Kông-vuq 4

1Tuôôy nưq, tuôôy oot đong đnooy dii manih karôp, khơl thơy tơơk tưp, kung khơl jư hnhư hơu ji kaluh manih Sa-đu-sê garuk truh oot, 2thier raa tôq jaraq vii vaarq adro đong padoh pato manih karôp ji đnooy vlôh varơuq riirh hlê xing aduq kaxêêt đom Lôôk Jê-xu. 3Yôôch bing oot rôp vaarq adro ji rôp muut karuk kôô truh hngơy atêq, vii tuôôy nưq heq kamơng yôôch. 4Bơh phon 'ngưng đom sôôq khơl adro atêq tuôôy tameng apok padoh nưq heq tuôq, ji sôôq adro khơl kanau heq tok truh lakah dăp ravơu.

5Varơuq xalih vlôh đom hngơy atêq, khơl dưk xanok ku oot kung khơl kadraq lơơk ji khơl thơy pato ganuun jah tagumq hlê aduq Jê-ru-sa-lem, 6dii An-ne thơy tơơk tưp kôt, kung Kai-phe, Jăng, A-lek-xan-đơ ji dêq hloay khơl adro thuôk truh adrơơk thơy tơơk tưp kôt. 7Atêq tuôôy jarooy vaarq adro xôq măn katul, oot vôôch: “Xing taay yaak leq, long taayh yal kơyq đơu êêp kơy heq dơơp varơuq nưq?” 8Muut tuôôy nưq, vii jah viik galaay Lôôk Phool Hiel, Phi-e-rơ heq đnooy dii oot: “Wơơy khơl dưk xanok ku manih karôp ji khơl kadraq lơơk, 9atoh hngơy neng 'wot biq vôôch hlê truh varơuq kaxay đôôyq dii muuyq dro jiq, đaneq gamưh 'leq ay nưq heq jah payơh, 10yôôych neq pheq laa varơuq jah dêq hloay êêp kơy ji padêq manih I-sơ-ra-ên xet truh, đaneq taayh yal Lôôk Wơơt Dêh Jê-xu manih Na-xa-ret, Kơy đơu êêp kơy heq đongq đing tol gay charăk, Kơy đơu Kơy Plêêk heq khienq riirh hlê xing aduq kaxêêt, nưq laa gamưh Kơy nưq đơu manih neq dưk kalh paraat kangưưr êêp kơy. 11Kadraq laa kuk phơu heq biq 'yo leh ra kajoq bơyh êêp kơy, nưq laa khơl thơq xơy, đơu heq vlôh jêêk talaat phơu kahnier muum hnhư. 12Be e varơuq wơơt xok aduq paq kê kơyq đêh, vii măn 'laarq plêêk be e yal leq đêh jah kahniq ăm măn katul koot manih xôq haay pheq gamưh đnư jah wơơt.”

13Tuôôy hloq varơuq kôk dik ku Phi-e-rơ ji Jăng, ji nhonq xet đaneq baarq kơy laa khơl dro be hok ji vlô, yôôych oot tưng hưng, oot kung nhonq vlôh vaarq dro, đaneq vaarq dro heq hmưq măn dii Lôôk Jê-xu. 14Đom tuôôy, vii hloq khơl kanau heq jah payơh dưk dii baarq kơy, lunưq oot leh e varơuq kajoq xôq tơơl aklơ hlê. 15Tuôôy nưq, atêq tuôôy vlôh tanưưl ka taleq dro nưq hooy klơlh hnhư padrok xadrah, oot tajauq dii mamuuyq, 16đaneq: “Haay duh dơơp kajoq dii khơl dro neq? Nưq laa xing muuyq pheep akêh trơ trơ heq xalih vlôh xing taleq dro neq, dik laa ro raang đôôyq dii dêq hloay khơl leq đong riirh aduq Jê-ru-sa-lem, ji haay leh hnoq laayq nhonq. 17Lunư, xôq varơuq neq leh lơy taboon vlôh athêêp katul đom manih karôp, haay pheq đnooy joa naap oot leh dơơp đnoyq taayh yal nưq xôq đnooy dii paq kê dro leq.” 18Anưq, tuôôy ăm taayh vaarq dro muut, oot vlôh tanưưl leh đnooy vlôh long pato dayq paq kê varơuq kajoq taayh yal Lôôk Jê-xu. 19Bơh tuôôy Phi-e-rơ ji Jăng tơơl apok, vaarq dro heq đnooy dii oot: “Jơq be laa troq măn kangưưr Kơy Plêêk tuôôy tameng tyauq êêp kơy iaq Kơy Plêêk? Êêp kơy dayh 'yo hlê yơu. 20Vii 'wot leh ik leh đnooy truh kaluh varơuq 'wot heq hloq ji tameng.” 21Anưq yôôch, atêq tuôôy naap joa athêêp, oot tha vaarq dro hooy, jo leh akhiim hloq varơuq kajoq xôq đơu oot hnoq ik hmơt dook vaarq dro, nưq laa vii kơq manih karôp, vii tôôy dro raay ayuôôt laat Kơy Plêêk truh varơuq heq xalih vlôh. 22Vii adro khơl kanau hơq, adro đơu pheep akêh payơh neq xalih vlôh, yôôych heq iaq poot kưl tuuyh.

