व्यवस्थाविवरण 2

आळी दा भटकुसोद

1“आग आ आग्या अन अनुसार, जो यहोवा नानी कोटीदुन, नाव तिर्गकु होदेव, अदिक क्याचाँद समुद्र अन हादी इन आळी दी होदेव; अदिक हापाळ दिन ताका सेईर पहाळी इन व्हार्या व्हार्या नळुतेला ईत्तेव. 2आग यहोवा नान से अंदुन, 3‘नीम लॉकुरी ई पहाळी इन‍ व्हार्या व्हार्या नळुतेला हापाळ दिन आगेदव, ईग तिर्गकु उत्तर दी नळी. 4अदिक नी अन लॉकुरी नान ईद आग्या केळ्स, कि नीव सेईर इन निवासी तान वार्ट एसाविया अन सीमा अन हात्ती टु आगतेला होदीर; अदिक आंदुर नीम से अंजेदार. इदुरसाटी नीव हापाळ सावधान ईरी. 5आंदरी छेळ्स बाळेतीर; यतिकी आंदुर द्याश दा टु ना नीमी काल ईटा लायक भी जागा कोळतीदील, ई कारण कि ना सेईर पहाळी एसाविया अन हक्क दा माळ बुटीन. 6नीव आंदुर से भोजन पैस्या देल कोंडकु तिन सक्कीर, अदिक पैस्या कोटकु भाय दा टु नीर तुमकु कुडु सक्कीर. 7यतिकी नीम परमेश्वर यहोवा नीम कय इन सप्‍पा क्याल्सा अन बारा दा नीमी आशीष कोळतेला बंदान; ई भारी आळी दा नीम नळोद वयाळोद आव अरूतान; ई च्यालीस साल दा नीम परमेश्वर यहोवा नीम सांगुळ सांगुळ ईतान; अदिक नीमी येनु कमी आगीदील.’ 8ईद नाव सेईर निवासी अदिक तान वार्ट एसाविया अन हात्ती टु आगतेला, अराबा अन हादी, अदिक एलत अदिक एस्योनगेबेर इक हींद बिटकु नळदेव.

“बाक नाव तिर्गकु मोआब इन आळी इन हादी देल आगतेला नळदेव. 9अदिक यहोवा नान से अंदुन, ‘मोआबीगोळी सतुस बाळेतीर अदिक ना लळाई छेळसेतीर, यतिकी ना आंदुर द्याश दा टु येनारा तुकळा भी नीन हक्क दा माळ कोळतीदील यतिकी ना आर नगर इक लूतियागोळ्द वंशजगोळ हक्क दा माळीन. 10हाळेव दिन दा अल एमी लॉकुर बसुसकु ईरोर, जो अनाकियागोळ घाई ताकतवर अदिक ऊद्द-ऊद्द अदिक गिनती दा हापाळ ईरोर; 11अदिक अनाकियागोळ घाई आंदुर भी रपाई हेसुर देल अरूकु आगोर, लेकीन मोआबी आंदरी एमी अनतोगोर. 12अदिक हाळेव दिन दा सेईर दा होरी लॉकुर बसुसकु ईरोर, लेकीन एसाव इन वंशगोळ आंदरी आ द्याश दा टु तेग्द बुट्टुर, अदिक तान मुंदु टु नष्ट माळकु आंदुर जागा मा खुद बसुसेदुर; ह्यांग कि इस्त्राएलीगोळ यहोवा अन कोळ्द तान हक्क इन द्याश दा माळदुर. 13यहोवा अंदुन ईग नीव येळी अदिक जेरेद गांगा अन आप्पाटी होगी.’ आग नाव जेरेद गांगा अन ईप्पाटी बंदेव. 14अदिक नाम कादेशबर्ने अक बिळोस से हुडुकु जेरेद गांगा अन आप्पाटी आगासताका ताका अळतीस साल बीतुसेदव, आ दरम्यान दा यहोवा अन किर्या अन अनुसार आ पीढ़ी इन सप्पा योद्धा छावनी दा टु नष्ट आगेदुर. 15अदिक यागास ताका आंदुर नष्ट आगीदील आगासताका ताका यहोवा अन कय आंदरी छावनी दा टु मिटुसोर साटी आंदुर खिलाप वाळुसतेला अच ईत्त.

