Kông-vuq 5

1Tuôôy nưq, muuyq dro nưq anơng A-na-nia, kung Sa-phi-ra, kadrê ni, heq tek muuyq hluôôt vari, 2yôôch ay nưq jư đêh ka xăk muuyq phon xing sôôq jêêt nưq (adro kadrê kung xet), ji atêq tuôôy xagook muuyq phon hơq truh, ay nưq bu aduq jôôk khơl jah rơơlh. 3Bơh Phi-e-rơ đnooy: “A-na-nia, vii aleq Sa-tan viik galaay xuum ay khienq ka ay đnooy pa ôôh Lôôk Phool Hiel đơu jư đêh ka xăk muuyq phon xing sôôq jêêt ku hluôôt vari nưq? 4Tuôôy măn nưq, be aalq hluôôt vari hloay laa ku ay, ji atêq tuôôy jah tek yôôch, sôôq jêêt hloay thuôk 'laarq qwuyen ku ay be aalq? Dơơp đaleq đơu ay biit jauq varơuq neq đom xuum ay? Be aalq ay đnooy pa ôôh koot manih 'leq, đơu laa dii Kơy Plêêk.” 5Anưq yôôch, atêq tuôôy A-na-nia tameng kaluh apok nưq, ay nưq kloh hơơy đơu gưlh pôôt, ji varơuq varaal yôq thier kôt kahri tol dêq hloay khơl leq tameng kaluh varơuq neq. 6Tuôôy nưq, tuôôy heq dưk tok, khơl tadăp blaay ahnom hlê ay nưq ji tuôôy heq xakôôk vlôh pi gôk yôôch oot xagook hooy up.

7Bơh varơuq xalih truh kơh pe wat atêq nưq, kadrê ay nưq tawaak muut, koq lưp xet varơuq heq xalih vlôh. 8Phi-e-rơ đnooy dii mư: “Dayh đnooy ka gô xet e jơq baarq heq tek hluôôt vari dii jaq tonư jơq be?” Yôôch mư đnooy: “Ư, jaq tonư nưq.” 9Bơh Phi-e-rơ dăt mư: “Dơơp aleq đơu varơuq nưq jah vaarq adro kung mamuuyq xôq thưh Kơy Phool Hiel ku Lôôk? Dayh 'yo hơq, pla jôôk ku khơl adro heq up kanau mư măn ka 'mok, ji oot kung hnoq xagook mư hooy up.” 10Hloay jơnưq, mư nưq gưlh pôôt aduq jôôk kơy ji kloh hơơy. Tuôôy nưq, tuôôy tawaak muut, khơl tadăp hloq xaak mư, yôôch atêq tuôôy xakôôk mư vlôh pi gôk, oot up mư pi gah kanau mư. 11Varơuq varaal yôq thier kôt kahri tol dêq tayuup vah ji tol dêq hloay khơl leq tameng truh kaluh varơuq neq.

12Tuôôy nưq, gamưh pla ti ku khơl jah rơơlh, 'ngưng dơuq akêh ji varơuq akêh xalih vlôh katul đom manih karôp, ji oot raay muuyq xuum măn aduq 'Mok Ngo Sa-lô-môn. 13Bơh leh kơyq đêh hôôk muut nhôp dii oot, long tabơh manih karôp 'miêh đong vanê oot. 14Tuôôy nưq, kang 'ngưng manih jah athêêp muut tuôôy xôq xuum tuôq aduq Lôôk iaq đnoyq, sôôq dro karôp dêq kanau hloay khơl kadrê, 15truh nôôy khơl kadrơy pheq đnooy xagook manih jiq vlôh trôôk, amik tol ravaak ji xadôôk, xôq tuôôy Phi-e-rơ hooy dalơh hlê, yôôych axit nhưk long lơuq ku kơy hnoq ik kahlôôp tol kơyq nưq đom oot. 16Muuyq bing manih karôp 'ngưng kung ga uun mamuuyq truh xing kaluh theng gah gih Jê-ru-sa-lem, xagook tyauq manih jiq ji khơl manih biq kamuuych a'moh dơơp ra ơơh, đơu dêq hloay oot raay jah payơh.

