गिनती 28

नियमीत समय इन बलिदान

(निर्गमन 29:38-46)

1बाक यहोवा मूसा से अंदुन, 2इस्राएलिगोळ ईद आग्या केळदुर, नान चढ़ावा, मतलब नानी सुखदायक सुगन्ध कोळावाळा नान हव्यरूपी भोजन, नीव लॉकुर नान साटी अदुर्द नियत समय मा येरसोद साटी याद ईटेतीर. 3अदिक नी आंदुर से अन: जो जो नीमी यहोवा अन्द साटी येर्सोद बिद्दीत अव ईव हू; मतलब नित्य होमबली इन साटी ऊंद वर्ष इन येढ्ढ निर्दोष म्यांडा अन्द नर पाड्डा हर रोज येर्सेतीर. 4ऊंद पाड्डा अक हुंजकुका दुसरा अक द्यावगा अन होती येर्सेत; 5अदिक म्यांडा अन्द पाड्डा अन्द हिंद ऊंद चौथाई हीन कुटस्कु तेग्द याण्णा हचकु एपा अन्द हतवा अंश मैदा अन्द अन्नभेट येर्सेत. 6ईद हमेशा अन्द होमबलि हुन, जो सीनै पहाळ मा यहोवा अन्द सुखदायक सुंगधवाळा होमबली आगोर साटी ठहरूसकु आग्याद. 7अदिक अदुर पेयबली प्रति ऊंद म्यांडा अन्द पाड्डा अन्द सांगुळ ऊंद चौथाई अंगुर इन रास्सा ईरूल; सार्रा अन्द ईद अर्घ यहोवा अन्द साटी पवित्र जागा दा कोळेतीर. 8अदिक दुसरा पाड्डा अक द्यावगा अन होती येर्सेत; अन्नबलि अदिक अर्घ सांगुळ व्हातर्या अन्द होमबलि इन घाई अदरी यहोवा अक सुखदायक सुंगध कोळावाळा होमबली माळकु येर्सेत.

आराम दिन इन बलिदान

9बाक आराम दिन इक येढ्ढ निर्दोष म्यांडा अन्द ऊंद वर्ष इन नर पाड्डा, अदिक अन्नबलि इन साटी याण्णा हचकु एपा अन्द येढ्ढ हतवा अंश मैदा पेयबली सांगुळ येर्सेत. 10हमेशा अन्द होमबली अदिक अदुर्द पेयबली इन अलावा हर आराम दिन इन ईदा होमबली ठहरूस्याद.

हर तींगुळ इन बलिदान

11बाक तान तिंगुळ इन सुरू दा हर तिंगुळ यहोवा अन्द साटी होमबली येर्सेत; मतलब येढ्ढ पाड्डा, ऊंद म्यांडा, अदिक ऊंद वर्ष इन निर्दोष म्यांडा अन येळ नर पाड्डा; 12अदिक पाड्डा अन्द हिंद याण्णा हचकु एपा अन्द मुर हतवा अंश मैदा, अदिक आ ऊंद म्यांडा अन्द सांगुळ याण्णा देल मुचकु एपा अन्द येढ्ढ हतवा अंश मैदा; 13अदिक हर ऊंद म्यांडा अन्द पाड्डा अन्द हिंद याण्णा देल मुचकु एपा अन्द हतवा अंश मैदा, आ सप्पा मुंदरी अन्नभेट माळकु येर्सेत; अद सुखदायक सुंगध कोळावाळा होमबलि अदिक यहोवा अन्द साटी होमबली ठहरूसीत. 14अदिक अऊर सांगुळ ईव पेयबली ईरूल; मतलब पाड्डा हींद आरदा हीन, म्यांडा अन्द सांगुळ ऊंद तिहाई हीन, अदिक म्यांडा अन्द पाड्डा अन्द हींद ऊंद चौथाई हीन1 शयद कोटकु आगुल; साल इन सप्पा तिंगुळगोळ दा टु हर तिंगुळ इन ईदा होमबली ठहरूसुल. 15अदिक ऊंद व्हात पापबलि माळकु यहोवा अन्द साटी येर्सकु आगुल; ईद हमेशा अन्द होमबली अदिक अदुर्द पेयबली इन अलावा येर्सकु आगुल.

