गिनती 36

सलोफाद उन पोरगोळ्द भाग

1बाक यूसुफीगोळ कुलगोळ दा टु गिलाद, जो माकीर उन पार अदिक मनश्शे अन्द नातु ईरोन, आऊन वंश इन कुल इन पितरगोळ्द घराना अन्द मुख्य गंळ्स मूसा अन्द हात्ती होगकु आ प्रधानगोळ मुंद, जो इस्राएलिगोळ्द पितरगोळ घराना अन्द मुख्य गंळ्सुर ईरोर, अनली कुरतुर, 2“यहोवा नाम प्रभु उक आग्या कोटीदुन, कि इस्राएलीगोळी चिट्टी हाक्कु द्याश वाट्स बुळेत; अदिक बाक यहोवा अन्द ईद भी आग्या नाम प्रभु उक सिक्त, कि नाम सग्गा सलोफाद उन भाग आऊन पोरगोळी कोळेतीर. 3पर अगर आंदुर इस्राएलिगोळ अदिक यातोदारा कुल अन्द गंळ्सुर से मदा माळुल, रा आंदुर भाग नाम पितरगोळ भाग देल बिळसेदीत, अदिक याता कुल दा आंदुर मदा आदीत अदा कुल अन्द भाग दा मिसळुसीत; आग नाम भाग गोर्त आगेदीत. 4अदिक याग इस्राएलिगोळ्द जुबली1 आदीत, आग या कुल दा आंदुर मदा आदीत आंदुर भाग दा आंदुर भाग पक्का रीती देल मिसळुसीत; अदिक अद नाम्द पितरगोळ्द कुल इन भाग से हमेशा अन्द साटी बिळसेदीत.” 5आग यहोवा से आग्या सिक्कु मूसा इस्राएलिगोळ से अंदुन, “यूसुफीगोळ कुल ठीक अनतार. 6सलोफाद उन पोरगोळ्द बारा दा यहोवा ईद आग्या कोट्टुन, कि जो मंळगार यार नजर दा वळ्लीद हतुल आक आऊन से मदा माळुल; लेकीन आंदुर तान मूल गंळ्सुर अच कुल अन्द कुल दा मदा माळुल. 7अदिक इस्राएलिगोळ्द यातोदारा कुल अन्द भाग दुसरा कुल अन्द भाग दा मिसळुस बाळुल; इस्राएली तान तान मूल गंळ्सुर कुल इन भाग मा बन्सकु ईरूल. 8अदिक इस्राएलिगोळ्द यातोदारा कुल दा यारदारा पोर आगुल जो भाग हासिल माळावळ्त ईरूल, आंदुर तान अच मूल गंळ्स उर कुल इन यातोदारा गंळ्स से मदा आगुल, ईदुरसाटी कि इस्राएली तान तान मूल गंळ्सुर भाग इन अधिकारी ईरूल. 9यातोदारा कुल अन्द भाग दुसरा कुल अन्द भाग दा मिसळुस बाळुल; इस्राएलिगोळ्द हर ऊंद कुल अन्द लॉकुर तान भाग मा बन्सकु ईरूल.” 10यहोवा अन्द आग्या अन्द अनुसार जो आव मूसा अक कोट्टुन सलोफाद उन पोरगोळ माळदुर. 11मतलब महला, तिर्सा, होग्ला, मिल्का, अदिक नोआ, जो सलोफाद उन पोरगोळ ईरोर, आंदुर तान काका अन पारगोळ से मदा माळदुर. 12यूसुफ उन पार मनश्शे अन्द वंश इन कुलगोळ दा आंदुर्द मदा माळकु आत, अदिक आंदुर भाग आंदुर मूल गंळ्स उन कुल अन अधिकार दा बन्सकु ईत्त.

13जो आग्यागोळ अदिक नियम यहोवा मोआब इन अराबा दा यरीहो अन्द हात्ती यरदन गांगा अन्द किनारा मा मूसा अन्द द्वारा इस्राएलीगोळी कोट्टुन अव ईवा हुव.