गिनती 27

सलोफाद उन पोरगोळ

1आग यूसुफ उन पार मनश्शे अन्द वंश इन कुलगोळ दा टु सलोफाद, जो हेपेर उन पार अदिक गिलाद उन नातु अदिक मनश्शे अन्द पार माकीर इन पळ नातु ईरोन, आऊन पोरगोळ यार हेसुर महला, नोआ, होग्ला, मिल्का, अदिक तिर्सा आद आंदुर हात्ती बंदुर. 2अदिक आंदुर मूसा अदिक एलीआजर याजक अदिक प्रधानगोळ पुरा मंडली इन मुंद भेंट माळोद तम्बू उन द्वार मा नीदुरकु अनली कुरतुर, 3“नाम आप्प आळी दा सोतोदुन; लेकीन आव आ मंडली दाकळोव ईला ईरोन जो कोरह अन्द मंडली इन सांगुळ आगकु यहोवा अन्द खिलाप जमा आगीत, आव तांदा पाप इन कारण सोत्तुन; अदिक आऊन यातोदु पार ईला ईरोन. 4रा नाम आप्प उन हेसुर आऊन कुल दा टु पार ईला ईरोद कारण यती मिटसुल? नाम काकागोळ न्याड्या नामी भी थ्वाळासा जागा अन हिस्सा कोळ.” 5आंदुर ईद विनती मूसा यहोवा अक केळ्सदुन. 6यहोवा मूसा से अंदुन, 7“सलोफाद उन पोरगोळ बराबर अनेत्यार; ईदुरसाटी नी आंदुर काकागोळ न्याड्या आंदरी भी जरूर थ्वाळासा जागा अन हिस्सा कोळ, मतलब आंदुर्द आप्प उन हिस्सा आंदुर कय दा सोप्सबुळ. 8अदिक इस्राएलिगोळ से ईद अन, अगर यावारा मंळसा बिना पार देल सोतोदान, रा आऊन हिस्सा आऊन पोर इन कय दा सोपसेत. 9अदिक अगर आऊन यातोदारा पोर भी ईला ईरूल, रा आकीन हिस्सा आकीन वार्ट उक कोळेत. 10अदिक अगर आकीन वार्टुर भी ईला ईतीदार, रा आकीन हिस्सा आकीन काकागोळी कोळेत. 11अदिक अगर आकीन काकागोळ भी ईला ईतीदार, रा आकीन कुल दा टु आकीन जो कुटुम्बी सब से हात्ती ईरूल आंदरी आकीन हिस्सा कोळेत कि आव आकीन अधिकारी आदान. इस्राएलिगोळ साटी ईद न्याय इन विधी ठहरूसीत, ह्यांग कि यहोवा मूसा अक आग्या कोटीदुन.”

मूसा अन्द जागा मा यहोशू

(व्यवस्थाविवरण 31:1-8)

12बाक यहोवा मूसा से अंदुन, “ई अबारीम हेसुर इन पहाळी इन म्याकुच येरकु आ द्याश इक नोळ कोम यदरी ना इस्राएलीगोळी कोटीन. 13अदिक याग नी अदरी नोळ कोंड्या, आग तान वार्ट हारून उन सांगुळ नी भी तान लॉकुर दा होगकु मिसळुस्या, 14यतिकी सीन हेसुर इन आळी दा नीव येढ्ढु मुंदुर मंडली इन झगळा अन्द समय दा नान आग्या अक मुरूकु नान से झगळा माळदीर, अदिक नानी सोता अन्द हात्ती आंदुर नजर दा पवित्र ठहरूसिदील.” ईद मरीबा हेसुर इन सोता हुन जो सीन हेसुर इन आळी इन कादेश दा आद. 15मूसा यहोवा से अंदुन, 16यहोवा, जो सप्पा जीवगोळ्द आत्मा अन परमेश्वर हुन, आव ई मंडली इन लॉकुर म्याकुच यातारा गंळ्स उक निवळुस बुळुल, 17जो आऊन मुंद होगुल बरूल, अदिक आंदरी तेगावाळा अदिक तरावाळा ईरूल; यदुर देल यहोवा अन्द मंडली बिना चरवाहा अन्द म्यांडा-मर्रगोळ घाई ईला ईरूल. 18यहोवा मूसा से अंदुन, नी नून उन पार यहोशू उक हुडुकु आऊन मा कय ईट; आव हिंग गंळ्स हुन यार दा नान आत्मा बसुसकु आद; 19अदिक आऊक एलीआजर याजक उन अदिक पुरा मंडली इन मुंद निदरूसकु आंदुर मुंद आऊक आग्या कोळ. 20अदिक तान महिमा दा टु येनारा आऊक कोळ, यदुर देल इस्राएलिगोळ्द पुरा मंडली आऊन आग्या मानसुल. 21अदिक आव एलीआजर याजक उन मुंद नीदुर तोगुल, अदिक एलीआजर आऊन साटी यहोवा से ऊरीम उन आग्या केळुल; अदिक आव इस्राएलिगोळ्द पुरा मंडली समेत आऊन अंदुर देल होगुल अदिक आऊंदा अंदुर देल वापस भी बरूल. 22यहोवा अन्द ईद आग्या अन्द अनुसार मूसा यहोशू उक हुडुकु, एलीआजर याजक अदिक पुरा मंडली इन मुंद निदरूसकु, 23आऊन मा कय ईटदुन, अदिक आऊक आग्या कोट्टुन ह्यांग कि यहोवा मूसा अन द्वारा अंदीदुन.