व्यवस्थाविवरण 3

राजा ओग उन पराजय

(गिनती 21:31-35)

1“आग नाव तिर्गकु बाशान इन हादी देल येर्त होदेव; अदिक बाशान इन ओग हेसुर इन राजा तान सप्पा सेना समेत नाम सामना माळली होटकु बंदुन, कि एद्रेई दा लळाई माळुल. 2आग यहोवा नान से अंदुन, ‘आऊन से अंजबाळ; यतिकी ना आऊक सप्पा सेना अदिक द्याश समेत नीन कय दा माळ कोळतीन; अदिक ह्यांग नी हेशबोन इन निवासी एमोरिया अन राजा सीहोन से व्यवहार माळ्या हांग अच आऊन से भी माळेत.’ 3ईत्ता प्रकार देल नाम परमेश्वर यहोवा सप्पा सेना समेत बाशान इन राजा ओग उक भी नाम कय दा माळ बुट्टुन; अदिक नाव आऊक ईल ताका बडुतेला ईत्तेव कि आंदुर दा टु याऊ भी ऊळु सकीदील. 4आटा होती नाव आंदुर सप्पा नगरगोळी ताकोम कोंडेव, यातोदु हींग नगर ईतीदील यदरी नाव आंदुर से ईला ताकोंडीदेव, ई रिति देल अर्गोब इन पुरा द्याश जो बाशान दा ओग उन राज्य दा ईरोद अदिक अदुर दा साठ नगर ईरव, अद नाम वश दा होटबत्त. 5ई सप्पा नगर गढ़ इनव ईरव, अदिक अऊर्द ऊचा-ऊचा शहरपनाह, अदिक फाटक, अदिक वाळागोळ ईरव, अदिक ईवरी बिटकु बिना शहरपनाह नव भी हापाळ सा नगर ईरव. 6अदिक ह्यांग नाव हेशबोन इन राजा सीहोन उन नगरगोळ से माळीदेव हांग अच नाव ई नगरगोळ से भी माळदेव, मतलब सप्पा बसुस्द नगरगोळ्द आर्तेर अदिक चिकोर चिणगेर समेत सत्यानाश माळ बुट्टेव. 7लेकीन सप्पा घरेलु जनावर अदिक नगरगोळ्द लूट नाव माळ बुट्टेव. 8ईद नाव आ समय यरदन इन ईप्पाटी ईरावाळेर एमोरिगोळ्द येढ्ढु राजागोळ्द कय देल अर्नोन इन नाला टु हुडुकु हेर्मोन पहाळी ताका अन द्याश ताकोम कोंडेव. 9हेर्मोन इक सीदोनी लॉकुर सिय्योन, अदिक एमोरी लॉकुर सनीर अनतार. 10समथर द्याश इन सप्पा नगर, अदिक पुरा गिलाद अदिक सल्का, अदिक एद्रेई ताका जो ओग इन राज्य अन नगर ईरव, पुरा बाशान ताकोम कोंडेव. 11जो रपाई ईतोगीदव, अऊर दा टु सिर्फ बाशान इन राजा ओग ईतोगीदुन, आऊन व्हर्स जो लॉहा अन आद अद अम्मोनियागोळ्द रब्बा नगर दा बिदकु आद, साधारण मंळसा अन कय इन हीसाब देल अदुर्द लम्बाई ऊम्बत कय इन अदिक चौळाई नाक कय इन आद.

द्याश इन जमीन इन बटवारा

(गिनती 32:1-42)

