व्यवस्थाविवरण 15

सातवाँ साल : छुटकारे क साल

(लैव्यव्यवस्था 25:1-7)

1“सात सात साल वितने पोर तुमू छुटकारू आप्या कोरनो, 2यानी जेना कुदा क ऋण आपने वाळा न आपनो पड़ोसी क काहिय उधार आपलो होय, हुयो छुड़ देये ; आरू आपना पड़ोसी एने भाई सी हेना बरबस न भरवावू, काहकी योहोवा क नाव सी इन छुटकारा क प्रचार होयलो छे। 3पारको मानुस सी तू हेना बरबस भरवा सोके छे, बाखुन ज काहिय तारा भाई क पास तारो होय हेनाक तू विगर भरवाए छुड़ देनो। 4तारे विच काहिय दरिद्र नी रोहसै, काहकी जेना देश क तारो परमेश्वर योहोवा तारो वाटो कोरीन तुसे आप्यो छे,कि तू ओको होकदारीयो होय, हेरेमा हुयो तुसे घोनोत बोरकोत आपसे। 5ओतरो पाको छे कि तू आपना परमेश्वर योहोवा क वात चित्त लागाड़िन सोमळे, आरू एनू आखी हुकुमो क मानने मा ज हाव आज तुसे सोमवाड़ो चौकसी कोरे। 6ती तारो परमेश्वर योहोवा आपना बुल क ओनसारे तुसे उधार लेनो नी पोड़से; आरू तू घोना देश पोर प्रभुता कोरीस, बाखुन हुये तारे उपोर प्रभुता नी कोरने पावसे।

7“ज देश तारो परमेश्वर योहोवा तुसे आपलो छे ओक काहना फाटक क धोड़े काहमाइन तारा भास्यो मा सी काई तारे पास दरिद्र होय, ती आपना हेना दरिद्र भाई क लिय न ती आपना दिल वातड़ो कोरनो, आरू नी आपनी मुठ कडि कोरनौ; 8जेनि चिज क घटी ओको होय, ओकी जोतरी जरूरत होय तोतरो छाचिन आपनो हात ढोलो कोरीन ओको उधार आपजु। 9सचेत रोह की तारो मन मा ओसी भुंडी फिकुर नी सोमाये, की सातवाँ साल ज छुटकारा क साल छे हुयो निकट छे, आरू आपनी निगाह तु आपसो हेन दरिद्र भाइ क भिनि सी क्रूर कोरीन हेना काहीन नी आपे, आरू हियो तारे विरुद्ध योहोवा क विनता आपसे, ति यो तारे लिय पाप कोहायसे। 10तू ओको छाचलिन आपजी, आरू ओको आपते टेम तारा मोन क भुण्डो नी लागे; काहकी इनी वात क कारन तारो परमेश्वर योहोवा तारा सब कामों मा जेरेमा तू आपनो हात लागाड़िस तुसे बोरकोत आपसे। 11तारा देश मा दरिद्र त होमिशा पावी जासे; एकालिय हाव तुसे यो हुकुम आपो कि तु आपना देश मा आपना गरीब-गुरबिया भास्यो क म्हारो हात ढिलो कोरीन छाचलिन दान आपजी।

दासो क वेवहार

(नीरगमन 21:1-11)

12“काहमाईन तारो कुदु भाई बन्धु, यानी कुसु इब्री एने इब्रिन , तारा हात वेचाये, आरू ओको छव साल तारी चाखरी कोर चुकया, ती सातवा साल ओको आपसो पास सी आजाद कोरीन जाने देजी। 13आरू जब तू ओको आजाद कोरीन आपना पास सी जाने देजी ती हेनाक खाली हाते नी जाने देजी; 14बाखुन आपना गाडरा-बुकड़ा, आरू खलिहान, आरू दाखमधु क कुण्ड मा सी ओको घोन सोटो आपजी; तारो परमेश्वर योहोवा न तुसे जोसी बोरकोत आप्यो होय तोसी क ओनसारे हेनाक आपे। 15आरू एनी वात क फोम राखजी की तू वी मिस्र देश मा दास हुतो, आरू तारो परमेश्वर योहोवा न तुसे छुड़ाय लेदो; ओस कोरिन हाव आज तुसे यो हुकुम सोमवाड़ो। 16आरू काहमाईन हुयो तार सी आरू तारा घोराना सी मोंग राखे, अरु तारा पुठी खुशी सी रोहे, आरू ओस कोरिन तार सी कोयने लागे हाव तारे पास सी नी जाईस, 17तो सुतारी लिन ओको कान किवाड़ पोर लागाड़िन कुरजु, तब हुयो सदा तारो दास बोनलो रोहसे। आरू आपनी दासी सी वी ओसोज कोरनो। 18जब तू ओको आपना दास सी आजाद कोरीन जाने देय, ती हेनाक छुड़ देजो तार सी वातड़ो नि जान पोड़े; काहकी हुयो छव साल दुय मजदुयो क बराबर तारी चाखरी कोर्यो छे। आरू तारो परमेश्वर योहोवा तारा आखा कामो मा तुसेक बोरकोत आपसे।

पहिलौठे डुरो क अर्पण

19“तारी गायो आरू गाडरा-बुकड़ा क जोतरा पहोलोठा नर होय हेनु सब क आपना परमेश्वर योहोवा क लिय चुखलो राखनो; आपनी गाय क पहोलोठो सी काई काम नी लेजो, आरू नी आपना गाडरा-बुकड़ा क पहोलोठो सी काई काम नी लेजो, आरू नी आपना गाडरा-बुकड़ा क पहिलोठो क रूई नी कातरना। 20हेना जागा पोर ज तारो परमेश्वर योहोवा नेवाड़ लेसे तू योहोवा क ओगळ आपना आपना घोराना भेळ होर साल ओको मांस खाजी। 21बाखुन काहमाईन हेरेमा काइ भातिन क दोष होय, यानी हुयो लोड़यलो, एने आंधवो होय, एने हेरेमा काई आरू त भातिन क बुराई क दोश होय, ति ओको आपसो परमेश्वर योहोवा क लिय बली नी कोरजो। 22ओको आपना फाटको क धोड़ खाजो; चुखो आरू वीटोळ दुयु भातिन क मानसे जोसो चिकारे आरू हरिण क मांस खाय छे तोसो त ओको वी खाय सोकसे। 23बाखिन ओक लुहुय झूनी खाजो; ओका जळ क जोसो धोरती पोर नाख देजू।