Skip to content
BibleKenya

Cua Bible Literal Text

Lu-ka 4

Lôôk Jê-xu, galơh galaay Kơy Phool Hiel, wiit xuq xing daak Jô-đanh, ji jah Phool Hiel jarooy muut wăngq we, xôq chiuq kamuuych adô aluut đom poot kưl hngơy. Tuôôt kaluh hngơy nưq, Kadraq leh xa paq kê kajoq lunưq Kadraq pangoot atêq tuôôy kaluh hngơy neq payôôch. Yôôch kamuuych đnooy dii Kadraq: “Atoh kơy laa Koot Kơy Plêêk, yôôych dayh đnooy dii phơu neq xôq ni jêêk vlôh tôôp yơu.” Lôôk Jê-xu tơơl kung ni: “E apok valơk đaneq: ‘Koot manih riirh leh vơ gamưh tôôp đơu heq.’” Yôôch tuôôy heq jarooy Kadraq tok yơơt, ni pato ka Kadraq dêq hloay kaluh daak dêh tol dêh araak đom muuyq jơy. Kamuuych đnooy dii Kadraq: “Gô hnoq ăm kơy tôôy da uh qwuyen neq kung tađnah tađnaak ku ni, vii ni heq jah pahnăp ka gô, ji gô e hnoq pahnăp ni ăm paq kê kơyq atoh gô trôôch. Lunưq, atoh kơy kul akuh kangưưr gô, yôôych dêq hloay hnoq laa ku kơy.” Xôq tơơl apok, Lôôk Jê-xu đnooy dii ni: “E apok valơk: ‘May pheq ayuôôt laat Lôôk laa Kơy Plêêk ku may, ji vơ hơu varơuq Kadraq đơu heq.’” Nưq yôôch, ni jarooy Kadraq truh Jê-ru-sa-lem, xôq Kadraq tol tavuk ku hnhư hơu, ji ni đnooy dii Kadraq: “Atoh kơy laa Koot Kơy Plêêk, dayh katruyh xăk pôôt xing aduq neq. Vii e apok valơk, đaneq:

‘Kadraq hnoq vlôh tanưưl ka khơl kơy yaak Kadraq truh koot, xôq xakaq 'yo koot,’

ji đaneq: ‘Oot hnoq tapôôk koot tol ti,

nưq koot xatôôlh jôôk koot muut phơu.’”

Xôq tơơl hlê, Lôôk Jê-xu đnooy dii ni, đaneq: “E apok xanoh: ‘May leh ik thưh Lôôk laa Kơy Plêêk ku may.’”

Atêq tuôôy dưk dơơp dêq tôôy kach adô aluut, kamuuych chuh klơlh Kadraq, takôô ajơ kadrơy.

Lôôk Jê-xu wiit xuq Ga-li-lê đom taay yaak ku Kơy Phool Hiel, ji hêêl truh Kadraq ahna vlôh loch dêh gah gih. Kadraq pato dayq đom kaluh hnhư hơu ku manih karôp, jah tôôy adro ayuôôt laat.

Kadraq hooy truh Na-xa-ret, aduq Kadraq heq jah văch xiap, ji tyauq katik ragơy ku kadraq, Kadraq hooy muut hnhư hơu đom hngơy Sa-bat yôôch dưk tok đok kalh xarooy. Rahlăp ku kơy hlit Ê-sai jah palo ka Kadraq, ji tuôôy luh rahlăp vlôh, Kadraq axek hloq aduq đơu dong kajoq jah valơk đaneq:

“Kơy Phool Hiel ku Lôôk măn tol gô,

vii Kadraq heq para jơu ka gô xôq padoh taboon hêêl kaxay ka manih adrah.

Kadraq heq dăt patăk gô xôq đnooy vlôh varơuq rayơh rayơơy ka khơl adro biq rôp karuk,

ji varơuq dơơp tađnah hlê mot ka khơl adro apul,

xôq jarooy khơl adro biq rôp toop truh varơuq rayơh rayơơy,

ji xôq padoh vlôh xanưm kaxay ku Lôôk.”

