Lu-ka 9

1Atêq tuôôy taayh kưl vaarq adro jah rơơlh anguk hlê, Kadraq kahniq ka oot da uh, ji taay yaak galơh ataalh dêq hloay kaluh kamuuych ji xôq payơh bingq, 2yôôch Kadraq patăk oot vlôh hooy xôq padoh taboon truh daak dêh Kơy Plêêk ji xôq payơh manih bingq. 3Kadraq đnooy dii oot: “Te xok tyauq thưq kajoq ka varơuq hooy — leh gay, leh droong, leh tôôp, leh baak — kung te xagook tyauq vaarq poop aau. 4Oh ay muut đom hnhư leq, dayh măn aduq đnư ji dayh xing nư vlôh hooy. 5Đom dong varơuq aduq leq đơu oot leh tawooyh oh ay, yôôych tuôôy chuh klơlh theng nưq, dayh tapolh thul klơlh jôôk oh ay đaji apok xanưk tachơơl kung oot.” 6Nưq laa tuôôy dưk hooy, khơl jah rơơlh hooy dalơh kaluh palơy pla, padoh taboon hêêl kaxay ji payơh jiq jiêh loch aduq.

7Tuôôy vuua dưk xanok Hê-rôt tek truh tôôy varơuq đong xalih vlôh, kơy nưq thier xôôl dôôl, vii apok taleq adro đnooy đaneq Jăng heq xing aduq kaxêêt riirh hlê, 8bơh muuyq sôôq yôôych đnooy đaneq Ê-li heq rama vlôh, măn sôôq kadrơy ăm đaneq muuyq đom khơl kơy hlit tuôôy hnu heq riirh hlê. 9Bơh Hê-rôt đnooy: “Gô heq dool akoq Jăng yôôch, măn adro neq laa kơyq đơu gô tek kaluh varơuq đanưq truh kơy?” Yôôch kơy nưq axek kach tavơh Kadraq.

10Tuôôy khơl jah rơơlh heq wiit xuq, oot taboon hlê ka Kadraq xet kaluh varơuq oot heq dơơp. Ji atêq tuôôy jarooy oot kung hooy, Kadraq kadih wiit xuq muuyq theng jah taayh laa Bêt-sai-đa. 11Bơh tuôôy bing manih karôp nhonq vlôh ik, yôôych oot hooy tyauq Kadraq. Kadraq tawooyh đoonq oot, padoh vlôh ka oot truh daak dêh Kơy Plêêk, ji Kadraq paxêêk khơl adro duh jah payơh. 12Hngơy jeq yôôp klôôy, tuôôy nưq, tuôôy kưl vaarq dro jah rơơlh hooy truh, oot tơơl dii Kadraq: “Xiin thơy pachaay bing manih xôq tuôôy hooy muut đom kaluh palơy ji dêh katu gah gih đnen, oot hnoq ik axek aduq măn ji tuôông xa, vii kađnen, haay đong măn katul muuyq aduq wăngq we.” 13Lunư, Kadraq đnooy dii oot: “Oh ay dayh ăm oot xa.” Bơh oot tơơl: “Be e thưq kajoq aduq 'wot 'ngưng iaq dăp poop tôôp ji vaarq poop kaa — đêh vlôh 'wot hooy root tuôông xa ka sôôq manih karôp neq.” 14(Vii e kơh dăp ravơu khơl kanau.) Kadraq đnooy dii khơl xatyauq kadraq: “Dayh dăt oot 'ngôôy pôôt xôq xa tyauq tưng bing, kơh dăp kưl dro.” 15Oot dơơp tyauq đanưq, ăm dêq bing karôp 'ngôôy pôôt xôq xa. 16Atêq tuôôy xok dăp poop tôôp ji vaarq poop kaa, 'ngơơk mot tok plêêk, Kadraq kuh kway truh tuôông xa nưq, yôôch pleh vlôh, palo ăm khơl xatyauq xôq aklah ahlook ka bing karôp. 17Dêq hloay raay xa phiq phơh, ji kaluh kajoq măn raah jah tagoop tôôch ka oot laa kưl vaarq đêêk tôôp tapleh.

