Dhankavi Bible
व्यवस्थाविवरण 18
लेवीय आरू याजको क वाटो
“लेवीय याजको क, वरन् आखा लेवीय गोत्रियों क, इसराएलीयों क पुठी कुदु वाटो एने अंश नी होय; ओक भोजन हव्य आरू योहोवा क आपलो वाटो होय। ओक आपना भास्यो क विच काहनो वाटो नी होये; काहकी आपना बुल क ओनसारे योहोवा ओक निज वाटो कोहाये छे। आरू चाहे गाय-बुईल चाहे गाडरा-बुकड़ा क मेलबली होय, ओक कोरनेवाळा मानसे क भीनी सी याजकों क हक यो होये, कि हुये ओक खांदा आरू दुयो गालो आरू पेट याजक क आपे। तू ओक आपसी पेहली उपज क अन , ओवलो दाखमधु, आरू जेतुन तेल, आरू आपना गाडराक हुया रूई आपजु ज पेहली वार कातरलो होय। काहकी तारो परमेश्वर योहोवा न तार सब गोत्रियों मासी ओक नेवाड़ लेदो छे, की हुयो आरू ओक ओवलियाद सदा ओक नाव सी सेवा चाखरी करने क हजुर होया कोरे।
“ओळतेन काहमाइन लेवीय इसराएली की बस्ती मा सी कुदा सी, जाँ हुये पारका क जोसो रोहतो होय, आपना मन क मोटी अभिलाशा सी ओक जागा पोर जाय जेनाक योहोवा नेवाड़ लेसे, ती आपना सब लेवीय भास्यो क जसो ज जाँ आपना परमेश्वर योहोवाक अगळ हजर होयसे, हुये वी ओक नाव सी सेवा चाखरी कोरे। आरू आपना डाहडा क वाट क मुलेन छुड़िन ओक भुजन क वाटो वी हेंदरे जोसो मिळ्या कोरे।
मूर्तिपूजक कायदा सी चोकचोया
“ जब तू हेना देश मा पुगिन ज तरो परमेश्वर योहोवा तुख आपे छे,तब होंया क देश क ओनसारे भुन्डला काम कोरने झूणी सीकजी। तारेम काहिन ओसो नी होये ज आपना पुर्या एने पुराय क आगठा मा होम कोरीन चढावनेवाळो,एन भावी कहने-वाळा, एने शुभ-अशुभ मुहूरूत क माननेवाळो , एने टोन्हा, एने तांत्रिक, एने मोहनी वाळने वाळो, एने ओझो सी पुछनेवाळा, एने भुतडा साधनेवाळा, एने भुतड़ा क जागाड़नेवाळो होय। काहकी जोतरा ओसा ओसा काम कोरे छे हुये सब योहोवा क अगळ क वारू नी छे; आरू एनी भुन्डा कामो क कारन तारो परमेश्वर योहोवा ओक तारे अगळ सी निकाळने पोर छे। तू आपना परमेश्वर योहोवा क अगळ खोरलो बोनलो रोहे।
परमेश्वर क सामने निर्दोष बोवना रोहनु
“हुये देश जेरो होकदारीयो तू हौयने पोर छे शुभ-अशुभ मुहूत्तों क माननेवाळो आरू भावी कोहनेवाळा क सोमळ्या कोर छे; बाखुन तुख तारे परमेश्वर योहोवा न ओसो कोरने नी देदो। तारो परमेश्वर योहोवा तारे विच सी, यानी तारा भास्यो मा सी मारे जसो एक नबी क उबजाड़से; तू ओकी समळजी; यो तारी हेनी विनती क ओनसारे होयसे, ज तु न होरेब बोयड़ा क पास सभा क दाहड़े आपना परमेश्वर योहोवा सी कोर्यो हुतो ‘मक नि ते आपना परमेश्वर योहोवा क बुल ओळतेन सोमळजी आरू न होयी मोटी आगठो ओळी देखनो पोड़े, काहिय ओसो नी होये की मोर जावू।’ तब योहोवा न मारे सी कोयो, ‘हुये ज काहिन कोये छे वारू कोहे छे। एकालिय हाव ओका लिय हेरा भास्यो क वीच मा सी तारे जसो एक नबी क पोयदा कोरीस; आरू आपना बुल ओका मन मा नाखीस; आरू जी जी वात क हाव ओक हुकूम आपीस चोत हुयो हेनुक कोहीन सोमवड़से। आरू ज मनुस मारा हुये बुल ज हुये मारे नाव सी कोहसे ग्रहण नी कोरसे, हांव हेको हिसाब हेका सी लिस। बाखुन ज नबी डाहवाय करीन मारा नाव सी काहिय ओसो बुल कोहे जेरो हुकुम मैन ओक नि आप्यो होय,एने पारका देवताओं क नाव सी काहिन कोहे, हुये नबी मार नाख्यो जासे।’ आरू काहमाईन तू आपना मोन मा कोहे, ‘ज बुल योहोवा न नी कोयो, ओक हामु काहने रीते सी उळखे?’ ती उळोख यी छे की जब काहनो नबी योहोवा क नाव सी काहिन कोहे,तब काहमाइन हुये बुल नी घटे आरू पूरो नी होय जाय,ती हुये बुल योहोवा क कोहलो नी; बाखुन हेना नबी न होयी वात डाहवाय करीन कोहली छे, तू हेरेसी बिहये झुणी।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.