ጌሻ ማጻፋ
ኤርማሳ ቲንቢቴ 14
ኮሻ፥ ጋፋኔ ኦላ
ጎዳይ ኮሻ ጊሻስ ኤርማሳስ
ዮቲዳ ቃላይ ሃይሳፌ ካሊዛይሳ፤
«ዩሁዳ ቢታይ ዬኬስ፤
ካታማቲካ ፖርቁ ጌቴስ፤
ኣሳይ ቢታ ቦላ ኡቲዲ ጬጬስ፤
ዬሩሳላሜፔካ
ዋሶይ ሴቴቴስ።
ዱሬቲ ባንታ ኣይሌታ
ሃ ዱቃናስ ኪቴቴስ።
ኢስቲካ ሃ ኦላይ
ዲዛሶ ቤቴስ፤
ጊዶ ኣቲን ሃ ዴሜቴና፤
ባንታ ኦቶ ሜላ
ቶኪ ኤኪዲ ሲሜቴስ።
ዬላቲዲኔ ሂዶታ ቃንጺዲ
ባንታ ሁኤ ጉሉንቴቴስ።
ኢራይ ቡኮንታ ጊሻስ
ቢታይ ሜሊዲ ዛኤስ።
ጎሻንቻቲ ዬላቲዲ
ባንታ ሁኤ ጉሉንቴቴስ።
ማታይ ባይንዳ ጊሻስ
ቆርኬይ ባ ዬሊዳ ማራ
ዴምባን ዬጋዳ ባዉስ።
ሃርዲዳቲ ኣይኮይ ባይንዳ
ዙምቡላታ ቦላ ኤቂዳ፤
ዎራካናታ ማላ
ሃ ኮዪዲ ሌሶቴቴስ።
ኢስታስ ሚዛ ሚሺ
ይዳ ጋሶን ኢስታ ኣይፌይ
ጼላናስ ዳቡርዴስ» ጊዴስ።
ኣሳይ፥ «ኣቤት ጎዳዉ!
ኔ ሲንፌ ባቃታ ዳርሲዶስ፤
ኔ ሱን ጊሻስ
ኑስ ኢሲ ሚሽ ኦ፤
ኑኒ ኔፔ ዳሮቲ
ጉዬ ሲሚዶስ፤
ኔ ቦላን ናጋራ ኦዶስ።
ኣቤት ኢስራኤሌ ሂዶታዉ!
ሜቶ ዎዴ ኣሺዛይሶ!
ኔኒ ቢታን ኢማ ማላ፥
ኢሲ ኦማርስ ኣቂዲ ቢዛ
ኦጌ ኣሳ ማላ ኣይስ ሃናይ?
ኔኒ ሃኒዛዚ ይዳ ኣሳ ማላ፥
ኣሻናስ ዎልቃይ ይዳ
ኦላንቻ ማላ ኣይስ ጊዳይ?
ኣቤት ጎዳዉ!
ኔኒ ኑ ጊዶን ዳሳ፤
ኑኒካ ኔ ሱንን ጼይጌቲዶስ፤
ኑና ኔኒ ኣጎፋርኪ!» ጊዴስ።
ሃ ኣሳታ ጊሻስ ጎዳይ፥
«ኢስቲ ቶይላቴቴ ኬሂ ዶሴቴስ፤
ባንታ ቶሆ ናጌቴና።
ሄሳ ጊሻስ ጎዳይ
ኢስታን ኡፋዬቴና፤
ሃኢ ኢዚ ኢስታ ቆሆ ቆፔስ፤
ኢስታ ናጋራ ጋሶን
ኢስታ ቃጻዬስ» ጌስ።
ሄሳፌ ጉዬ ጎዳይ ታና፥
«ሃ ዴራ ሎኦቴስ ዎሶፋ።
ኢስቲ ጾሚ ዎሲኮካ
ታኒ ኢስታ ዋሶ ሲዪኬ፤
ጹጌቲዛ ያርሾኔ
ካ ያርሾዛ
ኢስቲ ያርሺኮካ
ታኒ ኢስታ ያርሾዛ ኤኪኬ።
ታኒ ኢስታ ማሻን፥
ኮሻኒኔ ኢታ ሃርጌን
ይሳና» ጊዴስ።