16“रा सप्पा योद्धा लॉकुर न्याड्या टु सोतकु नष्ट आगेदुर, 17आग यहोवा नान से अंदुन, 18‘ईग मोआब इन सीमा, मतलब आर नगर इक पार माळी; 19अदिक याग नी अम्मोनियागोळ्द मुंद होगकु आंदुर हात्ती पोहचुस्या, आग आंदरी सतुसबाळेत अदिक छेळ्स बाळेत, यतिकी ना अम्मोनियागोळ्द द्याश दा टु येनारा भी नीन हक्क दा माळतीदील, यतिकी ना अदरी लूत उन वंशजगोळ्द हक्क दा माळ बुटीन. 20अद द्याश भी रपाईगोळ्द आळ्दकु आगतोगोद, यतिकी हाळा दिनगोळ दा रपाई, यारी अम्मोनी वश जमजुम्मी अनतोगोर, आंदुर अल ईरतोगोर; 21आंदुर भी अनाकिगोळ घाई ताकतवर अदिक ऊद्द अदिक गिनती दा हापाळ ईरोर; लेकीन यहोवा ईंदरी अम्मोनियागोळ्द मुंदु टु नष्ट माळ बुट्टुन, अदिक आंदुर आंदरी आ द्याश दा टु तेग्द बुट्टुर, अदिक आंदुर जागा मा खुद ईरली हतदुर; 22ह्यांग कि आव सेईर इन निवासी एसाव वंश इन मुंदु टु होरी लॉकुरी नष्ट माळदुन, अदिक आंदुर आंदरी आ द्याश दा टु तेग्द बुट्टुर, अदिक ईंद ताका आंदुर जागा मा आंदुर खुद निवास माळतार. 23हांग अच अव्वियागोळी, जो अज्जा नगर ताका ऊरगोळ दा बसुसकु ईरोर, आंदरी कप्तोरियागोळ जो कप्तोर टु होटीदुर नष्ट माळदुर, अदिक आंदुर जागा मा खुद ईरली हतदुर. 24ईग नीव लॉकुर येदकु कूच माळी, अदिक अर्नोन इन नाला अन आप्पाटी नळी: केळी, ना द्याश समेत हेशबोन इन राजा एमोरी सीहोन उक नीम कय दा माळ बुळतीन इदुरसाटी आ द्याश इक तान हक्क दा ताकोमोद सुरवात माळी, अदिक आ राजा से युद्ध छेळ्स बुळी. 25अदिक यास लॉकुर धरती मा ईरतार आ सप्पा मुंदुर मन दा ना ईंद इन दिनी टु नीन कारण अंज्क अदिक थरथराहट समुसली हताईन; आंदुर नीन बातणी केळकु नीन अंजक्या मारा देल नळग्यार अदिक दुखी आदार.’

राजा सीहोन उन पराजय

(गिनती 21:21-30)

26“इदुरसाटी ना कदेमोत हेसुर इन आळी टु हेशबोन इन राजा सीहोन उन हात्ती शांती इन ई मातगोळ अनली दूत कळुदीन: 27‘नानी तान द्याश दा टु आगतेला होगगोळ; ना राजपथ दा टु होटोगाईन अदिक डाक्या अदिक ऊजवा कय दी तिर्गतीदील. 28नी पैस्या ताकोमकु नान कय दा भोजनवस्तु कोळेत कि ना तिन सकाईन, अदिक नीर भी पैस्या ताकोमकु नानी कोळेत कि ना कुडु सकाईन; सिर्फ नानी काल-काल नळुत होगगोळ, 29ह्यांग सेईर इन निवासी एसावियागोळ अदिक आर नगर इन निवासी मोआबीयागोळ नान से बर्ताव माळदुर, हांग अच नी भी नान से माळ, ई रिति देल ना यरदन आप्पाटी आगकु आ द्याश दा पोहचुसाईन जो नाम परमेश्वर यहोवा नामी कोळतान.’ 30लेकीन हेशबोन इन राजा सीहोन नामी तान द्याश दा टु आगतेला नळुगोटीदील; यतिकी नीम परमेश्वर यहोवा आऊन चित्त कठोर अदिक आऊन मन जिद्दी माळ बुटीदुन, इदुरसाटी कि आऊक नीम कय दा माळ बुळुल, ह्यांग कि ईंद प्रगट आद. 31अदिक यहोवा नान से अंदुन, ‘केळ, ना द्याश समेत सीहोन राजा अक नीन वश दा माळदुर मा आईन; आ द्याश इक तान अधिकार दा ताकोमोद सुरवात माळ.’ 32आग सीहोन राजा तान सप्पा सेना समेत होटकु बंदुन, अदिक नाम सामना माळकु युद्ध माळली यहस ताका येर्त बंदुन. 33अदिक नाम परमेश्वर यहोवा आऊक नाम द्वारा हारूस बुट्टुन, अदिक नाव आऊक पारगोळ अदिक सप्पा सेना समेत कोंद बुट्टेव. 34अदिक आटा होती नाव आऊन सप्पा नगर ताकोम कोंडेव, अदिक ऊंद ऊंद बसुस्द नगर इक आर्तेर अदिक चिकोर चिणगेर समेत ईल ताका सत्यानाश माळेदव कि याऊ मिकीदील; 35लेकीन जनावरगोळी नाव तान माळ कोंडेव, अदिक आ नगरगोळ्द लूट भी नाव ताकोम कोंडेव यवरी नाव जितुस कोंडीदेव. 36अर्नोन नाला अन किनारा अन अरोएर नगर टु हुडुकु, अदिक आ नाला माकळोद नगर टु हुडुकु, गिलाद ताका यातोदु नगर हींग ऊचा ईतीदील जो नाम मुंद ठहरूस सकोद; यतिकी नाम परमेश्वर यहोवा सप्पा चीज इक नाम वश दा कोट्ट बुट्टुन. 37लेकीन नाव अम्मोनियागोळ्द द्याश इन हात्ती, उलटा यब्बोक गांगा अन आप्पाटी याट द्याश आद, अदिक पहाळी द्याश इन नगर यल होगदुर देल नाम परमेश्वर यहोवा नामी मना माळीदुन नाव अल होगीदील.