Lu-ka 3

1Muut xanưm thưq kưl dăp 'laarq đơơy Sê-sa Ti-be-rơ — đom tuôôy Bôn-xơ Phi-lat dơơp padrok xanok dêh Ju-đê, Hê-rôt dơơp vuua xakaq dêh Ga-li-lê, măn Phi-lip, oh kanau kơy nưq dơơp vuua xakaq dêh I-tu-rê kung dii dêh Tra-kô-nik, ji Li-sa-ni-a dơơp vuua xakaq dêh A-bi-len, 2đom kawat An-ne kung Kai-phe đong dơơp thơy tơơk tưp kôt — apok Kơy Plêêk heq truh dii Jăng, koot kanau Xa-cha-ri, đom wăngq we. 3Ji yôôch, kơy hooy truh loch kaluh aduq gah gih daak Jô-đanh, padoh taboon pheep bap-tem truh varơuq wiit xuum xôq jah vanong ka'lăk kadrôôp. 4Đaji varơuq heq jah valơk đom rahlăp truh kaluh apok ku kơy hlit Ê-sai:

“E apok taayh kôt đom wăngq we:

‘Dayh adoot deep trôôk ka Lôôk,

dơơp pahyioh kaluh trôôk ku Kadraq.

5Tôôy ahnuk huuk hnoq jah galôp viik,

tôôy gôk đoot hnoq jah xiel pôôt,

trôôk gwong gweng hnoq vlôh hyioh hyek,

trôôk ragưp ragôh hnoq vlôh manay kling,

6ji tôôy xăk xamơk hnoq hloq varơuq wơơt xok ku Kơy Plêêk.’”

7Nưq, Jăng đnooy dii bing manih truh xôq chiuq kơy dơơp bap-tem: “Adrơơk nooy voolh taweek hơq, kơyq heq đnooy tauq ka êêp xôq xadăk klôônq klơlh đơơt tôq jaraq jeq truh? 8Vii anưq, dayh vlôh play taxưngq dik dii varơuq wiit xuum, ji te kưq đnooy dii kadih xăk xamơk haay: ‘Haay e Ap-ra-ham laa mo kơy’ vii gô đnooy dii êêp đaneq Kơy Plêêk hnoq ik tơơk tok koot xau Ap-ra-ham xing kaluh kuk phơu neq. 9Panưh kadrơy, poop xuôôk kung đong xôq angôôlh ka ưk ôôlh yôôch. Jo anưq ưk leq leh e play tolh yôôych biq kơl ji taweek muut ôôlh.” 10Manih karôp vôôch kơy đaneq: “Nưq, 'wot duh pheq dơơp kajoq?” 11Xôq tơơl apok, kơy đnooy dii oot: “Kơyq e vaarq aau pheq ahlook aklah dii adro leh e, ji kơyq e tuôông xa, adro nưq kung dayh dơơp đanưq.” 12Khơl xok xơu kung truh xôq chiuq bap-tem, ji oot tơơl kung kơy: “Tơơl thơy, 'wot duh pheq dơơp kajoq?” 13Kơy đnooy dii oot: “Te xok 'ngưng iaq mưk heq jah đnooy ka oh ay.” 14Muuyq sôôq bing kuun kung vôôch kơy, đaneq: “Măn 'wot, 'wot duh pheq dơơp kajoq?” Kơy đnooy dii oot: “Te parayh xok thưq kajoq, kung te pahnhiq bơyq, ji dayh hlah xuum dii jêêt hngơy ku êêp.”

15Panưh kadrơy, vii manih karôp đong takôô ji vii dêq hloay raay biit kadih đom xuum oot truh Jăng, leh xet kơy e aalq laa Lôôk Wơơt Dêh be, 16Jăng heq tơơl hlê tuôôy đnooy dii tôôy adro: “Gô dơơp bap-tem ka oh ay bơơn daak, bơh Kơy jeq truh e taay yaak iaq gô, laa Kơy đơu gô leh taxưngq dik luh talơy kaxôôp ku Kadraq. Kadraq hnoq dơơp bap-tem ka oh ay bơơn Kơy Phool Hiel ji bơơn ôôlh, 17laa Kơy e apoop kapưk đom ti Kadraq xôq kapưyh thier xarêh chaal va kadraq, ji xôq va qwaay muut đom pơ ku kadraq, bơh Kadraq hnoq huur vuh hre va bơơn ôôlh be hnoq dơơp poch ik.”