18Varơuq xalih vlôh đom tuôôy Kadraq đong xadrook apôôy đêh, khơl xatyauq 'miêh hooy raa dii Kadraq, yôôych Kadraq vôôch oot đaneq: “Manih karôp đnooy thơy laa kơyq?” 19Tuôôy bla apok, oot tơơl: “Laa Jăng Bap-tit, măn sôôq kadrơy đnooy thơy laa Ê-li, bơh sôôq kadrơy đnoyq đnooy thơy laa muuyq đom khơl kơy hlit tuôôy hnu riirh hlê.” 20Yôôch Kadraq vôôch oot đnoyq: “Măn oh ay đnooy thơy laa kơyq?” Tuôôy nưq, tuôôy Phi-e-rơ bla apok, kơy tơơl: “Thơy laa Kơy Wơơt Dêh ku Kơy Plêêk.” 21Bơh xôq kơmq oot, Kadraq patăk dăt leh ik taboon varơuq neq dii kơyq, 22tuôôy đnooy đaneq: “Koot Manih pheq chiuq 'ngưng pơơl dal, biq khơl draq lơơk, khơl thơy tơơk tưp kôt, ji khơl thơy pato ganuun ka'lăk, yôôch hnoq biq păk kaxêêt, ji truh hngơy thưq pe hnoq riirh hlê.” 23Yôôch Kadraq đnooy dii dêq hloay oot: “Atoh kơyq xung hooy tyauq thơy yôôych pheq ka'lăk xăk, tôôy hngơy hlôôy gay charăk xăk ji tyauq thơy. 24Vii atoh kơyq xung wơơt varơuq riirh xăk yôôych adro nưq hnoq hlơơp ni, măn atoh kơyq vii thơy chiuq hlơơp varơuq riirh ku xăk, yôôych adro nưq hnoq wơơt jah ni. 25Vii muuyq adro jah ich lơơy kajoq, tuôôy e dêq dêh araak, bơh laay kadih păk kaxêêt long dơơp hlơơp kadih xăk? 26Vii atoh kơyq kamưưl truh thơy ji apok ku thơy, yôôych Koot Manih hnoq kamưưl truh adro nưq tuôôy Kadraq truh đom tađnah tađnaak ku kadraq, kung ku Vaq ji ku khơl kơy yaak vah. 27Bơh dong dik, thơy đnooy dii oh ay, e toleq dro đom khơl manih đong dưk đnen, laa khơl manih kajưk dik hnoq leh hmưq tavơh varơuq kaxêêt dong truh tuôôy oot hloq daak dêh Kơy Plêêk.”

28Varơuq xalih vlôh kawah thơơm hngơy atêq kaluh apok nưq, tuôôy jarooy tyauq Phi-e-rơ kung Jăng ji Ja-kơ, Kadraq hooy tok tol đoot xôq xadrook apôôy. 29Varơuq xalih vlôh tuôôy Kadraq đong xadrook apôôy, nưq laa kaphook ku mot Kadraq tađôôy đêh, ji qwuân aau ku Kadraq jêêk vlôh xaraar tađnah ko ploak. 30Ji hơq, vaarq adro đong tadooy athêêk kung Kadraq, nưq laa Môi-se ji Ê-li, 31đơu oot jah nhonq vlôh đom tađnah tađnaak, đong đnooy truh varơuq vlôh hooy ku Kadraq, laa varơuq Kadraq jeq dơơp dong jêêk yuôôr aduq Jê-ru-sa-lem. 32Phi-e-rơ ji khơl adro kung dii kơy 'miêh đong thier lakôôp vik, bơh tuôôy vơơ kadrăch hlê, oot hloq tađnah tađnaak ku Kadraq ji vaarq adro đong dưk dii Kadraq. 33Varơuq xalih vlôh tuôôy vaarq adro nưq vlôh hooy klơlh Kadraq, Phi-e-rơ đnoyq dii Lôôk Jê-xu: “Thơy lơơy, dik laa tolh ka haay xôq măn đnen, 'wot hnoq ik panưk pe poop pơ, muuyq poop ka thơy, muuyq ka Môi-se ji muuyq ka Ê-li.” (Kơy leh xet đong đnooy varơuq kajoq). 34Bơh tuôôy kơy đong đnooy đanưq, muuyq đum kluk rama vlôh ji kariik klum oot; oot varaal hwaal tuôôy oot muut pi 'lăp đum kluk. 35Yôôch xing đom đum kluk ahna vlôh apok đnooy, đaneq: “Neq laa Koot Gô, laa Manih heq jah rơơlh. Dayh tameng Kadraq.” 36Tuôôy apok nưq dêq yôôych vơ măn hlê muuyq adro Lôôk Jê-xu. Oot raay hnhep, ji be kơyq taboon truh paq kê varơuq kajoq đơu oot heq hloq đom kaluh hngơy nưq.

