व्यवस्थाविवरण 1

होरेब पहाळी टु होगोद आग्या

1जो मातगोळ मूसा यरदन इन आप्पाटी आळी दा, मतलब सूप इन मुंदळोद अराबा दा अदिक पारान अदिक तोपेल इन न्याड्या, अदिक लाबान हसेरोत अदिक दीजाहाब दा, सप्पा इस्राएलीगोळ से अंदुन अव ईव हुव. 2होरेब टु कादेशबर्ने ताका सेईर पहाळी इन हादी हनुन दिन इन आद. 3च्यालीसवा साल इन ग्यारवा तिंगुळ इन पयला दिन इक जो येनारा यहोवा मूसा अक इस्राएलीगोळ से अनोद आग्या कोटीदुन, अदुर अनुसार मूसा आंदुर से मातगोळ अनली हतदुन. 4मतलब याग मूसा एमोरिया अन राजा हेशबोनवासी सीहोन अदिक बाशान उन राजा अशतारोतवासी ओग इक एद्रेई दा हारूस बुट्टुन, 5अदुर बाद्दा यरदन इन आप्पाटी मोआब द्याश दा अद व्यवस्था अन विवरण हिंग माळली कुरतुन, 6“नाम परमेश्‍वर यहोवा होरेब पहाळी इन हाती नाम से अंदीदुन, ‘नीम लॉकुरी ई पहाळी इन हात्ती ईरतेला हापाळ दिन आगेग्याव; 7ईदुरसाटी ईग ईल टु होगोर साटी तयारी माळी, अदिक एमोरिया अन पहाळी द्याश इक, अदिक येन अराबा दा, येन पहाळीगोळ दा, येन ल्यालमा अन द्याश दा, येन दक्खिन द्याश दा, येन समुद्र अन किनारा मा, यास लॉकुर एमोरिया अन हाती ईरतार आंदुर द्याश इक, मतलब लबानोन पहाळी ताका अदिक परात हेसुर इन महानद ताका ईरावाळेर कनानीगोळ्द द्याश इक भी होटोगी. 8केळी, ना आ द्याश इक नीम मुंद माळकोट बुळतीन; याता द्याश इन बारा दा यहोवा अब्राहम, इसहाक, अदिक याकूब, नीम आप्प दादागोळ से किर्या तीनकु अंदीदुन कि ना ईदरी नीमी अदिक नीम बाद्दा नीम वंश इक कोळाईन, अदरी ईग होगकु तान अधिकार दा माळ कोमी.’

मूसा द्वारा न्यायीगोळ्द नियुक्ति

(निर्गमन 18:13-27)

9“बाक अदा होती ना नीम से अंदीन, ‘ना नीम भार आबना नेगु सकालीन; 10यतिकी नीम परमेश्वर यहोवा नीमी ईल ताका वाळुस्यान कि नीव गिनती दा ईंद आकाश इन तारागोळ घाई आगेगीर. 11नीमव आप्प दादागोळोव परमेश्वर नीमी हजारगुणा मात्त यक्कुल वाळुसुल, अदिक तान वचन इन अनुसार नीमी आशीष भी कोळतेला ईरूल! 12लेकीन नीम परेश्यानी, अदिक भार, अदिक झगळागोळी ना आबना येल ताका सहन माळ सकतीन? 13ईदुरसाटी नीव तान-तान कुल दा टु बुद्धिमान अदिक समझदार अदिक अनुभवी मंळसा नीवळुसी, अदिक ना आंदरी नीमव स्याण्णा ठहरूसाईन.’ 14ईदुर उत्तर दा नीव नान से अंदीर, ‘जो येनारा नी नाम से अनत्या अदुर्द माळोद वळ्‍लीद आद.’ 15ईदुरसाटी ना नीम कुल अन मुख्य मंळसागोळी जो बुद्धिमान अदिक अनुभवी मंळसा ईरोर निवळुसकु नीम मा मुखिया नियुक्त माळदीन, मतलब हजार-हजार, सौ-सौ, पचास-पचास, अदिक हत्त-हत्त इन म्याकुच प्रधान अदिक नीम कुल अन सरदार भी नियुक्त माळदीन. 16अदिक आ समय ना नीम न्यायीगोळी आग्या कोट्टीन, ‘नीव तान वार्टुर्द मुकदमागोळी केळ तोगी, अदिक आंदुर बीच अदिक आंदुर आजु बाजु वाळेर्द अदिक परदेशीगोळ न्याड्या भी न्यायीपन देल न्याय माळतोगी. 17न्याय माळा होती यारदु पक्षपात माळबाळेतीर; ह्यांग धोड्डेर्द हांग अच श्याण मंळसा अन भी केळेतीर; यारदारा मार्रा नोळकु अंजबाळेतीर, यतिकी न्याय परमेश्वर उन क्याल्सा हुन; अदिक जो मुकदमा नीम साटी कठिन ईत्तीत, अद नान हाती तरेतीर, अदिक ना अदरी केळाईन.’ 18अदिक ना अदा होती नीम सप्पा क्याल्सा नीमी आग्या कोट्टीन.

