Dawro Full Bible Ethiopic
ፓይዱዋ 19
ቱናተፐ ጌይያ ሃ
መና ጎዳይ ሙሳነ አሮና ሀዋዳን ያጌዳ፤ “መና ጎዳይ ህግያን አዛዜዳ ዎጋይ ሀዋ: ትላ ቦላና ደእያ ዎይ ቦርስያባይ ባይና፥ እ ሞርግያን ሞርገ ምይ ዎቤና ዞኦ ኡሳቶ ነዉ አሀና ማላ፥ እስራኤልያ አሳዉ ኦድተ። ቄስያ ኤልኣዛራዉ እዞ እምተ፤ እ እዞ ዱንካኔዳ ሳኣፐ ጋጻ አፍና፥ እት አሳይ እዞ አ ስንን ሹኮ። ቄስያ ኤልኣዛር እ ሱፐ አማሬዳዋ ባረ ብራያን አኪደ፥ ጋከትያ ዱንካንያዉ ስን ባጋና ላፑን ገደ ጫጫፎ። እ ጼልሽን ኡሳታ ጹገቱ፤ እ ጋልባይ፥ አሹ፥ ሱይነ ቶጪ ጹገቶ። ቄሲ ዝጋ፥ ሂሶጵያ ታሽያነ ዞኦ ቁንጩትያ አኪደ፥ ኡሳቶ ጹግያ ታማን ኦሎ። ሄዋፐ ጉይያን፥ ቄሲ ባረ ማዩዋ ሜጮ፤ ባረ ቦላካ ሃን ሜጨቶ፤ ያትደ ዱንካኔዳሳ ገሎ፤ ሽን ኦማርሳ ጋካናዉ እ ዎጋዳን ቱና ግዳናዋ። ሄ ኡሳቶ ጹጌዳዌ ቃይ ባረ ማዩዋ ሜጮ፤ ባረ ቦላካ ሃን ሜጨቶ፤ እካ ቃይ ኦማርሳ ጋካናዉ ዎጋዳን ቱና ግዳናዋ።
“ሄዋፐ ጉይያን፥ ጌሻ አሳይ ኡሳታ ጹገቴዳ ብድን ሺሺደ፥ ዱንካኔዳ ሳኣፐ ጋጻና ጌሻ ሳኣን ዎ። እስራኤልያ አሳይ ቱናተፐ ጌይያ ሃን ጎኤታናዉ ሄዋ ናግ ዎና፤ ሄዌ ናጋራፐ ጌሻናሳ።1 ቃይ ኡሳት ብድን ሺሼዳ አሳይ ባረ ማዩዋ ሜጮ፤ ኦማርስ ጋካናዉ እ ዎጋዳን ቱና ግዳናዋ። ሀ ዎጋይ እስራኤልያ አሳዉነ ኡንቱንቱ ግዱዋን ደእያ ሀራ ጋደ አሳዉ ላኦካ መና ዎጋ ግዳናዋ።
“ሀይቄዳ አሳ አሃ ቦችያ ኦንነ ላፑን ጋላሳ ዎጋዳን ቱናና። ሄ ቱናተፐ ጌይያ ሃን ሄዛን ጋላስነ ላፑን ጋላስ፥ እ ባረና ጌሾ፤ ሄዋፐ ጉይያን፥ እ ዎጋዳን ጌሻ ግዳናዋ፤ ሽን ሄዛን ጋላሳንነ ላፑን ጋላሳን ባረና ጌሻና ዮፐ፥ እ ጌሻ ግደና። ሀይቄዳ ኡራ አሃ ቦችያ ኦንነ ባረና ጌሸናን አጎፐ፥ መና ጎዳ ዱንካንያ እ ቱንሴ፤ ሄ ኡራይ እስራኤልያ አሳ ግዶፐ ቦሄቶ። ቱናተፐ ጌይያ ሃይ አ ቦላን ጫጫፈትቤና ድራዉ፥ እ ቱና፤ አ ቱናተይ አ ቦላን ጋምኤ።
“እት ኡራይ ዱንካንያ ግዶን ሀይቆፐ ደእያ ዎጋይ ሀዋ: ዱንካንያ ግዶ ገልያ ኦንነ፥ ቃይ ዱንካንያ ግዶን ደእያ ኡባይካ ላፑን ጋላሳ ቱና ግዳናዋ። ሄዋዳንካ፥ ቁምኤተናን ዶያ ደእያ ሚሻ ኡባይ ቱና ግዳናዋ። ቃይ ደምባን ማሻን ሀይቄዳ አሳ፥ ዎይ ጮ ሀይቄዳ አሃ፥ ዎይ አሳ መቀ፥ ዎይ ዱፉዋ ቦችያ ኦንነ ላፑን ጋላሳ ቱና ግዳናዋ።
“ቱናተፐ ጌሻናዉ ጹጌዳ ኡሳት ብድንፐ አማሬዳዋ አካደ፥ ኦቱዋን ዎደ፥ ፑልቶ ሃ አን ትጋ፤ ጌሻ አሳይ ሂሶጵያ ቦንጭያ አኪደ፥ ሃን ቱሽ ከሲደ፥ ዱንካንያ፥ ዱንካንያን ደእያ ሚሻ ኡባንነ ሄዋን ደእያ አሳ ኡባ ቦላን ጫጫፎ። ቃይ አሳ መቀ፥ ዎይ ዱፉዋ፥ ዎይ ዎዳ ኡራ፥ ዎይ ሀይቄዳ ኡራ ቦቼዳ አሳ ቦላ እ ጫጫፎ። ጌሻ አሳይ ሄዘንነ ላፑን ጋላሳን ቱኔዳ ኡራ ቦላን ጫጫፎ። እ ላፑን ጋላሳን ሄ ኡራ ቱናተፐ ጌሾ፤ ሄ ጌዬዳ ብታኒ ባረ ማዩዋ ሜጮ፤ ባረ ቦላካ ሃን ሜጨቶ፤ ሄ ጋላሳ ኦማርስ እ ጌሻ ግዳናዋ።
“ሽን ቱና ኡራይ ባረና ጌሸናዋ ግዶፐ፥ ሄ ኡራይ መና ጎዳ ጌሻ ሳኣ ቱንሴዳ ድራዉ፥ እስራኤልያ አሳ ግዶፐ ቦሄቶ፤ ቱናተፐ ጌይያ ሃይ አ ቦላን ጫጫፈትቤና ድራዉ፥ እ ቱና። ሀዌ ህንተንቶ መና ዎጋ ግዳናዋ። ቃይ ቱናተፐ ጌይያ ሃ ጫጫፍያ አሳይ ባረ ማዩዋ ሜጮ፤ ቱናተፐ ጌይያ ሃ ቦችያ ኦንነካ ኦማርስ ጋካናዉ ቱና ግዳናዋ። ቱና ኡራይ ቦችያ አያይነ ቱኔ። ቃይ ሄዋ ቦችያ ኦንነ ኦማርሳ ጋካናዉ ቱና ግዴ” ያጌዳ።
Source notes (1)
- Cross-reference እብራ. 9:13
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.