गिनती 35

लेवीगोळ्द नगर

1बाक यहोवा, मोआब इन अराबा दा, यरीहो अन्द हात्ती यरदन गांगा अन्द किनारा मा मूसा से अंदुन, 2“इस्राएलिगोळ इक आग्या कोळ, कि नीव तान तान खुद इन भाग इन जागा दा टु लेवीगोळी ईरोर साटी नगर कोळेतीर; अदिक नगरगोळ नाकु दिकळोद चराईगोळ भी आंदरी कोळेतीर. 3नगर रा आंदुर ईरोर साटी अदिक चराईगोळ आंदुर गोसी-वस्ता अदिक म्यांडा-मर्रगोळ, आंदुर सप्पा पशुगोळ साटी आदीत. 4अदिक नगरगोळ्द चराईगोळ, यवरी नीव लेवीगोळी कोट्टीर, अव ऊंद ऊंद नगर इक शहरपनाह टु व्हार्या नाकु दी ऊंद ऊंद हजार कय ताका ईरूल. 5अदिक नगर इन व्हार्या पूर्व, दक्षिण, पश्चिम, अदिक उत्तर दी, येढ्ढ येढ्ढ हजार1 कय ई रीति देल आळेतीर कि नगर बराबर न्याड्या ईरूल; लेवीगोळ्द ऊंद ऊंद नगर इन चराई ईटा भूमी इन ईरूल. 6अदिक जो नगर नीव लेवीगोळी कोट्टीर अऊर दा आर शरण नगर ईरूल, यारी नीव हत्यारा अक ओळोर साटी ठहरूसोद बिद्दीत, अदिक आंदुर से यक्कुल ब्यालीस नगर यक्कुल भी कोळेतीर. 7यास नगर नीव लेवीगोळी कोट्टीर अव सप्पा अळतालीस ईरूल, अदिक अऊर सांगुळ चराई इन भुमी कोळेतीर. 8अदिक जो नगर नीव इस्राएलिगोळ्द खुद इन जागा दा टु कोट्टीर, आंदुर यार यक्कुल नगर ईरूल आंदुर से यक्‍कुल, अदिक यार गोर्त नगर ईरूल आंदुर से गोर्त ताकोमकु कोळेतीर; सप्पा तान तान नगरगोळ दा टु लेवीगोळी तांद अच भाग इन अनुसार कोळुल.”

हत्यारा साटी शरण नगर

(व्यवस्थाविवरण 19:1-13; यहोशू 20:1-9)

9बाक यहोवा मूसा से अंदुन, 10“इस्राएलिगोळ से अन: याग नीव यरदन गांगा पार आगकु कनान द्याश दा पोहचुसीर, 11आग हिंग नगर ठहरूसेतीर जो नीम साटी शरण नगर आगुल, कि जो यावारा यारीकारा भूल देल कोंदकु खूनी ठहरूसुल आव अल ओळेगुल. 12अव नगर नीम्द निमित्त बदला ताकोमावाळेर से शरण ताकोमोद क्याल्सा दा बंदाव, कि यागासताका हत्यारा न्याय इन साटी मंडली इन मुंद न्याय आगाल्द आगासताका आव कोंदकु आग बाळुल. 13अदिक शरण इन जो नगर नीव कोट्टीर अव आर ईत्ताव. 14मुर नगर रा यरदन इन ईप्पाटी, अदिक मुर कनान द्याश दा कोळेतीर; शरण नगर ईसा ईरूल. 15ईव आरू नगर इस्राएलिगोळ अदिक आंदुर न्याड्या ईरावाळेर परदेशीगोळ साटी भी शरण स्थान ठहरूसुल, कि जो यावारा यारीकारा भूल देल कोंद बुळुल आव अल्या ओळेगुल.

