Lu-ka 8

1Varơuq xalih vlôh muut đom kawat hloay atêq nưq, Kadraq măn kưq dưk tok hooy hlê theng neq, palơy hơq, pato dayq kung đaji padoh taboon hêêl kaxay truh daak dêh ku Kơy Plêêk, ji kưl vaarq adro jah rơơlh hooy dii Kadraq, 2kung muuyq sôôq khơl kadrê hơq laa khơl adro heq jah paxêêk yơh klơlh kamuuych ting ji bingq tăk: Ma-ri, manih jah taayh laa Ma-đơ-len, đơu xing mư e pơh kamuuych xơuq heq vlôh klơlh; 3Jan-nơ kadrê Chu-xa, adro xakaq ku Hê-rôt; Xu-xa-nơ; ji 'ngưng khơl kadrê kadrơy; oot hơu varơuq nhomq ku Kadraq bơơn kaluh garuh anôôp oot đong e.

4Tuôôy bing manih karôp anguk hlê xing kaluh theng hooy truh kung Lôôk Jê-xu, Kadraq đnooy pato bơơn kadook atoh: 5“Muuyq adro paraay adrek hooy vlôh xôq paraay kalook adrek ku ni, ji đom tuôôy ay nưq paraay, muuyq sôôq kalook adrek klêh pi trôôk, biq joaq 'laarq jôôk ji xêêp plêêk vok dêq sôôq kalook nưq. 6Sôôq kalook kadrơy klêh tol phơu, lunưq tuôôy vlok tok, sôôq nưq biq kateh ha'yauq, vii be e hơơy xa uuh. 7Sôôq kadrơy đnoyq klêh muut katul pôôp jaliê, yôôch tuôôy vlok tok, yôôych jaliê dơơp ka ni hach hwaal. 8Ji muuyq sôôq kalook kadrơy klêh muut aduq vari kaxay, lunưq tuôôy kôt tok, ni vlôh play gôp hreek yưk iaq.” Atêq tuôôy đnooy payôôch kaluh apok nưq, Kadraq taayh tok: “Kơyq e tôôr xôq tameng, dayh tameng.”

9Atêq nưq, khơl xatyauq ku Kadraq vôôch Kadraq: “Kadook atoh nưq laa aleq?” 10Kadraq tơơl: “Oh ay heq jah kahniq vanong xôq hlolh xet kaluh varơuq hmưq kadook truh daak dêh ku Kơy Plêêk, bơh dii khơl drơy yôôych xok kadook atoh, xôq ‘tuôôy 'yo, oot leh hloq, ji tuôôy tameng, oot leh hlolh.’ 11Kadook atoh nưq laa đaneq: Kalook adrek laa đaauq ku Kơy plêêk. 12Kaluh aduq tol trôôk laa khơl adro heq tameng, bơh atêq nưq kamuuych truh ji varoh xok đaauq klơlh xuum oot hlơu ka oot leh tuôq xôq jah wơơt. 13Kaluh aduq tol phơu pato truh khơl adro tuôôy oot heq tameng, yôôych dii varơuq hlah hlaak, oot nhonq xok đaauq. Bơh oot leh e rayah, 'ngưq laa khơl adro vơ tuôq muuyq kawah, ji đom tuôôy rôp toop, yôôych oot ka'lăk. 14Măn truh muuyq sôôq kalook heq klêh katul kaluh pôôp jaliê, yôôych aduq neq laa khơl adro heq tameng, yôôch tuôôy ratuut tawaak hooy đom đơơy oot, oot biq dơơp ka hach hwaal xing kaluh lo biit, varơuq karoh kariêp ji agưt agooh đơơy neq, ji oot leh kôt tok ik. 15Bơh truh phon klong adrek tol vari kaxay, neq laa khơl adro dii xuum klaak dong dik ji kaxay iq, atêq tuôôy tameng đaauq yôôych oot jư kajưk xok ji vlôh play đom varơuq wêêt xuum.

16Atêq tuôôy ataak đeen, be kơyq up ni hlê bơơn đêêk long xôq 'laarq chanưng. Tađôôy muut đnư, oot xôq ni taalh jôôk đeen xôq khơl manih tawaak muut hnoq ik 'yo hloq xaraar tađnah. 17Vii be e varơuq kajoq ik kadook kinq đơu hnoq leh biq kahnoq vlôh, kung be e padu kadook leq đơu kajưk dik leh biq tauq vlôh ji kahnoq vlôh ro raang. 18Lunưq, dayh rơơt rol truh kach oh ay tameng, vii kơyq e hnoq jah ăm athêêp, măn kơyq leh e, pheq đnooy varơuq adro nưq biit ni e kung hnoq biq xok hloay klơlh ni.”

