ፓይዱዋ

ፓይዱዋ ማጻፋ

ገሉዋ

ፓይዱዋ ጌተቴዳ ሀ ማጻፋይ፥ እስራኤልያ አሳ ያራቱዋ ሙሴ ፓይዴዳዋ በስያ ድራሳ። ሲና ደርያፐ ደንዴዳ ዎድያፐ ዶሚደ፥ ጾሳይ ኡንቱንቶ እማና ጌዳ፥ ህዶታ ቢታዉ አዋይ ዉልያ ባጋ ዛዋ ጋካና ጋካናዉ፥ ኦይታሙ ላይ ኡንቱንቱ ደኤዳ ታርክያ ኦዴ። ማጻፋ ሱንይ፥ ግዶን ደእያ ታርከቱዋፐ ዳርያ ክፍልያ በሰ። ሄዌነ እስራኤልያ አሳይ ሲና ደርያፐ ደንዲደ ባናፐ ካሰቲደ፥ ቃይ እት የለታፐ ስምና ዮርዳኖሳ ሻፋፐ አዋይ ዶልያ ባጋና ሞኣበን፥ ሙሴ አሳ ፓይዴዳ ፓይዱዋባ በሰ። ላኡ ፓይዳቱዋፐ ግዱዋን ደእያ ዎደቱዋን እስራኤልያ አሳይ ካናነዉ ገድሳ ባጋ ዛዋ ግድያ ቃዴሳ-ባርነ ጋክ ኡቴዳ። ግዶፐነ ኡንቱንቱ ሄዋና ህዶታ ቢታ ገላናዉ ዳንዳይበይክኖ። ሄዋ ድራዉ፥ ኡንቱንቱ ሄዋ ሄራን ዳሮ ላይ አደ፥ ጉየፐ ዮርዳኖሳ ሻፋፐ አዋይ ዶልያ ባጋና ደእያ ቢታ ቤድኖ። ኡንቱንቱፐ ባጋይ ያን ደአናዉ ቆፋ ቃችና፥ አቴዳ አሳይ ዮርዳኖሳ ፕኒደ፥ ካናነ ባናዉ ባረና ጊግሴዳ።

ፓይዱዋባይ ዳሮ መቱ ጋክያ ዎደ ያይያነ ህዶታ ቃንጽያ አሳቱ ታርክያ፥ ጾሳ ቦላነ ኡንቱንታ ካለና ማላ ጾሳይ ኡንቱንቶ ዶሬዳ ሙሴ ቦላ ማካሊደ ደንዴዳ አሳቱ ታርክያ ኦይቄዳዋ። አሳይ ዳቡራንቻነ ባ ግዶፐነ ጾሳይ ኡንቱንቶ አማነትያዋ ግዲደ፥ ኡንቱንታ ካቦዪደ ዎዳዋ ታርኪ ኦዴ። ሄዋዳንካ ሙሴ እት እቶደን ገንጫ ዮፐ፥ አዉ ምኖ አማኑ ደእያዌ ጾሳዉነ አሳዉ አማነቲደ ኦዳ አሳ እ ግድያዌ ቤቴዳ።

ሸምፓቱዋ ኡባቶ እመቴዳ ቃን ቆፋቱዋ

እስራኤላቱ ሲና ደርያፐ ባናዉ ጊጉሳ

ሀ. ኮይሮ አሳ ፓይዱዋ

ለ. ዱማ ዱማ ህግያነ ዎጋ

ሐ. ላኤን ፓስጋ

ሲና ደርያፐ ሞኣበ ቡሳ

ሞኣበን ኦሰቴዳ ሀኖታቱዋ

ግብጼፐ ሞኣባ ጋካናዉ ደእያ ሀመሳይ ቃንን

ዮርዳኖሳ ፕናናፐ ካሰት እመቴዳ አዛዙዋ