23Tuôôy nưq, atêq tuôôy jah tha vlôh, baarq truh dii oh ay khơl tuôq ku baarq ji taboon hlê tôôy varơuq đơu khơl thơy tơơk tưp kôt ji khơl kadraq lơơk heq đnooy dii baarq. 24Tuôôy heq tameng yôôch, oot muuyq xuum atok apok tok wih truh Kơy Plêêk ji tơơl: “Kuh Lôôk, Kadraq laa Kơy heq panưk jêêk plêêk, vari ji tahli, kung tôôy paroh măn đom nưq, 25laa Kơy, gamưh hlê mo kơy 'wot xing Lôôk Phool Hiel, xing aduq huuy ku Đa-vik xapok Kadraq, heq xanoh đaneq:

‘Aleq kaluh daak tôq jaraq,

ji kaluh tamooy xôq vih hư hlơơp?

26Khơl vuua tol vari dưk tok, ji khơl padrok kôt jah tagumq hlê kung mamuuyq

tachơơl Lôôk ji tachơơl Kơy chiuq para jơu ku Kadraq.’

27Vii đom dong dik, hloay Hê-rôt ji Bôn-xơ Phi-lat, kung dii khơl tamooy xadaay ji tamooy I-sơ-ra-ên, heq jah tagumq hlê dii mamuuyq đom theng neq tachơơl Xapok vah ku Kadraq laa Lôôk Jê-xu, Kơy đơu Kadraq para jơu, 28xôq dưk dơơp tôôy varơuq đơu ti Kadraq ji varơuq dơơp ku Kadraq heq đinq adroyq ăm xalih vlôh. 29Juneq, Lôôk lơơy, xiin dayh 'yo hlê kaluh apok joa naap ku oot, ji xiin kahniq ăm khơl xapok ku kadraq padoh vlôh apok Kadraq dii dêq hloay varơuq kôk dik 30tuôôy Kadraq tơơk ti ku Kadraq vlôh xôq ka varơuq payơh, kaluh dơuq akêh ji kaluh varơuq hlêêl akêh jah xalih truh gamưh yal ku Xapok vah Kadraq, laa Lôôk Jê-xu.” 31Tuôôy oot heq xadrook apôôy yôôch, aduq đơu oot đong anguk hlê biq anhưh hrưng, yôôch dêq hloay oot raay jah viik galaay Lôôk Phool Hiel ji padoh taboon apok ku Kơy Plêêk kung dii xuum kôk dik.

32Tuôôy nưq, bing karôp khơl manih heq tuôq raay e achung muuyq xuum klaak ji danưng kooy. Leh kơyq 'yo muuyq varơuq leq đom kaluh kajoq thuôk truh xăk laa ku đêh, đơu đôôyq dii oot, tôôy thưq laa ku achung. 33Bơơn taay yaak kalh paraat, khơl jah rơơlh đnooy vlôh apok xanưk truh varơuq riirh hlê ku Lôôk Jê-xu, ji vanong plêêk kôt galơh măn tol dêq hloay oot. 34Vii leh e manih leq tayuh thiuq katul đom oot, vii atoh khơl leq laa kôôch jah dêq vari dêh long hnhư wah, yôôych atêq tuôôy tek, oot adrơk truh sôôq jêêt heq agoop jah, 35yôôch xôq aduq jôôk khơl jah rơơlh, măn jêêt nưq jah ahlook ăm tưng adro xatyauq adro nưq e xung duh leq.

36Tuôôy nưq, Jô-sep, dro jah khơl jah rơơlh taayh laa Ba-na-ba (anơng jah jich iq laa Koot ku Varơuq Hlơq Hlôôp), laa muuyq adro Lê-vi, manih tamooy Chip-rơ, 37atêq tuôôy tek yôôch manay ruôngq thuôk ku kơy, kơy heq xagook jêêt truh ji bu aduq jôôk khơl jah rơơlh.