Cua Bible Literal Text
Lu-ka 7
Atêq tuôôy Kadraq payôôch kaluh apok ku kadraq kangưưr varơuq domq tameng ku manih karôp, Kadraq muut đom theng Ka-bê-na-um.
Tuôôy nưq, muuyq adro xapok hơq ku kơy xakaq kuun, đơu nưq laa adro thier xung xiaq đôôyq dii kơy, đong biq jiq thier năngq, jeq kaxêêt. Atêq tuôôy tameng truh Lôôk Jê-xu, kơy patăk khơl kadraq lơơk Jo Thaiq truh kung Kadraq, apôôy xiin Kadraq truh xôq Kadraq paxêêk yơh xapok ku kơy. Tuôôy khơl adro nưq truh dii Lôôk Jê-xu, oot dêq xuum apôôy xiin Kadraq, tơơl đaneq: “Kơy nưq yôôych xưngq đangq xôq thơy hnoq dơơp ik varơuq neq ka kơy, vii kơy xung xiaq tamooy haay, kơy kung heq xơy hnhư hơu ka haay.” Nưq yôôch, Lôôk Jê-xu hooy kung dii oot. Bơh tuôôy Kadraq heq măn kach aduq apoop hnhư leh xangưưy, yôôych kơy xakaq kuun atăq taleq dro 'wơyq truh tơơl dii Kadraq: “Kuh Lôôk, xiin te kadih tagay khoq xăk, vii gô leh xưngq đangq xôq Kadraq truh 'laarq apo hnhư gô. Kadih vii anưq, gô pheq đnooy kung leh hloq gô xưngq đangq xôq truh tavơh Kadraq. Lunư, xiin Kadraq xanoh muuyq apok, yôôych xapok gô pheq jah yơh bingq. Vii gô kung laa adro jah xôq 'laarq da uh qwuyen, đơu e kuun 'laarq qwuyen ku gô, ji gô dăt adro neq: ‘hooy yuh,’ yôôych ni hooy; yôôch dii adro hơq: ‘Truh đnen,’ yôôych ni truh; ji dii xapok gô: ‘Dayh dơơp varơuq neq,’ yôôych ni dơơp.” Tuôôy Lôôk Jê-xu tameng đanưq, Kadraq thier tưng hưng truh kơy nưq, yôôch wih hlê manih karôp đong hooy tyauq xăk, Kadraq đnooy: “Gô đnooy dii oh ay, pheq đnooy aduq I-sơ-ra-ên, gô kung koq hmưq hloq xuum tuôq đanưq.” Tuôôy khơl adro jah patăk hooy xuq hlê truh hnhư, oot hloq dro xapok đong kalh paraat.
Varơuq xalih vlôh muut hngơy atêq, Kadraq hooy muut muuyq theng jah taayh laa Na-in, khơl xatyauq Kadraq ji bing manih thier karôp đong kung hooy dii Kadraq. Hloay tuôôy Kadraq jeq truh 'mok theng yôôych 'yo hơq, oot đong xakôôk vlôh muuyq adro heq kaxêêt, laa koot kanau muuyq ku miq ni (mo laa mo valơu), muuyq bing thier 'ngưng manih karôp đom theng kung hooy dii mo. Tuôôy 'yo hloq mo, Lôôk arơơk xuum manưưt angơuq deng ka mo, ji Kadraq đnooy dii mo: “Te nhim.” Hooy truh jeq, Kadraq avêq ti muut vook, yôôych khơl adro đong xakôôk dưk hlê. Yôôch Kadraq đnooy: “Adro kanau blaay, gô dăt nhu, dayh kah 'ngôôy.” Manih kaxêêt kah 'ngôôy ji xarôp athêêk, Yôôch Kadraq atăq nhu ka miq ku nhu. Nưq laa, varơuq varaal yôq kariik aklum dêq hloay, oot ayuôôt laat Kơy Plêêk, đnooy đaneq: “Muuyq kơy hlit kôt galơh heq jah dưk tok đom katul haay” ji đaneq: “Kơy Plêêk heq truh hlơq tamooy Kadraq.” Hêêl neq truh Kadraq ahna vlôh loch dêq dêh Ju-đê ji tôôy dêh gah gih.