37Varơuq xalih vlôh muut hngơy atêq, tuôôy oot xing tol đoot pôôt, muuyq bing manih karôp truh tavơh Kadraq. 38Ji 'yo hơq, muuyq adro xing bing karôp taayh kalh đaneq: “Thơy lơơy, xiin thơy 'yo truh koot kanau gô, vii ni laa koot kanau muuyq ku gô. 39'Yo neq, muuyq garu xi rôp jư oh de ji oh de long tưng hưng alo tarok, yôôch ni pangơlh oh de kamalh kajưk kung xatyauq kamuh padriaap huuy. Ni dang đaji leh vlôh klơlh oh de, kưq dơơp ra ơơh oh de xataat xateek. 40Gô heq xiin khơl xatyauq ku thơy aleq ăm oot druyh ni hooy, bơh oot leh e da uh.” 41Tuôôy tơơl apok, Lôôk Jê-xu đnooy: “Wơơy lơơy muuyq đơơy adrơơk lưp tuôq ji xơk tauq, gô hnoq măn dii êêp ji chiuq uunq êêp ăm truh dong leq? Dayh jarooy koot kanau ay truh đnen.” 42Vơơ tuôôy oh de truh, kamuuych pagưlh kalh ni pôôt vari ji khienq ni vlôh đơơt kamalh kajưk. Bơh Lôôk Jê-xu toah kamuuych ting ji paxêêk yơh oh de, yôôch Kadraq atăq ni hlê ka vaq ni. 43Dêq hloay raay biq dơơp akêh adroyq taay yaak tađnah tađnaak ku Kơy Plêêk. Bơh đom tuôôy tôôy adro măn e đong tưng hưng adroyq tôôy varơuq Kadraq dơơp, yôôych Kadraq đnooy dii khơl xatyauq kadraq: 44“Oh ay dayh xôq kaluh apok neq muut tôôr oh ay: Vii Koot Manih jeq biq rôp atăq muut ti khơl drơy.” 45Lunư, oot leh hlolh apok nưq ji varơuq neq 'miêh đong biq đơ kađoq đôôyq dii oot, lunưq oot be hlolh ik ni, oot laay yôq xôq thăk măk dii Kadraq truh apok nưq.

46Atêq nưq, katul oot duôôl tok varơuq apleh tagêh xôq 'yo adro leq đom sôôq oot laa kôt nhưk. 47Bơh vii Lôôk Jê-xu xet varơuq jauq biit đom xuum oot, yôôych atêq tuôôy jarooy hlê muuyq oh de, Kadraq xôq oh de nưq pi gah Kadraq, 48ji đnooy dii oot: “Atoh kơyq taayh yal thơy tiip oh de neq, yôôych adro nưq tiip thơy, ji atoh kơyq tiip thơy, yôôych adro nưq tiip Kơy heq patăk thơy. Vii adro leq laa de nhưk đom dêq hloay oh ay, yôôych adro nưq laa yơơt galơh nhưk.”

49Tuôôy Jăng tơơl apok, kơy đnooy: “Thơy lơơy, 'wot hloq e manih taayh yal thơy đuôôy kamuuych ji 'wot heq klơl manih nưq hlê, vii manih nưq leh kung hooy achung dii haay.” 50Bơh Lôôk Jê-xu đnooy dii kơy: “Te đơ klơl, vii adro leq leh aalq laa tachơơl hlê dii oh ay yôôych dưk xuq pi oh ay.”

51Varơuq xalih vlôh laa tuôôy hngơy varơuq xagook tok plêêk ku Kadraq đong truh jeq, yôôych Kadraq đinq ngưưr xôq hooy truh theng Jê-ru-sa-lem. 52Kadraq patăk khơl jah patăk hooy adroyq kangưưr Kadraq, ji tuôôy hooy, oot muut đom muuyq palơy pla ku manih Sa-ma-ri xôq ralauq palauq ka Kadraq. 53Oot leh tiip đoonq Kadraq vii ngưưr ku Kadraq laa đong hooy truh Jê-ru-sa-lem. 54Khơl xatyauq laa Ja-kơ ji Jăng, tuôôy hloq đanưq, oot tơơl: “Kuh Lôôk, Kadraq e xung 'wot patăk ka ôôlh xing plêêk pôôt huur vuh oot be?” 55Bơh atêq tuôôy wih hlê, Kadraq toah trek oot, 56yôôch oot hooy hlê palơy kadrơy.

57Tuôôy oot đong hooy tol trôôk, muuyq adro hơq tơơl dii Kadraq: “Gô hnoq tyauq thơy paq kê aduq leq thơy hooy.” 58Lôôk Jê-xu đnooy kung ay nưq: “Xo karaak e troop ji xêêp plêêk e tapu, bơh Koot Manih leh e aduq angôôlh akoq.” 59Kadraq đnooy dii muuyq adro kadrơy: “Dayh tyauq thơy.” Bơh adro nưq tơơl: “Kuh Lôôk, xiin ăm pheep gô hooy vlôh xôq up vaq gô adroyq.” 60Bơh Kadraq đnooy dii ay nưq: “Dayh xôq khơl manih kaxêêt up deep khơl manih kaxêêt ku oot. Măn tuôôy ay hooy vlôh, dayh padoh taboon daak dêh ku Kơy Plêêk.” 61Nưq yôôch, muuyq adro kadrơy đnoyq đnooy: “Kuh Lôôk, gô hnoq tyauq Kadraq, bơh adroyq dêq xiin ăm pheep gô xuq patek khơl manih đom hnhư gô.” 62Lunư, Lôôk Jê-xu tơơl: “Leh kơyq, tuôôy heq palo ti xăk muut akay đơu măn e 'yo xuq pi atêq, laa taxưngq dik ka daak dêh ku Kơy Plêêk.”