Skip to content
BibleKenya

Cua Bible Literal Text

Lu-ka 6

Varơuq xalih vlôh muut muuyq hngơy Sa-bat, Lôôk Jê-xu đong hooy dalơh kaluh manay va qwaay, ji khơl xatyauq Kadraq kađnek 'môôk va, raniaq tol ti, yôôch xa. Bơh taleq dro Pha-ri-si đnooy: “Aleq khơl ay dơơp varơuq leh ik ăm pheep đom hngơy Sa-bat?” Tuôôy tơơl apok oot, Lôôk Jê-xu đnooy kung oot: “Khơl kơy koq hmưq đok truh varơuq đơu Đa-vik heq dơơp tuôôy vuua ji khơl adro măn kung vuua biq pangoot ih? Đaleq vuua heq muut đom hnhư Kơy Plêêk, xok tôôp tơơk tưp, vuua xa ji ahlook ka khơl adro kung hooy dii vuua, đơu tôôp nưq leh ik pheep xa, đêh vlôh đôôyq dii khơl thơy tơơk tưp đơu heq.” Yôôch Kadraq đnooy dii oot: “Koot Manih laa Lôôk ku hngơy Sa-bat.”

Varơuq xalih vlôh muut muuyq hngơy Sa-bat kadrơy, Kadraq muut đom hnhư hơu xôq pato dayq, ji aduq nưq e muuyq dro khơl kanau, pla ti akoh ku ay nưq biq kavăp. Măn khơl thơy pato ganuun ji manih Pha-ri-si 'yo atrêêk tavooy tyauq Kadraq, 'yo Kadraq e paxêêk yơh đom hngơy Sa-bat be, xôq oot axek jah kơq rôp kadrôôp Kadraq. Bơh Kadraq xet varơuq biit ku oot, yôôch Kadraq đnooy dii adro biq kavăp ti: “Dayh dưk tok ji vlôh dưk măn katul tôôy adro.” Ay nưq dưk tok ji vlôh dưk đnư. Lôôk Jê-xu đnooy dii oot: “Gô vôôch êêp kơy, atoh troq tyauq ganuun đom hngơy Sa-bat yôôych dơơp kaxay long dơơp xơuq, wơơt riirh long păk kaxêêt yơu?” Atêq tuôôy 'yo tôôy adro gah gih, Kadraq đnooy dii ay nưq: “Dayh tơơk ti ku ay vlôh.” Ay dơơp tyauq ji ti ay jah paxêêk yơh. Bơh oot viik xuum tôq jaraq ji tajauq dii mamuuyq 'yo oot hnoq ik dơơp kajoq dii Lôôk Jê-xu.

Varơuq xalih vlôh đom kaluh hngơy nưq, nưq laa Kadraq hooy tok gôk xôq xadrook apôôy, ji Kadraq heq parol klôôy mưng đom varơuq xadrook apôôy dii Kơy Plêêk. Tuôôy hngơy đơơu heq truh, Kadraq taayh khơl xatyauq kadraq, ji rơơlh kưl vaarq adro vlôh xing oot, đơu Kadraq kung taayh kưl vaarq adro nưq laa khơl jah rơơlh, anguk: Si-môn, adro đơu Kadraq kung vlăk anơng laa Phi-e-rơ, oh kanau kơy laa Anh-rê, Ja-kơ, Jăng, Phi-lip, Ba-thê-lê-mi, Ma-thi-ơ, Thô-ma, Jăng koot A-phê, Si-môn laa adro jah taayh laa Xê-lôt, Ju-đa koot Ja-kơ, ji Ju-đa Ich-ka-ri-ôt laa adro jêêk vlôh adro xalih xuum. Atêq tuôôy hooy pôôt dii oot, Kadraq dưk đnư muuyq aduq vari manay kling kung muuyq bing karôp khơl xatyauq Kadraq, ji bing manih dii sôôq manih karôp lơyq truh xing loch dêh Ju-đê ji Jê-ru-sa-lem, kung đaji dêh gah tahli Ti-rơ ji Si-đôn, Khơl adro nưq heq truh xôq domq tameng Kadraq ji xôq jah payơh klơlh kaluh tăk bingq ku oot. Khơl adro biq kamuuych 'moh nhôp kung jah payơh. Dêq bing tamooy kưq axek kach avêq muut Kadraq vii taay yaak vlôh xing Kadraq ji payơh tôôy adro.