19Tuôôy nưq miq ji khơl oh Kadraq truh dii Kadraq, bơh oot leh hnoq truh jeq Kadraq ik vii kơq bing karôp. 20Yôôch, varơuq nưq jah tauq ka Kadraq: “Miq thơy kung khơl oh ku thơy đong dưk pi gôk, xung tavơh thơy.” 21Bơh tuôôy tơơl apok, Kadraq đnooy dii oot: “Neq laa miq gô ji oh ay gô, laa khơl adro tameng ji dơơp tyauq apok Kơy Plêêk.”

22Varơuq xalih vlôh muut muuyq hngơy hơq, Kadraq kung dii khơl xatyauq ku kadraq tawaak tok muuyq poop ge, ji Kadraq đnooy dii oot: “Haay duh pheq hooy hlê gah hlôôk pi hơq.” Yôôch oot tok ge hooy. 23Đom tuôôy oot awaayh ge yôôych Kadraq vik. Kaplah nưq, muuyq đơơt khiel kaxơlh puh kaxuh klôôp pôôt tol tahli hlôôk, oot biq daak muut viit ge ji thier pơơl hwơơl. 24Oot truh jeq nhơk Kadraq kah, đaneq: “Thơy lơơy! Thơy lơơy! Haay jeq kaxêêt!” Bơh tuôôy Kadraq kadrăch kah, Kadraq toah khiel ji daak ralaaq kahlôôp, yôôych ni langưm hlê ji varơuq nưq jêêk vlôh langưưp hnhep. 25Kadraq đnooy dii oot: “Xuum tuôq ku oh ay ka'leq?” Đom varơuq varaal yôq, oot tưng hưng đnooy kung mamuuyq: “Yôôch dik thơy laa kơyq đơu thơy vlôh tanưưl ka kaah khiel dii daak, ji ni pheq tameng tyauq thơy?”

26Yôôch oot awaayh ge truh dêh Jê-ra-sê, laa aduq măn tahyioh dii dêh Ga-li-lê. 27Tuôôy Kadraq tawaak tok gah, muuyq adro nưq thuôk theng nưq hooy vlôh klơl Kadraq, adro nưq biq kamuuych nhôp. Heq muuyq kawat xiik, ay nưq leh hlưp qwuân aau, kung leh riirh đom hnhư, bơh măn aduq kalo xanưng. 28Tuôôy 'yo hloq Lôôk Jê-xu, ay nưq alo tok, kul pôôt kangưưr Kadraq ji đnooy kalh xarooy: “Kuh, Jê-xu, Koot Kơy Plêêk Thier Yơơt, gô dii Kadraq e huq apiq kajoq? Gô apôôy Kadraq, xiin te dơơp ra ơơh gô.” 29Vii Kadraq heq vlôh tanưưl ka kamuuych 'moh hooy vlôh klơlh adro khơl kanau nưq. Bơyh 'ngưng yưk ni nhôp muut ay, măn ay 'miêh heq biq kal hlê bơơn looy tooy ji kal, long ăm biq jư 'yo, yôôych bơyh kamuuych, tôôy tuôôy parach kloh kal, ay biq jarooy taluq muut wăngq we. 30Tuôôy nưq, Lôôk Jê-xu vôôch ni: “Anơng may laa kajoq?” Ni tơơl: “Kuun Karôp,” vii 'ngưng kamuuych heq nhôp muut ay nưq. 31Yôôch oot kưq apôôy xiin Kadraq xôq Kadraq te vlôh tanưưl ka oot pheq hooy pôôt bơk jaruq. 32Aduq nưq e muuyq bơy xuur thier karôp đong xa tol ahmaat adroay, oot xiin Kadraq xôq Kadraq ăm pheep oot nhôp muut bơy xuur. Ji Kadraq ăm pheep oot. 33Nưq laa, tuôôy heq vlôh klơlh adro khơl kanau, kaluh kamuuych nhôp muut bơy xuur, yôôch dêq bơy kuu akoq charơơk tyauq ahmaat bơk kalong pôôt hlôôk ji biq kaxêêt karăp. 34Atêq tuôôy khơl adro ajư xuur dưk xanưk kaluh varơuq vơơ xalih vlôh, yôôych oot xadăk klôônq ji taboon hlê varơuq nưq đom theng hloay đom ma dêh katu. 35Lunưq, manih karôp garuk truh xôq 'yo varơuq heq xalih vlôh, oot truh aduq Lôôk Jê-xu ji hloq adro khơl kanau, đơu kaluh kamuuych heq vlôh klơlh, đong 'ngôôy aduq jôôk Lôôk Jê-xu, jah hlưp qwuân aau, ji akoq ngook talăng jăk, yôôych oot biq varaal hwaal. 36Khơl adro heq dưk xanưk taboon hlê ka oot kach leq đơu manih biq kamuuych nhôp heq jah wơơt yơh. 37Hloay bing karôp đom dêh Jê-ra-sê xiin Kadraq chuh klơlh oot, vii oot biq đơơt varaal hwaal paq ik wi kajưk. Lunưq, Kadraq tawaak tok ge ji wiit xuq. 38Adro khơl kanau, đơu kaluh kamuuych heq vlôh klơlh, apôôy xiin Kadraq xôq măn kung Kadraq, bơh Kadraq ăm ay xuq, đnooy đaneq: 39“Dayh wiit xuq aduq hnhư ku ay ji dayh taboon hlê tôôy varơuq Kơy Plêêk heq dơơp ka ay.” Yôôch ay dưk hooy padoh loch dêq theng tôôy varơuq Lôôk Jê-xu heq dơơp ka ni.

