ኤርማሳ ቲንቢቴ 48

ሞኣቤ ጊሻስ ዮቴቲዳ ኪታ

1ሞኣቤ ጊሻስ ኡባፌ ዎልቃማ ጎዳ ኢስራኤሌ ጾሳይ፥

«ኔቦይ ያና ጊሻስ

ኢዚስ ኣዬ ኣና!

ቂሪያታይሜይ ካዉያናኔ

ኦይኬታና፤

ሚጻቲካ ኦይኬታናኔ

ላሌታና።1

2ሃይሳፌ ጉዬ ሞኣቤይ

ቦንቼቱኩ፤

ኣሳይ ሃሴቦኔን ኡቲዲ፥

‹ሃ ዪቴ! ሃኖ ካታማዮ

ኣኔ ይሶስ›

ጊዲ ኢዚ ቦላ ዱላታና።

ሃኔ ማዲሜኔ!

ኔና ቡሮ ጮኡ ሂስታና፤

ማሻይ ኔና ጎዳና።

3ሆሮናይሜፔ ኬዚዛ ይሳ

ዋሶኔ ጊታ ባሻ ዋሶ

ጊሪስ ሲዪቴ፤

4ሞኣቤይ ሜቃና፤

ኢዚ ናይቲካ ዋሶ ሲሳና።

5ጫሞ ዬሆ ዬካና፤

ሉሂቴ ፑዱን ኬዛና፤

ባና ጋኪዳ ኢታ ሜቶፔ

ዴንዲዳይሳን ጫሞ ዬሆ

ዬኪሼ ሆሮናይሜ

ዱጉን ዎና።

6ባቃቲዲ ኢንቴ ሼምፖ ኣሺቴ፤

ባዞን ቱሻ ዎራ ጊዲቴ።

7ኢንቴ ኦዳ ኦሶኒኔ

ኢንቴ ኣቆታን

ኢንቴ ኣማኔቲዛ

ጊሻስ ኢንቴካ ዲኤታና፤

ካሞሼይካ ባ ቄሴታራኔ

ባ ሹሜታራ ዲኤቲ ባና።

8ካታማ ኡባ ቦላ

ይሲዛይ ያና፤

ኢሲ ካታማይካ

ኬሲ ኤኪ ኣቴና፤

ጎዳይ ዮቲዳ ጊሻስ

ሾባይ ያና፤

ዴምባቲካ ያና።

9ሞኣቤይ ፒራ ኣታና ማላ

ኢዚስ ቄፌ ኢሚቴ፤

ኢዚ ካታማቲ ኣይኮይ ባይንዳ

ቡላ ጊዳና።

10«ጎዳ ኦሶስ ዉዱ ጎንታዴይ

ቃንጌቲዳዴ ጊዶ!

ኢዛ ማሻይ

ሱ ጉሶንታ ማላ

ዲጊዛዴይ ቃንጌቲዳዴ ጊዶ።

11«ሞኣቤይ ዬላጋቴፌ

ዶሚዲ ጋጬቶንታ

ቶጬራ ዲዛ ዎይኔ

ኡሻ ማላ ዎፓን ዴስ፤

ኦቶፔ ኦቶን ላሜቲቤና፤

ኢዚ ዲኤቲ ቢ ኤሬና፤

ኢዛ ማልኦይ

ካሴ ዲዛ ማላ ዴስ፤

ኢዛ ሳዎይካ ላሜቲቤና።

12ጊዶ ኣቲን ኦቶዛ ላሚዛ ኣሳታ

ታ ኪታና ዎዴይ ያና፤

ኢስታካ ዎራ ጉሲዲ

ኦታ ጻላ ኣሻና፤

ዱቂዛ ሚሻታካ

ሜንሬ ዬጋና።

13ኢስራኤሌ ኣሳይ ቤቴሌን

ኣማኔቲ ዲሼ

ዬላቲዳይሳ

ሞኣቤ ኣሳይካ

ባ ጾሳን

ካሞሼን ዬላታና።

14«ኢንቴ፥ ‹ኑኒ ሚኖ ኦላንቻታ›

ጋናስ ዋኒ ዳንዳይዴቲ?

