गिनती 34

कनान द्याश इन सीमागोळ

1बाक यहोवा मूसा से अंदुन, 2इस्राएलिगोळ इक ईद आग्या कोळ: जो द्याश नीम भाग आदीत अद रा नाकु दीकळोद सीमा ताका कनान द्याश हुन, ईदुरसाटी याग नीव कनान द्याश दा पोहचुसीर, 3आग नीम दक्षिणी प्रान्त सीन हेसुर इन आळी टु हुडुकु एदोम द्याश इन किनारा ताका आगतेला होगुल, अदिक नीम दक्षिणी सीमा ऊप्प इन ताल इन क्वाना मा सुरू आगकु पश्चिम दी होटोगुल; 4अल टु नीम्द सीमा अक्रब्बीम हेसुर इन चढ़ाई इन दक्षिण दी पोहचुस्कु डोकुल, अदिक सीन ताका बरूल, अदिक कादेशबर्ने अन दक्षिण दी होळुल, अदिक हसरद्दार ताका वाळुस्कु अस्मोन ताका पोहचुसुल; 5बाक अद सीमा अस्मोन टु तिर्गकु मिस्र अन्द नाला ताका पोहचुसुल, अदिक अदुर्द अन्त समुद्र अन्द किनारा ठहरूसुल.

6बाक पश्चिमी सीमा भुमध्य सागर आगुल; नीम्द पश्चिमी सीमा ईदा ठहरूसुल.

7नीम्द उत्तरी सीमा ईद आगुल, मतलब नीव भुमध्य सागर टु हुडुकु होर पर्वत ताका सीमा कटेतीर; 8अदिक होर पर्वत टु हमात इन घाटी ताका सीमा कटेतीर, अदिक अद सदाद मा होळुल; 9बाक अद सीमा जिप्रोन ताका पोहचुसुल, अदिक हसरेनान मा होळुल; नीम्द उत्तरी सीमा ईदा ठहरूसुल. 10“बाक तान पूर्वी सीमा हसरेनान टु शपाम ताका कटेतीर; 11अदिक अद सीमा शपाम टु रिबला ताका, जो ऐन इन पूर्व दी आद, ल्यालमा ईळुत-ईळुत किन्नेरेत हेसुर इन झील इन पूर्व टु हत्तेगुल; 12अदिक अद सीमा यरदन ताका ईळुकु ऊप्प इन ताल इन किनारा मा होळुल, नीम्द द्याश इन नाकु सीमागोळ ईवा ठहरूसुल.” 13आग मूसा इस्राएलिगोळ से मात्त अंदुन, “या द्याश इन नीव चिट्टी हाक्कु अधिकारी आदीर, अदिक यहोवा अदरी साढ़े ऊम्बत कुल अन लॉकुरी कोळोद आग्या कोट्टुन, अद ईदा हुन; 14लेकीन रूबेनिगोळी अदिक गादीगोळी रा तान पितरगोळ कुलगोळ अनुसार तान भाग सिक्‍केग्याद, अदिक मनश्शे अन्द आर्धा कुल अन्द लॉकुरी भी तान भाग सिक्‍केग्याद; 15मतलब आ ढाई कुलगोळ्द लॉकुरी यरीहो अन्द हात्ती यरदन गांगा अन्द आप्पाटी पूर्व दिशा दा, यल सुर्योदय आगतद, तान भाग सिक्‍केग्याद.”

जागा वाटसावाळेर प्रधान

16बाक यहोवा मूसा से अंदुन, 17“जो गंळ्सुर नीम अदिक नीम लॉकुर साटी द्याश इक वाट्स्यार आंदुर हेसुर ईव हुव: एलीआजर याजक अदिक नून उन पार यहोशू. 18अदिक द्याश इक वाटसोर साटी ऊंद कुल अन ऊंद प्रधान ठहरूसेतीर. 19अदिक ई गंळ्सुर कुल इन हेसुर ईव हुव: यहूदाकुली यपुन्ने अन्द पार कालेब, 20शिमोन कुल इन अम्मीहूद उन पार शमूएल, 21बिन्यामीन कुल इन किसलोन उन पार एलीदाद, 22दानीगोळ्द कुल अन्द प्रधान योग्ली इन पार बुक्‍की, 23यूसुफीगोळ दा टु मनश्शेईगोळ्द कुल अन्द प्रधान एपोद उन पार हन्नीएल, 24अदिक एप्रैमिगोळ्द कुल अन्द प्रधान शिप्तान उन पार कमूएल, 25जबूलूनिगोळ्द कुल इन प्रधान पर्नाक उन पार एलीसापान, 26इस्साकारिगोळ्द कुल इन प्रधान अज्जान उन पार पलतीएल, 27आशेरीगोळ्द कुल इन प्रधान शलोमी इन पार अहीहूद, 28अदिक नप्तालिगोळ्द कुल इन प्रधान अम्मीहूद उन पार पदहेल.” 29याता गंळ्सुरी यहोवा कनान द्याश इक इस्राएलिगोळ साटी वाटसोद आग्या कोट्टुन आंदुर ईंदुर अच उर.