गिनती 29

व्हाशोद साल इन हाब्‍बा अन्द बलिदान

(लैव्यव्यवस्था 23:23-25)

1बाक सातवा तिंगुळ इन पयला दिन इक नीम्द पवित्र सभा ईरूल; अदुर्दा मेहनत इन यातोदारा क्याल्सा माळबाळेतीर. अद नीम्द साटी जयजयकार इन नरसिंगा ऊरोद दिन ठहरूस्याद; 2नीव होमबली येर्सेतीर, यदुर देल यहोवा अन्द साटी सुखदायक सुंगध आगुल; मतलब ऊंद पाड्डा, ऊंद म्यांडा, अदिक ऊंद साल इन येळ निर्दोष भेड़ अन्द नर पाड्डा; 3अदिक अऊर अन्नभेट याण्णा हचकु मैदा अन्द ईरूल; मतलब पाड्डा अन्द सांगुळ एपा अन्द मुर हतवा अंश, अदिक म्यांडा अन्द सांगुळ एपा अन्द येढ्ढ हतवा अंश मैदा, 4अदिक येळु म्यांडा अन्द पाड्डा दा टु ऊंद पाड्डा अन्द हिंद एपा अन्द हतवा अंश मैदा येर्सेतीर. 5अदिक ऊंद व्हात भी पापबलि माळकु येर्सेतीर, यदुर देल नीम साटी पाप झाक्सकु आगुल. 6ई सप्पा दा टु यक्‍कुल व्हाशोद चंद्र अन होमबलि अदिक अदुर्द अन्नभेट, अदिक हमेशा अन्द होमबलि अदिक अदुर्द अन्नभेट, अदिक आ सप्पा अन्द पेयबली भी आंदुर्द नियम इन अनुसार सुखदायक सुंगध कोळोर साटी यहोवा अन्द होमबली माळकु येर्सेत.

पाप झाकसोद दिन इन बलिदान

(लैव्यव्यवस्था 23:26-32)

7बाक अदा सातवा तिंगुळ इन हतवा दिशी इक नीम्द पवित्र सभा आगुल; नीव तान तान प्राण इक दुख कोळेतीर, अदिक यातोदारा प्रकार इन क्याल्सा धंदा माळबाळेतीर, 8अदिक यहोवा अन्द साटी सुखदायक सुंगध कोळली होमबली, मतलब ऊंद पाड्डा, ऊंद म्यांडा, अदिक ऊंद ऊंद वर्ष इन येळ म्यांडा अन्द नर पाड्डा येर्सेतीर; बाक ईव सप्पा निर्दोष ईरूल; 9अदिक आंदुर्द अन्नबली याण्णा हतकु मैदा अन्द ईरूल; मतलब पाड्डा अन्द सांगुळ एपा अन्द मुर हतवा अंश, अदिक म्यांडा अन्द सांगुळ एपा अन्द येढ्ढ हतवा अंश, 10अदिक येळु म्यांडा अन्द पाड्डा दा टु ऊंद ऊंद पाड्डा अन्द हिंद एपा अन्द हतवा अंश मैदा येर्सेत. 11अदिक पापबलि इन साटी ऊंद व्हात भी येर्सेत; ईव सप्पा पाप झाकसोद पापबलि अदिक हमेशा होमबलि अदिक अदुर्द अन्नभेट इन, अदिक आ सप्पा मुंदुर्द पेयबलीगोळ अलावा येर्सकु आगुल.

झोपळीगोळ्द हाब्‍ब अन्द बलिदान

(लैव्यव्यवस्था 23:33-44)