ሂስቲን ታኒ፥ «ኣቤት ኡባፌ ዎልቃማ ጎዳዉ! ኣዬ ኣና! ናቤቲ ኢስታስ፥ ‹ኢንቴ ኦላ ቤኤኬታ ዎይኮ ኮሻይ ኢንቴና ዴሜና፤ ታኒ ኢንቴስ ዉርሴ ጋካናስ ሳሮቴ ኢማና› ጌቴስ» ጋዲስ።
ሂስቲን ጎዳይ ታስ፥ «ናቤቲ ታ ሱንን ዎርዶ ዮቴቴስ። ታኒ ኢስታ ኪታቤኬ፥ ኣዛዛቤኬ፥ ኢስታስካ ዮታቤኬ። ኢስቲ ኢንቴስ ዎርዶ ኣጁታ፥ ሙሬኖ ዮኦ፥ ሃዳ ዮኦኔ ባንታ ዎዚናን ዲዛ ባሌ ዮኦ ዮቴቴስ። ሄሳ ጊሻስ ታ ኪቶንታ ዲሺን፥ ‹ኦላይኔ ኮሻይ ሃ ቢታይ ቦላ ዬና› ጊዲ ታ ሱንን ዎርዶ ቲንቢቴ ዮቲዛ ናቤታ ታኒ ኦላኒኔ ኮሻን ይሳና። ቃሴ ኢስቲ ቲንቢቴ ዮቲዳ ዴሬይካ ኮሻኒኔ ኦላ ጋሶን ዬሩሳላሜ ዱቡሻታን ኩንዳና፤ ኢስታስ፥ ኢስታ ማቼታ፥ ኢስታ ኣቱማ ናይታኔ ማጫ ናይታ ኣሃ ሞጊዛይ ያና፤ ታኒ ኢስታ ሞሮ ማላ ኢስታ ቦላ ቂጻቴ ኤሃና» ጊዴስ።
ሃ ቃላ ኢስታስ፥
« ‹ታ ዴሬይ
ኬሂ ዴሼቲዲ
ማዱንጺዳ ጊሻስ፥
ታ ኣይፌቲ ኦማርሲኔ
ጋላስ ሼምፖንታ ኣፉንጼቴስ።
ታኒ ጋጻሬ ቢኮ፥
ማሻን ሃይቂዳይታ ቤኣይስ፤
ካታማ ጌሊኮ
ኮሻይ ዉርሲዳይታ ቤኣይስ።
ናቤቲኔ ቄሴቲ
ባ ኤሮንታ ዴሬ ባቃቲዳ›
ጌስ ጎዳይ» ጊዴስ።
ኣቤት ጎዳዉ!
ኔኒ ዩሁዳ ሙሌካ ኣጋዲ?
ጺዮኔ ኣሳ ሃራሴታዲ?
ኔኒ ኑና ፓጾንታ ማላ
ኦዳ ኣይስ ዴቻዲ?
ኑኒ ሳሮቴ ናጊዶስ፤
ጊዶ ኣቲን ሳሮቴ
ዴሚቤኮ፤
«ፓጻና ዎዴይ ያና»
ጊዲ ናጊዶስ፤
ጊዶ ኣቲን ዳጋማ ጻላ ጊዲዴስ።
ኣቤት ጎዳዉ!
ኑኒ ኑ ኢታቴ ኤሪዶስ፤
ኑ ኣዋታ ቆሆካ ኣኬኪዶስ፤
ቱማፔካ ኔ ቦላ
ናጋራ ኦዶስ።
ኑና ኔ ሱን ጊሻስ
ጋዳ ካፓርኪ!
ኔ ቦንቾ ኣራታ ካዉሾፋ።
ኔኒ ኑናራ ጫቄቲዳ
ጫቆዛ ቆፓ፤
ኔ ጫቂዳ ቃላ ሞፓ።
ካዎቴታ ኤቃ ጾሳቲ
ኢራ ቡኪሳና ዳንዳይዞ?
ሳሎቲ ባ ሼኔን
ፑሴ ዱጌ ዬዳናስ ዳንዳይዞ?
ዳንዳዬቴና፤
ኣቤት ኑ ጎዳዉ!
ሄሳ ኡባ ኦና
ዳንዳይዛይ ኔና፤
ሄሳ ጊሻስ ኑኒ ኔናን
ሂዶታ ኦስ።
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.