गिनती 31

मिद्दानिगोळ से बदला ताकोमोद

1बाक यहोवा मूसा से अंदुन, 2“मिद्दानिगोळ से इस्राएलिगोळ्द बदला ताकोम; बाद्दा नी तान लॉकुर दा होगकु मिलुस्या.” 3आग मूसा लॉकुर से अंदुन, “तान दा टु गंळ्स उर इक युद्ध इन साटी हथियार धारण माळसुसी कि आंदुर मिद्दानीगोळ मा येरकु आंदुर से यहोवा अन्द बदला ताकोमुल. 4इस्राएल इन सप्पा कुलगोळ दा टु हर कुल अन्द ऊंद ऊंद हजार गंळ्स उर इक युद्ध माळोर साटी कळी.” 5आग इस्राएल इन सप्पा कुलगोळ दा टु हर ऊंद कुल इन ऊंद ऊंद हजार गंळ्सुर निवळुसकु आदुर, मतलब युद्ध इन साटी हथियार बन्ध हन्नेळ हजार गंळ्स उर. 6हर ऊंद कुल दा टु आ हजार-हजार गंळ्स उर इक, अदिक एलीआजर याजक उन पार पीनहास उक, मूसा युद्ध माळोर साटी कळुदुन, अदिक आऊन कय दा पवित्र जागा अन्द पात्र अदिक अव तुरहीगोळ ईरव जो श्वास कट कटकु ऊरूकु आगव. 7अदिक जो आग्या यहोवा मूसा अक कोटीदुन, अदुर अनुसार आंदुर मिद्दानीगोळ से युद्ध माळकु सप्पा गंळ्स उर घात माळदुर. 8अदिक दुसरा जूझागोळी बिटकु आंदुर एवी, रेकेम, सूर, हूर, अदिक रेबा हेसुर इन मिद्दानी इन अईद राजागोळ इक घात माळदुर; अदिक बोर उन पार बिलाम उक भी आंदुर तलवार देल घात माळदुर. 9अदिक इस्राएलिगोळ मिद्दानी आर्तेर बाल-बच्या सांगुळ बंदी माळ कोंडुर; अदिक आंदुरव गोसी-वस्ता, म्यांडा-मर्र, अदिक पुरा धन-दौलत इक लुट्‍स कोंडुर. 10अदिक आंदुर्द निवास इन सप्पा नगरगोळ, अदिक सप्पा छावनीगोळी ऊर्द कोंडुर; 11आग आंदुर, येन गंळ्स येन पशु, सप्पा बंदीगोळी अदिक पुरा लूट-पाट हुडुकु 12यरीहो अन्द हात्ती यरदन गांगा अन्द किनारा मा, मोआब इन अराबा दा, छावनी इन हात्ती, मूसा अदिक एलीआजर याजक अदिक इस्राएलिगोळ्द मंडली इन हात्ती बंदुर.

सेना अन्द वापसी

13आग मूसा अदिक एलीआजर याजक अदिक मंडली इन सप्पा प्रधान याजक छावनी इन व्हार्या आंदुर्द स्वागत माळली होट्टुर. 14अदिक मूसा सहसपति-शतपति पुरा मुंदुर सेनापतीगोळ से, जो युद्ध माळकु वापस बरतोगोर गुस्सा आगकु अनली कुरतुर, 15मूसा आंदुर से अंदुन, “येन नीव सप्पा आर्तेरी जीत्ता बिट बुटीर? 16नोळी, बिलाम इन सम्मति देल, पोर इन बारा दा इस्राएलिगोळ से यहोवा अन्द विश्वासघात ईंदुरा माळीदुर, अदिक यहोवा अन्द मंडली दा मरी फैलुसेत. 17इदुरसाटी ईग बाल-बच्यागोळ दा टु हर ऊंद पार उक, अदिक यास आर्तेर गंळ्स उन बाय नोळदुर आ सप्पा मुंदुर्द घात माळी. 18लेकीन यास पोरगोळ गंळ्स उन बाय नोळीदील आ सप्पा मुंदरी नीव तान साटी जीत्ता ईटी. 19अदिक नीव लॉकुर येळ दिन ताका छावनी टु व्हार्या ईरी, अदिक नीम दा टु यास मुंदुर प्राणीगोळ्द घात माळदुर, अदिक यास मुंदुर यातोदारा सोतकु मंळसा अक मुट्टीर, आंदुर सप्पा तान तान बन्दीगोळ सांगुळ तीसरा अदिक सातवा दिनगोळ दा तान तान इक शुद्ध माळुल. 20अदिक सप्पा फळक्यागोळी अदिक तोगुल इन माळ्द सप्पा वस्तुगोळ इक, अदिक मर्र इन चुट्टीगोळ्द अदिक हुळ्ली इन माळ्द वस्तुगोळ इक पावन माळ कोमी.” 21आग एलीआजर याजक सेना अन्द आ गंळ्स उर से जो युद्ध माळली होगीदुर अंदुन, “व्यवस्था अन्द या विधी इन आग्या यहोवा मूसा अक कोटीदुन अद ईद हुन: 22व्हान्ना, बेळ्ली, पीतल, लोहा, टीन, अदिक सीसा, 23जो येनारा बेक्‍की दा ठहरूस सकुल अदरी बेक्‍की दा हाक्की, आग अद शुद्ध ठहरूसीत; तौभी अद अशुद्धता देल बिळसावाळा नीर इन द्वारा पावन माळकु आदीत; लेकीन जो येनारा बेक्‍की दा ठहरूस सकतीदिल अदरी नीर दा मुळकुळसी. 24अदिक सातवा दिशी फळक्यागोळी ओगेतीर, आग नीव शुद्ध ठहरूसीर; अदिक आग छावनी दा बरेतीर.”

