ኤርማሳ ቲንቢቴ 15

ዩሁዳ ኣሳ ቦላ ጋካና ፒርዳ

1ሄሳፌ ጉዬ ጎዳይ ታስ፥ «ሙሴይኔ ሳሜሊ ታ ሲንን ኤቂዳኮካ ታ ዎዚናይ ሃ ዴራስ ሚሼቴና፤ ኢስታ ታ ሲንፌ ዲጋ፤ ኢስቲ ቤቶ።1 2ቃሴ ኢስቲ ኔና፥ ‹ኑኒ ኣዋ ቢኖ?› ጊ ኦይቺኮ፥

ኔ ኢስታስ፥ ‹ሃይቆስ

ፒርዴቲዳይቲ ሃይቃና፤

ማሻስ ፒርዴቲዳይቲ

ማሻን ሹኬታና፤

ኮሻስ ፒርዴቲዳይቲ

ኮሻን ዉራና፤

ዲኤታናስ ፒርዴቲዳይቲ

ዲኤቲ ባና።›2

3«ጎዳይ፥ ‹ታኒ ኦይዱ ቆሞ ባሽ ኢስታ ቦላ ኤሃና፤ ሄይቲካ ኢስታ ዎናስ ማሻ፥ ኢስታ ኣሃ ጎቻናስ ካናታ፥ ኢስታ ኣሾዛ ሚዲ ይሳናስ ሳሎ ካፎታኔ ሳኣ ዶኣታ። 4ሂዝቂያሳ ና፥ ዩሁዳ ካዎ ሚናሴይ ዬሩሳላሜን ኦዳ ፓላ ጊሻስ ታኒ ኢስታ ቦላ ሳኣ ካዎቴታ ኡባስ ዳጋንዛዝ ኦና› ጌስ ጋዳ ዮታ» ጊዴስ።3

5«ሃኔ ዬሩሳላሜ!

ኔስ ኦኔ ቃታናይ?

ኔስ ሚሼታናይ ኦኔ?

ኔ ሎኤቴ

ጌሊ ኦይቻናይ

ኦኔ?» ጌስ።

6«ኔ ታና ኣጋዳሳ፤

ጉዬ ጉዬ ባሳ፤

ሄሳ ጊሻስ ታኒ ኔ ቦላ

ታ ኩሼ ዴንዳ

ኔና ይሳና፤

ሃይሳፌ ጉዬ ኔስ ቃቲኬ።

7ታኒ ኢስታ ካ ሱራጊዛ ማላ

ሱራጋዳ ካታማታ

ፔንጌን ላላና፤

ኢስቲ ባ ኦጌፔ

ሲሞንታ ኣጊዳ ጊሻስ

ታኒ ታ ዴሬዛ ካዮን ኩንና፤

ኢስታ ቦላካ ባሽ ኤሃና።

8ታኒ ኢስታ ኣምኤታ ቆዳ

ኣባን ዲዛ ኣጬፔካ ዳርሳና፤

ሚኖ ኣዬታ ይሲዛዝ

ሴታ ጋላስ ታ ኢስታ ቦላ ኤሃና፤

ኢስቲ ቆፖንታ ዲሺን

ዳጋማኔ ሺሮ

ታ ኢስታ ቦላ ዬጋና።

9ላፑን ናይቲ ሃይቂዳ ኣያ

ዳጋማን ዳቡራና፤

ፔኖራ ያና

ኢዚስ ጋላሳይ ቃማና፤

ኢዛ ዬላታናኔ ካዉያና፤

ኣቲዳይታካ ሞርኬታ ማሻስ

ኣ ኢማና» ጌስ ጎዳይ።

ኤርማሲ ባ ሜቶ ጎዳስ ማጋኒዴስ

10ታ ኣዬ! ሃኖ ፖራ!

ታኒ ኣስ ኡባስ ኦሻሲኔ

ፓላማስ ጊዳና ማላ

ኣይስ ታና ዬላዲ?

