Angaramɔ 28:15

1Izaak saa Zakob nɛ wɛnɛ wola dede wen ha zu wa, nɛ wɛnɛ haa nû ha wɛnɛ mɛgi: «Mɛ lɛm si bebhoko mɔ le Kanan na. 2Gu tɛ, mɛ nɛ̂ ha le Paddan-Aram ha pɛ bafa mɛ nana mɛ, nɛ mɛ si ma bebhoko haki ha soko hio bebhoko pɛ Laban, ya mɛ nana mɛ. 3Lɛma nde Ngaya Sɔ awol dede wen ha zu mɛ, wɛnɛ ade nde mɛ bhɛ hio bem, nɛ mbwa ayɛbhi kade mɛ adung ma zugili hio kandɔ. 4Lɛma nde wɛnɛ wɔl dede wen pɛ Abraham ha zu mɛ, mɛ hinɛ hio bezang mɛ.» 5Mɛgi, Izaak tomsa Zakob ha le Paddan-Aram ha pɛ Laban, bem pɛ Betuel, wi mɔ kandɔ pɛ Aram. Laban nɛ̂ ya mɛ Rebeka, nana mɛ Zakob hinɛ Ezau.

6Ezau zɔka nde Izaak wola dede wen ha zu Zakob, nɛ a tomsa wɛnɛ ha Paddan-Aram mɔ si bhoko haki. Nɛ wɛnɛ wola dede wen ha zu wa, a tɔa ha wɛnɛ nde: «Mɛ lɛm si ma bebhoko mɔ le Kanaan na.» 7Tangere Zakob zea nû bafa wa hinɛ nana wa, nɛ a pena nɛ̂ ha le Paddan-Aram. 8Ezau zɔka nde sila bafa wa ngoy hio bhoko mɔ Kanaan na. 9Mɛgi, Ezau nɛa ha pɛ Ismael, wɛnɛ sio Mahalat, bebhoko pɛ Ismael, ka dung nɛ̂ bewei pɛ Abraham, nɛ̂ ya mɛ Nebayot, mɔ gde ha zu hio ko pɛa mɔ Sɔngsi.

Zakob zɔka zu wa

10Zakob guo tɛ ha Beer-Seba mɔ nɛ ha Haran. 11Wɛnɛ hɔa ha ma bhandi, nɛ a ɔa haki, hazu mɔ gaa kari. Wɛnɛ kuo ma ta mɔ bhandia, nɛ a gdea yo ha si zu wa, nɛ wɛnɛ ɔa nu ha bhandi ɛngi. 12A zɔka zu wa nde: «A zɔka ma ɛskalie guo tɛ ha nu ndɔ lîswe. Hio telenge pɛ Sɔ ha nɛa nɔ ha zua mɔ nɛ ha ngɔn, mana mɔ zil ha nu.» 13Tangere Wankpoo dungɔ ha zua, nɛ a tɔa ha wɛnɛ: «Mi nɛ̂ Wankpoo, Sɔ pɛ bafa mɛ Abraham hinɛ Sɔ pɛ Izaak. Nu ɛngɛ ka mɛ ɔ ha yo, mi beha yo ha mɛ hinɛ hio bezang mɛ. 14Mɛgi, hio bezang mɛ bedung nɛ dɔka tuka gbutunu. Mbwa belɛm nɛ zunu hɛr, nɛ wal ɔnu-swe hɔ ha gutɛ-swe, nɛ wal wekɔ̂-swe gbo ha wal garekɔ̂-swe. Ɛ bewol dede wen ha zu hio nam mɔ zu nu fɛt nɛ ling mɛ hinɛ hio bezang mɛ. 15Zɔk: Mi wantɛ hinɛ mɛ, mi bepam mɛ ha bhandi fɛt ka mɛ benɛ ha yo, nɛ mi bekifiri nɛ mɛ ha kandɔnu ɛngɛ. Hazu mi lɛm lak mɛ gde na, Sɔngsi nde mi ade mɔ ka mi batɔ ha mɛ.

16Zakob guo tɛ ha la, nɛ a tɔa: «Kpasawen Wankpoo ha bhandi ɛngɛ, nɛ mi, mi tɛ̂ ing pɔm yo na!» 17Ke dea wɛnɛ, nɛ a tɔa: «Bhandi ɛngɛ nɛ̂ bhandi ka gde ke ha sila wi! Ɛngɛ bo nɛ̂ ma bhandi nɛtɛ na, yo nɛ̂ twa pɛ Sɔ, nûtwa mɔ ngɔn!» 18Zakob guo tɛ nɛ sutole sut, wɛnɛ kuo ta ka wɛnɛ gdea zu wa ha zua ha ngimɔ la pɛa, a yolsa yo gde ha ngɔn, nɛ wɛnɛ aa nɔ̂ ha ndɔnga. 19A saa ling bhandia nde Betɛl1. Maa, bosi ling lea nɛ̂ Luz. 20Zakob gɔna nû nde: «Ka Sɔ hinɛ mi, nɛ wɛnɛ ha pama mi ha lîwal ka mi nɛ̂ ang, ka wɛnɛ haa mampa ha mi yɔng, nɛ hio la mɔ yol, 21nɛ ka mi sio ha zang gaamɔ ha twa pɛ bafa mi, mɛgi, Wankpoo bedung nɛ̂ Sɔ pɔm. 22Ta ɛngɛ ka mi yolsa yo ha ngɔn, bedung nɛ̂ twa-Sɔ. Hio mɔ ka wɛnɛ beha ha mi fɛt, mi be haa ha wɛnɛ hio dimaa.»