गिनती 32

यरदन इन पूर्व अन बसुस्द लॉकुर

(व्यवस्थाविवरण 3:12-22)

1रूबेनिगोळ अदिक गादीगोळ कुल इन हात्ती हापाळ सा जनावर ईरव. याग आंदुर याजेर अदिक गिलाद द्याश इक नोळकु विचार माळदुर, कि अद पशुगोळ योग्य द्याश आद, 2आग मूसा अदिक एलीआजर याजक अदिक मंडली इन प्रधानगोळ्द हात्ती होगकु अनली कुरतुर, 3“अतारोत, दीबोन, याजेर, निम्रा, हेशबोन, एलाले, सबाम, नबो, अदिक बोन नगरगोळ्द द्याश 4यदुर मा यहोवा इस्राएल इन मंडली इक विजयी माळसुसीदुन, अव जनावरगोळ्द लायक आव; अदिक नीन दासगोळ हात्ती जनावर आव.” 5बाक आंदुर अंदुर, “अगर नीन अनुग्रह नीन दासगोळ मा आद, रा ईद द्याश नीन दासगोळ इक सिक्‍कुल कि आंदुर्द खुद इन जागा आगुल; नामी यरदन आप्पाटी ओयबाळ.” 6मूसा गादीगोळ अदिक रूबेनिगोळ से अंदुन, “याग नीम वार्टुर युद्ध माळली होदार आग येन नीव ईल कुर्तकु ईत्तीर? 7अदिक इस्राएलिगोळ से भी आप्पाटी इन द्याश दा होगोद बारा दा, जो यहोवा आंदरी कोट्टान, नीव येती अस्वीकार माळतीर? 8याग ना नीम्द आप्प मुतीगोळ इक कादेशबर्ने टु कनान द्याश नोळोर साटी कळुदीन, आग आंदुर भी हिंग अच माळीदुर. 9मतलब याग आंदुर एशकोल हेसुर इन घाटी ताका पोहचुस्कु द्याश इक नोळदुर, आग इस्राएलिगोळ से आ द्याश दा जो यहोवा आंदरी कोटीदुन नीव आंदरी अल होगदुर देल येती निराश माळतीर. 10इदुरसाटी आ समय यहोवा कोप माळकु ईद किर्या तिंदुन, 11बिना संकोच देल जो मंळसा मिस्र टु होटकु बंदार आंदुर दा टु, याट मुंदुर ईप्पत वर्ष इन या अदुर से यक्कुल वर्ष इन आर, आंदुर आ द्याश इक नोळ सकतीदिल, यदुर्द कोळोद कसम ना अब्राहम, इसहाक, अदिक याकूब से तिंदीन, यतिकी आंदुर नान हिंद पुरा रीति देल आगीदील; 12लेकीन यपुन्ने कनजी इन पार कालेब, अदिक नून उन पार यहोशू, इंदुर येढ्ढु मुंदुर जो यहोवा अन हिंद पुरा रीति देल आगेग्यार इंदुर अदरी नोळ्यार.” 13अत: यहोवा अन्द कोप इस्राएलिगोळ मा भळकुस्त, अदिक याग ताका आ पीढ़ी इन सप्पा लॉकुर्द अंत आगीदील, जो यहोवा अन्द प्रति बुरा माळीदुर, आगासताका मतलब चालीस वर्ष ताका आव आंदरी आळी दा भटकुसतेला टेटाळ्त ईत्तुन. 14अदिक केळी, नीव लॉकुर आ पाप माळावाळेर चिकोर आगकु तान आप्प दादागोळ्द जागा दा प्रकट आगीर, कि इस्राएल इन खिलाप यहोवा अन्द भळकुस्द कोप इक मात्त भळकुसी! 15अगर नीव यहोवा अन हींद नळदुर देल भटकुसेदीर, रा आव बाक नाम सप्पा मुंदरी आळी दा बिट्ट बुट्टान, ई प्रकार नीव ई पुरा लॉकुर्द नाश माळेतीर. 16आग आंदुर मूसा अन्द मात्त हात्ती बंदकु अंदुर, “नाव तान जनावरगोळ साटी ईल्या क्वाटक्या माळेव, अदिक तान बाल-बच्यागोळ साटी ईल्या नगर माळेव, 17लेकीन खुद इस्राएलिगोळ मुंद मुंद हथियार बंद आगासताका नळदार, यागासताका आंदरी आंदुर्द जागा दा पोहचुस बुळालेव; लेकीन नाम बाल-बच्यागोळ ई द्याश इन ईरावाळेर अंजक्या देल गढ़वाळा नगरगोळ दा ईत्तार. 18लेकीन यागासताका इस्राएली तान तान भाग इन अधिकारी आगालुर आगासताका नाव तान मान्नी वापस होगालेव. 19नाव आंदुर सांगुळ यरदन इन आप्पाटी या अदुर मुंद तान भाग ताकोमतीदील, यतिकी नाम भाग यरदन इन ईप्पाटी का पूर्व दी सिक्याद.” 20आग मूसा आंदुर से अंदुन, “अगर नीव हिंग माळेतीर, मतलब