Lu-ka 5

1Varơuq xalih vlôh tuôôy bing manih karôp pahnen rawiit Kadraq xôq domq tameng apok Kơy Plêêk, ji Kadraq đong dưk gah hlôôk daak Gê-nê-xa-rêt, 2Kadraq hloq vaarq poop ge đong vek neeo gah hlôôk daak, măn khơl hmơt kaa, tuôôy nưq heq pôôt klơlh ge yôôch, oot đong arôôh lươyq. 3Kadraq tok muuyq đom vaarq poop ge, đơu ge nưq laa ku Si-môn, Kadraq dăt kơy awaayh vlôh xangưưy gah muuyq xiik. Atêq tuôôy 'ngôôy ieen viq, Kadraq padoh pato ka bing manih xing tol ge. 4Tuôôy Kadraq padoh payôôch, Kadraq đnooy dii Si-môn: “Dayh awaayh ge vlôh aduq daak jaruq yôôch avih lươyq ku ay pôôt xôq rôp muuyq xit kaa.” 5Tuôôy tơơl apok, Si-môn đnooy: “Tơơl thơy, ju dơơp varơuq tuôôt kaah klôôy, 'wot heq be rôp jah kajoq, bơh ganưq tyauq apok thơy, gô hnoq avih lươyq.” 6Atêq tuôôy dơơp varơuq nưq, oot rôp jah thier 'ngưng kaa, măn lươyq ku oot yôôych jeq hyaak. 7Oot avlôh hlêêl ka khơl 'wơyq rôp kaa măn poop ge kadrơy truh waak oot, khơl adro nưq truh ji duuy kaa tok viit dêq vaarq ge truh nôôy oot jeq karăp. 8Lunư, tuôôy hloq anưq, Si-môn Phi-e-rơ kuu xăk pôôt aduq takuul Lôôk Jê-xu, tơơl: “Kuh Lôôk, xiin chuh klơlh gô, vii gô laa adro kadrôôp maroh.” 9Vii varơuq varaal vari kariik klum kơy ji dêq hloay khơl adro măn kung kơy xing kơq lươyq kaa đơu oot heq dơơp rôp jah, 10Kung dang đanưq đôôyq dii Ja-kơ ji Jăng, laa khơl koot kanau ku Xê-bê-đê, oot laa khơl 'wơyq rôp kaa ku Si-môn. Lôôk Jê-xu đnooy dii Si-môn: “Te yôq! Xing neng kơn têq ay hnoq laa ti hmơt lươyq manih.” 11Atêq tuôôy awaayh ge muut gah, ji ka'lăk tôôy thưq, oot hooy tyauq Kadraq.

12Varơuq xalih vlôh tuôôy Kadraq đong măn aduq muuyq theng hơq, ji 'yo hơq, muuyq adro xăk viik jiq paruh. Tuôôy hloq Lôôk Jê-xu, ay kuu mot pôôt apôôy xiin Kadraq, đaneq: “Kuh Lôôk, atoh Kadraq trôôch, Kadraq hnoq ik khienq gô jah xarêh.” 13Kadraq palo ti vlôh avêq muut ay, đnooy: “Gô trôôch, dayh xarêh yơu.” Hloay jơnưq, jiq paruh vlôh klơlh ay nưq. 14Yôôch Kadraq đnooy panhăk ay te đnooy dii kơyq, wih hlê: “Dayh hooy kahnoq vlôh kadih xăk ka thơy tơơk tưp ji tơơk kuah lêh truh varơuq jah xarêh ku ay tyauq đaji Môi-se heq pato dayq, xôq dơơp xanưk ka oot.” 15Lunư, hêêl taboon truh Kadraq laay măn lơy ranưh iaq đnoyq, nưq laa bing manih karôp lơyq garuk mamuuyq truh xôq tameng Kadraq pato dayq ji jah payơh klơlh kaluh jiq jiêh ku oot. 16Bơh Kadraq ragơy hooy muut aduq wăngq we ji xadrook apôôy.

