Skip to content
BibleKenya

Dawro Full Bible Ethiopic

ፓይዱዋ 36

ጋድያ ላትያ ማጫ አሳቱዋ

ዮሴፎ ዛራቱዋፐ፥ ምናሰ ናኣ ማኪራ ናኣ ጋላኣደ ያራቱዋ ካፓቱ ሙሴኮነ እስራኤላቱዋ ያራቱዋ ካፓቱዋኮ ዬድኖ። ኡንቱንቱ ዪደ፥ “ኑ ጎዳዉ፥ እስራኤልያ አሳዉ ቢታ ኤጻን ሻካደ እማና ማላ፥ መና ጎዳይ ኔና አዛዜዳ፤ ቃይ ጾሳይ ኑ እሻ ጻሎፍሃዳ ላታ አ ማጫ ናናዉ ኔን እማና ማላ፥ ኔና አዛዜዳ።1 ሌምሶ ኡንቱንቱ ሀራ ዛረ ግድያ እስራኤልያ አሳ ገሎፐ፥ ኡንቱንቱ ላታይ ኑ አዎቱዋ ላታፐ አከቲደ፥ ኡንቱንቱ ገልያ ዛርያዉ ጉጀቴ። ሄዋ ድራዉ፥ ኑዉ ኤጻን እመቴዳ ላታይ ፓጫና። ቃይ እስራኤላቶ እሻታማን ላይ ባላይ ጋክያ ዎደ፥ ኡንቱንቱ ላታይ ኡንቱንቱ ገልያ አሳ ዛርያዉ ጉጀቴ፤ ኡንቱንቱ ላታይ ኑ አዎቱዋ ዛርያ ላታፐ ፓጫና” ያጌዳ።

ሄዋፐ ጉይያን፥ መና ጎዳ ቃላዳን፥ ሙሴ እስራኤላቱዋ ሀዋዳን ያጊደ አዛዜዳ፤ “ዮሴፎ ዛራቱ ግያዌ ልከ። መና ጎዳይ ጻሎፍሃዳ ማጫ ናናቱዋባ አዛዜዳዌ ሀዋ፤ ኡንቱንቱ ባረንቱ ዶሴዳ አስና ገላናዉ ዳንዳዪኖ፤ ሽን ባረንቱ አዉዋ ዛርያፐ ግዳናዉ ኮሼ። እስራኤላቱዋ ላታይ እት ዛርያፐ ሀራ ዛርያዉ አፖ፤ እስራኤልያ ኡባይ ባረ ማይዛ አዎቱዋ ዛሪ ላቴዳ ቢታ ምንሲደ ኦይቆ። እስራኤልያ አሳ ግዶን አይ ዛረፐ ግድናካ፥ ቢታ ላትያ ማጫ ናእ ኡባይ፥ እስራኤሊ ኡባይ ባረ ማይዛ አዎቱዋ ላታ ላታና ማላ፥ አ ባረ አዉዋ ዛረ ግድያ አሳ ገሉ። ሄዋዳን ሀኒደ፥ ላታይ እት ዛርያፐ ሀራ ዛርያዉ ሙለካ አናን ደአና። ሄዋ ድራዉ፥ እስራኤልያ ኡባይ ባረ ማይዛ አዎቱዋ ዛሪ ላቴዳ ቢታ ምንሲደ ኦይቆ” ያጌዳ።

ጻሎፍሃዳ ማጫ ናናይ መና ጎዳይ ሙሳ አዛዜዳዋዳን ኦድኖ። ጻሎፍሃዳ ማጫ ናናይ፥ ማህሎ፥ ትርጾ፥ ሆግሎ፥ ምልኮነ ኖኦ ጌተትያዋንቱ፥ ባረንቱ አዉዋ እሻንቱ ናናቱዋ ገሌድኖ። ኡንቱንቱ ዮሴፎ ናኣ ምናሰ ናናቱ ዛርያ ግዶን አስና ገሌድኖ፤ ኡንቱንቱ ላታይ ኡንቱንቱ አዉዋ ዛርያዉነ ያራዉ አቴዳ።

ያርኮፐ ሄፍንና፥ ዮርዳኖሳ ሻፋ ማታን ደእያ ሞኣባ ደምባን ሙሴ ባጋና መና ጎዳይ እስራኤልያ አሳ አዛዜዳ ህገቱነ ዎጋቱ ሀዋንታ።

Source notes (1)
  1. Cross-reference ፓይ. 27:7

Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.