Dawro Full Bible Ethiopic
ፓይዱዋ 29
ማላካታ ባላ
(ዎጋ 23:23-25)
“ ‘ላፑን አግናዉ ኮይሮ ጋላሳን፥ ጌሻ ሺቁዋ ሺቅተ። ዳቡርስያ ኦሶ አያነ ኦፕተ። ሄ ጋላሳይ ጹሩምባይ ፑነትያ ጋላሳ። መና ጎዳዉ ሳዉዋ ቶሹኩ ጋና ማላ፥ ጹግያ ያርሾ፥ እት ኮሩማ፥ እት ዶርሳ ኦርግያነ እት ላይ ግዴዳ ላፑን ዶርሳ ኦርገቱዋ፥ ኡባይካ ትላ ቦላና ደእያዋንታ፥ ያርሽተ። ካ ያርሾ እት ኮሩማና ዛይትያን ሙናቀቴዳ ሄዙ ኪሎ ግራመ ግድያ ሙሩታ ዛርጋ ልያ፥ እት ዶርሳ ኦርግያና ላኡ ኪሎ ግራመ ልያነ ላፑን ዶርሳ ማራቱዋፐ እት እት ማራና እት ኪሎ ግራመ ልያ ያርሽተ። ቃይ እት ዴሻ ኦርግያ ናጋራ ያርሾ፥ ህንተ ናጋራ አቶ ጊሳናዉ ያርሽተ። ሄዋንታ አግናይ ጼርያ ጋላሳን ጹግያ ያርሹዋ ቦላነ አ ካ ያርሹዋ ቦላ፥ ሀች ሀች ጹግያ ያርሹዋ ቦላ፥ አ ካ ያርሹዋ ቦላነ አ ኡሻ ያርሹዋ ቦላ ጉጂደ፥ ዎጋዳን ያርሽተ፤ ሀዋንቱ መና ጎዳዉ ሳዉዋ ቶሹኩ ግያ፥ ታማን ያርሽያ ያርሾቱዋ።
ናጋራ አቶ ጊስያ ጋላሳ ያርሹዋ
(ዎጋ 23:26-32)
“ ‘ሀ ላፑን አግናዉ ታማን ጋላሳን ጌሻ ሺቁዋ ሺቅተ፤ ህንተ ሁጲያ ካዉሽተ፤ አያ ኦሱዋካ ኦፕተ።1 ያቲደ መና ጎዳ ቶሹኩ ጊደ ሳዋና ማላ፥ ጹግያ ያርሾ እት ኮሩማ፥ እት ዶርሳ ኦርግያነ እት ላይ ግዴዳ ላፑን ዶርሳ ኦርገቱዋ፥ ኡባይካ ትላ ቦላና ደእያዋንታ፥ ያርሽተ። ካ ያርሾ እት ኮሩማና ዛይትያን ሙናቀቴዳ ሄዙ ኪሎ ግራመ ግድያ ሙሩታ ዛርጋ ልያ፥ እት ዶርሳ ኦርግያና ላኡ ኪሎ ግራመ ልያነ ላፑን ዶርሳ ማራቱዋፐ እት እት ማራና እት ኪሎ ግራመ ልያ ያርሽተ። ቃይ ናጋራ ያርሾ እት ዴሻ ኦርግያ ያርሽተ። ሄዋንታ ናጋራ አቶ ጊስያ ያርሹዋ ቦላ፥ ሀች ሀች ጹግያ ያርሹዋ ቦላ፥ ኡንቱንቱ ካ ያርሹዋ ቦላነ ኡንቱንቱ ኡሻ ያርሹዋ ቦላ ጉጂደ ያርሽተ።
ዳስያ ባላ ያርሾቱዋ
(ዎጋ 23:33-44)
“ ‘ላፑን አግናን ታማነ እቼሸን ጋላሳን፥ ጌሻ ሺቁዋ ሺቅተ፤ ዳቡርስያ ኦሶ አያነ ኦፕተ። መና ጎዳዉ ዳስያ ባላ ላፑን ጋላሳ ቦንችተ። መና ጎዳ ቶሹኩ ጊደ ሳዋና ማላ፥ ታማን ያርሽያ ታማነ ሄዙ ኮሩማቱዋ፥ ላኡ ዶርሳ ኦርገቱዋነ እት ላይ ግዴዳ ታማነ ኦይዱ ዶርሳ ኦርገቱዋ፥ ኡባይካ ትላ ቦላና ደእያዋንታ፥ ያርሽተ። ካ ያርሾ ታማነ ሄዙ ኮሩማቱዋፐ እት እት ኮሩማና ዛይትያን ሙናቀቴዳ ሄዙ ኪሎ ግራመ ግድያ ሙሩታ ዛርጋ ልያ፥ ላኡ ዶርሳ ኦርገቱዋፐ እት እት ኦርግያና ላኡ ኪሎ ግራመ ልያነ ታማነ ኦይዱ ዶርሳ ማራቱዋፐ እት እት ማራና እት ኪሎ ግራመ ልያ ያርሽተ። ቃይ ናጋራ ያርሾ እት ዴሻ ኦርግያ ያርሽተ። ሄዋንታ ሀች ሀች ጹግያ ያርሹዋ ቦላ፥ አ ካ ያርሹዋ ቦላነ አ ኡሻ ያርሹዋ ቦላ ጉጂደ ያርሽተ።
“ ‘ላኤን ጋላሳን ታማነ ላኡ ኮሩማቱዋ፥ ላኡ ዶርሳ ኦርገቱዋነ እት ላይ ግዴዳ ታማነ ኦይዱ ዶርሳ ኦርገቱዋ፥ ኡባይካ ትላ ቦላና ደእያዋንታ፥ ያርሽተ። ኮሩማቱዋና፥ ዶርሳ ኦርገቱዋናነ ዶርሳ ማራቱዋና፥ ኡንቱንቱ ካ ያርሹዋነ ኡንቱንቱ ኡሻ ያርሹዋ ዎጋይ አዛዝያ ፓይዱዋዳን ያርሽተ። ቃይ ናጋራ ያርሾ እት ዴሻ ኦርግያ ያርሽተ። ሄዋንታ ሀች ሀች ጹግያ ያርሹዋ ቦላ፥ አ ካ ያርሹዋ ቦላነ አ ኡሻ ያርሹዋ ቦላ ጉጂደ ያርሽተ።
“ ‘ሄዘን ጋላሳን፥ ታማነ እት ኮሩማቱዋ፥ ላኡ ዶርሳ ኦርገቱዋነ እት ላይ ግዴዳ ታማነ ኦይዱ ዶርሳ ኦርገቱዋ፥ ኡባይካ ትላ ቦላና ደእያዋንታ፥ ያርሽተ። ኮሩማቱዋና፥ ዶርሳ ኦርገቱዋናነ ዶርሳ ማራቱዋና፥ ኡንቱንቱ ካ ያርሹዋነ ኡንቱንቱ ኡሻ ያርሹዋ ዎጋይ አዛዝያ ፓይዱዋዳን ያርሽተ። ቃይ ናጋራ ያርሾ እት ዴሻ ኦርግያ ያርሽተ። ሄዋንታ ሀች ሀች ጹግያ ያርሹዋ ቦላ፥ አ ካ ያርሹዋ ቦላነ አ ኡሻ ያርሹዋ ቦላ ጉጂደ ያርሽተ።
“ ‘ኦይደን ጋላሳን፥ ታሙ ኮሩማቱዋ፥ ላኡ ዶርሳ ኦርገቱዋነ እት ላይ ግዴዳ ታማነ ኦይዱ ዶርሳ ኦርገቱዋ፥ ኡባይካ ትላ ቦላና ደእያዋንታ፥ ያርሽተ። ኮሩማቱዋና፥ ዶርሳ ኦርገቱዋናነ ዶርሳ ማራቱዋና፥ ኡንቱንቱ ካ ያርሹዋነ ኡንቱንቱ ኡሻ ያርሹዋ ዎጋይ አዛዝያ ፓይዱዋዳን ያርሽተ። ቃይ ናጋራ ያርሾ እት ዴሻ ኦርግያ ያርሽተ። ሄዋንታ ሀች ሀች ጹግያ ያርሹዋ ቦላ፥ አ ካ ያርሹዋ ቦላነ እዛ ኡሻ ያርሹዋ ቦላ ጉጂደ ያርሽተ።
“ ‘እቼሸን ጋላሳን፥ ኡዱፑን ኮሩማቱዋ፥ ላኡ ዶርሳ ኦርገቱዋነ፥ እት ላይ ግዴዳ ታማነ ኦይዱ ዶርሳ ኦርገቱዋ፥ ኡባይካ ትላ ቦላና ደእያዋንታ፥ ያርሽተ። ኮሩማቱዋና፥ ዶርሳ ኦርገቱዋናነ ዶርሳ ማራቱዋና ኡንቱንቱ ካ ያርሹዋነ ኡንቱንቱ ኡሻ ያርሹዋ ዎጋይ አዛዝያ ፓይዱዋዳን ያርሽተ። ቃይ ናጋራ ያርሾ እት ዴሻ ኦርግያ ያርሽተ። ሄዋንታ ሀች ሀች ጹግያ ያርሹዋ ቦላ፥ አ ካ ያርሹዋ ቦላነ አ ኡሻ ያርሹዋ ቦላ ጉጂደ ያርሽተ።