फसह अन्द हाब्‍बा अन्द बलिदान

(लैव्यव्यवस्था 23:5-14)

16बाक पयला तिंगुळ इन चौदावा दिशी यहोवा अन्द फसह हाब्ब आगतोगुल. 17अदिक अदा तिंगुळ इन पंद्रावा दिशी अखमीरी रोट्टी तिनकु हाब्ब मनुसुल. 18पयला दिशी पवित्र सभा ईरूल; अदिक आ दिशी मेहनत इन यातोदारा क्याल्सा माळकु आग बाळुल; 19अदुर्दा नीव यहोवा अन्द साटी होमबली येर्सेत; अत: येढ्ढ पाड्डा, ऊंद म्यांडा, अदिक ऊंद वर्ष इन येळ म्यांडा अन्द नर पाड्डा ईरूल; ईव सप्पा निर्दोष ईरूल; 20अदिक अऊर अन्नभेट याण्णा हचकु मैदा अन्द ईरूल; पाड्डा अन्द हिंद एपा अन्द मुर हतवा अंश अदिक म्यांडा अन्द सांगुळ एपा अन्द येढ्ढ हतवा अंश मैदा ईरूल. 21अदिक येळ म्यांडा अन्द पाड्डा दा टु हर ऊंद पाड्डा अन्द हिंद एपा अन्द हतवा अंश येर्सेतीर. 22अदिक ऊंद व्हात भी पापबलि माळकु येर्सेतीर, यदुर देल नीम्द साटी प्रायश्चित आगुल. 23हुंजकुका अन होमबली जो हमेशा अन्द होमबलि ठहरूसकु आद, अदुर अलावा ईवरी येर्सेतीर. 24ई रीति देल नीव आ येळु दिनगोळ दा होमबली इन भोजन येर्सेतीर, जो यहोवा अक सुखदायक सुंगध कोळोर साटी ईरूल; ईद हमेशा अन्द होमबली अदिक अदुर्द पेयबली इन अलावा येर्सकु आगुल. 25अदिक सातवा दिशी भी नीम्द पवित्र सभा ईरूल; अदिक आ दिशी मेहनत इन यातोदारा क्याल्सा माळबाळेतीर.

कटाई इन हाब्‍ब अन्द बलिदान

(लैव्यव्यवस्था 23:15-22)

26बाक पयला उपज इन दिन दा, याग नीव तान कटाई इन हाब्‍ब दा यहोवा अन्द साटी व्हाशोद अन्नभेट येरसीर, आग भी नीम्द पवित्र सभा ईरूल; अदिक मेहनत इन यातोदारा क्याल्सा माळबाळेतीर. 27अदिक ऊंद होमबली येर्सेतीर, अदुर देल यहोवा अन्द साटी सुखदायक सुंगध आगुल; मतलब येढ्ढ पाड्डा, ऊंद म्यांडा, अदिक ऊंद वर्ष इन येळ म्यांडा अन्द नर पाड्डा ईरूल; 28अदिक अऊर्द अन्नभेट याण्णा हचकु मैदा अन्द ईरूल; मतलब पाड्डा अन्द हींद एपा अन्द मुर दसवा अंश, अदिक म्यांडा अन सांगुळ एपा अन येढ्‌ढ दसवा अंश, 29अदिक येळु म्यांडा अन्द पाड्डा दा टु ऊंद पाड्डा अन्द हिंद एपा अन्द हतवा अंश मैदा येर्सेतीर. 30अदिक ऊंद व्हात भी येर्सेतीर अदुर देल नीम साटी पाप झाक्सकु आगुल. 31ईव सप्पा निर्दोष ईरूल; अदिक हमेशा अन्द होमबलि अदिक अदुर्द अन्नभेट अदिक पेयबली इन अलावा ईदरी भी येर्सेतीर.