Khơl xatyauq ku Jăng taboon hlê ka kơy truh tôôy varơuq nưq. Ji atêq tuôôy ăm taayh vaarq adro xatyauq nưq ku kơy, yôôych Jăng patăk oot truh dii Lôôk, tơơl: “Thơy laa Kơy pheq truh, long 'wot duh takôô Kơy kadrơy?” Tuôôy truh dii Kadraq, khơl adro nưq tơơl: “Jăng Bap-tit patăk 'wot truh dii Thơy, tơơl: ‘Thơy laa Kơy pheq truh, long 'wot duh takôô Kơy kadrơy?’” Muut jơq wat nưq, Kadraq payơh 'ngưng manih klơlh bingq tăk, jiq jiêh ji kamuuych 'moh, Kadraq kung khienq 'ngưng manih apul jah 'yo hloq. Xôq tơơl apok, Kadraq đnooy dii oot: “Atêq tuôôy wiit xuq, dayh taboon hlê ka Jăng kaluh kajoq khơl ay heq hloq ji tameng: manih apul jah hloq tađnah hlê, manih taqwauq tawaak hooy, manih paruh jah xarêh, manih klơk tameng hlolh, manih kaxêêt jah khienq riirh hlê, manih adrah jah tameng hêêl kaxay, ji vanong ka adro leq leh biq xatôôlh lôp vii gô.”
Xatyauq đnoyq, atêq tuôôy khơl xatyauq ku Jăng hooy yôôch, Kadraq xarôp đnooy dii bing manih truh Jăng: “Oh ay hooy muut đom wăngq we xôq 'yo kajoq? Muuyq ưk kadeer biq khiel ahrưng ih? Wih hlê, oh ay hooy vlôh xôq 'yo kajoq? Muuyq adro jah xa vâk bơơn vaayh lanh ih? 'Yo hơq, khơl adro đom hlưp qwuân aau kaxay dik ji riirh karoh e yôôych măn đom hnhư vuua. Nưq bơh, oh ay hooy vlôh xôq 'yo kajoq? Muuyq kơy hlit ih? Jơq, gô đnooy dii oh ay, măn iaq muuyq kơy hlit đnoyq. Nưq laa truh kơy đơu apok neq heq jah valơk:
‘Nee, Gô patăk adro jah patăk Gô hooy pi adroyq kangưưr Koot,
adro hnoq deep trôôk ku Koot kangưưr Koot.’
Gô đnooy ka oh ay xet, đom sôôq khơl adro jo khơl drê pa iir vlôh, leh kơyq laa kôt iaq Jăng, bơh adro de dik đom daak dêh Kơy Plêêk yôôych kôt iaq kơy nưq.” (Tuôôy heq domq tameng, yôôych tôôy adro, kê kaah khơl adro xok xơu, raay xưng Kơy Plêêk laa hyioh jăk, tuôôy chiuq bap-tem tyauq pheep bap-tem ku Jăng. Bơh khơl manih Pha-ri-si ji khơl thơy pato ganuun heq chôôyq ka'lăk iq đinq ku Kơy Plêêk deng ka oot, tuôôy leh chiuq kơy dơơp bap-tem.) “Nưq yôôych, gô hnoq taso khơl manih thuôk adrơơk neq dii kajoq neq? Oot dang đaji kơyq? Oot dang đaji bing oh de 'ngôôy aduq tabôôt xa, pariau taayh mamuuyq, oot đnooy: ‘Bing 'wot klôôp taliaq ka êêp đơu êêp leh ayuch ayauq. Bing 'wot kacheeu baai hlu rơu đơu êêp be nhim alo.’ Vii Jăng Bap-tit heq truh, leh xa tôôp, kung be hôôch lok, yôôych khơl kơy đnooy: ‘Kơy nưq biq kamuuych nhôp.’ Koot Manih heq truh, xa ji hôôch, yôôych khơl kơy dăt: ‘'Yo hơq, muuyq adro ka aak xa ji giel hôôch, khơl 'wơyq ku khơl xok xơu ji bing manih e kadrôôp!’ Bơh varơuq khôôt xet heq jah đnooy hyioh bơyh dêq hloay koot xau ku ni.”