भेदिगोळ्द कळुकु आगोद

(गिनती 13:1-33)

19“नाव होरेब पहाळी टु कूच माळकु तान परमेश्‍वर यहोवा अन आग्या अन अनुसार आ सप्पा धोळ्द अदिक भयानक आळी दा टु आगतेला नळदेव, यदरी नीव एमोरिया अन पहाळी द्याश इन हादी मा नोळदीर, अदिक नाव कादेशबर्ने ताका बंदेव. 20अल ना नीम से अंदीन, नीव एमोरिया अन पहाळी द्याश ताका होट बंदीर यदरी नाम परमेश्वर यहोवा नामी कोळतान. 21नोळी, आ द्याश इक नीम परमेश्वर यहोवा नीम मुंद माळकोट बुळतान, इदुरसाटी तान आप्प दादागोळ्द परमेश्वर यहोवा अन वचन इन अनुसार अदुर मा येरी, अदिक अदरी तान अधिकार दा ताकोम कोमी, ना रा नीव अंजी अदिक ना नीम मन कच्चा आगुल.” 22अदिक नीव सप्‍पा मुंदुर नान हाती बंदकु अनली हतदीर, नाव तान मुंद मंळसागोळी कळु कोंडेव, जो आ द्याश इन पता हचकु नामी ईद बातणी कोळुल, कि याता हादी टु आगकु नळोद बिद्दीत अदिक याता याता नगर दा प्रवेश माळोद बिद्दीत? 23ई मात नान नजर दा वळ्लीद हत्त कि ना नीम दा टु हन्नेळ मंळसा, मतलब हर कुल दा टु ऊंद मंळसा नीवळुस कोंडीन; 24अदिक आंदुर पहाळी मा येरेदुर, अदिक एशकोल हेसुर इन नाला अन हाती पोहचुस्कु आ द्याश इन भेद तांकोडुर. 25अदिक आ द्याश इन कायगोळ दा टु थ्वाळासा कय दा हुडुकु नाम हाती बंदुर, अदिक नामी ईद बातणी कोट्टुर, जो द्याश नाम परमेश्वर यहोवा नामी कोळतान अद वळ्लीद आद.

26तरी भी नीव अल होगोर से मना माळदीर, लेकीन तान परमेश्वर यहोवा अन आग्या अन विरूद्‍ध आगकु 27तान तान ड्यारा दा ईद अनकु बळबुळ्सली हतदुर, यहोवा नाम से दुश्मनी ईटतान, ई कारण नामी मिस्र द्याश टु तेगुकु तंदान, कि नामी एमोरिया अन वश दा माळकु नाम सत्यानाश माळ बुळुल. 28नाव यात्त होदेव? नाम वार्टुर ईद अंदकु नाम मन इक कमजोर माळ बुटार कि अलेर लॉकुर नाम से धोड्डेर अदिक ताकतवर आर, अदिक अलेव नगर धोड्ड धोड्डेव आव, अदिक अऊर्द शहरपनाह बादल से मात हेळतद; अदिक नाव अल अनाक वंशवाळेर इक भी नोळेव. 29ना नीम से अंदीन, आंदुर कारण अंजबाळी अदिक घबरूस बाळी. 30नीम परमेश्वर यहोवा जो नीम मुंद मुंद नळुतान आव खुद नीम दी टु लळुस्यान, ह्यांग कि आव मिस्र दा नीम देखत नीम साटी माळदुन; 31बाक नीव आळी दा भी नोळदीर कि याता रिति देल यावारा मंळसा तान पार उक नेगुकु नळुतान, अदा रिति देल नाम परमेश्वर यहोवा नामी ई जागा मा पोहचुसोर ताका, आ सप्पा हादी दा यदुर देल नाव बंदेव, नेगुकु ईटदुन. 32ई मात मा भी नीव तान आ परमेश्वर यहोवा मा विश्वास माळीदिल, 33जो नीम मुंद मुंद इदुरसाटी नळुतेला ईत्तुन कि ड्यारा हाक्कोद जागा नीम साटी ढुंढ्सुल, अदिक ईळ्लकी बेक्की दा अदिक हागुल इक बादल दा प्रगट आगकु नळदुन, ताकी नीमी आ हादी तोर्सुल यदुर देल नीव नळदीर.

