Dawro Full Bible Ethiopic
ፓይዱዋ 4
ቃሃታ ያራ ግድያ ሌዋቱዋ ኦሱዋ
መና ጎዳይ ሙሳነ አሮና ሀዋዳን ያጌዳ፤ “ሌዊያ ዛራቱዋን ቃሃታ ያራቱዋ ኡንቱንቱ ዳቡዋን ዳቡዋንነ ኡንቱንቱ ሶ አሳን አሳን ሻካደ ፓይዳ፤ የለቶደፐ ላይይ ሀታሙዋፐ ቢደ እሻታሙዋ ጋኬዳ አቱማ አሳ ኡባ፥ ጾሳ ዱንካንያ ግዶን ኦናዉ ይያዋንታ ፓይዳ። ቃሃታ ያራቱ ጾሳ ዱንካንያ ግዶን ኦና ኦሱ ሀዋ: ኡንቱንቱ ኡባፐ አዳ ጌሻ ሚሻቱዋን አዎቲኖ።
“አሳይ ዱንካኔዳ ሳፐ ባናዉ ሀንያ ዎደ፥ አሮንነ አ አቱማ ናናይ ጾሳ ዱንካንያ ግዶ ገሊደ፥ ታቦታ ስን ጋርዱዋ ካቁዋፐ ዎኖ፤ ሄ ጫቁዋ ታቦታ አን ካምኖ። ሄ ካሜዳዋ ቦላካ ዎያ እርባንያ ካምኖ፤ ሄዋ ቦላካ ቃይ ጉጂደ፥ ሳሉዋ ማላትያ ጫርቂያ ካምኖ፤ ቶክያ ካሶቱዋ ኡንቱንቱ ሳጋየቱዋን አኖ።
“ጾሳ ስን ሺሽያ ኡክ ዎያ ጻራጴዛ ቦላን ሳሉዋ ማላትያ ጫርቂያ ሂጽኖ፤ አ ቦላ ሳነቱዋ፥ ጭልፓቱዋ፥ ጹአቱዋነ ኡሻ ያርሾ ጎኤትያ ኦቶቱዋ ዎኖ፤ ቃይ ኡክይ ኡባ ዎደካ አ ቦላፐ ዮፖ። ሄዋ ቦላን ዞኦ ጫርቂያ ሂጺደ፥ እርባንያ ቃይ አ ቦላ ካምኖ፤ ቶክያ ካሶቱዋ ሳጋየቱዋን አኖ።
“ኡንቱንቱ ሳሉዋ ማላትያ ጫርቂያ አኪደ፥ ጾምፕያ ዎያ ባላቱዋ ጾምፐቱዋና፥ ቶይስያ ቃጰቱዋና፥ ኡንቱንታ ዎያባቱዋናነ ዛይትያ ትግያ ጻሮቱዋናካ ኡባ ካምኖ። ያቲደ አካ ሚሻቱዋ ኡባካ እርባንያን ካሚደ፥ ቶክያ ሻንቻማ ቦላን ዎኖ።
“እጻና ጩውስያ ዎርቃ ሳጽንያ ቦላን ሳሉዋ ማላትያ ጫርቂያ ሂጼዳዋ ቃይ እርባንያን ካምኖ፤ ቶክያ ካሶቱዋ ኡንቱንቱ ሳጋየቱዋን አኖ። ሄዋዳንካ፥ ቃይ ጾሳ ዱንካንያ ግዶን ጎኤትያ ሚሻቱዋ ኡባ አኪደ፥ ሳሉዋ ማላትያ ጫርቂያን ጻጽኖ፤ እርባንያን ካሚደ፥ ቶክያ ሻንቻማ ቦላን ዎኖ።
“ያቲደ ናሃስያፐ ኦዳ ያርሽያ ሳኣ ቦላ ደእያ ብድን ድጊደ አ ቦላ ኦቻ ቴራ ማላትያ ጫርቂያ ሂጽኖ። አ ቦላ ያርሽያሳን ጎኤትያ ሚሻቱዋ ኡባ፥ ታማ ጮጨቱዋ፥ አሹዋ ቃጲያ ቃጰቱዋ፥ አካፋቱዋነ ካሽያ ኩይጻሮቱዋ ዎኖ። እርባንያን ካምኖ፤ ቶክያ ካሶቱዋ ኡንቱንቱ ሳጋየቱዋን አኖ።
“አሮንነ አ አቱማ ናናይ፥ ጌሻባቱዋነ ጌሻ ሚሻቱዋ ኡባ ካሚደ ማኮፐነ ዱንካኔዳ ሳኣፐ ደንድያ ዎዲ ጋኮፐ፥ ሄዋ ኡባ ቶካናዉ ቃሃታ ያራቱ ዪኖ። ሽን ጌሻ ሚሻቱዋ ኡንቱንቱ ቦቾፐ ሀይቂኖ። ጾሳ ዱንካንያ ግዶን ደእያ ሄ ሚሻ ቃሃታ ያራቱ ቶክኖ።
