व्यवस्थाविवरण 23

योहोवा क सभा मा प्रवेश निषेध

1“जेरा अण्ड कुचळाय गया हय, एने लिंग काट नाख्यो हय त्यो योहोवान सभा मा नी आवे।

2“कोय कुकर्म सी जनम्यो योहोवा क सभा मा नी आवने पावे; बाखुन दस पीढ़ी लोगून ओकी ओवलियाद क कोय योहोवा क सभा मा नी आवने पावे।

3“कोय अम्मोनी एने मोआबी योहोवा क सभा मा नी आवने पावे; ओकि दसवी पीढ़ी लोगुन क कोय योहोवा क सभा मा कोदी नी आवनो जुवे;

4“ओसकोरीन सी की जब तुमू मिस्र सी निकळीन आवता हुता तब हुये ओन जळ लिन वाटो मा तुम सी भेंट नी कोर्यो, आरू यो वी की हुयो अरम्नहरैम देश क पतोर नगरवाळा बोर क पुर्य बिलाम क तुख शाप आपने क लिय दक्षिणा आप्यो। 5बाखुन तारो परमेश्वर योहोवा न बिलाम क नी सोमळ्यो; बाखून तारो परमेश्वर योहोवा न तारा निमित्त ओका शराप क बोरकोत मा बोदल देदो, एकालिय की तारो परमेश्वर योहोवा तार सी मोंग राखतो हुतो। 6तू जिवन भोर ओक कुशल आरू भलाई कोदी नी चाहजी।

7“काहना एदोमी सी घाड़ाय नी कोरजी, काहकी हुयो तारो भाइस छे; काहना मीसरी सी वी घाड़ाय झुनी कोरजु , काहकी ओक देश मा तू पारको होईन रोयो हुतो। 8हेरा ज परपोता पोयदा होये हुये योहोवा क सभा मा आवनु जुवे।

छावनी क चुखो राखनो

9“जब तू दुसमोल सी लोड़ायने क जाईन छावनी नाखे, तब सब भातीन क भुंडी वातो सी वाचीन रोहजी। 10काहमाइन तारे विच काहमो मानुस हेन वीटोळ सी ज राती क आपसुत सी आपसुत् होया कोरे छे वीटोळ हुयो होय, ती हुयो छावनी सी खोयड़े जाय, आरू छावनी क धोड़े नी आवे; 11बाखुन सान्ते सी काहिम पेहेल हुयो उंगवी लेये, आरू जब दाहड़ो डूब जाय ती छावनी मा आवे।

12“छावनी क खोयड़े तारी दिशा फिरने क एक जागो हुया कोरे, आरू हुयी दिशा फिरने क जाया कोरजू; 13आरू तारे पास क हतियारो मा एक खनती बी रोहे; आरू जब तू दिशा फिरने क बोठे, ती हेनाक खुंदिन आपना मल क ढ़ाँक देजो। 14काहकी तारो परमेश्वर योहोवा तुख वाचाड़ने आरू तारा दुसमोल क तार सी हरवाने क तारी छावनी क विच फिर्या कोरसे, एकालिय तारि छावनी चुखली रोहनो जुवे, असो नी होये कि हुयो तारे विच मा काहना वीटोळ चिज देखीन तुख सी ओळी जाय।

दिसरा कायदा

15“ज दास आपना स्वामी क पास सी ढासीन तारि शरण लेये ओक ओका स्वामी क हात नी धोराय देज; 16हुयो तारे विच ज नगर हेनाक वारू लागे हेरेमा तारे पुठी रोहनो जुवे; आरू तू हेर पोर वेला झुन मत पाड़जो।

17“इसराएली कुंवारली पोराय्यो मा सी काही देवदासी नी होय, आरू नि इसराएली मा सी काहना मानुस ओसो भुंडो काम करने वाळौ होय। 18तू वेश्यापन क कमाय एने कुतरा क कोमाई काहना मानता क पुरी करने क लिय आपना परमेश्वर योहोवा क घर मा नी लावनो; काहकी तारो परमेश्वर योहोवा क धोड़ ये दुयो काम घाड़ाय क काम छे।

19“आपना काहना भाईस क ईयाज पोर ऋण नी आपजी, चाहे रूपया होय, चाहे खानेनचिज होय, चाहे काहनी चिज होय ज इयाज पोर आपी जाये छे, ओक इयाज पोर नी आपजी। 20तू पारका क इयाज पोर ऋण ते आप, बाखून आपना काहना भाईस सी ओसो नी कोरजी, ताकी जेना देश क होकदारीयो होयने क तू जाय रोयो छे, होंया जेना-जेना काम मा आपनो हात लागाड़े हेनू सभो मा तारा परमेश्वर योहोवा तुख बोरकोत आपे।

21“जब तू आपना परमेश्वर योहोवा क लिय मानता माने, ती ओक पुरी करने मा वार नी कोरजी; काहकी तारो परमेश्वर योहोवा हेनाक छाचिन तुख सी ली लेसे, आरू वार कोरने सी तू पापी कोहाईस । 22बाखुन काहमाईन तू मानता नी माने , ती तारो काहनो पाप नी। 23ज काहीम तारा मुयो सी निकळे ओक पुरो कोरने मा चौकसी कोरजी; तू आपना पमुयो सी बुल आपीन इच्छा सी आपना परमेश्वर योहोवा क जसी मानता माने, तोसीत आजादी पूर्वक ओक पुरो कोरजी।

24“जब तू काहना दिसरा क दाख क वाड़ी मा जाय , तब पेट भर मनमाने दाख खाय ती खाय, बाखुन आपना पात्र मा काहीन नी राखजी। 25आरू जब तू काहना दिसरा क उबा खेत मा जाय , तब तू हात सी उम्बिया तुड़ सोके, बाखुन काहना दिसरा क उबा खेत पोर उखोर नी लागाड़जी।