40Tuôôy Lôôk Jê-xu wiit xuq, muuyq bing manih karôp đoonq tiip Kadraq, vii tôôy adro raay đong takôô Kadraq. 41Ji 'yo hơq, muuyq adro tawaak truh, anơng ku kơy laa Jai-ru, kơy laa adro jư 'yo hnhư hơu. Kuu pôôt aduq jôôk Lôôk Jê-xu, kơy apôôy xiin Kadraq hooy truh hnhư kơy, 42vii adro koot kadrê vơ muuyq đôôyq dii kơy, kơh kưl vaarq xanưm, oh nga đong hoot heet kađơơh. Tuôôy Kadraq đong hooy tol trôôk, bing manih karôp hnen hnek rawiit Kadraq.

43E muuyq mư kadrê dii biq bingq be drơy heq kưl vaarq xanưm, long heq tayuh dêq jêêt baak ka thơy jarơơu, đơu be e paq kê kơyq hnoq payơh ik bingq ka mư. 44Bơơn kach truh jeq xing piik katoor, mư avêq muut thơơl aau ku Kadraq, ji hloay jơnưq, bingq be drơy ku mư dưk hlê. 45Lôôk Jê-xu đnooy: “Kơyq laa dro heq avêq muut gô?” Bơh kơyq nưq raay leh nhonq, Phi-e-rơ tơơl apok: “Thơy lơơy, bing karôp manih đong wi rawiit ji hnen hnek thơy.” 46Bơh Lôôk Jê-xu đnooy: “Muuyq kơyq nưq heq avêq muut thơy, vii thơy xet taay yaak xing thơy heq hooy vlôh.” 47Tuôôy nưq, tuôôy adro khơl kadrê nhonq hloq đaneq mư heq leh padu kadook ik, yôôych mư padrau tahrik tawaak truh ji atêq tuôôy kuu xăk pôôt kangưưr Kadraq, mư tauq vlôh kangưưr dêq hloay manih karôp vii kakơq kajoq đơu mư heq avêq muut Kadraq ji mư heq jah payơh hloay jơnưq đaleq. 48Kadraq đnooy dii mư: “Koot kadrê lơơy, xuum tuôq ku koot heq payơh koot. Dayh hooy đom varơuq hrok hrol.”

49Tuôôy Kadraq măn đong đnooy, kơyq nưq xing hnhư ku manih dưk jư hnhư hơu truh tauq đaneq: “Koot kadrê kơy heq kaxêêt. Te dơơp ngơyq thơy đnoyq.” 50Bơh tuôôy Lôôk Jê-xu tameng apok nưq, Kadraq tơơl kung kơy: “Te yôq, dayh e xuum tuôq đơu heq yôôych oh nga hnoq jah wơơt.” 51Tuôôy heq hooy truh hnhư, Kadraq leh ăm kơyq muut dii Kadraq, đêh vlôh Phi-e-rơ, Jăng, Ja-kơ, kung vaq ji miq ku oh de. 52Dêq hloay đong nhim ook ji tuk tada vii oh de, bơh Kadraq đnooy: “Te nhim, vii oh de koq kaxêêt, đơu vơ đong vik.” 53Oot xagiel aklêêu Kadraq, vii xet đaneq adro de heq kaxêêt. 54Bơh atêq tuôôy adrơk ti oh de, Kadraq taayh kalh, đaneq: “Oh nga lơơy, dayh kah yơu.” 55Phool hiel ku oh de wiit hlê ji oh de hloay jơnưq kah 'ngôôy, yôôch Kadraq dăt ăm oh de xa. 56Miq vaq oh de thier kung dơơp akêh, bơh Kadraq patăk dăt oot leh đnooy dii kơyq truh varơuq heq xalih vlôh.