Dhankavi Bible
व्यवस्थाविवरण 21
हत्या क अनसुलझ्यो मामलो
“काहमाईन हेना देश क खोयड़ा मा ज तारो परमेश्वर योहोवा तुख आपे काहना मर रयलो पड़लो जड़े, आरू ओका कुन मार नाक्यो छे यो पतो नी चाले, ती तारा पुरनिया आरू नियायी निकळिन हेना शब सी च्यारू मेर क एक एक नगर दूरी क मापे; तब ज नगर हेना शब क सबसे धोड़े रोहे, ओका पुरनिया एक ओसी केवड़ी ली राखू, जेरेसी काहीन काम नी लेदा होय, आरू जेरे पोर जुड़ो कोसी नी मेकलो होय। तब हेना नगर क पुरनिया हेना केवड़ी क एक बारहमासी नदी क ओसी तराई मा ज नी तै जुपलौ आरू नी वेरली होय ली जाय,आरू हेनी तराई मा हेनी केवड़ी क गोवाड़ीन तुड़ देये। आरू लेवीय याजक वी धोड़े आवे, काहकी तारो परमेश्वर योहोवा न ओक नेवाड़ लेदो छे की ओकी चाखरी कोरे आरू ओक नाव सी बोरकोत आप्या कोरे, आरू हेरा कोहने क ओनसारे हर एक झगड़ो आरू मारपीट क मुकद्दमा क निर्णय होय। ओळतेन ज नगर हेना शव क सबसे धोड़े रोहे, ओक पुरनिया हेना केवड़ी क उपोर जेरो गळौ तराई मा तुड़्यो गयो होय आपना आपना हात धुवीन कोहे, ‘यो खून हामु नी कोर्या, आरू नी यो आमरा डुळा क अगळ होयलो काम छे। एकालिय, हे योहोवा , आपनि छुड़ावली इसराएल प्रजा क पाप ढाकीन विनगुनावा क खुन क पाप आपना इसराएली प्रजा क मुनका पोर से उतार।’ तब हेना खून क गुना सी ओक क्षमा कोर आप्यो जासे। यो हुयो काम करिन ज योहोवा क निगाह मा वारू छे तू विनगुनावू क खुन क गुनु आपना विच मा सी नांबे कोरजी।
युद्ध मा धोरली बायर साथे इयाव
“जब तु आपना दुसमोल सी युद्ध कोरने जाय , आरू तारो परमेश्वर योहोवा हेनूक तारा हातोम कोर देये, आरू तू हेनूक बन्दी बोनाय ले, तब काहमाइन तू बन्कियो मा काहनी घाटावी बायोर क देखीन हेर पोर मोहित होय जाय, आरू हेरेसी इयाव कोरने चाहे, ती ओक आपना घर क महायता ली आव, आरू हुयी आपनो सीर मुँड़ावे, नोखड़ा काटे, आरू आपना बन्धन क छिन्दरा उतारीन तारे घर क मोहनो भोर रोहीन आपना आया बाबा क लिय विळाप कोरती रोहे; ओक वाद तू ओक पास जाजी, आरू तू ओक घोलवाळो आरू हुयी तारी घोरवाळी बने। ओळतेन काहमाईन हुये तुख वारू नी लागे, ती जाँ हुयी जाने चाहे चाँ ओक जाने देजो; ओका रूपया लीन काणखेर झुनी वेचे, आरू तारा हेना डोलोन सम्बन्ध हुतो, ओस कोरीन हेरेसी दासी जोसी वेवहार झुनी कोरजी।
पहिलौठे क होक
“यदि काहनो मानुस क दुय लाड़ी होय, आरू ओक एक वारू आरू दुसरी वारू नी होय, आरू वारू एने वारू नी होय दुयो बायोर क पुर्या होये, बाखुन मोटलो वारू नी लागे तेरो होये, ती जब हुये आपना पुर्या क सम्पत्ती क वाटो पाड़े , तब काहमाईन अप्रिया क पुर्या ज छाचिन मोटलो छे काहमाइन जिवतलो होय, ती हुयो मोंगाळा पुर्याक जेठांस नी आप सोकसे; हुयो यो जानीन अप्रिया क पुर्या मारे मानू क पेहलो फऴ छे, आरू मोटलो क होक हेरो छे, हेनाक आपसी आखी जायदाद मा सी दुय वाटा आपीन जेठांसी माने।
हठीलो पुर्य
“काहमाइन काहनो क हठीला आरू दंगो करनीयो पुर्यो होय, ज आपसा आया-बाबा क वात नी माने, बाखुन ताड़न आपने पोर वी ओकी नी सोमळे, ती ओका आया-बाबा ओक धोरीन आपना नगर सी खोयड़े झोपला क धोड़े नगर क पुरनिया क पास ली जाय, आरू हुये नगर क पुरनियो सी कोहे, ‘आमरो यो पुर्यो हठीला आरू लोड़ायक्यो छे, यो आमरी नी सोमळे, यो उजाड़्यू आरू दारकुटो छे।’ तब हेना नगर क सब मानसे हेना पथराव कोरीन मार नाखे, यो तू आपना विच मा सी ओसी बुराई क छेटो कोरजू, तब आखा इसराएली सोमळिन बिक खासे।
दिसरा कायदा
“ओळतेन काहमाइन सी प्राणदण्ड क योग्य काहनो पाप होयो होय जेरेसी हुयो मार नाख्यो जाय,आरू तू ओक शव क झाड़ पोर टांग देयू, ती हुयो शव रात क झाड़ पोर टांगायली नी रोहे, छाचिन तेने दाहड़े ओक धुळू आपजु, काहकी ज टांगायलो परमेश्वर क भैनी सी शरापित कोहाये छै: एकालिय ज देश तारो परमरेश्वर योहोवा तारो वाटो करीन आपे छे ओक भूमी क वीटोळ नी कोरनो।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.