ጌሻ ማጻፋ
ኤርማሳ ቲንቢቴ 20
ኤርማሳኔ ፓሽኩሬ
ሄ ዎዴ ጎዳ ኬን ኢሜሬ ና ቄሴ ፓሽኩሬይ ኤርማሲ ቲንቢቴ ዮቲሺን ሲዪዲ፥ ናቤ ኤርማሳ ሾጪዴስ፤ ጾሳ ኬፌ ፑዴ ባጋራ ዲዛ ቢኒያሜ ጊምቤ ፔንጌ ቦላ ኣግሪሞቄን ቃቺዴስ። ዎንቴ ጋላስ ፓሽኩሬይ ኤርማሳ ቃሾፔ ቢርሺን ኤርማሲ ኢዛስ፥ «ሃቺፌ ዶሚን ጎዳይ ኔ ሱን ማጎርሚሳቢቤ1 ጋና ኣቲን ፓሽኩሬ ጌና። ጋሶይካ ጎዳይ፥ ‹ታኒ ኔናኔ ኔ ላጌታ ኡባ ዳጋማስ ኣ ኢማና፤ ኢስቲ ኔኒ ጼሊሺን ባንታ ሞርኬታ ማሻን ዉራና፤ ታኒ ዩሁዳ ኣሳ ኡባ ባቢሎኔ ካዎ ኩሼን ኣ ኢማና፤ ኢዚ ኢስታ ዲኢዲ ባቢሎኔ ኤፋና፤ ሂስቲዲ ሄን ኢስታ ማሻን ሲፋና። ሃ ካታማይ ኣቆታ፥ ኢዛ ኦ ዴሚዳ ኡባ፥ ዩሁዳ ካዎታ ኣቆታኔ ኢስታስ ዲዛ ኣልኦ ሚሽ ኡባ ታኒ ኢስታ ሞርኬታስ ኣ ኢማና፤ ኢስቲካ ዲኢ ኤኪዲ ባቢሎኔ ኤፋና። ፓሽኩሬ! ኔኒኔ ኔ ሶሆን ዲዛ ኡባይካ ዲኤቲዲ ባቢሎኔ ባና። ኔኒኔ ኔ ኢስታስ ዎርዶ ቲንቢቴ ዮቲዳ ኔ ላጌቲ ኡባይ ሄን ሃይቃናኔ ሞጌታና› ጌስ» ጊዴስ።
ኤርማሳ ዙዙን
ኣቤት ጎዳዉ!
ኔኒ ታና ጪማዳሳ፤
ታኒካ ጪሜታዲስ።
ኔኒ ታፔ ኬሃ ሚናዳ
ታና ጾናዳሳ።
ጋላስ ኩሜ ታኒ ኣሳስ
ሚቻስ ኣታዲስ፤
ኡባይካ ታና ቂስ።
ታኒ ሃሳይዛ ዎዴ
ኡባን ዋሳይስ፤
«ሺሮኔ ባሽ» ጋ ኣዋጃይስ፤
ሄሳ ጊሻስ ጎዳ ቃላይ
ታስ ኩሜ ጋላስ ታ ቦላ
ጫሼኔ ቂ ኤሂዴስ።
ታኒ፥ «ሃይሳፌ ጉዬ
ጎዳ ሱን ዴንኬ፤
ኢዛ ሱንንካ
ሃሳይኬ» ጊኮ
ኢዛ ቃላይ ታ ዎዚና ጊዶን
ታማ ማላ፥
ታ ሜቄ ጊዶንካ
ሱርቁንቶ ማላ ጊዲዴስ፤
ሄሳ ጊሻስ
ታ ካማ ኦይካናስ ጾኒዴስ፤
ሙሌራካ ኤቄታናዉ
ዳንዳያቤኬ።
«ኡባሶን ሺሮይ ዴስ፤
ሂሊቴ ኣኔ ኑኒካ ሂሎስ» ጊዲ
ዳሮቲ ሳሱኬቲሺን ታ ሲያዲስ፤
ታ ኩንዴ ናጌቲሼ ዲዛ
ታ ላጌቲ ኡባይ፥
«ኦኔ ኤሪዛይ
ባሌታና ዳንዳይዛኮ
ሂስቲኮ ኑኒ ኢዛ ጾናናኮኔ
ኑ ሃሎ ኬሳናኮ» ጌቴስ።
ጊዶ ኣቲን ጎዳይ ያሺሲዛ
ቶራ ቃራ ማላ ታናራ ዴስ፤
ሄሳ ጊሻስ ታና ዬዴዛይቲ
ጴታና ኣቲን ታና ጾኔቴና፤
ኢስቲ ኢታ ካዉሽ ካዉያና ኣቲን
ኢስታስ ጊጌና፤
ኢስታ ካዉሻቴይ
ሙሌካ ዶጌቴና።
ኣቤት ኡባፌ
ዎልቃማ ጎዳዉ!
ጺሎዛ ፓጪዛይሶ!
ዎዚናኔ ካሃ
ፒልጋ ጼሊዛይሶ!
ታኒ ታ ሞቶ ኔስ
ኣ ኢሚዳ ጊሻስ
ኔኒ ኢስታ ቦላ ሃሎ ኬሲሺን
ታ ኣይፌን ቤኣናስ ታና ጋ።
ጎዳስ ዬጺቴ!
ኢዛስ ጋላታ ሺሺቴ፤
ኢዚ ሜቶታንቻታ ሼምፖ
ኢታታ ኩሼፔ ኣሼስ።
ታኒ ዬሌቲዳ ጋላሳያ
ቃንጌቲዳሮ ጊዱ!
ታ ኣዬያ ታና ዬሊዳ
ጋላሳያ ኣንጄቱፉ!
ታ ኣዋስ፥ «ኔስ ሚሺራቾ፤
ኔስ ኣቱማ ናይ ዬሌቲዴስ!»
ጊ ዮቲዳይ ቃንጌቲዳዴ ጊዶ!
ሄሳዴይ ጎዳይ ቃታይ ባይንዳ
ሺሬቺ ዬጊዳ
ካታማታ ማላ ጊዶ፤
ማላዶ ዋሶ፥ ጋላሳ ሴታን
ኦላ ሺሮ ሲዮ።
ታ ኣያ ታስ ዱፎ ጊዳና ማላ፥
ኢዚ ኡሎይ ታስ ሜርና
ዱሳሶ ጊዳና ማላ
ታና ሄን ኣይስ ዎቤኔ?
ታኒ ሜቶኔ ጬጬ ቤኣናሲኔ
ታ ዴኦ ላይ ኡባ
ካዉሻቴን
ዉርሳናስ ታ ኣዪ ኡሎፔ
ኣይስ ኬዛዲና?2
Source notes (2)
- Footnote ማጎርሚሳቢቤ፡ ማጎርሚሳቢቤ ጌቴቲዛይሳ ኢብራዌታ ቃላ ቢርሼ ኡባ ሚሻንካ ዳጋማ ጉሳ።
- Cross-reference ኢዮ 3፡1-19
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.