Atêq tuôôy gwonq rahlăp hlê ăm ka adro dơơp varơuq, Kadraq 'ngôôy pôôt. Tôôy kalook mot đom hnhư hơu raay 'yo atrêêk Kadraq. Nưq yôôch, Kadraq xarôp đnooy dii oot, đaneq: “Hngơy neng, apok Rahlăp Vah truh aduq tôôr oh ay nưq heq jah jêêk yuôôr.” Tôôy adro raay dơơp xanưk tolh truh Kadraq ji oot tưng hưng adroyq kaluh apok viik galaay vanong vlôh xing huuy Kadraq, ji oot tajauq: “Neq be aalq laa koot kanau ku Jô-sep ih?” Kadraq đnooy dii oot: “Kajưk dik oh ay hnoq đnooy dii gô apok đnooy hnu neq: ‘Thơy jarơơu lơơy, dayh kadih wơơt paxêêk kadih xăk. Xet toleq varơuq đơu 'wot heq tameng xalih vlôh aduq Ka-bê-na-um, yôôych kơy kung dayh dơơp kađnen, aduq katu hnhư kơy nưq yuh.’” Nưq yôôch Kadraq đnooy: “Dong dik, gô đnooy dii oh ay, đaneq leh e kơy hlit leq jah đoonq nhonq aduq katu hnhư ku kơy. Gô đnooy dii oh ay ganưq tol varơuq dik, đaneq 'ngưng mo valơu 'miêh măn aduq I-sơ-ra-ên đom đơơy ku Ê-li, tuôôy plêêk biq kađnoch galip đom pe xanưm drơu xiêk, tuôôy nưq, naanq pangoot kôt xalih vlôh đom loch dêh, đơu Ê-li jah patăk truh dii be kơyq đom sôôq oot, đêh vlôh truh Sa-rep-ta, aduq theng Si-đôn, truh kung muuyq mo valơu kanau. Kung e 'ngưng manih jiq paruh măn aduq I-sơ-ra-ên đom đơơy kơy hlit Ê-li-sê, ji be kơyq đom sôôq oot jah payơh, đêh vlôh Na-a-man, manih Si-ri.” Tuôôy tameng kaluh apok nưq, tôôy adro đom hnhư hơu galơh galaay thier jaraq. Atêq tuôôy dưk tok, oot hnen xagook Kadraq vlôh pi gôk theng, ji hwa Kadraq truh apưt ku ngok đoot đơu theng ku oot măn tol nưq, xôq taweek Kadraq pôôt. Bơh Kadraq ka'lăk hooy atêq tuôôy hooy dalơh hlê katul oot.

Kadraq hooy pôôt Ka-bê-na-um, muuyq theng thuôk dêh Ga-li-lê, ji Kadraq pato dayq ka manih karôp đom hngơy Sa-bat. Oot thier akêh adroyq varơuq pato dayq ku Kadraq, vii apok Kadraq kahnoq vlôh kung dii taay yaak. Đom hnhư hơu, e muuyq adro biq garu xi ku kamuuych klơơr 'yêq nhôp muut, ji adro nưq alo kôt xarooy: “A! Jê-xu Na-xa-ret, 'wot dii Kadraq e apiq truh kajoq? Kadraq truh xôq păk kaxêêt 'wot ih? Gô xet Kadraq laa kơyq — laa Kơy Vah ku Kơy Plêêk!” Lôôk Jê-xu toah trek ni, đaneq: “Dayh hnhep yơu, ji vlôh klơlh adro neq!” Nưq laa atêq tuôôy amik ay nưq pôôt vari hloay katul manih karôp, kamuuych vlôh klơlh ay nưq, leh dơơp ka ay neq xưr xôôh kajoq. Varơuq kadrăch varaal truh tol tôôy adro, ji oot tajauq dii mamuuyq, đaneq: “Đaauq kajoq neq, truh nôôy dii da uh qwuyen ji taay yaak, kơy nưq vlôh tanưưl ka kamuuych 'moh, ji oot pheq vlôh klơlh?” Hêêl truh Kadraq ahna vlôh loch dêh gah gih.

Atêq nưq, tuôôy heq dưk tok chuh hnhư hơu, Kadraq muut đom hnhư ku Si-môn. Lunư, miq kadrê ku Si-môn đong chiuq jiq jiêh dii jiq tanget dik, ji oot apôôy vôôch Kadraq truh mo. Dưk garê xăk tol mo, Kadraq toah jiq tanget, ji ni chuh klơlh mo, yôôch mo hloay jơnưq dưk tok hơu varơuq oot.

Tuôôy mot hngơy lôp, dêq hloay tôôy adro paq kê biq jiq jiêh dii đu kaluh loayq bingq tăk, manih nưq jarooy oot truh ka Kadraq, yôôch Kadraq paxêêk yơh oot tuôôy xôq ti tol tưng adro đom sôôq nưq. Kaluh kamuuych kung vlôh klơlh 'ngưng adro, tuôôy taayh kalh đơu đnooy đaneq: “Kadraq laa Koot Kơy Plêêk!” Ji bơơn kach toah trek, Kadraq leh ăm pheep oot đnooy, vii oot heq xet Kadraq laa Lôôk Wơơt Dêh.

Tuôôy xarôp hngơy đơơu, atêq tuôôy vlôh klơlh aduq nưq, Kadraq hooy truh muuyq aduq wăngq we, măn manih karôp kưq akhiim axek Kadraq, ji oot heq hooy dong truh tuôôy tavơh Kadraq yôôych raanq jư Kadraq hlê, leh ăm hooy klơlh oot. Bơh Kadraq đnooy dii oot, đaneq: “Gô kung pheq padoh taboon hêêl kaxay truh daak dêh ku Kơy Plêêk ka 'ngưng theng kadrơy, xing gô jah patăk truh vii varơuq neq.”

Yôôch Kadraq athêêp đnoyq pato dayq đom kaluh hnhư hơu dêh Ju-đê.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.