळ बुळुल, ह्यांग ईंद इन दिशी ताका कांळ्सकु बिळतद; 39इदुरसाटी ईंद जान्स कोम, अदिक तान मन दा सोच भी ईट, कि म्याकुच आकाश दा अदिक ल्यालमा धरती मा यहोवा अच परमेश्वर आन; अदिक याऊ दुसरा हैलेच. 40अदिक नी आऊन विधिगोळ अदिक आग्यागोळी जो ना ईंद नीनी केळ्सतीन मान्सेत, इदुरसाटी कि नीन अदिक नीन हींद नीन वंश इन भी भला आगुल, अदिक जो द्याश नीन परमेश्वर यहोवा नीनी कोळतान अदुर दा नीन दिन हापाळ उलटा हमेशा साटी ईरूल.”

शरणनगर

41आग मूसा यरदन इन आप्पाटी पूर्व दी मुर नगर ब्यार्र माळदुन, 42इदुरसाटी कि जो यावारा जान्सदुर बिना अदिक बिना पयले टु दुश्मनी ईटुल तान यावारा मान्ना हातळोर उक कोंद बुळुल, आव अऊर दा टु यातोदारा नगर दा ओळेगुल, अदिक ओळकु जीत्ता ईरूल: 43मतलब रूबेनियागोळ्द बेसेर नगर जो आळी इन समथर द्याश दा आद, अदिक गादिगोळ्द गिलाद इन रामोत, अदिक मनश्शेइगोळ्द बाशान इन गोलान.

व्यवस्था अन कोळ्द भुमिका

44बाक जो व्यवस्था मूसा इस्राएलीगोळी कोट्टुन अद ईद हुन: 45ईवा अव चेतावनीगोळ अदिक नियम हुव यवरी मूसा इस्राएलीगोळी आ समय अंदकु केळ्सदुन याग आंदुर मिस्र दा टु होटीदुर, 46मतलब यरदन इन आप्पाटी बेतपोर इन मुंद दीकळोद तराई दा, एमोरिगोळ्द राजा हेशबोनवासी सीहोन उन द्याश दा, याता राजा अक आंदुर मिस्र दा टु होट्टुर बाद्दा हारूसदुर. 47अदिक आंदुर आऊन द्याश इक, अदिक बाशान इन राजा ओग उन द्याश इक, तान वश दा माळ कोंडुर; यरदन इन आप्पाटी पूर्व दी ईरावाळेर एमोरिगोळ्द राजागोळ ई द्याश ईरव. 48ईद द्याश अर्नोन इन नाला अन छोरवाळा अरोएर टु हुडुकु सीओन ताका, यदरी हेर्मोन भी अंदकु आगतद, 49आ पहाळी ताका अन सप्पा द्याश, अदिक पिसगा अन ढलान इन ल्यालमा अन अराबा अन ताल ताका, यरदन आप्पाटी पूर्व दीकळोद पुरा अराबा हुन.