व्यवस्थाविवरण 19

खूनी क लिय शरणनगर

(गिनती 35:9-28; यहोसु 20:1-9)

1“जब तारो परमेश्वर यहवा हेनू राष्ट्रयों क नाश कोरे जिनदरो देश हुये तुख आपे छे, आरू तू ओका देश क होकदारीयो हौईन ओक नगर आरू घरो मा रोहने लागू, 2ती आपना देश क वीच जेरो होकदारीयो तारो परमेश्वर योहोवा तुख कोर आपे छे, तीन नगर आपने लिय अगळ कोर देजू। 3आरू तू आपने लिय वाट वी तीयार कोरजू, आरू आपना देश क ज तारो परमेश्वर योहोवा तूख सौंप देदे छे तीव वाटो कोरजू, ताकि होर एक खुनी होंया ढास जाय। 4आरू ज खुनी होंया ढासीन आपना जिव क वाचाड़े , हुयो ओस कोरिन क होय; यानी हुयो काहने सी विगुर बैर राखे एने ओक विगूर जाने बुझीन मार नाख्यो होय - 5जोसो काहीन कुदाक पुठी लाकड़ा काटने क जंगल मा जाय , आरू झाड़ काटने क कुराड़ी हात सी चुटे, आरू कुराड़ी डांडा सी निकळिन हेना भाई क ओसो लागे की हुयो मोर जाय - ती हुयो हेना नगर मा सी काहना मा ढासीन जिवतलो रोहे; 6ओसो नी होये की वाट क नांबाय क कारण खून क पलटो लेनेवाळो आपसी रीस क ज्वलन मा ओक पोछो करीन ओक जाय धोरे, आरू मार नाखे, यद्यपि हुयो प्राणदण्ड क योग्य नी, काहकी हेरे सी बैर नी राखतो हुतो। 7एकालिय हाव तुसे तो हुकुम आपो , की आपने लिय तीन नगर अलग कोर राखजी।

8“काहमाईन तारो परमेश्वर योहोवा हेनी शपथ क ओनसारे ज हुयो तारा डाहडा सी खादो हुतो तारी सीमा क वोदाड़ीन हुयो आखो देश तुख आपे, जेनाक आपनेन बुल हुयो तारा डाहडा क आप्यो हुतो - 9काहमाइन तू एनू सब कायदा क मानीन हाव जेनूक हाव आज तुक सोमवाड़ो चौकसी कोरे, आरू आपना परमेश्वर योहोवा सी मोंग राखे आरू सदा ओका वाटो पोर चालतो रोहे - ती एनू तीन नगर सी जादा आरू वी तीन नगर अलग कर देजो, 10एकालिय की तारो देश मा ज तारो परमेश्वर योहोवा तारो निज वाटो कोरिन आपे‌ छे काहना विनगुनावान क खुन नी उहवाड़्यो जाय, आरू ओक गुनु तार पोर नी लागे।

11“बाखून काहमाइन साते वाळा सी बैर राखीन ओकी घात मा लागे , आरू हेर पोर लोपकीन हेनाक ओसो मारे की हुयो मोर जाय, आरू ओळतेन हेनू नगर मा सी काहीन मा वाटे जाय; 12ती ओक नगर क पुरनिये कुदाक मुकलिन ओको होंया सी माँगाड़िन खून क पलटो लेनेवाळो क हात मा सौंप देये, की हुये मार नाख्यो जाय। 13हेर पोर तरस नी खानो, बाखुन विनगुनावा क गुनु इसराएली सी नांबे कोरजु, जेरेसी तुमरो भलो होये।

वेगली सीमा

14“ज देश तारा परमेश्वर योहोवा तुख आपे छे, होक ज वाटो तुख मिळसे , हेरेमा काहीन क सीमा जेरा प्राचीन मानसो न ठहरायो होय नि हटाड़जो।

गोवायन कायदा

15“काहना मानुस क विरूद्ध काहने रीते क अपराध एने पाप क वाराम मा, चाहे ओक पाप कोसो वी काहनी होय, एक त जन क गोवा नी सोमळजो, बाखु न दुय एने तीन गोवा क कोहने सी वात पाकी कोहाये। 16काहमाइन कुदु झुटो गोवा आपनेवाळो काहना क विरुद्ध योहोवा सी ओळी जाने क गोवा आपने क उबो होय, 17ती हुये दुय मानसो , जेनदरा विच ओसो मुकद्दमो उठे होय, योहोवा क अगळ , यानी हेनू दाहड़ा क याजको आरू नियानो क अगळ उबा कोर्यो जाय; 18तब नियायी भले भाँती पुछताछ कोरे, आरू काहमाइन एना निर्णय पोर पुगे की हुयो झुटो गोवा छे, आरू आपना भाई क विरूद्ध झुटो गोवा आपतो छे 19ती आपना भाई क जसी हानी कोरावने क युक्ती हुयो कोर्यो होय तोसी त तुमू वी कोरजू; एने रीते सी आपना विच मा सी ओसी बुराई क दुर कोरजू। 20तब दिसरा मानसे समळीन बिहसे, आरू अगळ क तारे विच ओळी ओसो भूंडो काम नि कोरसे। 21आरू तू बिल्कूल तरस नी खाजी; प्राण क बोदले प्राण क, डुळा क बोदले डुऴा क, दाँत क बोदले दाँत, हात क बोदले हात, पाय क बोदले पाय क डोन आपजु।