12“जो द्याश नाव आ समय तान हक्क दा ताकोम कोंडेव अव ईव हुव, मतलब अर्नोन इन नाला अन किनारा अन अरोएर नगर टु हुडुकु सप्पा नगरगोळ समेत गिलाद इन पहाळी द्याश इन आर्धा भाग, यदरी ना रूबेनियागोळ अदिक गादियागोळी कोट बुट्टीन, 13अदिक गिलाद इन ऊळ्दकु भाग, अदिक पुरा बाशान, मतलब अर्गोब इन पुरा द्याश जो ओग इन राज्य दा ईरोद, ईवरी ना मनश्शे अन आर्धा कुल अक कोट बुट्टीन. पुरा बाशान रा रपाइगोळ्द द्याश कहलुसकु आगतद. 14अदिक मनश्शेई याईर गशूरीयागोळ अदिक माकावासिगोळ्द सीमा ताका अर्गोब इन पुरा द्याश ताकोम कोंडुन, अदिक बाशान इन नगरगोळ्द हेसुर तान हेसुर मा हब्बोत्याईर ईटदुन, अदिक अदा हेसुर ईगासताका कायम आद. 15अदिक ना गिलाद द्याश माकीर उक कोट बुट्टीन, 16अदिक रूबेनिया अदिक गादियागोळी ना गिलाद टु हुडुकु अर्नोन इन नाला ताका अन द्याश कोट बुट्टीन, मतलब आ नाला अन बीच दा आंदुर्द सीमा ठहरूसदीन, अदिक यब्बोक गांगा ताका जो अम्मोनियागोळ्द सीमा आद; 17अदिक किन्नेरेत टु हुडुकु पिसगा अन ढलान इन ल्यालमा अन अराबा अन ताल ताका, जो खर्ट ताल भी कहलुसकु आगतद, अराबा अदिक यरदन इन पूर्व दिकळोद पुरा द्याश भी ना आंदरी का कोट बुट्टीन.

18“आ समय ना नीमी आग्या कोट्टीन, ‘नीम परमेश्वर यहोवा नीमी ईद द्याश कोटान कि अदरी तान अधिकार दा ईटी; नीव सप्पा योद्धा हथियारबन्द आगकु तान वार्ट इस्त्राएलीगोळ्द मुंद मुंद आप्पाटी नळी. 19लेकीन नीम आर्तेर, अदिक चिकोर चिणगेर अदिक जनावर, यवरी ना जान्सतीन कि हापाळ सा आव, अव सप्पा नीम नगरगोळ दा जो ना नीमी कोटीन ईतोगुल. 20अदिक याग यहोवा नीम वार्टुरी हांग विश्राम कोळुल ह्यांग कि आव नीमी कोटान, अदिक आंदुर आ द्याश इन अधिकारी आगेगुल जो नीम परमेश्वर यहोवा आंदरी यरदन इन आप्पाटी कोळतान; आग नीव भी तान तान अधिकार इन जमीन मा जो ना नीमी कोटीन वापस आदीर.’ 21बाक ना आटा होती यहोशू से चितुसकु अंदीन, ‘नी तान कण्णगोळ देल नोळ्या कि नीन परमेश्वर यहोवा ई येढ्ढु राजागोळ से येन येन माळ्यान; हांग अच यहोवा आ सप्पा राज्यगोळ से माळ्यान यऊर दा नी पार आगकु होद्या. 22आंदुर से अंज बाळेत; यतिकी जो नीम दी टु लळुसावाळा आन आव नीम परमेश्वर यहोवा हुन.’

मूसा, कनान दा प्रवेश देल वंचित

23“आटा होती ना यहोवा से गिळगिळास्कु विनती माळदीन, 24‘हे प्रभु यहोवा, नी तान दास उक तान महिमा अदिक शक्तिशाली कय तोर्सली हत्या; स्वर्ग दा अदिक धरती मा हींग याता द्‍याव आन जो नीन से क्याल्सा अदिक पराक्रम इन कर्म माळ सकुल? 25इदुरसाटी नानी आप्पाटी होगगोळ कि यरदन इन आप्पाटी इन आ उत्तम द्याश इक, मतलब आ उत्तम पहाळी अदिक लबानोन इक भी नोळ सकाईन.’ 26लेकीन यहोवा नीम कारण नान से मुंदोग्यान, अदिक नान केळीदील; लेकीन यहोवा नान से अंदुन, बस माळ; ई बारा दा बाक यागलु नान से मात माळबाळेत. 27पिसगा पहाळी इन स्यांडा मा येरेग, अदिक पूर्व, पश्चिम, उत्तर, दक्षिण नाकु दी कण्ण तिरगुस्कु आ द्याश इक नोळ कोम; यतिकी नी ई यरदन इन आप्पाटी होग सकतीदील. 28अदिक यहोशू उक आग्या कोळ, अदिक आऊक हिम्मत कोटकु मजबुत माळ; यतिकी ई लॉकुर मुंद मुंद आवा आप्पाटी होदान, अदिक जो द्याश नी नोळ्या अदरी अल्या आंदुर निजी भाग माळसुस कोट्या. 29आग नाव बेतपोर इन मुंद दिकळोद तराई दा ठहरूसकु ईत्तेव.