15ቤኢቴ ሞኣቤ ቢታይ ያና፤

ኢዚ ካታማቲካ ዎራጄታና፤

ዶሬቲዳ ኢዚ ዬላጋ ናይቲካ

ሹኬታናስ ዱጌ ዎና፤

ኢዛ ሱንይ ጎዳይ ኡባፌ

ዎልቃማ ጾሳይ፥

16«ሞኣቤስ ኩንዴ

ዎዴይ ጋኪዴስ፤

ባሺ ኢዛ ቦላ ኤሶን ያና።

17ኢዛ ዩሾን ዲዛ ኡባይ

ኢዛ ጊታቴ ኤሪዛይቲ ኡባይ

ኢዛስ ዬኪቴ፤

ኢንቴ፥ ‹ሚኖ ኢዛ ጪካይ፥

ቦንቼቲዳ ጻንባሮይ

ዋኒ ሜቂዴ?› ጊቴ።

18«ሞኣቤ ይሳናይ

ኔ ቦላ ያና፤

ጊምቤቲዳ ኔ ካታማታ

ኢዚ ይሳና፤

ሃኔ ዲቦኔ ናዬ!

ኔ ቦንቾዛፔ

ዱጌ ዎ፤

ሜላ ቢታ ቦላ ዎ ኡታ።

19ሃኔ ኣሮኤሬን ዲዛሬ!

ኔኒ ኦጌ ዶናን ኤቃዳ ጼላ፤

ባቃቲዛ ኣቱማስ፥

ኬሳ ኤካ ቢዛ ማጫስ፥

‹ኣዜ ሜቲዳይ?›

ጋዳ ኦይቻ።

20ሞኣቤይ ላሌቲዲ ካዉዪዴስ፤

‹ዉ! ዉይ› ጊዲ ዋሲቴ፤

ሞኣቤይ ሙሌራ ይዳይሳ

ኣርኖኔ ሻፋ ኣቻን ኣዋጂቴ!

21ፒርዳይ ቦላ ጌዜ ቢታን

ሆሎኔ ቦላ፥

ያሃጼ ቦላኔ

ሜፋኣቴ ቦላ፥

22ዲቦኔ ቦላ፥

ኔቦ ቦላኔ

ቤቲ-ዲቢላታይሜ ቦላ፥

23ቂሪያታይሜ ቦላ፥

ቤቲ-ጋሙሌ ቦላኔ

ቤቲ-ማኦኔ ቦላ፥

24ቂሪያቴ ቦላኔ ቦጺራ ቦላ፥

ሃሆኒኔ ማታን ዲዛ ሞኣቤ

ካታማታ ኡባ ቦላ ዪዴስ።

25ሞኣቤ ካጬይ ቃንጼቲዴስ፤

ኢዛ ቄሴይካ ሜቄሬቲዴስ።

26«ኢዚ ጎዳ ካዳ ጊሻስ

ሞኣቤ ኡሻን ማሲቴ፤

ሞኣቤይ ባ ጮሻ ቦላ ጌንዴሬቶ፤

ቂስ ኣቶ።

27ኔኒ ካሴ ኢስራኤሌ ቂቤኪ?

ኢዚ ጊሻስ ኔ ሃሳይዛ ዎዴ

ኔኒ ኔ ሁኤ ቃቤኪ?

ኢዛ ካይሶታራ ካይሶታሼ

ኦይኬታዴ?

28ኢንቴኖ ሞኣቤን ዲዛይቶ!

ካታማፔ ኬዚ ቢዲ

ዛላ ጊዶን ዲቴ፤

ኣፎ ዶናን ባ ኬ ኬጺዛ

ሃራጴይ ማላ ጊዲቴ።

29ሞኣቤ ኦቶሬቴ፥

ባና ቁ ሂስቴ፥

ጬቄቴኔ

ዎዚና ሙሜቴ

ኑ ሲዪዶስ።

30ታኒ ኢዛ ዎልቃ ኤራይስ፤

ጊዶ ኣቲን ሄሲ ሃዳ፤

ኢዛ ጬቄቴስ ጎኣይ ዴና።

31ሄሳ ጊሻስ

ታኒ ሞኣቤስ ዬካይስ፤

ሞኣቤ ዴሬ ኡባስ፥

‹ዉ! ዉይ› ጋይስ፤

ቂሬ-ሄሬሴ ኣሳሲካ

ዬሆ ጬንጉርስ ሲሳይስ።

32ኔኖ ሴባማ ዎይኔ ሚዞ!