अगर नीव यहोवा अन्द मुंद मुंद युद्ध माळोर साटी हथियार कटी, 21अदिक हर ऊंद हथियार-बंद यरदन इन आप्पाटी आगासताका नळुल, यागासताका यहोवा तान मुंद टु तान दुश्मनगोळ इक तेगालुन 22अदिक द्याश यहोवा अन्द वश दा ईला बरूल; रा आऊन हिंद नीव ईल वापस बंदीर, अदिक यहोवा अन्द अदिक इस्राएल इन बारा दा निर्दोष ठहरूसीर; अदिक ईद द्याश यहोवा अन्द प्रति नीम्द खुद इन जागा ठहरूसीत. 23अदिक अगर नीव हिंग माळतीदील, रा यहोवा अन्द विरूद्ध पापी ठहरूसीर; अदिक जान्स कोमी कि नीमी नीम पाप इन साटी दण्ड सिक्कीत. 24नीव तान बाल-बच्यागोळ साटी नगर कुरसी, अदिक तान म्यांडा-मर्रगोळ साटी क्वाटक्या बनुसी; अदिक जो नीम्द बाय देल होळ्त अदा माळी.” 25आग गादीगोळ अदिक रूबेनिगोळ मूसा से अंदुर, “तान प्रभु उन आग्या अन्द अनुसार नीन दासगोळ माळ्यार. 26नामव बाल-बच्यागोळ, आर्तेर, म्यांडा मर्रगोळ, सप्पा पशु रा ईल्या गिलाद इन नगरगोळ दा ईत्तार; 27लेकीन तान प्रभु उन अनोद अनुसार नीन दास सप्पा च्या सप्पा मुंदुर युद्ध इन साटी हथियार बंद यहोवा अन्द मुंद मुंद लळाई माळली आप्पाटी होदार.” 28आग मूसा आंदुर बारा दा एलीआजर याजक, अदिक नून उन पार यहोशू, अदिक इस्राएलिगोळ्द कुल अन्द पितरगोळ्द घरानागोळ्द मुख्य गंळ्सुरी ईद आग्या कोट्टुन, 29मूसा अंदुन, “अगर सप्पा गादी अदिक रूबेनी गंळ्स उर यहोवा अन्द आग्या देल युद्ध इन साटी हथियार-बंद नीम्द सांगुळ यरदन गांगा अन्द आप्पाटी होदार, अदिक द्याश नीम्द वश दा होट बरूल, रा गिलाद द्याश आंदुर्द खुद इन जागा आगली आंदरी कोळेतीर. 30लेकीन आंदुर नीम सांगुळ हथियार-बंद आप्पाटी ईला होगुल, रा आंदुर्द खुद इन जागा नीम्द न्याड्या कनान द्याश इन ठहरूसुल.” 31आग गादी अदिक रूबेनी अनली कुरतुर, “यहोवा जसा नीन दासगोळ से कहलुसदुन हांग अच नाव माळेव. 32नाव हथियार-बंद यहोवा अन्द मुंद मुंद आप्पाटी कनान द्याश दा होदेव, लेकीन नाम्द खुद इन जागा यरदन इन ईप्पाटी का ईत्तेव.” 33आग मूसा गादीगोळ अदिक रूबेनिगोळ इक, अदिक यूसुफ उन पार मनश्शे अन्द आर्धा कुलगोळ इक एमोरिगोळ राजा सीहोन अदिक बाशान इन राजा ओग, येढ्ढु मुंदुर्द राज्यगोळ द्याश, नगरगोळ, अदिक आंदुर्द आसपास इन जागा अन्द सांगुळ कोट बुट्टुन. 34आग गादीगोळ दीबोन, अतारोत, अरोएर, 35अत्रौत, शोपान, याजेर, योगबहा, 36बेतनिम्रा, अदिक बेथारान हेसुर इन नगरगोळ इक मजबूत माळदुन, अदिक अऊर दा म्यांडा-मर्रगोळ साटी क्वाटक्या माळदुर. 37अदिक रूबेनिगोळ हेशबोन, एलाले, अदिक किर्यातैम इक, 38बाक नबो अदिक बालमोन इन हेसुर बदलुसकु आंदरी, अदिक सिबमा अक मजबूत माळदुन; अदिक आंदुर तान मजबूत माळ्द नगरगोळ्द व्हासा व्हासा हेसुर ईटदुर. 39अदिक मनश्शे अन्द पार माकीर इन वंशवाळेर गिलाद द्याश दा होगकु अदरी कोम कोंडुर, अदिक जो एमोरी अदुर दा ईरतोगोर आंदरी तेगु बुट्टुर. 40आग मूसा मनश्शे अन पार माकीर उन वंश अक गिलाद कोट बुट्टुन, अदिक आंदुर अदुर दा ईरली कुरतुर. 41अदिक मनश्शेई याईर होगकु गिलाद इन यास बस्तीगोळ ताकोम कोंडुन, अदिक अऊर हेसुर हव्वोत्याईर ईटदुर. 42अदिक नोबह होगकु ऊरगोळ सांगुळ कनात इक ताकोम कोंडुन, अदिक अदुर हेसुर तान हेसुर मा नोबह ईटदुन.