12“बाक सातवा तिंगुळ इन पंद्रावा दिशी नीम पवित्र सभा आगुल; अदिक अदुर दा मेहनत इन यातोदु क्याल्सा माळबाळेतीर, अदिक येळ दिन ताका यहोवा अन्द साटी हाब्‍ब मानसेतीर; 13नीव यहोवा अक सुखदायक सुगन्ध कोळोर साटी होमबली माळकु येर्सेतीर; मतलब तेरह पाड्डागोळ, अदिक येढ्ढ म्यांडागोळ, अदिक ऊंद वर्ष ईनव चौदह भेड़ इन नर पाड्डा; ईव सप्पा निर्दोष ईरूल; 14अदिक अऊर अन्नभेट याण्णा देल हचकु मैदा अन्द घाई ईरूल; मतलब तेरहा पाड्डागोळ दा टु ऊंद पाड्डा अन्द हींंद एपा अन्द मुर हतवा अंश, अदिक येढ्ढु म्यांडागोळ दा टु ऊंद ऊंद पाड्डा अन्द हिंद एपा अन्द मुर हतवा अंश, 15अदिक चौदहा म्यांडा अन्द पाड्डागोळ दा टु ऊंद पाड्डा अन्द हिंद एपा अन्द हतवा अंश मैदा येर्सेतीर. 16अदिक पापबलि इन साटी ऊंद व्हात भी येर्सेतीर; ई हमेशा अन्द होमबलि अदिक अदुर्द अन्नभेट अदिक पेयबली इन अलावा येर्सकु आगुल. 17बाक दुसरा दिशी हन्नेळ पाड्डा, अदिक येढ्ढ म्यांडा, अदिक ऊंद वर्ष इन चौदा निर्दोष भेड़ इन नर पाड्डा येर्सेतीर; 18अदिक पाड्डागोळ अदिक म्यांडागोळ, अदिक म्यांडा अन्द पाड्डागोळ सांगुळ अऊर अन्नभेट अदिक पेयबली, अऊर गिनती इन अनुसार, अदिक नियम इन अनुसार येर्सेतीर. 19अदिक पापबलि इन साटी ऊंद व्हात भी येर्सेतीर; ईद हमेशा होमबलि अदिक अदुर्द अन्नभेट अदिक पेयबली इन अलावा येर्सकु आगुल. 20बाक तिसरा दिशी हनुन पाड्डगोळ, अदिक येढ्ढ म्यांडागोळ, अदिक ऊंद वर्ष ईनव चौदह निर्दोष भेड़ इन नर पाड्डा येर्सेतीर; 21अदिक पाड्डागोळ अदिक म्यांडागोळ, अदिक भेड़ अन्द पाड्डागोळ सांगुळ अऊर अन्नभेट अदिक पेयबली, अऊर गिनती इन अनुसार, अदिक नियम इन अनुसार येर्सेतीर. 22अदिक पापबलि इन साटी ऊंद व्हात भी येर्सेतीर; ईद हमेशा होमबलि अदिक अदुर अन्नभेट अदिक पेयबली इन अलावा येर्सकु आगुल. 23बाक चौथा दिशी हत्त पाड्डागोळ, अदिक येढ्ढ म्यांडागोळ, अदिक ऊंद ऊंद वर्ष ईनव चौदह निर्दोष म्यांडा अन्द नर पाड्डा येर्सेतीर; 24पाड्डागोळ अदिक म्यांडागोळ, अदिक भेड़ अन्द पाड्डागोळ सांगुळ अऊर अन्नभेट अदिक पेयबली, अऊर गिनती इन अनुसार, अदिक नियम इन अनुसार येर्सेतीर. 25अदिक पापबलि इन साटी ऊंद व्हात भी येर्सेतीर; ईद हमेशा अन्द होमबलि अदिक अदुर्द अन्नभेट अदिक पेयबली इन अलावा येर्सकु आगुल. 26बाक पाचवा दिशी ऊंम्बत पाड्डागोळ, येढ्ढ म्यांडागोळ, अदिक ऊंद वर्ष ईनव चौदह निर्दोष भेड़ अन्द नर पाड्डा येर्सेतीर; 27अदिक पाड्डागोळ, म्यांडागोळ, अदिक भेड़ अन्द पाड्डागोळ सांगुळ अऊर अन्नभेट अदिक पेयबली, अऊर गिनती इन अनुसार, अदिक नियम इन अनुसार येर्सेतीर. 28अदिक पापबलि इन साटी ऊंद व्हात भी येर्सेतीर; ईद हमेशा अन्द होमबलि अदिक अदुर्द अन्नभेट अदिक पेयबली इन अलावा येर्सकु आगुल. 29बाक छठवा दिशी येठ्ठ पाड्डागोळ, अदिक येढ्ढ म्यांडागोळ, अदिक ऊंद वर्ष ईनव चौदह निर्दोष भेड़ अन्द नर पाड्डा येर्सेतीर;” 30अदिक पाड्डागोळ, अदिक म्यांडागोळ, अदिक भेड़ अन्द पाड्डागोळ सांगुळ अऊर अन्नभेट अदिक पेयबली, अऊर गिनती इन अनुसार, अदिक नियम इन अनुसार येर्सेतीर. 31अदिक पापबलि इन साटी ऊंद व्हात भी येर्सेतीर; ईद हमेशा अन्द होमबलि अदिक अदुर अन्नभेट अदिक पेयबली इन अलावा येर्सकु आगुल. 32बाक सातवा दिशी येळ पाड्डगोळ, अदिक येढ्ढ म्यांडागोळ, अदिक ऊंद वर्ष ईनव चौदह निर्दोष भेड़ अन्द नर पाड्डा येर्सेतीर; 33अदिक पाड्डागोळ, अदिक म्यांडागोळ अदिक भेड़ अन्द पाड्डागोळ सांगुळ अऊर अन्नभेट अदिक पेयबली, अऊर गिनती इन अनुसार, अदिक नियम इन अनुसार येर्सेतीर. 34अदिक पापबलि इन साटी ऊंद व्हात भी येर्सेतीर; ईद हमेशा अन्द होमबलि अदिक अदुर्द अन्नभेट अदिक पेयबली इन अलावा येर्सकु आगुल. 35बाक येट्टवा दिशी नीम्द ऊंद महासभा आगुल; अदुर्दा मेहनत इन यातोदु क्याल्सा माळबाळेतीर, 36अदिक अदुर्दा होमबलि यहोवा अक सुखदायक सुंगध कोळोर साटी होमबली माळकु येर्सेतीर; अद ऊंद पाड्डा, अदिक ऊंद म्यांडा, अदिक ऊंद ऊंद वर्ष इन येळ निर्दोष भेड़ अन्द नर पाड्डागोळ्‍द ईरूल; 37पाड्डागोळ अदिक म्यांडागोळ, अदिक भेड़ अन्द पाड्डागोळ सांगुळ अऊर अन्नभेट अदिक पेयबली, अऊर गिनती इन अनुसार, अदिक नियम इन अनुसार येर्सेतीर. 38अदिक पापबलि इन साटी ऊंद व्हात भी येर्सेतीर; ईद हमेशा अन्द होमबलि अदिक अदुर्द अन्नभेट अदिक पेयबली इन अलावा येर्सकु आगुल. 39“तान मन्नतगोळ अदिक खुद इन इच्छा अन्द बलिगोळ्द अलावा, तान तान नियत समयगोळ दा, ईव अच होमबलि, अन्नभेट, पेयबली, अदिक मेलबलि, यहोवा अन्द साटी येर्सेतीर.” 40ईव सप्पा आग्या यहोवा मूसा अक कोटीदुन, जो आव इस्राएलिगोळ इक केळ्सदुन.