लूट इन बटवारा

25बाक यहोवा मूसा से अंदुन, 26“एलीआजर याजक अदिक मंडली इन पितरगोळ्द घराना अन्द मुख्य मुख्य गंळ्स उर इक सांगुळ हुळकु नी लूट इन मंळसागोळ अदिक पशुगोळ्द गिनती माळ; 27आग अवरी आर्धा-आर्धा माळकु ऊंद भाग आ सिपाहीगोळी जो युद्ध माळली होगीदुर, अदिक दुसरा भाग मंडली इक कोळ. 28बाक जो सिपाही युद्ध माळली होगीदुर, आंदुर्द आर्धा दा टु यहोवा अन्द साटी, येन मंळसा, येन गोसी-वस्ता, येन गदहा, येन म्यांडा-मर्रगोळ, 29अईद सौ इन हिंद ऊंद इक कर मान्सकु ताकोम कोम; अदिक यहोवा अन्द भेंट माळकु एलीआजर याजक उक कोटबुळ. 30बाक इस्राएलिगोळ्द आर्धा दा टु, येन मंळसा, येन गोसी-वस्ता, येन गदहा, येन म्यांडा-मर्रगोळ, येन यातोदारा प्रकार इन पशु ईरूल, पचास हिंद ऊंद हुळकु यहोवा अन्द निवास इन रखवाली माळावाळेर लेवीगोळ इक कोळ.” 31यहोवा अन्द ई आग्या अन्द अनुसार जो आव मूसा अक कोटीदुन, मूसा अदिक एलीआजर याजक माळदुर.

32जो वस्तुगोळ सेना अन्द गंळ्स उर तान तान साटी लुट्सीदुर आंदुर से यक्‍कुल इन लुट ईद ईरोद; मतलब आर लाख पचहत्तर हजार म्यांडा-मर्रगोळ, 33बहात्तर हजार गोसी-वस्ता, 34इकसठ हजार गदागोळ, 35अदिक मंळसागोळ दा टु या आर्तेर गंळ्स उन बाय नोळीदील आंदुर सप्पा बत्‍तीस हजार ईरोर. 36अदिक इदुर्द आर्धा, मतलब आंदुर्द भाग जो युद्ध माळली होगीदुर, अऊर दा म्यांडा-मर्रगोळ मुर लाख साढ़े सैतीस हजार, 37अदुर दा टु पावने येळ सव म्यांडा-मर्रगोळ यहोवा अन कर ठहरूसदव. 38अदिक गोसी-वस्ता छत्तीस हजार, अऊर दा टु बहात्तर यहोवा अन्द कर ठहरूसदुर. 39अदिक गदागोळ तीस हजार अईद सव, अऊर दा टु इकसठ यहोवा अन्द कर ठहरूसदुर. 40अदिक मंळसा सोलह हजार यऊर दा टु बत्‍तीस प्राणी यहोवा अन्द कर ठहरूसदुर. 41ई कर इक जो यहोवा अन्द भेंट ईरव मूसा यहोवा अन्द आग्या अन्द अनुसार एलीआजर याजक उक कोट्टुन.

42इस्राएलीगोळ्द मंडली इन आर्धा भाग यदरी मूसा सैनिकगोळ भाग दा टु अलग माळीदुन : 43मुर लाख सैंतीस हजार अईद सव म्यांडा-मर्रगोळ, 44छत्तीस हजार गोसी-वस्ता, 45तीस हजार अईद सव गदागोळ, 46अदिक सोलह हजार मंळसागोळ आदुर. 47ई आर्धा दा टु, यारी मूसा युद्ध माळावाळेर गंळ्सुर हात्ती टु अलग माळीदुन, यहोवा अन्द आग्या अन्द अनुसार मूसा, येन मंळसा येन पशु, हर पचास इन हींद ऊंद हुडुकु यहोवा अन्द निवास इन रखवाली माळावाळेर लेवीगोळी कोट्टुन.

48आग सहसपति, शतपति आदि, जो सरदार सेना अन्द हजारो अन्द म्याकुच नियुक्त ईरोर, आंदुर मूसा अन्द हात्ती बंदुर, 49अदिक अनली हतदुर, हे मूसा जो सिपाही नाम्द अधीन ईरोर आंदुर्द नीन दासगोळ गिनती ताकोंडुर, अदिक आंदुर दा टु ऊंद भी घटुसीदील. 50ईदुरसाटी पयरपट्या, कळा, मुंदीगोळ, बालीगोळ, बाजूबन्द, व्हान्ना अन्द जो गयनागोळ, यारी सिक्याद, अवरी नाव यहोवा अन्द मुंद तान जीव इन निमित्त प्रायश्चित माळली यहोवा अन्द भेंट माळकु तंदेव. 51आग मूसा अदिक एलीआजर याजक आंदुर से अव सप्पा व्हान्ना अन्द नक्काशीदार गयनागोळ ताकोम कोंडुर. 52अदिक सहसपतिगोळ अदिक शतपतिगोळ जो भेंट इन व्हान्ना यहोवा अक भेंट माळकु कोट्टुर अद सप्पा अन्द सप्पा सॉळा हजार येळ सव पचास शेकेल1 ईरोद. 53योध्दागोळ रा तान तान साटी लुट्‍स कोंडीदुर. 54ईद व्हान्ना मूसा अदिक एलीआजर याजक सहसपतिगोळ अदिक शतपतिगोळ टु ताकोमकु भेंट माळोद तम्बू दा पोहचुसदुर कि इस्राएलिगोळ साटी यहोवा अन्द मुंद याद तोरसोद वस्तु ठहरूसुल.