गिनती 33

मिस्र टु मोआब ताका यात्रा

1यागी टु इस्राएली मूसा अदिक हारून उन अगुवाई दा दल माळकु मिस्र द्याश टु होट्टुर, आगी टु आंदुरव ई पळाव आदव. 2मूसा यहोवा से आग्या पाऊसकु आंदुरव कूच आंदुरव पळावगोळ अनुसार लिख्स कोंडुन, अदिक अव ईव हूँ. 3पयला तिंगुळ इन पंद्रावा दिन इन आंदुर रामसेस टु कूच माळदुर; फसह अन्द दुसरा दिशी इस्राएली सप्पा मिस्रीगोळी नोळतेला भेंट माळतेला होट बुट्टुर, 4जब कि मिस्री तान सप्पा पयला पारगोळ इक मुण्ण कोळोर आंदरी यहोवा कोंदीदुन; अदिक आव आंदुरव द्यावगोळ इक भी दंड कोटीदुन. 5इस्राएलिगोळ रामसेस टु होटकु सुक्कोत नगर दा ड्यारा हाकदुर. 6अदिक सुक्कोत टु होटकु एताम दा , जो आळी दी आद, ड्यारा हाकदुर. 7अदिक एताम टु होटकु आंदुर पीहाहीरोत इक डोक्केदुर, जो बालसपोन इन मुंद आद; अदिक मिगदोल इन मुंद ड्यारा नीदरूसदुर. 8आग आंदुर पीहहीरोत इन मुंद टु होगकु समुद्र अन्द न्याड्या आगकु आळी दा होदुर, अदिक एताम हेसुर इन आळी दा मुर दिन इन हादी नळुकु मारा दा ड्यारा हाकदुर. 9बाक मारा टु होटकु आंदुर एलाम इक होदुर, अदिक एलीम दा नीर इन हन्नेळ सोतागोळ अदिक सत्तर खजूर इक मार्र सिकदव, अदिक आंदुर अल ड्यारा नीदरूसदुर. 10आग आंदुर एलीम टु होटकु क्याचाँद समुद्र अन्द किनारा मा ड्यारा नीदरूसदुर. 11क्याचाँद समुद्र टु होटकु सीन हेसुर इन आळी दा ड्यारा नीदरूसदुर. 12बाक सीन हेसुर इन आळी टु होटकु आंदुर दोपका दा ड्यारा नीदरूसदुर. 13अदिक दोपका टु होटकु आलूश दा ड्यारा नीदरूसदुर. 14अदिक आलूश टु होटकु रपीदीम दा ड्यारा माळदुर, अदिक अल आ लॉकुर इक कुडुली नीर सिक्कीदील. 15बाक आंदुर रपीदीम टु होटकु सीनै अन्द आळी दा ड्यारा हाकदुर. 16अदिक सीनै अन्द आळी टु होटकु किब्रोथत्तावा दा ड्यारा हाकदुर. 17अदिक किब्रोथत्तावा टु होटकु हसेरोत दा ड्यारा हाकदुर. 18अदिक हसेरोत टु होटकु रिथमा दा ड्यारा हाकदुर. 19बाक आंदुर रिथमा टु होटकु रिम्मोनपेरेस दा ड्यारा नीदरूसदुर. 20अदिक रिम्मोनपेरेस टु होटकु लिब्ना दा ड्यारा नीदरूसदुर. 21अदिक लिब्ना टु होटकु रिस्सा दा ड्यारा नीदरूसदुर. 22अदिक रिस्सा टु होटकु कहेलाता दा ड्यारा हाकदुर. 23अदिक कहेलाता टु होटकु शेपेर पहाळी इन हात्ती ड्यारा हाकदुर. 24बाक आंदुर शेपेर पर्वत टु होटकु हरादा दा ड्यारा हाकदुर. 25अदिक हरादा टु होटकु मखेलोत दा ड्यारा हाकदुर. 26अदिक मखेलोत टु होटकु तहत दा ड्यारा नीदरूसदुर. 27अदिक तहत टु होटकु तेरह दा ड्यारा हाकदुर. 28अदिक तेरह टु होटकु मित्का दा ड्यारा हाकदुर. 29बाक मित्का टु होटकु आंदुर हशमोना दा ड्यारा हाकदुर. 30अदिक हशमोना टु होटकु मोसेरोत दा ड्यारा हाकदुर. 31अदिक मोसेरोत टु होटकु याकानिगोळ्द न्याड्या ड्यारा हाकदुर. 32अदिक याकानिगोळ्द न्याड्या टु होटकु होर्हग्गिदगाद दा ड्यारा हाकदुर. 33अदिक होर्हग्गिदगाद टु होटकु योतबाता दा ड्यारा हाकदुर. 34अदिक योतबाता टु होटकु अब्रोना दा ड्यारा हाकदुर. 35अदिक अब्रोना टु होटकु एस्योनगेबेर दा ड्यारा हाकदुर. 36अदिक एस्योनगेबेर टु होटकु आंदुर सीन हेसुर इन आळी इन कादेश दा ड्यारा हाकदुर. 37बाक कादेश टु होटकु होर पर्वत इन हात्ती, जो एदोम द्याश इन सीमा मा आद, ड्यारा हाकदुर. 38अल इस्राएलिगोळ्द मिस्र द्याश टु होळोद चालीसवा साल इन पाचवा तिंगुळ इन पयला दिशी हारून याजक यहोवा अन्द आग्या हासिल माळकु होर पहाळी मा येरदुन, अदिक अल सोतोदुन. 39अदिक याग हारून होर पर्वत मा सोतोदुन आग आव ऊंद सौ तेवीस साल इनव ईरोन. 40अदिक अराद इन कनानी राजा, जो कनान द्याश इन दक्षिण भाग दा ईरतोगोन, आऊक इस्राएलिगोळ्द बरोद समाचार सिक्त. 41आग इस्राएलिगोळ होर पहाळी टु होटकु सलमोना दा ड्यारा हाकदुर. 42अदिक सलमोना टु होटकु पूनोन दा ड्यारा हाकदुर. 43अदिक पूनोन टु होटकु ओबोत दा ड्यारा हाकदुर. 44अदिक ओबोत टु होटकु अबारीम हेसुर इन डीह दा जो मोआब इन सीमा मा आद, ड्यारा हाकदुर. 45आग आ डीहो टु होटकु आंदुर दीबोनगाद दा ड्यारा हाकदुर. 46अदिक दीबोनगाद टु होटकु अल्मोनदिबलातैम दा ड्यारा हाकदुर. 47अदिक अल्मोनदिबलातैम टु होटकु आंदुर अबारीम हेसुर इन पहाळगोळ दा नबो अन्द मुंद ड्यारा हाकदुर. 48बाक अबारीम पहाळगोळ टु होटकु मोआब इन अराबा दा, यरीहो अन्द हात्ती यरदन गांगा अन्द किनारा मा ड्यारा हाकदुर. 49अदिक आंदुर मोआबिन अराबा दा बेत्यशीमोत टु हुळकु आबेलशित्तीम ताका यरदन इन किनारा मा ड्यारा हाकदुर.

