Dhankavi Bible
व्यवस्थाविवरण 24
तलाक आरू पुनर्विवाह
“काहमाईन काहनो मानुस काहनी बायोर सी ईयाव कोर लेये, आरू ओक वाद हेरेम काहीन लाज क वात जोड़े हेरेसी अप्रसन्न होय, ती हुये ओक लिय त्यागपत्र लिखिन आरू ओका हात मा आपीन ओक आपना घोर सी निकाल देये, आरू जब हुये ओक घर सी निकळी जाय, तव दिसरा मानसो क लाड़ी बोन सोके छे। बाखून काहमाइन हुयी हेना दिसरा मानुस क वी वारू नि लागे, आरू हुयी ओक लिय त्यागपत्र लिखीन आरू ओका हात मा आपिन ओक घर सी निकाळ देये, एने हुयी दिसरा मानुस ज ओक आपनी बायोर कोर लेदे होय मोर जाय, तो ओक पेहलो पती, जिनाक हुयो निकाळ देदो होय, ओक वीटोळ होयने क वाद हेनीक त्यो पछो हेकी लाड़ी बनावीन नी लावे काहकी यो योहोवान क निगाम बुरो छे, ओस कोरिन तू हेना देश क ज तारो परमेश्वर योहोवा तारो वाटो करीन तुख आपे छे पाप मा मेळका झूण बनवाजो।
दिसरा कायदा
“जेना मानुस क हाळत मा विवाह होयो होय, हुयो सेना क सात नी जाय आरू नी काहना काम क भार हेर पोर नाख्यो जाय; हुयो सार भरीन आपना घर मा आजाद सी रोहीन आपनी इयाव होयली बायोर क खुश कोरतो रोहे।
“कोय रीपिया आपने वाळो, उधार लेने वाळा सी चक्की या हेको पुड़ गिरवी नी राखे काहकी हुयो त मानू प्राण त क बन्धक राखनो छे।
“काहमाईन कोय आपना काहना इसराएली भाईस क दास बोनावने एने वेचने क विचार सी चुराय कोरतो धोराय जाय,ते ओसो चुर मार नाख्यो जाय; ओसी बुराई क आपने विच मा सी छेटी कोरजू।
“कुड़ावा क व्याधि क वाराम चौकचोया रोहजु, आरू ज काहिन लेवीय याजक तुमक सीकाड़े ओकाज ओनसारे यत्न सी कोरने मा चौकसी कोरजु; जसो हुकुम हाव न ओक आप्यो छे तोसोत करने मा चौकसी कोरजू। फोम राखु की तारो परमेश्वर योहोवा न, जब तुमू मिस्र सी निकळिन आय रोहा होता, तब वाटो मा मरियम सी काय कोर्यो।
“जब तू आपना काहना भाइ क काहिन उधार आपे, ती बन्धक क चीज लेने क लिय ओक घर क धोडे़ नी भोरायजी। तू खोयड़े उबो रोहजी, आरू जेक तु उधार आप्यो हुयो बन्धक क चिज क तार पास खोयड़े ली आवे। आरू काहमाईन हुयो मानुस कंगाल होय, ती ओक बन्धक आपने पास राखला होया नी सुवनो; दाहड़ू बुडता-बुडता हेना हुयो बन्धक छाचिन फेर देजो, एकालिय की हुयो आपना ओढ़नो पांगरीन सुय सोके आरू तुख बोरकोत आपे; आरू यो तारो परमेश्वर योहोवा क निगाह मा धरम क काम कोहायसे।
“काहनो मजदूय ज दीन आरू कंगाल होये, चाहे हुयो तारो भाईस मा सी चाहे तारा देश क झपला क धोड़े रोहनेवाळा पारका मा सी होय, हेर पोर अन्धेर नी कोरजी; यो जानीन, की हुयो दिन छे आरू ओक मन मज़दूरी मा लागलो रोहे छे, मजदूरी करने त क दाहड़े दाहड़ू डुबने सी पेहेल तू ओक मजदुरी आपजी; असो नी होये कि हुयो तारे कारण योहोवा क विनता कोरे, आरू पापी ठहरे।
“पुर्या क कारण बास नि मार नाख्यो जाय, आरू नी बाबो क कारण पुर्य मार नाख्यो जाय; ज पाप कोर्यो होय हुयो हेना पाप क कारण मार नाख्यो जाय।
“काहना मानुस एने विखावाळा पुर्या क नियाव नी बिगाड़नो, आरू नि काहनी रोंडायली क छिन्दरा क बन्धक राखजू; आरू ओक फोम राखजी कि तू मिस्र मा दास हुतो, आरू तारो परमेश्वर योहोवा तुख होंया सी छुड़ाय लायो छे; ओस कोरिन हाव तुख यो हुकुम आपो।
“जब तू आपना पाक्का खेत क काटे, अरु एक पुळो खेत मा विसराईन रोय जाय, ती तेनाक लेने क ओळी नी पछु नी जाजी; हुयो पारका, विखावाळा,आरू रोंडायली, क लिय पोड़्यो रोहे; एकालिय कि परमेश्वर योहोवा तारा सब कामो मा तुख बोरकोत आपे। जब तू आपना फलक झाड़का झाड़े, तब डाळ्या क दिसरे वार नी झाड़जी; हुयो पारका, विखावाळा, आरू रोडायली क लिय रोय जाय । जब तू आपनी दाख की वाड़ी क फोव तुड़े, ती हेका दाना-दाना झुण तुड़जी; हुयो पारका, विखावाळा, आरू रोंडायली क लिय रोह जाय। आरू ओक फोम राख की तू मिस्र देश मा दास हुतो; ओस कोरिन हाव तुख यो हुकुम आपो।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.