ታኒ ኦናስካ ታልኤ ኢማቤኬ፤

ኦናፔካ ታልኤ ኤካቤኬ፤

ጊዶ ኣቲን ኣሲ ኡባይ

ታና ቃንጌስ።

11ጎዳይ፥ «ቱማፔ ታኒ ኔና

ሎኦ ሚሻስ ኣሻ ኤካና፤

ቱማፔ ኔ ሞርኬቲ

ሜቶ ዎዴኔ

ዋዬ ዎዴ

ኔና ሾባና ማላ

ታኒ ኦና።

12ኣሲ ቢራታ፥ ፑዴሃ ባጋፌ ዪዳ ቢራታ

ዎይኮ ጻርቂማላ

ሜንና ዳንዳይዜ?

13ኔ ዴሬ ኡባን ኦሴቲዳ

ናጋራ ጊሻስ

ኔ ኣቆታ ኡባ ዲኢዛይታስ

ጮ ኣ ኢማና።

14ታ ሃንቆይ ኢንቴ ቦላ

ታማ ማላ ኤጻና፤

ሄሳ ጊሻስ ኔኒ

ኔ ኤሮንታ ቢታን

ኔ ሞርኬታስ

ታኒ ኔና ኣይሌሳና» ጊዴስ።

15ኣቤት ጎዳዉ! ኔ ኤራሳ።

ታና ቆፓ፤ ሞካካ ጼላ፤

ታና ዬዴዛይታ ቦላ

ሃሎ ኬሳ፤

ኔ ዳንዳያንቻ ጊዲዳ

ጊሻስ ታና ይሶፋ፤

ኔ ጋሶን ታና ጋኪዛ ካዛ

ኔ ቆፓ።

16ኣቤት ኡባፌ

ዎልቃማ ጎዳዉ!

ታኒ ኔ ሱንን

ጼይጌቲዳ ጊሻስ

ኔ ቃላይ ታኮ ዪን ማዲስ፤

ሂስቲን ኔ ቃላይ ታስ ፓሽካኔ

ዎዚና ኡፋይስ ኢሚዴስ።

17ጉፒዛይታራ ኡታቤኬ፤

ኢስታራካ ጉፓቤኬ።

ኔኒ ኔ ኩሼ ታ ቦላ

ዴንዳ ጊሻሲኔ

ኔ ሃንቆ ታ ቦላ ዬዲዳ ጊሻስ

ታኒ ታርካ ኡታዲስ።

18ታ ቦላ ሃርጌይ ኣይስ ሚኒዴ?

ታ ማዱንይ

ኣይስ ዳሪ ዳሪ ቢዴ?

ኣይስ ፓጾንታ ኢጺዴ?

ኔኒ ታስ ባሌዛ

ሻፋ ማላኔ

ጪሚዛ ፑልቶ ማላ

ኣይስ ጊዳዲ?

19ሄሳ ጊሻስ ጎዳይ፥

«ኔኒ ሲሚኮ ታ ኔና

ዛራ ኤሳና፤

ኔካ ታስ ኦና።

ሃዳ ዮኦ ኣጋዳ

ቦንቾ ቃላ ጻላ ሃሳይኮ

ኔኒ ታ ዶና ጊዳና።

ኢስቲ ኔኮ ሲማና ኣቲን

ኔ ኢስታኮ ሲማካ።

20ታ ኔና ሃ ዴራስ

ጊምቤ ኦና፤

ጻርቂማላፔ ኦሴቲዳ

ጊምቤ ማላ ሂስታና፤

ታኒ ኔና ኣሻናሲኔ

ዎ ኤካናስ

ኔናራ ዲዛ ጊሻስ

ኢስቲ ኔናራ ኦሌታና ሺን

ኔና ጾኔቴና።

21ኢታታ ኩሼፔ ታኒ ኔና ዎዛና፤

ሜንጼ ኢታታ ቆሆፔካ

ታ ኔና ኣሻና» ጌስ።