गिनती 30

मन्नत मानसोद विधी

1बाक मूसा इस्राएली कुल इन मुख्य मुख्य गंळ्सुर से अंदुन, “यहोवा ईद आग्या कोट्टान: 2याग यावारा गंळ्स यहोवा अन्द मन्नत मानसुल, या खुद इक वाचा देल कटोर साटी किर्या तिनुल, रा आव तान वचन टाल्स बाळुल; जो येनारा आऊन बाय देल होळुल अदुर अनुसार आव माळुल. 3अदिक याग याकारा आर्त तान कुवारा अवस्था दा, तान आप्प उन मान्या ईरतेला, यहोवा अन्द मन्नत मानसुल, या तान इक वाचा दा कटुल, 4रा अगर आकिन आप्प आकिन मन्नत या आकीन अद वचन केळकु, यदुर देल आक खुद इक कट्यार, आकीक येनु अन बाळुल; आग रा आकिन सप्पा मन्नतगोळ स्थिर बन्सकु ईरूल, अदिक यातोदारा बंधन येती ईरबाळुल, यदुर देल आक खुद इक कटकु ईटुल, आक भी स्थिर ईरूल. 5लेकीन अगर आकिन आप्प आकिन केळकु अदा दिशी आकीक मना माळुल, रा आकिन मन्नतगोळ या दुसरा प्रकार ईनव बंधन, यार देल आक तान तान इक कटकु ईट्यार, अऊर दा टु ऊंद भी स्थिर ईरबाळुल, अदिक यहोवा ईद जान्सकु कि आ आर्त इन आप्प आकीक मना माळ्यान, आकीन ईद पाप माफ माळ्यान. 6बाक अगर आक गांड्ड उन अधीन ईरूल अदिक मन्नत मानसुल, या बिना सोच विचार माळकु हिंग येनारा अनुल अदुर देल आक बंधन दा बिळुल, 7अदिक अगर आकिन गांड्ड केळकु आ दिशी आकिन से येनु ईला अनुल; आग रा आकिन मन्नतगोळ स्थिर ईरूल, अदिक या बंधनगोळ देल आक तान तान इक कट्यार अव भी स्थिर ईरूल. 8लेकीन अगर आकिन गांड्ड केळकु अदा दिशी आकी मना माळबुळुल, रा जो मन्नत आक मानस्यार, अदिक जो मात बिना सोच विचार माळकु अंदुर देल आक तान तान इक वाचा देल कट्यार, अद मुरदीत; अदिक यहोवा आ आर्त इन पाप माफ माळ्यान. 9बाक रांड्यागीत या छोळचिट्टी माळकु आत आ आर्त इन मन्नत, या यातोदारा प्रकार इन वाचा अन्द बंधन येती ईरबाळुल, अदुर देल आक तान तान इक कट्यार, रा आक स्थिर अच ईरूल. 10बाक अगर याकारा आर्त तान गांड्ड उन मान्या ईरतेला मन्नत मानसुल, या कसम तिनुल, या किर्या तिनकु तान तान इक कटुल, 11अदिक आकिन गांड्ड केळकु येनु ईला अनुल, अदिक न आकी मना माळुल; आग रा आकिन सप्पा मन्नतगोळ स्थिर बन्सकु ईरूल, अदिक हर ऊंद बंधन येती ईरबाळुल, अदुर देल आक तान तान इक कट्यार, अद स्थिर ईरूल. 12लेकीन अगर आकिन गांड्ड आकिन मन्नत केळकु अदा दिशी पुरा रीती देल मुरूल, रा आकिन मन्नतगोळ आदि जो येनारा आकिन बाय देल तान बंधन इन बारा दा होटिदाद, अदुर दा टु ऊंद मात भी स्थिर ईला ईरूल; आकिन गांड्ड सप्पा मुरू बुट्टान; इदुरसाटी यहोवा आ आर्त इन अद पाप माफ माळ्यान. 13यातोदारा भी मन्नत या किर्या येती ईरबाळुल, अदुर देल आ आर्त तान जीव इक दुख कोळोद वाचा कट्यार, अदरी आकिन गांड्ड चाहे रा पुरा माळुल, अदिक चाहे रा मुरूल; 14मतलब अगर आकिन गांड्ड रोज-रोज आकिन से येनु भी ईला अनुल, रा आव आकिन सप्पा मन्नतगोळ बंधनगोळ इक यदुर देल आक कटकु ईरूल पुरा माळ बुळतान; आव अवरी पुरा माळ बुटान, यतिकी केळोद दिशी आव येनु अंदीदिल. 15अदिक अगर आव अवरी केळकु हिंद मुरूबुळुल, रा तान आर्त इन अधर्म इन भार अल्या नेगदान.” 16गांड्ड-हिंग्स उन न्याड्या, अदिक आप्प अदिक आऊन मान्या ईरतेला कुवारा पोर इन न्याड्या, या विधीगोळ्द आग्या यहोवा मूसा अक कोटीदुन अव ईवा हूँ.