Yôôch Lôôk Jê-xu, 'ngơơk mot kadraq ngưưr truh khơl xatyauq ku Kadraq, ji đnooy: “Vanong ka oh ay laa manih adrah, vii daak dêh Kơy Plêêk laa ku oh ay. Vanong ka oh ay juneq đong pangoot, vii oh ay hnoq jah phiq phơh. Vanong ka oh ay juneq đong alo nhim, vii oh ay hnoq hlah xagiel. Oh ay jah vanong tuôôy khơl drơy 'yarơ geet oh ay, tuôôy oot dơyh ka'lăk oh ay, đnooy axaap ji dơyh ka'lăk anơng oh ay đaji adro xơk tauq vii kơq Koot Manih. Đom hngơy nưq, dayh hlah hlaak ji ayuch atok hlah hlaak vii, 'yo hơq, phon kadrool ku oh ay tol plêêk laa thier kôt, vii mo kơy ku oot heq xa dơơp dii khơl kơy hlit tyauq kach đanưq. Lunư, ra ơơh ka oh ay, laa adro karoh, vii oh ay heq nhonq varơuq hlơq hlôôp ku oh ay. Ra ơơh ka oh ay laa adro juneq đong phiq phơh, vii oh ay hnoq pangoot. Ra ơơh ka oh ay juneq đong xagiel ahrơh, vii oh ay hnoq jiq rơu ji alo nhim. Ra ơơh ka oh ay tuôôy tôôy adro raay đnooy tolh truh oh ay, vii mo kơy ku oot kung heq dơơp tyauq kach đanưq dii khơl kơy hlit pa ôôh.

Bơh gô đnooy dii oh ay, khơl adro đong domq tameng, dayh xiaq adro tachơơl oh ay ji dayh xa dơơp kach tolh kaxay dii adro 'yarơ oh ay. Dayh chuk vanong ka khơl karoay axaap oh ay ji dayh xadrook apôôy ka adro dơơp ra ơơh oh ay. Đôôyq dii kơyq pađa oh ay aduq tavok piik neq, dayh ăm hloay tavok piik hơq, măn adro varoh xok aau pi gôk ku oh ay, yôôych oh ay kung te niiuq jư aau 'lăp klơlh adro nưq. Paq kê kơyq apôôy xiin oh ay, dayh kahniq ăm, ji te vôôch hlê xing adro xok hloay tuôông kajoq ku oh ay. Oh ay trôôch khơl drơy dơơp ka oh ay đaleq, dayh dơơp ka oot đanưq. Atoh oh ay xiaq khơl adro xiaq oh ay, yôôych nưq laa vanong kiêuh kajoq đôôyq dii oh ay? Vii hloay kaah khơl e kadrôôp kung xiaq adro xiaq oot. Atoh oh ay dơơp tolh dii adro dơơp tolh dii oh ay, yôôych nưq laa vanong kiêuh kajoq đôôyq dii oh ay? Adro e kadrôôp kung dơơp dang đanưq. Atoh oh ay ăm khơl drơy xapo đơu oh ay takôô nhonq hlê xing oot, yôôych nưq laa vanong kiêuh kajoq đôôyq dii oh ay? Adro e kadrôôp kung ăm adro e kadrôôp xapo, xôq nhonq hlê dang đanưq. Bơh dayh xiaq khơl tachơơl oh ay ji dơơp tolh dii oot, dayh ăm xapo tuôôy leh takôô nhonq hlê, yôôych phon kadrool ku oh ay hnoq laa thier kôt, oh ay hnoq laa koot ku Kơy Thier Yơơt, vii Kadraq măn hwêêt xuum đôôyq dii khơl lưp vanong ji xơk tauq. Dayh e xuum biit angơuq, dang đaji Vaq ku oh ay e xuum biit angơuq. Te xưh xadrah, yôôych oh ay kajưk dik leh biq xưh xadrah. Te tok xadrah yôôych oh ay kajưk dik leh biq tok xadrah. Dayh tha ka'lăk, yôôych oh ay hnoq jah tha ka'lăk. Dayh kahniq ăm, yôôych varơuq hnoq jah kahniq ka oh ay: muuyq phon hlơk hlơu klêq — jah dơơp kajưk, jah luk lăk ăm pôôt, jah athêêp ăm galaay viik — oot hnoq kliik muut thơơl aau oh ay. Vii oh ay hlơk mưk leq, yôôych mưk nưq hnoq jah hlơk hlê ka oh ay.”