कनान मा आक्रमण इन आदेश

50बाक मोआब इन अराबा दा, यरीहो अन्द हात्ती इन यरदन गांगा अन्द किनारा मा, यहोवा मूसा से अंदुन, 51“इस्राएलिगोळ इक समझुसकु अन: याग नीव यरदन पार आगकु कनान द्याश दा पोहचुसीर, 52आग आ द्याश इन ईरावाळेरी आंदुर द्याश दा टु तेग्द बुळेतीर; अदिक आंदुर सप्पा नक्काशीदार कल्लगोळी अदिक घळुस्द मूर्तिगोळी नष्ट माळेतीर, अदिक आंदुर सप्पा पुजा अन्द ऊचा जागागोळी केळ्द बुळेतीर. 53अदिक आ द्याश इक तान अधिकार दा हुळकु अदुर्दा निवास माळेतीर, यतिकी ना अद द्याश नीमी का कोट्टीन कि नीव अदुर्द अधिकारी आगी. 54अदिक नीव आ द्याश इक चिट्टी हाक्कु तान कुलगोळ अनुसार वाटा हिस्सा माळेतीर; मतलब जो कुल यक्कुल आव आंदरी यक्कुल, अदिक जो थ्वाळासा आर आंदरी थ्वाळासा भाग कोळेतीर; याता कुल इन चिट्टी याता जागा अन्द साटी होट्टीत अदा अदुर्द भाग ठहरूसुल; तान पितरगोळ कुल अन्द अनुसार तान तान भाग ताकोमेतीर. 55लेकीन अगर नीव आ द्याश इन ईरावाळेरी तान मुंदु टु तेगुतिदील, रा आंदुर दा टु यारी नीव अदुर्दा ईर गोट्टीर आंदुर नीम कण्णगोळ दा कचरा घाई अदिक नीम कालगोळ दा मुळ्ल घाई ठहरूस्यार, अदिक आंदुर आ द्याश दा यल नीव बसुसीर नीमी संकट दा हाक्यार. 56अदिक आंदुर से ह्यांग व्यवहार माळोद मनसा ना माळीन हांग अच नीम से माळाईन.”