ኤርማሳ ቲንቢቴ

ኤርማሳ ቲንቢቴ

ጊዶ ቆፋ

ቲንቢቴ ዮቲዛ ኤርማሲ ኪርስቶሲ ዬሌታናፔ ካሴ ላፑን ጼቱ ላይ ዉርሴኒኔ ኡሱፑን ጼቱ ላይ ዶሜቲዛ ዎዴ ዴኢዴስ። ኤርማሲ ዳሮ ዎዴ ኦዳ ባ ኦሶን ኢስታ ኤቃ ጾሳ ጎይኖኒኔ ኢስታ ናጋራ ኦሶ ጋሶን ጾሳ ኣሳ ቦላ ጊታ ባሺ ጋካናይሳ ሚንዲ ኤሪሲዴስ፤ ኢዚ ዮቲዳ ቲንቢቴታፔ ባጋይ ፖሌቲዛ ዎዴ ፓጻ ዲዲ ባ ኣይፌን ቤኢዴስ። ባቢሎኔ ካዎ ናቡካዳናጾሬይ ዬሩሳላሜ ኦይኪዲ ካታማዮኔ ጾሳ ኬ ላሎይሳ፥ ዩሁዳ ካዎይኔ ኣሳፔካ ዳሪዛ ባጋይ ዲኤቲዲ ባቢሎኔ ቢዳይሳ ቤኢዴስ። ጉጂዲካ ኤርማሲ ኣሳይ ዲኦፔ ሲማናይሳኔ ኢስራኤሌ ካዎቴ ሲሚ ኤቃናይሳ ካሴቲዲ ዮቲዴስ።

ኤርማሳ ማጻፋ ኦይዱ ኬሲዲ ቤኣናስ ዳንዳዬቴስ። 1። ኢዮሲያሳ፥ ኢዮኣቄሜ፥ ኢዮኣኪኔኔ ሴዴቂያሳ ካዎቴ ላይታን ዩሁዳ ኣሳሲኔ ኢስታ ካሌዛይታስ ጾሳፌ ዪዳ ቃላ። 2። ዱማ ዱማ ቲንቢቴታ፥ ኤርማሳ ዴኦን ፖሌቲዳ ኣይፌ ዮኦታኔ ኤርማሳ ጻፌ ባሮኬይ ጻፊ ዎዳ ዮኦታ። 3። ዱማ ዱማ ኣላጋ ቢታ ኣሳስ ጾሳፌ ዮቴቲዳ ቲንቢቴ ቃላ። 4። ዬሩሳላሜ ኦይኬቴኔ ኣሳይ ዲኤቲዲ ባቢሎኔ ባናይሳ ዮቲዛ ጉጆ ታሪኬታ።

ኤርማሲ ባ ኣሳ ኬሂ ዎዚናፔ ሲቂዛዴኔ ኢስታ ቦላ ባሻ ፒርዳ ቲንቢቴ ኣናስ ኬሂፔ ዳሮ ኢጺዛ ኣሳ። ናቤቴን ኢዚ ኦና ማላ ጾሲ ኢዛ ጼይጊዳ ጊሻስ ባና ጋኪዳ ሜቶ ጋሶን ኢዚ ጬጪዳ ሚኖ ጬጬይ ኢዛ ማጻፋ ጊዶን ዳሮ ሶሆን ጻፌቲ ኡቲዴስ። ጾሳ ቃላይ ኢዛ ዎዚና ጊዶን ታማ ማላ ጹጊዛ ጊሻስ ካሚዲ ዲጋናስ ዳንዳዮንታይሳ ቆንጪሲዴስ።

ሃ ማጻፋን ዲዛ ጊታ ቲንቢቴ ቃላታፔ ኢሶቲ ኢሶቲ ሜቶይ ኩሚዳ ኤርማሳ ላይፌ ካንዲ ጾሲ ኢስታስ ኢሚዛ ኦራ ጫቆ ቃላይ ፖሌታና ዎዴዛ ቤሲዛይታ፤ ሄ ኦራ ጫቆ ቃላይ ኣሳ ዎዚናን ጻፌቲዛ ጊሻስ ኢስታ ኣኬኪሲዛ ኣስታማሬ ኮሾንታ ኢስታ ናጋና። (31፡31-34)።

ሃ ማጻፋይ ኦይኪዳ ኩሜ ቆፋ

ጾሳን ኤርማሳ ዶሬቴ

ዩሁዳ ቦላኔ ኢስራኤሌ ቦላ ጾሲ ኤሃና ቂጻቴ

ዎርዶ ናቤታራ ኤርማሳ ኤቄቴ

ጾሲ ባ ዴራ ዲኤቲዳሶፔ ዛራናይሳ

ዱማ ዱማ ኤርማሳ ኦሶታ

ዬሩሳላሜ ኩንዴኔ ዩሁዳን ሜቲዳ ሃኖታ

ጊብጼ ቢታን ኤርማሳ

ባሮኬስ ኪቴቲዳ ኪታ

ናቤዚ ዱማ ዱማ ዴሬታስ ዮቲዳ ቲንቢቴ

ዬሩሳላሜ ኩንዴ ጊሻስ ዮቴቲዳ ዮኦታ