व्यवस्थाविवरण 17

1“तू आपना परमेश्वर योहोवा क लिय काही बुईल एने गाडरा-बुकड़ा बली नी कोरनो जेरेमा दोष एने काहने रीते क खुट होय; काहकी ओसो कोरनो तारो परमेश्वर योहोवा क समीप घोरणित छे।

2“ज बोसती तारो परमेश्वर योहोवा तुख आपे छे, काहमाइन हेरेमा सी काई मा कुदु मानुस एने बायोर ओसी पायी जाय, ज तारो परमेश्वर योहोवा क वाचा तुड़िन ओसो काम कोर्यो होय, ज ओकी नजर मा बुरो छे, 3यानी मारी हुकुम तुड़नो कोरिन पारका देवताओ क , एने सुर्य, एने चांद , एने आकाश क गण मा सी कुदा क उपासना क होय, एने ओक वान्दया कोर्या होय, 4आरू यी वात तुसे बतलाई जाय आरू तारे सोमळने मा आवे; ती भली भाँति पुछताछ कोरनू, आरू काहमाईन यी वात छाची रोहे की इसराएली मा ओसी घाड़ाय काम कोर्यो गोयो छे, 5ती जेना मानुस एने बायोर न ओसो भुंडो काम कोर्यो होय, हेना मानुस एने बायोर क खोयड़े आपना झोपला पोर ली जाईन असो दोगड़ा देजो की हुये मोर जाय। 6ज प्राणदण्ड क योग्य कोहाये हुय एक त गोवा सी नी मार्यो जाय, बाखुन दुय एने तीन मानसो क गोवा सी मार्यो जाय। 7ओक मार नाखने क लिय आकासी पेहेल गोवाट क हात, आरू ओका वाद आरू सब मानसो क हात हेर पोर उठे। एने रीते सी ओसी बुराई क आपना विच मा सी नांबे कोरजू। 8काहमाईन तारि बस्तियों क धोड़े काहिय झोगड़ा की वात होये, यानी आपस क लुहुय , एने विवाद , एने मारपीट क काहिय मुकद्दमो उठै, आरू ओक नियाव कोरने तारे लिय कठिन जान पोड़े, ते हेना जागा क जाईन ज तारो परमेश्वर योहोवा नेवाड़ लेसी; 9लेवीय याजको क पास आरू हेनू दाहड़ा क नियाव क पास जाईन पुछताज कोरनू, की हुये तुम क नियाव क वाते देखाड़े। 10आरू नियाव क जोसी वात हेना जागा क मानसे ज योहोवा नेवाड़ लेसे तुसे बताड़ देये, ओक ओनसारे कोरजू ; आरू ज व्यवस्था हुये तुसे आपे ओक ओनसारे चालने मा चौकसी कोरजू; 11वेवोसथा क ज वात हुये तुख बताड़े, आरू नियाव क ज वात हुये तार सी कोहे, ओकज ओनसारे कोरजू; ज वात हुये तुख बताड़े ओक दायने एने डाक्रे नी वोवजी। 12आरू ज मानुस डाहवाय करीन ओक याजक क, जो होंया तारा परमेश्वर योहोवा क सेवा चाखरी करने क हजर रोहसे, नी माने, एने ओक नियायी क नी सोमळे ती हुये मानुस मार नाख्यो जाय; ओस करीन तू इसराएली मा सी ओसी बुराय क दूर कोरजू। 13एरेसी सब मानसे सोमळीन बिह जासे, आरू ओळतेन डाहवाय नी कोरसे।

राजा को केसे चुने

14“जब तू हेना देश मा पूगीन जेनाक तारो परमेश्वर योहोवा तुसे आपे, आरू ओक होकदारीयो होय, आरू हेरेम बसीन कोहने लागे, की च्यारू मेर क सब देश क जोसा हाव वी आपने उपोर राजा राखीस; 15ती जेनाक तारो परमेश्वर योहोवा नेवाड़ लेये हेनाक राजा राकजू।आपना भास्यो मा सी कुदाक आपने उपोर राजा राकजू; काहना पारका क ज तारो भाई नी होय तू आपने उपोर राजा नी राक सोकू। 16आरू हुयो घोना घुल्ला नी राके, आरू नी एरी मनसा सी आपनी प्रजा क मानसो क मिस्र मा मुकले की ओक पास घोना घुल्ला होय जाय, काहकी योहोवा न तुमरे सी कोयो छे, की तुमू हेना वाटो सी ओळी कोदी नी पोछा आवजु। 17आरू हुये घोना बायरा वी नी राखे, ओसो नी होये की ओक मन योहोवा क भेनी सी पलट जाय; आरू नी हुये आपना सोना रूपया घोना वोदाड़े। 18आरू जब हुये राजगादी पोर बोस जाय, ती एरी वेवोसथान क पुस्तक, ज लेवीय याजको क पास रोहसे, ओकी एक नकल आपने लिय कोर ले। 19आरू हुये ओक आपने पास राख , आरू आपना जीवन भोर ओक भोन्या कोरे, जेरेसी हुयो आपना परमेश्वर योहोवा क बिक मानजू, आरू ओकी वेवोसता विधिआरि एनू वायका क आखी वातो क मानने मा चौकसी कोरनो सीकू; 20जेरेसी हुये आपना मोन मा घाड़ाय करीन आपना भास्यो क तुच्छ नी जाने, आरू एनू कायदा सी नी ते जेवड़ियो वोवे आरू नी डाख्रे; जेरेसी की हुयो आरू ओक ओवलियाद क मानसे इसराएलीयों क वि घोना दाहड़ा लोगुन राज कोरता रोहे।