“ቄስያ አሮና ናአይ ኤልኣዛር ጾምፕያ ዛይትያዉ፥ ሳዊያ እጻናዉ፥ ሀች ሀች ያርሽያ ካ ያርሹዋነ ኦክያ ዛይትያዉ፥ ቃይ ጾሳ ዱንካንያ ሙልያነ አ ግዶን ደእያ ዱማ ጌሻ ሚሻቱዋ ኡባ ቦላ አዋቶ” ያጌዳ።
ቃይ መና ጎዳይ ሙሳነ አሮና ሀዋዳን ያጌዳ፤ “ቃሃታ ያራቱ ሌዊያ ዛራቱዋፐ ሀይቂደ የና ማላ ጼልተ። ኡባፐ አዳ ጌሻ ሚሻ ማታ ሺቅያ ዎደ፥ ኡንቱንቱ ሀይቀናን ፓጻ አቲደ ደአና ማላ፥ ኡንቱንቶ ሀዋዳን ኦተ: አሮንነ አ አቱማ ናናይ ጾሳ ዱንካንያ ግዶ ገሊደ ቃሃታ ያራቱ ኡባይ ሁጲያን ሁጲያን ኦና ኦሱዋነ ቶካና ቶኩዋ ሻክ ሻኪደ ግሽኖ። ቃሃታ ያራቱ ሀይቀናዳን፥ ኡባፐ አያ ጌሻቱዋ ቄሳቱ ጻጽሽን በአናዉ ግዱዋ ገሎፕኖ” ያጌዳ።
ገርሾና ያራ ግድያ ሌዋቱዋ ኦሱዋ
መና ጎዳይ ሙሳ ሀዋዳን ያጌዳ፤ “ገርሾና ያራቱዋካ ኡንቱንቱ ዳቡዋን ዳቡዋንነ ኡንቱንቱ ሶ አሳን አሳን ሻካደ ፓይዳ፤ የለቶደፐ ላይይ ሀታሙዋፐ ቢደ እሻታሙዋ ጋኬዳ አቱማ አሳ ኡባ፥ ጾሳ ዱንካንያ ግዶን ኦናዉ ይያዋንታ ፓይዳ።
“ገርሾና ያራቱ ኦያ ኦሱነ ቶክያ ቶኩ ሀዋ: ኡንቱንቱ ጾሳ ዱንካንያ ጋርዳቱዋ፥ ጾሳ ዱንካንያ፥ አ ካምያባቱዋነ ቦላና ካምያ እርባንያ፥ ጾሳ ዱንካንያ ገልያሳን ሶትያ ጋርዱዋ ቶክኖ፤ ቃይ ጾሳ ዱንካንያነ ያርሽያ ሳኣ ዩይ አዳ ዳባባ ጋርዳቱዋ፥ ዳባባ ገልያሳ ጋርዱዋ፥ ዎዶሮቱዋነ ኡንቱንቶ ጎእያ ሚሻቱዋ ኡባ ቶክኖ። ገርሾና ያራቱ ሀ ሚሻቱዋን ኦናዉ በስያ ኦሱዋ ኡባ ኦኖ። ቶክያዋ ግድና፥ ሀራ ኦሱዋ ግድናካ ኡንቱንቱ ኦያ ኦሱዋ ኡባይ አሮንነ አ አቱማ ናናይ ኡንቱንታ አዛዝና ኦሰትኖ። ኔን ኡንቱንቱ ቶካናዉ በስያባቱዋ ኡባ ኡንቱንቱ አዎተ አዎተዳን ኡንቱንቶ ግሻ። ጾሳ ዱንካንያ ግዶን ገርሾና ያራቱ ኦና ኦሱ ኡባይ ሀዋ። ኡንቱንቱ ኦና ኦሱዋ ኡባይ ቄስያ አሮና ናኣ እታማራ አዎተ ጋርሳና ግዳናዋ።
ማራራ ያራ ግድያ ሌዋቱዋ ኦሱዋ
“ማራራ ያራቱዋ ኡንቱንቱ ዳቡዋን ዳቡዋንነ ኡንቱንቱ ሶ አሳን አሳን ሻካደ ፓይዳ፤ የለቶደፐ ላይይ ሀታሙዋፐ ቢደ እሻታሙዋ ጋኬዳ አቱማ አሳ ኡባ፥ ጾሳ ዱንካንያ ግዶን ኦናዉ ይያዋንታ ፓይዳ።