Kadraq kung taboon ka oot muuyq kadook atoh: “Manih apul leh e paraat jarooy trôôk manih apul, jơq be? Be aalq dêq vaarq raay hnoq gưlh pôôt raluk ih? Khơl xatyauq yôôych leh iaq thơy, bơh muuyq adro tuôôy jah pato dayq đu tol hnoq jêêk vlôh dang đaji thơy haay. Aleq oh ay 'yo hloq apoop kachar đom mot muuyq oh ay haay, đơu oh ay leh nhonq vlôh talok gay đom mot ku haay? Dơơp đaleq oh ay hnoq ik đnooy dii oh ay haay: ‘Ay lơơy, dayh xôq gô xok apoop kachar đom mot ay vlôh’ tuôôy xăk xamơk oh ay leh 'yo hloq talok gay đom mot ku haay? Adro xuum pa ôôh hơq! Adroyq dêq, dayh xok talok gay vlôh klơlh mot haay, yôôch oh ay đơơu 'yo hloq ro xôq xok apoop kachar đom mot oh ay haay. Vii be e ưk ôôlh kaxay vlôh play xơuq, panưh kadrơy, kung be e ưk ôôlh xơuq vlôh play tolh. Xing muuyq ưk jah nhonq xet gamưh play ku ưk nưq. Manih nưq leh weelh play pok puut aduq pôôp jaliê, oot kung leh weelh nho aduq pôôp gay rơơk. Manih kaxay jo varơuq tađnưk kaxay tamaq ku xuum klaak dơơp vlôh varơuq kaxay, măn adro xơk xing đom varơuq xơk dơơp vlôh varơuq xơk. Vii xing varơuq galơh galaay đom xuum đơu huuy xăk đnooy vlôh.

Aleq oh ay taayh gô: ‘Lôôk, Lôôk,’ đơu leh dơơp tyauq apok gô pato? Gô hnoq ăm oh ay xet adro leq truh dii gô, tameng apok gô ji dơơp tyauq kaluh apok nưq yôôych dang kơyq. Adro nưq dang đaji muuyq adro xơy hnhư, đơu manih neq heq akhwoar vari xiel jaruq ji dơơp xool tol talaat phơu. Nưq yôôch, tuôôy daak ngôp galaay truh, alook daak kaxuyh muut hnhư nưq, đơu ni leh hnoq anhưh anhưưy hnhư ik, vii hnhư heq jah xơy panưk kach jơq dik. Măn adro tameng đơu leh dơơp tyauq yôôych dang đaji muuyq adro xơy hnhư tol vari leh e kahnier xool, tuôôy alook daak ngôp muut hnhư nưq, ni hloay hrưp, ji varơuq hư hek ku apoop hnhư nưq laa thier kôt.”

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.