17Bơh atêq tuôôy xalaak kah, thơy tơơk tưp kôt ji dêq hloay khơl adro tyauq kơy nưq (laa khơl manih thuôk bing Sa-đu-sê) viik galaay xuum 'yarơ, 18yôôch khơl adro nưq tơơk ti tol khơl jah rơơlh ji rôp oot muut hnhư karuk achung. 19Bơh đom klôôy, muuyq yaak plêêk ku Lôôk heq luh 'mok hnhư karuk, xagook oot vlôh pi gôk, ji dăt: 20“Hooy yuh, ji atêq tuôôy dưk đom hnhư hơu, dayh đnooy dii manih karôp kaluh apok ku varơuq riirh neq.” 21Anưq yôôch, tuôôy heq tameng anưq, oot hooy muut đom hnhư hơu tuôôy rahưng tađnah ji pato dayq. Tuôôy nưq, atêq tuôôy thơy tơơk tưp kôt dik ji khơl adro tyauq kơy nưq truh aduq, oot ăm anguk hlê Khơl Karôp kung dêq hloay khơl draq lơơk đom manih I-sơ-ra-ên, yôôch patăk manih truh hnhư karuk xôq jarooy khơl jah rơơlh truh. 22Bơh tuôôy truh aduq, khơl jư 'yo leh hloq khơl jah rơơlh đom hnhư karuk, nưq laa atêq tuôôy wih wiit hlê, oot tauq taboon, 23tơơl đaneq: “'Wot hloq hnhư tu heq jah kađnoch chăk bơơn kaluh dong varơuq jư 'yo, ji kuun jư yôôych dưk ka 'mok, bơh atêq tuôôy luh vlôh, 'wot be hloq kơyq măn pi 'lăp dêq.” 24Tuôôy nưq, hloay tuôôy bing oot heq tameng taleq apok nưq, dêq khơl ưk dưk jarooy bing kuun hnhư hơu hloay khơl thơy tơơk tưp kôt raay xôôl dôôl truh kaluh tauq taboon, dơơp aleq varơuq đanưq laay hnoq ik xalih vlôh. 25Anưq yôôch, muuyq kơyq nưq, atêq tuôôy truh aduq, heq tauq dii oot đaneq: “Dayh 'yo nee, khơl manih đơu êêp kơy rôp muut karuk neq đong măn đom hnhư hơu, heq dưk pato dayq manih karôp!” 26Tuôôy nưq, adro dưk xanok, hooy kung khơl jư 'yo, heq jarooy oot xuq, leh hôôk tơơk jôôk ti, vii oot yôq manih karôp, e đaneq oot biq tiip phơu. 27Tuôôy heq jarooy khơl jah rơơlh xuq, khơl adro nưq xôq oot katul Tayuup Karôp, yôôch thơy tơơk tưp kôt xadrah vôôch oot, 28đaneq: “'Wot heq đnooy ka êêp kơy tanưưl kơmq pato dayq đom yal neq, đơu 'yo hơq, êêp kơy heq khienq Jê-ru-sa-lem galaay viik varơuq pato dayq êêp, ji êêp kơy yôôych xung xagook vahaap ku manih nưq uk tol 'wot.” 29Bơh tuôôy tơơl hlê, Phi-e-rơ ji khơl jah rơơlh đnooy: “Pheq tameng tyauq Kơy Plêêk iaq laa khơl drơy. 30Kơy Plêêk ku mo kơy haay heq khienq Lôôk Jê-xu riirh hlê, Kadraq laa Kơy đơu êêp kơy heq păk kaxêêt, tuôôy kađnok tol gay charăk. 31Kơy Plêêk heq vanê Kơy nưq tok dơơp Vuua ji Lôôk Wơơt Dêh măn pi akoh kadraq, xôq kahniq varơuq wiit xuum ka I-sơ-ra-ên kung varơuq ka'lăk kadrôôp maroh. 32'Wot laa manih xanưk ku kaluh varơuq nưq, kung dii Lôôk Phool Hiel, Kơy đơu Kơy Plêêk heq kahniq ăm khơl manih tameng tyauq Kadraq.”

33Bơh atêq tuôôy tameng anưq, bing oot thier tưk jaraq ji xung păk kaxêêt khơl jah rơơlh. 34Tuôôy nưq, tuôôy muuyq dro nưq dưk tok katul Tayuup Karôp, laa muuyq adro Pha-ri-si, anơng laa Ga-ma-li-ên, thơy pato ganuun, jah dêq manih dêh kul vado, kơy dăt xagook khơl jah rơơlh vlôh pi gôk muuyq jơy. 35Yôôch kơy đnooy dii oot:

“Wơơy oh ay, khơl manih I-sơ-ra-ên, dayh rơơt rol dii xăk xamơk truh varơuq đơu oh ay đinq dơơp ka taleq adro neq. 36Vii adroyq kawat neq, Thêu-đa heq dưk tok, kadih xưng ni laa muuyq dro đaleq nưq, sôôq kaluh manih khơl kanau heq nhôp bing kung ni muut kơh poot hreek, đơu ni heq biq păk kaxêêt yôôych dêq hloay khơl adro leq jah nhăp tameng tyauq ni raay biq pachaay, yôôch bing oot hooy truh aduq be e kơyq. 37Atêq adro neq, Ju-đa manih Ga-li-lê heq dưk tok đom katuôôy jauq hlê sôôq manih dêh ji dăt manih karôp tyauq ni. Adro nưq kung kaxêêt, yôôych dêq hloay khơl adro leq jah jarooy tyauq ni raay biq pachaay hyaak. 38Juneq gô đnooy dii oh ay varơuq neq: Dayh chuh xangưưy klơlh taleq dro nưq ji xôq kê ka oot, vii atoh iq đinq neq long kaluh varơuq neq laa xing koot manih, yôôych ni hnoq biq păk kaxêêt, 39bơh atoh varơuq nưq laa xing Kơy Plêêk, yôôych oh ay hnoq leh ik păk kaxêêt oot, đơu leh kheoq oh ay pheq đnooy hnoq ik biq 'yo laa dro tachơơl dii Kơy Plêêk.” Nưq laa, oot tameng tyauq kơy. 40Atêq tuôôy ăm taayh khơl jah rơơlh, tuôôy heq tiel dook yôôch, oot vlôh tanưưl kơmq pato dayq taayh yal Lôôk Jê-xu, yôôch oot tha ăm hooy.

41Nưq atoh, khơl jah rơơlh dưk tok hooy klơlh varơuq tangưưr mot kung Tayuup Karôp, hlah hlaak vii oot heq jah 'yo laa taxưngq chiuq biq đnooy ra ơơh vii Yal Kadraq. 42Tôôy hngơy, hloay đom hnhư hơu long đom tưng hnhư, oot leh padơy pato dayq ji padoh taboon Hêêl Kaxay — Lôôk Jê-xu laa Lôôk Wơơt Dêh.