18Lunưq, dong dik đom tuôôy pato nhăk 'ngưng varơuq kadrơy, kơy padoh taboon hêêl kaxay ka manih karôp. 19Bơh vuua xakaq Hê-rôt, atêq tuôôy biq Jăng toah trek truh varơuq Hê-rô-đia, kadrê ku ma oh vuua, ji truh kaluh varơuq xơk kadrơy đơu Hê-rôt heq dơơp, 20pheq đnooy heq athêêp varơuq neq muut dêq hloay varơuq xơk ku kơy: nưq laa kơy nưq ăm rôp Jăng karuk muut tu.

21Lunư đom tuôôy tôôy adro chiuq bap-tem, varơuq xalih vlôh nưq laa Lôôk Jê-xu kung chiuq bap-tem, ji đom tuôôy Kadraq đong xadrook apôôy, kaluh tal plêêk jah luh vlôh, 22yôôch Kơy Phool Hiel kahri pôôt tol Kadraq đom long lơuq pi gôk dang đaji xêêp katrơu, ji muuyq apok xanoh truh xing plêêk: “Koot laa Koot xung xiaq ku Gô. Gô hlah xuum truh Koot.”

23Tuôôy xarôp dơơp varơuq, xăk xamơk Lôôk Jê-xu jah kơh pe kưl tuuyh, (tyauq đaji oot măn biit) Kadraq laa koot ku Jô-sep, Jô-sep koot Hê-li, 24Hê-li koot Mat-tat, Mat-tat koot Lê-vi, Lê-vi koot Mên-chi, Mên-chi koot Ja-nê, Ja-nê koot Jô-sep, 25Jô-sep koot Ma-ta-thia, Ma-ta-thia koot A-môt, A-môt koot Na-hum, Na-hum koot Êch-li, Êch-li koot Na-gê, 26Na-gê koot Ma-at, Ma-at koot Ma-ta-thia, Ma-ta-thia koot Sê-mê-in, Sê-mê-in koot Jô-sêch, Jô-sêch koot Jô-đa, 27Jô-đa koot Jô-a-nan, Jô-a-nan koot Rê-sa, Rê-sa koot Xô-rô-ba-bên, Xô-rô-ba-bên koot Sa-la-thi-ên, Sa-la-thi-ên koot Nê-ri, 28Nê-ri koot Mên-chi, Mên-chi koot A-đi, A-đi koot Kô-sam, Kô-sam koot Ên-ma-đam, Ên-ma-đam koot Ê-rơ, 29Ê-rơ koot Jô-suê, Jô-suê koot Ê-li-ê-se, Ê-li-ê-se koot Jô-rim, Jô-rim koot Mat-that, Mat-that koot Lê-vi, 30Lê-vi koot Si-mê-ôn, Si-mê-ôn koot Ju-đa, Ju-đa koot Jô-sep, Jô-sep koot Jô-nam, Jô-nam koot Ê-li-a-kim, 31Ê-li-a-kim koot Mê-lê-a, Mê-lê-a koot Men-na; Men-na koot Mat-ta-tha, Mat-ta-tha koot Na-than, Na-than koot Đa-vik, 32Đa-vik koot Je-sê, Je-sê koot Ô-bêt, Ô-bêt koot Bô-ô, Bô-ô koot Sanh-môn, Sanh-môn koot Na-ach-son, 33Na-ach-son koot A-mi-na-đap, A-bi-na-đap koot At-min, At-min koot A-rơ-ni, A-rơ-ni koot Êch-rôm, Êch-rôm koot Pha-rê, Pha-rê koot Ju-đa, 34Ju-đa koot Ja-kôp, Ja-kôp koot I-sak, I-sak koot Ap-ra-ham, Ap-ra-ham koot Tha-rê, Tha-rê koot Na-kô, 35Na-kô koot Sê-ruk, Sê-ruk koot Rê-hu, Rê-hu koot Bê-lek, Bê-lek koot Hê-be, Hê-be koot Sa-la, 36Sa-la koot Kai-nam, Kai-nam koot A-bak-sat, A-bak-sat koot Sem, Sem koot Nô-ê, Nô-ê koot Lê-mek, 37Lê-mek koot Mê-tu-sê-la, Mê-tu-sê-la koot Hê-nok, Hê-nok koot Jê-rêt, Jê-rêt koot Ma-ha-la-ên, Mê-ha-la-ên koot Kê-nan, 38Kê-nan koot Ê-not, Ê-not koot Sêt, Sêt koot A-đam, A-đam koot Kơy plêêk.