व्यवस्थाविवरण 16

फसह क पर्व

(नीरगमन 12:1-20)

1“आबीब महिना क फोम कोरीन आपना परमेश्वर योहोवा क लिय फसह क पर्व मानजो, काहकी आबीब महिन मा तारो परमेश्वर योहोवा रात क तुसे मिस्र सी निकाल लावलो। 2एकालिय ज जागो योहोवा आपने नाव क रोहने मेकने क नेवाड़ लेसे, हुयो आपना परमेश्वर योहोवा क लिय गाडरा बुकड़ा आरू गाय बुईल फसह कोरिन बली कोरजू। 3ओका संग काई खमीरी चीज नी खाजु; सात दाहड़ा लोगुन विगूर खमिर क रूटू छे खाया कोरजु; काहकी तू मिस्र देश सी उतवाव कोरिन निकळ्यो हुयो एने रीते दी तुख मिस्र देश सी निकळने क दाहड़े जीवन भोरिन फोम रोहेसे। 4सात दाहड़ा लोगुन तारा आखा देश मा तारे पास काही खमीर देखने मा वी नी आवे; आरू ज डुर तू पेहले दाहड़े क सांतो क बलि कोरे ओको मांस मा सी काहीन सोंदरे लोगुन रोहनो नी जुवे। 5फसह क आपना काहना फाटक क धोड़े, जेरो तारो परमेश्वर योहोवा पशु तुसे देदो ओकी बली नी कोरनू; 6ज जागो तारो परमेश्वर योहोवा आपना नाव क रोहेन क लिय नेवाड़ लेये केवल तेनात, हेनेत साल क तेने टेमे जेरेम तू मिस्र सी निकल्यो हुतो, यानी दाहड़ो डुबने पोर सांतीघोड़ि, फसह क डुर बली कोरजु। 7ती ओको मास ओका जागा मा जेनाक तारो परमेश्वर योहोवा नेवाड़िन भुंजिन खाजी; ओळी सोंदारे उठिन आपना आपना डेरा क पोछा जाजु। 8छव दाहड़ा लोगुन अखमिरि रुटा खाया कोरजू; आरू सातवे दाहड़े तारो परमेश्वर योहोवा क लिय महासभा होये; ओक दाहड़े काहने रीते क काम-काज नी कोरजू।

सप्ताहो क पर्व

(नीरगमन 34:22; लैव्यव्यवस्था 23:15-21)

9“ओळतेन जब तू खेत मा दातवो लागाडे, ती सी सुरू कोरिन सात सप्ताह गिनजी। 10तब आपनो परमेश्वर योहोवा क बोरकोत क ओनसारे ओक लिय स्वेच्छाबली आपिन सापतान पर्व मानजू; 11आरू हेना जागा मा ज तारो परमेश्वर योहोवा आपना नाव क निवास करने क निवाड़ लेये आपना आपना पुर्या-पारी, दास-दासी भेळ तू आरू तारा फाटको क धोड़े ज लेवीय होय, आरू ज ज पारको, आरू विखावाळो, आरू रोंडायला तारे वि मा होय, हुये सब क सब आपसो परमेश्वर योहोवा क अगळ क खुशी कोरे। 12आरू फोर राखजू कि तू वि मिस्र मा दास हुतो; एकालिय एनू कायका क विधि पाळन करने मा चौकसी कोरजू।

झोपड़ियों क पर्व

(लैव्यव्यवस्था 23:33-43)

13“तू जब आपना खलिहान आरू दाखमधु क कुण्ड मासी सब काहिन एकठो कोर लेदा, तब झपड़ियों सात दाहड़ा मानवता रोहजू; 14आरू आपना एना पर्व मा आपना आपना पुर्या-पारी, दास-दासी भेळ तू आरू ज लेवीय , आरू पारका , आरू विखावाळा , आरू रोंडायला तारा झोपला क धोड़े होय हुये वी खुशी कोरे। 15ज जागो योहोवा नेवाड़ लेये हेरेम तू आपनो परमेश्वर योहोवा क लिय सात दाहड़ा लोगुन पर्व मानता रोहजू; काहकी तारो परमेश्वर योहोवा तारी आखी वोदती मा आरू तारा सब कामों मा तुसे बोरकोत आपसे; तू खुशी कोरजू। 16साल मा तीन वार, यानी अखमीरी रूटा क पर्व, आरू सापताह क पर्व, आरू झोपड़ियों क पर्व , एनू तीनू पर्व मा तुमरा सब मानसो आपना परमेश्वर योहोवा क अगळ हेना जागा मा क हुये नेवाड़ लेयो जाय। आरू देखू, खाली हात योहोवा क अगळ काहिय न जाय; 17अब मानसे आपसी आपनी पूंजी, आरू हेनू बोरकोत क ओनसारे ज तारो परमेश्वर योहोवा न तुख आप्यो होय, आप्या कोरे।

नियायी क नेवाड़

18“तू आपना एक एक गोत्र मा सी, आपना सब फाटको क धोड़े जेनुक तारो परमेश्वर योहोवा तुक आपे छे नियायी आरू सरदार नेवाड़ कोर लेनो, जे मानसे क नियाय न्यायपन सी कोर्या कोरे। 19तुमू नियाव नी बिगाड़नो; तु नी ते पक्षपात कोरजू; आरू न ती घूस लेजो, काहकी घूस ओकोळमान क डुळा आंधवा कोर देये छे, आरू न्याय क वात पोलट देये छे। 20ज काहीन नितान्त ठिक छे हेरो पोछोळ धोरला रोहजू, जेरेसी जिवतला रोहे, आरू ज देश तारो परमेश्वर योहोवा तख आपे छे ओक होकदारीयो बोनलो रोहे।

अन्य देवताओं क पूजा

21“तू आपना परमेश्वर योहोवा क ज वेदी बोनावसे ओका पास काहने रीते क लाकड़ी क बोनली होई अशेरा क स्थापना नी कोरनो। 22आरू न काई खंबा उबो कोरनो, काहकी हेरेसी तारो परमेश्वर योहोवा घाड़ाय कोरे छे।