Dhankavi Bible
व्यवस्थाविवरण 22
“तू आपना भास्यो क गाय-बुईल एने गाडरा-बुकड़ा क भटकी होयी देखीन अनदेखी झुनी कोरजू, तू मदत करने सी प्ओ झुण हुए हेको छाचिन थार भाई जुळ पुगाड़ देजो। बाखुन काहमाइन तारो हुयो भाई धोड़े नी रोहतो होय, एने तू ओक नी जानतो होय, ति हेना डुर क आपने घोर क धोड़े लि आवजी, आरू जब लोगुन तेरो हुयो भाई ओको नी हेरे तब लोगुन हयो तारे पास रोहे; आरू जब हुयो हेर कोरे ती ओक आप देजो। आरू ओका गोदड़ो एने छिन्दरा क वाराम, वरन् ओकी काहिन चिन काहनी नि होय, ज हेरेसी खुवायली होय आरू तुसे मिळ , ओका वाराम वी ओसोत कोरजी; तू अनदेखी नी कोरजी।
“तू आपना भाई क गोदड़ो एने बुईल क वाट पोर पड़लो हुयो देखिण अनदेखी नी कोरजी; ओक चुटने मा छाचिन ओकी सहायता कोरजू।
“काहनी बायोर मानूश क पहरोन नी पेहरे, आरू नी कुदु मानूष बायोर क पेरोन पेहरे; काहकी ओसो काम क सब करनेवाळा तारा परमेश्वर योहोवा क निगाह मा वारू नी छे।
“काहमाईन झाड़ एने भूमी पोर तारे सामने वाट मा काहना चिल्ला क पुतरू मिळे, चाहे हेरेम पिला होय चाहे आमडा, आरू हेनू पिला एने आंडा पोर ओकी आईस बोसली होय, ती पिला भैळ आईस नी लेजू; बच्चा क आपने लिय ले ते लेये, बाखुन आईस क छाचिन छुड़ देनो; एकालिय कि तारो भलो होये, आरू तारी उमोर क दाहड़े घोना होये।
“जब तू नोवलो घोर बोनावे ती ओकी छत पोर आड़ क लिय मोण्डवरी बोनावजी, ओसो नी होये की छत पोर सी हिट पोड़े, आरू तू आपना घोराना पोर खून क दोष लागाड़े।
“आपनी दाक की वाड़ी मा दुय भातिन क बीज नि वेरनो, ओसो नी होये की ओक आखी उपज, यानी ता रो वेरलो बीज आरू दाख क उपज दुयू वीटोळ होये।
“बुईल आरू गदड़ा दुयो सग जुपिण हळ नी चालाड़जू। रूई आरू सनी क मिलावट सी बोनलो हयो छिंदरा नि पेहेरजो।
“आपना ओढ़ने क च्यारू मेर क कोर पोर झालर लागाड़्या कोरजू।
नैतिकता क कायदा
“काहमाइन काहनो मानुस काहनी बायोर सी इयाव कोरे, आरू ओका पास जानेक टेमे हुयी वारू नी लागे, आरू हुयो हेनी बायोर क नामधराई कोरे, आरू यो कोहीन हेर पोर कुकर्मे क दोष लागाड़े, ‘एनी बायोर सी हाव न इयाव कोर्यो, आरू जब हेरेसी संगति कोर्यो कि हेरेम कुवारी अवस्था क लक्षण नी पावे,’ ती हेनी कन्या क आसी-बासा ओका कुवारीपन क सोहलानी लीन नगर क डाहला मानसो क पास झोपला क खोयड़े जाय; आरू हेनी कन्या क बाबो डाहला मानसो सी कोहे , ‘मैन आपनी पुराय एना मानुस क इयाव आप्यो, आरू हुयो ओको वारी नी लागती छे; आरू हुयो त यो कोविन हेर पोर कुकर्म क दोष लागाड़े छे, की मैन तारी पुराय मा कुवारीपन क लक्षण नी जोड़े। बाखुन मारू पुराय क कुवारीपन क सोहलानी यी छे।’ तब ओका आसी-बासा नगर क डाहल मानसो क अगळ हेना चद्दर क फैलाये। तब नगर क पुरनिये हेना मानुस क धोरीन ताड़ना आपे; आरू हेर पोर सौ शेकेल रूपया क डोन वी लागाड़िन हेनी कन्या क बास क आपे, एकालिय की हुये एक इसराएली कन्या क नामधराई क छे; आरू हुये ओकी लाड़ि बोनी रोहे, आरू हुयो जीवन भरीन हेनी बायोर क त्यागने नी पावे। बाखुन काहमाईन हेनी कन्या क कुवारीपन क सोहलानी पाये नि जाय, आरू हेना मानुस क वार छाची रोहे, ती हुये हेनी कन्या क हेका बाबा क घोर क झोपला पोर ली जाय, आरू इसराएल नगर क मानुस हेर पोर पथराव कोरीन मार नाखे; हुयो ते आपना बाबा क घर मा वेश्या क काम करने बुराय कोर्यो छे; यो तू आपना विच मा सी ओसी बुराई क नांबे कोरजू।
“काहमाईन काहनो मानुस दिसरा मानुस सी इयाव होयली बायोर क साथ मा सुवतो धराय जाय, ती जो मनुस हेनी बायोर क साथ मा सुवलो हय ती त्यो आरू त्या बायोर दुयोन क मार नाखे: ओस कोरीन तु ओसी बुराई क इसराएल मा सी नांबे कोरजू।
“काहमाइन काहनी कुवारी कन्या क इयाव क वात लागलि होय, आरू काहनो दिसरो मानुस ओका नगर मा धोरीन हेरेसी कुकर्म कोरे, ती तुमु हेनू दुयो क हेना नगर क झोपलाक खोयड़े ली जाईन हेनू पोर पथराव कोरिन मार नाखजो; हेनी कन्या क त एकालिय की हुयी नगर मा रोहे ती वी नी आयड़ी, आरू हेना मानुस क ओस कोरीन कि हुयो आपना पड़ोसी क बायोर क कुवारी पन भंग कोर्यो छे; ओस कोरीन तू आपना विच मा सी ओसी बुराई क दुर कोरजू।
“बाखून काहमाइन मानुस काहनी कन्या क जेरौ इयाव क वात लागली होय खौयड़ा मा पावीन बरबस हेरेसी कुकर्म कोरे, ती केवल हेना मानुस क मार नाख्यो जाय ज हेरेसी कुकर्म कोर्यो होय। आरू हेनी कन्या सी काहीन नी कोरजू; हेनी कन्या क पाप प्राणदण्ड क योग्य नी, काहकी जोसो काइ आपना पड़ोसी पोर चढ़ाई कोरीन ओक मार देसे, ओसी त यी वात वी कोहायसे; की हेना मानुस न हेनी क्या क खोयड़ा मा पावे, आरू हुयो आयड़े ते खोरी, बाखुन ओक वाचाड़ने वाळो नी मिळ्यो।
“काहमाईन काहनो मानुस क काहनी कुवारी पुराय मिळे जेसेई इयाव की वात नि लागी होय, आरू हुये ओक धोरीन ओका सात कुकर्म कोरे, आरू हुये धोराय जाय, ती जेना मानुस न हेरेसी कुकर्म कोर्यो होय हुये हेनी पोराय क बास क पचास शेकेल रूपया आपे, आरू हुयी ओकी लाड़ी होये, हुयो ओक शील भंग आप्यो, ओस कोरीन हुयो जिवन भर ओक नी जुड़नो जुवे।
“कोय आपनी सौतेली आईस क आपनी बायोर नी बोनावे, हुयो आपना बाब क ओढ़नो नि उघाड़े।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.