“ ‘ኡሱፑን ጋላሳን፥ ሆስፑን ኮሩማቱዋ፥ ላኡ ዶርሳ ኦርገቱዋነ እት ላይ ግዴዳ ታማነ ኦይዱ ዶርሳ ኦርገቱዋ፥ ኡባይካ ትላ ቦላና ደእያዋንታ፥ ያርሽተ። ኮሩማቱዋና፥ ዶርሳ ኦርገቱዋናነ ዶርሳ ማራቱዋና ኡንቱንቱ ካ ያርሹዋነ ኡንቱንቱ ኡሻ ያርሹዋ ዎጋይ አዛዝያ ፓይዱዋዳን ያርሽተ። ቃይ ናጋራ ያርሾ እት ዴሻ ኦርግያ ያርሽተ። ሄዋንታ ሀች ሀች ጹግያ ያርሹዋ ቦላ፥ አ ካ ያርሹዋ ቦላነ አ ኡሻ ያርሹዋ ቦላ ጉጂደ ያርሽተ።
“ ‘ላፑን ጋላሳን፥ ላፑን ኮሩማቱዋ፥ ላኡ ዶርሳ ኦርገቱዋነ እት ላይ ግዴዳ ታማነ ኦይዱ ዶርሳ ኦርገቱዋ፥ ኡባይካ ትላ ቦላና ደእያዋንታ፥ ያርሽተ። ኮሩማቱዋና፥ ዶርሳ ኦርገቱዋናነ ዶርሳ ማራቱዋና ኡንቱንቱ ካ ያርሹዋነ ኡንቱንቱ ኡሻ ያርሹዋ ዎጋይ አዛዝያ ፓይዱዋዳን ያርሽተ። ቃይ ናጋራ ያርሾ እት ዴሻ ኦርግያ ያርሽተ። ሄዋንታ ሀች ሀች ጹግያ ያርሹዋ ቦላ፥ አ ካ ያርሹዋ ቦላነ አ ኡሻ ያርሹዋ ቦላ ጉጂደ ያርሽተ።
“ ‘ሆስፑን ጋላሳን ጌሻ ሺቁዋ ሺቅተ፤ ዳቡርስያ ኦሶ አያነ ኦፕተ። ታማን ያርሽያ ያርሹ መና ጎዳ ቶሹኩ ጊደ ሳዋና ማላ፥ እት ኮሩማ፥ እት ዶርሳ ኦርግያነ እት ላይ ግዴዳ ላፑን ዶርሳ ኦርገቱዋ፥ ኡባይካ ትላ ቦላና ደእያዋንታ፥ ያርሽተ። ኮሩማና፥ ዶርሳ ኦርግያናነ ዶርሳ ማራቱዋና ኡንቱንቱ ካ ያርሹዋነ ኡንቱንቱ ኡሻ ያርሹዋ ዎጋይ አዛዝያ ፓይዱዋዳን ሺሽተ። ቃይ ናጋራ ያርሾ እት ዴሻ ኦርግያ ያርሽተ። ሄዋንታ ሀች ሀች ጹግያ ያርሹዋ ቦላ፥ አ ካ ያርሹዋ ቦላነ አ ኡሻ ያርሹዋ ቦላ ጉጂደ ያርሽተ።
“ ‘ህንተ ሺቆዋ ጋናዉ ያርሽያ ያርሾቱ ቦላነ ህንተ ህንተ ዶሱዋን ጮ እምያ ያርሾቱ ቦላ፥ ጹግያ ያርሹዋ፥ ካ ያርሹዋ፥ ኡሻ ያርሹዋነ እትፐተ ያርሹዋ፥ ሀዋንታ መና ጎዳ ባላ ህንተ ቦንቻናዉ ኬሬዳ ዎድያን ዎድያን ያርሽተ’ ያጋ” ያጌዳ።
ሙሴ ባረና መና ጎዳይ አዛዜዳዋ ኡባ እስራኤላቶ ኦዴዳ።
Source notes (1)
- Cross-reference ዎጋ 16:29-34
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.