ኢያዜሬስ ዬኮይሳፌ

ኣዳ ታኒ ኔስ ዬካይስ።

ኔ ሃጋቲ ዳዪዲ ኣባ ፒኒዲ

ኢያዜሬ ጋኪዳ፤

ጊዶ ኣቲን ኔስ ማጻ ጋኪዳ

ካ ኣይፌኔ

ዎይኔ ይሳናይ ዪዴስ።

33ሞኣቤን ኣታኪልቴሶፔኔ

ጎሻ ጋዴፔ

ሃሹ ሂስቲዛዚኔ

ኡፋይሲ ይዴስ፤

ዎይኔ ኡሺ ጉምኢን

ዎንታ ማላ ሜሊሳዲስ፤

ኦኒካ ኢዛ ኢሊሊሼ ጉምኤና፤

ሄን ኣሳ ቃላይ ሲዬቲኮካ

ኢሊሊሳ ጬንጉርስ ጊዴና።

34«ሃሴቦኔፔ ቢዲ ኤልኤሌኔ

ያሃጼ ጋካናስ፥

ዞኣሬፔ ቢዲ ሆሮናይሜ፥

ኤጊላቴ-ሻሊሺያ ጋካናስ

ኢስታ ዋሶይ ኬሂ ሴቴቴስ፤

ኒሚሪሜ ሃ ሜሊዴስ።

35ቃሶሆታ ቦላ ያርሺዛይታኔ

ባንታ ኤቃ ጾሳታስ

ኤጻኔ ጩዋሲዛይታ

ታኒ ሞኣቤ ቢታፌ ይሳና።

36«ታ ዎዚናይ ሞኣቤሲኔ

ቂሬ-ሄሬሴ ኣሳስ ዛዬን

ዬኪዛ ኣሳ ማላ ዬኬስ፤

ጋሶይካ ኢስታ ዱሬቴ

ይዴስ።

37ኣስ ኡባ ሁኤይኔ

ቡቺ ሜዴቲዴስ፤

ባንታ ኩሼካ ጫዴሬዳ፤

ቃሴ ማቃ ማይኢዳ።

38ሞኣቤን ዲዛ ኬ

ኡባኒኔ ዳባባን

ዬሆፔ ኣቲን

ሃራይ ዴና፤

ጋሶይካ ታኒ ሞኣቤ ዴሬ

ሞሆ ኦቶ ማላ

ሜንሬ ዬጋዲስ።

39«ሞኣቤይ ኣይ ሜቆ ሜቂዴ!

ኣሳይ ኣይ ዬሆ ዬኪዜ!

ሞኣቤይ ኣይ ማላ

ዬላቲዲ ዞኮ ዛሪዴ!

ሞኣቤይ ባ ሄራን ዲዛ

ኣሳ ኡባስ

ጫሻሲኔ ሻባርሳስ

ማላታ ጊዲዴስ» ጌስ።

40ጎዳይ፥ «ጎሌይ ባ ቄፌ

ፒዲ ሂስቲ

ፒራ ዎዛ ማላ፥

ሞኣቤ ቦላ ዎና።

41ኢዛ ካታማቲኔ

ኢዛ ሚጻቲ ኦይኬታና፤

ሄ ጋላስ ሞኣቤ

ኦላንቻታ ዎዚናይካ

ሚጻ ኦይኬቲዳ ማጫሳ

ዎዚና ማላ ጊዳና።

42ሞኣቤይ ጎዳ

ካዉሺዳ ጊሻስ ያና፤

ኢዛ ካዎቴይካ ኣታና።

43ኔኖ ሞኣቤ ዴሬዞ!

ኔና ሻባርሲ፥ ኦላይኔ

ዎጺማዴይ ናጌስ።

44«ሻባርሳፌ ባቃቲ ኣቲዳ ኡባይ

ኦላን ጌላና፤

ኦላፌ ኬዚዳይ

ዎጺማዴን ኦይኬታና፤

ታኒ ሞኣቤይ ቃጻዬቲዛ

ላይ ኤሃና ጊሻሳ።

45«ሃሴቦኔፔ ሞኣቤ ሊጴ፥

ጬቄቲዛይታ ፒ

ጹጊዛ ታማይ፥

ታማ ላጮይ ሲሆኔ

ኬፌ ኬዚዴስ፤

ባቃቲ ቢዳይቲ

ሃሴቦኔ ኩዋ ጋርሳን

ባናሶ ይዲ ኤቂዳ።

46ሞኣቤ ኔስ ኣዬ ኣና!

ካሞሼስ ጎይኒዛ

ዴሬይ ዉሪ ዉሪዴስ።

ኔ ኣቱማ ናይቲ ኡባይ ዲኤቲዳ፤

ማጫ ናይቲ ኡባይካ ዲኤቲ ቢዳ።

47«ጊዶ ኣቲን ዉርሴን ሞኣቤፔ

ዲኤቲ ቢዳይታ ታ ዛራና» ጌስ።

ሞኣቤ ቦላ ፒርዴቲዳ

ፒርዳይ ሄሳ።