इस्त्राएल इक दण्ड सिकोद

(गिनती 14:20-45)

34“लेकीन नीम अव मातगोळ केळकु यहोवा अन कोप भळकुसकु येळ्त, अदिक आव ईद किर्या तिंदुन, 35‘निश्चय ई बेकार पीढ़ी इन मंळसागोळ दा टु ऊंद भी आ वळ्लीद द्याश इक नोळ सकतीदील, यदरी ना आंदुर आप्प दादागोळी कोळोद किर्या तिंदीदिन. 36यपुन्ने अन पार कालेब अच अदरी नोळ सक्यान, अदिक याता जमीन मा आऊन काल बिदाव अदरी ना आऊक अदिक आऊन वंश इक भी कोळाईन; यतिकी आव पुरा रिति देल नान हींद आगेग्यान.’ 37अदिक नान मा भी यहोवा नीम कारण क्रोधित आदुन, अदिक ईद अंदुन, ‘नी भी अल होग सकतीदील; 38नून उन पार यहोशू जो नीन मुंद निदुरकु ईरतान, आव रा अल होग सक्यान; इदुरसाटी नी आऊक हिम्मत कोळ, यतिकी आ द्याश इक इस्राएलीगोळ्द हक्क दा आवा माळ बुट्टान. 39बाक नीम चिकोर-चिणगेर यार बारा दा नीव अंतीर कि ईंदुर लूट दा होटोदार, अदिक नीम जो चिकोर ईगल्या भला बुरा अन फरक अरालुर, आंदुर अल प्रवेश माळ्यार, अदिक आंदरी ना अद द्याश कोळाईन, अदिक आंदुर अदुर अधिकारी आदार. 40लेकीन नीव लॉकुर तिर्गकु कूच माळी अदिक क्याचाँद समुद्र अन हादी देल आळी दी होगी.’

41“आग नीव नान से अंदीर, ‘नाव यहोवा अन खिलाप पाप माळेव; ईग नाव तान परमेश्वर यहोवा अन आग्या अन अनुसार चढ़ाई माळेव अदिक लळुसेव.’ आग नीव तान तान औजार कटकु पहाळी मा बिना सोच विचार देल येरली तयार आगेदीर. 42आग यहोवा नान से अंदुन, ‘आंदुर से अंदकोम कि नीव येरबाळी, अदिक लळुसबाळी; यतिकी ना नीम बीच दा हैलेच; ईलारा हिंग आगबाळुल कि नीव तान दुश्मनगोळ से हारूसेदीर.’ 43ईद मात ना नीम से अंद बुट्टीन, लेकीन नीव मान्सीदील; लेकीन मुजोरी देल यहोवा अन आग्या अन उल्लंघन माळकु पहाळी मा येरेदीर. 44आग आ पहाळी नोर निवासी एमोरिगोळ नीम सामना माळली होटकु नॉण घाई नीम पीछा माळदुर, अदिक सेईर द्याश इन होर्मा ताका नीमी कोंत कोंत होट बंदुर. 45आग नीव वापस बंदकु यहोवा अन मुंद वर्लली हतदीर; लेकीन यहोवा नीम केळीदील, ना नीम मात मा ध्यान कोट्टुन. 46अदिक नीव कादेश दा हापाळ दिन ताका बिदकु ईत्तीर,