Tuôôy nưq, muuyq đom sôôq khơl manih Pha-ri-si mơơy Kadraq xôq xa waal dii kơy. Tuôôy heq muut đom hnhư manih Pha-ri-si nưq, Kadraq 'ngôôy aduq para xa. 'Yo hơq, e muuyq khơl kadrê đom theng, đơu mư nưq laa adro e kadrôôp. Tuôôy nhonq xet đaneq Kadraq đong 'ngôôy aduq para xa măn ma hnhư manih Pha-ri-si, mư xagook xatyauq muuyq kave ngok tađnưk jơu thơơm, ji truh dưk piik katoor, jeq aduq jôôk Kadraq, đơu nhim. Mư xarôp dơơp voq jôôk Kadraq bơơn daak mot, yôôch mư 'nhuôôt ni dii kapoyh hlôôk tol akoq mư, hiip jôôk Kadraq ji para jơu thơơm tok. Tuôôy manih Pha-ri-si, laa manih heq mơơy Kadraq, hloq anưq, kơy nưq kadih biit, đaneq: “Atoh kơy neq laa hnhư kơy hlit, yôôych kơy nưq dik pheq xet khơl kadrê đơu đong avêq truh kơy laa kơyq ji thuôk khơl manih leq, đaneq mư nưq laa adro kadrôôp maroh.” Xôq tơơl hlê, Lôôk Jê-xu đnooy dii kơy: “Si-môn, gô e varơuq neq xôq đnooy dii kơy.” Kơy nưq đnooy: “Thơy lơơy, xiin kưq đnooy!” “E vaarq koot thiuq ku muuyq adro ăm xapo jêêt nưq. Muuyq dro thiuq dăp hreek Đơ-ni-ê, măn adro hơq thiuq dăp kưl. Tuôôy oot raay leh e xôq bla, kôôch lôôkq heq tha ka dêq vaarq. Nưq yôôych, kơyq đom sôôq vaarq adro hnoq xung xiaq kơy nưq iaq?” Tuôôy Si-môn ăm vlôh apok tơơl, kơy đnooy: “Gô dik biit đaneq adro đơu kôôch lôôkq heq tha 'ngưng iaq.” Kadraq đnooy dii kơy: “Kơy đnooy jơq dik.” Yôôch wih hlê pi adro kadrê, Kadraq đnooy dii Si-môn: “Kơy hloq adro kadrê neq be? Gô muut đom hnhư ku kơy. Kơy leh ăm gô daak 'nhaau jôôk, măn mư dơơp voq jôôk gô bơơn daak mot, yôôch 'nhuôôt ni dii kapoyh hlôôk ku mư. Kơy heq leh ăm gô poop hiip leq, măn mư, xing tuôôy gô hooy muut, heq leh padơy hiip jôôk gô. Kơy be para jơu tol akoq gô, măn mư heq para jôôk gô dii jơu thơơm. Vii kơq nưq, gô đnooy dii kơy, kadrôôp maroh ku mư, ju 'ngưng, heq jah tha ka'lăk, vii mư xung xiaq 'ngưng. Măn kơyq jah tha ka'lăk axit yôôych xung xiaq axit.” Yôôch Kadraq dăt mư nưq: “Kadrôôp maroh mư heq jah tha ka'lăk.” Khơl adro đong 'ngôôy aduq para xa xarôp tajauq katul wat oot: “Adro neq laa kơyq đơu kung tha kadrôôp?” Yôôch Kadraq đnooy dii adro kadrê: “Xuum tuôq ku mư heq wơơt mư. Dayh hooy đom hrok hrol.”
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.