17Varơuq xalih vlôh muut muuyq hngơy hơq, đom tuôôy Kadraq đong pato dayq, yôôych e khơl manih Pha-ri-si ji thơy pato ganuun 'ngôôy ka đnư, laa khơl adro heq truh xing loch kaluh palơy đom dêh Ga-li-lê ji Ju-đê, kung đaji xing theng Jê-ru-sa-lem, ji taay yaak ku Lôôk măn tol Kadraq paxêêk yơh jiq jiêh. 18'Yo hơq, muuyq sôôq manih xakôôk muuyq adro khơl kanau vik tol chanưng, nưq laa adro biq jiq talêêt, oot đong axek kach xakôôk ay nưq muut pi 'lăp xôq amik kangưưr Kadraq. 19Tuôôy leh axek ik kach xakôôk ay nưq muut vii kơq bing karôp, yôôych gamưh hooy tok tol tavuk hnhư, hluh hlê apo hnhư, oot heq raduk ay nưq vik tol chanưng pôôt katul tôôy adro, kangưưr Lôôk Jê-xu. 20Tuôôy hloq xuum tuôq ku oot, Kadraq đnooy: “Nee ay, kadrôôp maroh ay heq jah ka'lăk.” 21Khơl thơy pato ganuun ji manih Pha-ri-si xarôp tagêh apleh, đaneq: “Adro neq laa kơyq đơu đnooy apok katơơk galơh đahơq? Kơyq e qwuyen ka'lăk kadrôôp đêh vlôh muuyq adro Kơy Plêêk?” 22Bơh Lôôk Jê-xu xet varơuq biit ku oot, đơu xôq tơơl hlê, Kadraq đnooy dii oot: “Aleq khơl kơy tagêh apleh đom xuum êêp đanưq? 23Apok leq laa klêq đnooy iaq: ‘Kadrôôp maroh ay heq jah ka'lăk’ long đnooy: ‘Dayh dưk tok ji tawaak hooy’? 24Bơh xôq khơl kơy xet đaneq Koot Manih tol vari e qwuyen ka'lăk kadrôôp,” — Kadraq đnooy dii adro biq talêêt — “Gô dăt ay, dayh dưk tok, doot deep chanưng ay ji dayh hooy xuq hnhư ku ay.” 25Hloay jơnưq, ay nưq dưk tok kangưưr oot, atêq tuôôy deep chanưng đơu ay 'miêh vik pi taalh, yôôych ay hooy xuq hnhư ay, xôq tađnah tađnaak ka Kơy Plêêk. 26Varơuq tưng hưng kariik klum tôôy adro, ji oot ayuôôt laat Kơy Plêêk, xuum viik yôq varaal, đnooy đaneq: “Hngơy neng haay heq hloq kaluh varơuq akêh.”

27Atêq kaluh varơuq nưq, Kadraq chuh klơlh đnư ji 'yo anhinq muuyq adro xok xơu anơng Lê-vi đong 'ngôôy ka aduq xok xơu, yôôch Kadraq đnooy dii kơy: “Dayh tyauq gô!” 28Nưq laa atêq tuôôy dưk tok, ka'lăk hlê tôôy thưq, kơy hooy tyauq Kadraq.

29Lê-vi adoot muuyq waal xa kôt deng ka Kadraq aduq hnhư kơy, ji e muuyq bing karôp manih xok xơu kung khơl manih kadrơy đong 'ngôôy măn para xa kung dii oot. 30Măn kaluh manih pha-ri-si ji thơy pato ganuun ku oot ramôôl xôôl dii khơl xatyauq ku Kadraq, đaneq: “Vii kơq kajoq đơu khơl kơy xa hôôch achung dii khơl xok xơu ji khơl adro kadrôôp maroh?” 31Xôq tơơl hlê, Lôôk Jê-xu đnooy dii oot: “Manih kalh paraat leh e varơuq duh truh thơy jarơơu, bơh manih jiq jiêh yôôych duh. 32Gô leh truh xôq tawooyh taayh manih hyioh jăk, đơu laa adro e kadrôôp truh dii varơuq wiit xuum.”

33Bơh yôôch, oot đnooy dii Kadraq: “Khơl xatyauq ku Jăng ragơy deek xa ji tơơk tưp kaluh apok xadrook apôôy, khơl xatyauq ku manih Pha-ri-si kung anưq. Măn manih ku khơl kơy kưq xa dii hôôch.” 34Kadraq tơơl kung oot: “Êêp kơy lưp hnoq ik rôp 'wơyq jưq waal pajêêk nhiinq xa đom tuôôy koot ok đong măn dii oot, jơq be? 35Bơh dik hnoq truh hngơy tuôôy đơu koot ok jah xagook hooy klơlh oot. Tuôôy nưq, muut kaluh hngơy nưq, oot hnoq deek xa.” 36Yôôch Kadraq kung taboon ka oot muuyq kadook atoh đaneq: “Leh kơyq kaval tol poop aau duut apek vaayh chieh vlôh xing poop aau đơơu. Bơh atoh dơơp anưq, yôôych hnoq phaq tahyaak aau đơơu, ji apek vaayh đơu xok xing aau đơơu kung hnoq leh tamuut dii aau duut. 37Ji leh kơyq tađnưk lok đơơu đom bơu kađuh duut. Bơh atoh dơơp anưq, yôôych lok đơơu hnoq dơơp vadah bơu kađuh, lok hnoq hoot vlôh pi gôk, bơu kung hnoq biq hư. 38Wih hlê, pheq tađnưk lok đơơu đom bơu kađuh đơơu. 39Atêq tuôôy hôôch lok duut, leh kơyq trôôch lok đơơu, vii adro nưq đnooy đaneq: ‘Lok duut laa juq iaq.’”