16“लेकीन अगर यावारा यारीकारा ल्वाहा अन्द यातोदारा हथियार देल हिंग बडुल कि आव सोतोगुल, रा आव हत्यारा ठहरूस्यान; अदिक आ हत्यारा जरूर कोंदकु आगुल. 17अदिक अगर यावारा हिंग कल्ल कय दा हुडुकु, यदुर देल यावारा साय सकतान, यारीकारा बडुल, अदिक आव सोतोगुल, रा आव भी हत्यारा ठहरूस्यान; अदिक आव हत्यारा जरूर कोंदकु आगुल. 18या यावारा कय दा हिंग हुळ्ली हुडुकु, यदुर देल यावारा साय सकतान, यारीकारा बडुल, अदिक आव सोतोगुल, रा आव भी हत्यारा ठहरूस्यान; अदिक आव हत्यारा अक जरूर कोंदकु आगुल. 19हत्या अन बदला ताकोमावाळा खुद अच आ हत्यारा अक कोंद बुळुल; याग भी आव सिकुल आग अच आव आऊक कोंद बुळुल. 20अदिक अगर यावारा दुश्मनी देल ढकलुस बुळुल, या घात हचकु येनारा आऊन मा भिळुल कि आव सोतोगुल, 21या दुश्मनी देल आऊक तान कय देल हिंग बडुल कि आव सोतोगुल, रा जो बळदुन आव अवश्य कोंदकु आगुल; आव खूनी ठहरूस्यान; खूनी इन बदला ताकोमावाळा जब भी आ खूनी आऊक सिक्केगुल आग अच आऊक कोंद बुळुल.

22“लेकीन अगर यावारा यारीकारा बिना सोचकु, अदिक बिना दुश्मनी ईटकु ढकलुस बुळुल, या बिना घात हचकु आऊन मा येनारा भीळ बुळुल, 23या हिंग यातोदारा कल्ल हुळकु, अदुर देल यावारा साय सकतान, दुसरा अक बिना नोळकु आऊन मा भीळ बुळुल, अदिक आव सोतोगुल, लेकीन आव आऊन दुश्मन आगबाळुल, अदिक न आऊन हानि इन खोजी ईरूल; 24रा मंडली कोनावाळा अदिक हत्या अन बदला ताकोमावाळा अन्द न्याड्या ईव नियमगोळ्द अनुसार न्याय माळुल; 25अदिक मंडली आ हत्यारा अक हत्या अन बदला ताकोमावाळा अन्द कय देल वाचुसकु आ शरण नगर दा यल आव पयला ओळ्यान लौटुस बुळुल, अदिक यागासताका पवित्र याण्णा देल अभिषेक माळकु आग्यान महायाजक सायालुन आगासताका आव अल्या ईरूल. 26लेकीन अगर हत्यारा आ शरण नगर इन सीमा से अदुर दा टु आव ओळेग्यान व्हार्या होटकु अदिक येल्यारा होगुल, 27अदिक हत्या अन बदला ताकोमावाळा आऊक शरण नगर इन सीमा अन्द व्हार्या येल्यारा सिक्कु कोंद बुळुल, रा आव रकत वाहुसोद दोषी ठहरूसबाळुल. 28यतिकी हत्यारा अक महायाजक उक मृत्यु ताका शरण नगर दा ईर पायजे; अदिक महायाजक उन सोत्तुर पश्चात आव तान खुद इन भूमी इक वापस होग सक्यान.

29“नीम्द पीढ़ी पीढ़ी दा नीम्द सप्पा ईरोद जागागोळ दा न्याय इन ईद विधी आदीत. 30अदिक जो यावारा यातोदारा मंळसा अक कोंद बुळुल आव गवाहगोळ कहना मा कोंदकु आगुल, लेकीन ऊंद अच गवाही इन गवाही देल यारीकारा कोंदकु आगबाळुल. 31अदिक जो हत्यारा प्राण दंड इन योग्य ठहरूसुल आऊन से प्राण दंड इन बदला दा जुरमाना ताकोम बाळेतीर; आव जरूर कोंदकु आगुल. 32अदिक जो यावारा शरण नगर दा ओळ्यान आऊन साटी भी ई मतलब देल जुरमाना ताकोमबाळेतीर, कि आव याजक उन सायोद पयला बाक तान द्याश दा ईरली वापस होगुल. 33इदुरसाटी या द्याश दा नीव ईत्तीर अदरी अशुद्ध माळबाळेतीर; हत्या देल रा द्याश अशुद्ध आगेगतद, अदिक या द्याश दा याग हत्या माळकु आगुल आग सिर्फ हत्यारा अन रकत वाहुसदुर देला आ द्याश इन प्रायश्चित आग सकतद. 34या द्याश दा नीव निवास माळीर अदुर न्याड्या ना ईराईन, अदरी अशुद्ध माळबाळेतीर; ना यहोवा रा इस्राएलिगोळ न्याड्या दा ईरतीन.”