व्यवस्थाविवरण 20

युद्ध पोर जाने क कायदा

1“जब तू आपना दुसमोन सी युद्ध कोरने क जाय, आरू घुल्ला, रथ, आरू आपना सी जादा सेना क देखे, तब ओका सी नी बिहजी; तारो परमेश्वर योहोवा ज तुख मिस्र देश सी निकाळ ली आयो छे हुयो तारे पुठी छे। 2आरू जब तुमू युद्ध करने क दुसमोल क धोड़े जावु, ती याजक सेना क पास आवीन कोहे, 3‘हे इसराएली सोमळ्ळु, आज तुमू आपना दुसमोन सी युद्ध करने क धोड़ आया होय; तुमरा मोन काचा नी होये; तुमू मा बिहयू, आरू नी थरथरावू आरू नी ओक सामने बिक खावू; 4काहकी तुमरो परमेश्वर योहोवा तुमरा दुसमोल सी युद्ध करने आरू तुमुक वाचाड़ने क लिय तुमरे पुठी पुठी चाले छे।’ 5ओळी सरदार सीपायड़ा सी यो कोहु, तुमरे मा सी कुन छे ज नोवलो घोर बोनावलो छे आरू ओका समर्पण नी कोर्यो होय? ति हुयो आपने घोर क लौट जाय, काही ओसो नी होये कि हुयो युद्ध मा मोर जाय आरू दिसरो मानुस समर्पण कोरे। 6आरू कुन छे ज दाख क वाड़ी लागाड्यो होय, बाखून ओक फोव नी खादो होय? हुयो वी आपने घोर क लौट जाय, ओसो नी होये की हुयो संग्राम मा मोर जाय, आरू दिसरो मानुस ओक फोव खाय। 7ओसो कुन छे ज काहनी बायोर सी इयाव क वात कोरलो होय, बाखून ओक इयाव कोरीन नी लायो होय? चो वी आपने घोर क पोछो जाय, ओसो नी होये की हुयो युद्ध मा मोर जाय, आरू दिसरो मानुस हेरेसी इयाव कोर लेये। 8एरे अलावा सरदार सीपायड़ा सी यो वी कोहे, ‘कुन कुन मानुस छे ज डरपोक आरू काचा मोन क छे, हुयो वी आपना घोर क पोछो जाय, ओसो नी होये कि ओकी देखादेखी ओका भास्यो क वी हियाव टूट जाय।’ 9आरू जब प्रधान सीपायड़ा सी यो कोय देये, ती हेनू पोर नियुक्ती करने क करता सेनापती क नेवाड़ कोरे।

10“जब तू काहना नगर सी युद्ध केरने क ओक धोड़ जाय, ती पेहेल हेरेसी शांती क प्रस्‍ताव आप। 11आरू काहमाइन हुयो सन्धि कोरने सीवकार कोरे आरू तारे लिय आपना झोपला उगाड़ देये ती जोतरा हेरेमा होय हुये सब तारा होकोम होईन तारे लिय चाखरी कोरनेवाळा कोहाये। 12बाखून काहमाईन हुये तार सी शांती नी कोरे, बाखुन तार सी लोड़ायने चाहे, ती ती हेना नगर क घेर लेजी; 13आरू जब तारो परमेश्वर योहोवा हेनाक तारा हात मा सौंप देये ती हेरेम क सब मानसो क तलवार सी मार नाखजू। 14बाखून बायरा आरू बाळ-बच्चा, आरू डुरे आदि जोतरो लूट हेना नगर मा होय ओक आपने लिय राख लेजो; आरू तारा शत्रू क लूट ज तारो परमेश्वर योहोवा तुसे आपे हेनाक काम मा लावजी। 15ओस कोरीन हेना नगर सी कोरजी ज तुख बेस नांबे छे, आरू ज याँ क राष्ट्र क नगर नी छे। 16बाखुन ज नगर एनू मानसो क छे, जेरो होकदारीयो तारो परमेश्वर योहोवा तुक मेकने पोर छे, हेरेम सी काहना प्राणी क जिवतलो नी मेक छुड़े, 17बाखून ओक छाचिन सत्यनाश कोरजू, यानी हित्तियो, एमोरियो, कनानियो, परिज्जियों, हिब्बिया क, यबूसियों जोसो की तारो परमेश्वर योहोवा न तुक हुकुम आप्यो छे; 18ओसो नी होये की जोतरा भुन्डा कामहुये आपना देवताओं क चाखरी मा कोरता आया छे तोसात कोरने मा तुमुक वि सीकाड़े, आरू तुमु आपना परमेश्वर योहोवा क विरुद्ध पाप कोरने लागू।

19“जब तु युद्ध कोरता जाईन काहना नगर क जीतनर क लिय हेनाक घोना दाहड़ा लोगुन घेरवीन रोहे, ती ओक झाड़ो पोर कुराड़ी दिन हेनुक नष्ट नी कोरजू, काहकी ओक फोव तारे खाने क काम आवसे, एकालिय हेनूक नी काटनो। काय खौयड़ा क झाड़ वी मानुस छे की तू हेनूक वी घैर मेके? 20बाखून जेनू झाड़क वाराम तू यो जान लेये की एरो फल खानो क नी छे ए, ती ओक नष्ट कोरजी, आरू हेना नगर क विरूद्ध हेने टेमे लोगुन घैराबोन्दी कोरे रोहजू जब लोगुन हुये तारा वश मा नी आय जाय।