“ኡንቱንቱ ጾሳ ዱንካንያ ግዶን ኦና ኦሶቱ ሀዋንታ: ኡንቱንታ ዱንካንያ ጻጋገቱዋ፥ ኩልቦቱዋ፥ ቱሳቱዋነ ገደቱዋ፥ ቃይካ ዳባባ ዩሹዋን ኤቂያ ቱሳቱዋ፥ ሄ ቱሳቱ ገደቱዋ፥ ቶልያ ጻጋገቱዋ፥ ዎዶሮቱዋ፥ ሄዋንቶ ኮሽያ ሚሻቱዋ ኡባነ ሄ ሚሻቱዋና ጋከትያባቱዋ ኡባ ቶክኖ። እት እት ኡራዉ እ ቶካናዋ ሻካደ ግሻ። ጾሳ ዱንካንያ ግዶን ማራራ ያራቱ ኦና ኦሱ ኡባና ሀዋ። ኡንቱንቱ ኦና ኦሶ ኡባይ ቄስያ አሮና ናኣ እታማራ አዎተ ጋርሳና ግዳናዋ” ያጌዳ።
ሌዋቱዋ ፓይዱዋባ
ሙሴ አሮንነ ማባራ ካፓቱ ቃሃታ ያራቱዋ አቱማ አሳ ኡንቱንቱ ዳቡዋን ዳቡዋንነ ኡንቱንቱ ሶ አሳን አሳን ሻኪደ ፓይዴድኖ። የለቶደፐ ላይይ ሀታሙዋፐ ቢደ እሻታሙዋ ጋኬዳ አቱማ አሳቱ ኡባቱ፥ ጾሳ ዱንካንያ ግዶን ኦናዉ ይያዋንቱ፥ ኡንቱንቱ ሶ አሳን አሳን ፓይድና ኡባና 2,750. ቃሃታ ያራቱዋን ጾሳ ዱንካንያ ግዶን ኦዳ አሳ ፓይዱ ሀዋ። መና ጎዳይ ሙሴ ባጋና አዛዜዳዋዳን፥ ሙሴነ አሮን ኡንቱንታ ፓይዴድኖ።
ገርሾና ያራቱካ ባረንቱ ዳቡዋን ዳቡዋንነ ባረንቱ ሶ አሳን አሳን ሻከቲደ ፓይደቴድኖ። የለቶደፐ ላይይ ሀታሙዋፐ ቢደ እሻታሙዋ ጋኬዳ አቱማ አሳቱ ኡባቱ፥ ጾሳ ዱንካንያ ግዶን ኦናዉ ይያዋንቱ፥ ኡንቱንቱ ሶ አሳን አሳን ፓይድና ኡባይ 2,630. ገርሾና ያራቱዋን ጾሳ ዱንካንያ ግዶን ኦዳ አሳ ፓይድና ሀዋ። መና ጎዳይ ሙሴ ባጋና አዛዜዳዋዳን፥ ሙሴነ አሮን ኡንቱንታ ፓይዴድኖ።
ማራራ ያራቱካ ቃይ ዳቡዋን ዳቡዋንነ ባረንቱ ሶ አሳን አሳን ሻከቲደ ፓይደቴድኖ። የለቶደፐ ላይይ ሀታሙዋፐ ቢደ እሻታሙዋ ጋኬዳ አቱማ አሳቱ ኡባቱ፥ ጾሳ ዱንካንያ ግዶን ኦናዉ ይያዋንቱ፥ ኡንቱንቱ ሶ አሳን አሳን ፓይድና ኡባይ 3,200. ማራራ ያራቱዋ ፓይዱ ሀዋ። መና ጎዳይ ሙሴ ባጋና አዛዜዳዋዳን፥ ሙሴነ አሮን ኡንቱንታ ፓይዴድኖ።
ሄዋ ኦደ ሙሴ፥ አሮንነ እስራኤልያ ካፓቱ ሌዋቱዋ ኡባ፥ ኡንቱንቱ ያራን ያራንነ ኡንቱንቱ ሶ አሳን አሳን ሻኪደ ፓይዴድኖ። የለቶደፐ ላይይ ሀታሙዋፐ ቢደ እሻታሙዋ ጋኬዳ አቱማ አሳቱ ኡባቱ፥ ጾሳ ዱንካንያ ግዶን ኦሱዋ ኦናዉነ አዉ ጎእያ ሚሻቱዋ ኡባ ቶካናዉ ዬዳዋንቱ ኡባይ 8,580. መና ጎዳይ ሙሴ ባጋና አዛዜዳዋዳን፥ ኡንቱንቱ ሁጲያን ሁጲያን ኦና ኦሱ ዎይ ቶካና ቶኩካ ኡንቱንቶ ኦደቴዳ። መና ጎዳይ ሙሳ አዛዜዳዋዳን፥ ኡንቱንቱ ኡባይካ ፓይደቴድኖ።
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.