Kông-vuq 3

1Tuôôy nưq, Phi-e-rơ ji Jăng hooy tok hnhư hơu muut wat xadrook apôôy, laa muut wat thưq xiit. 2Muuyq adro nưq, biq tâk xing đom klaak miq ni, heq jah xakôôk truh, laa adro đơu tôôy hngơy khơl drơy xôq aduq 'mok ku hnhư hơu, aduq jah taayh laa 'Mok Kaxay, xôq vôôch jêêt ăm hloh xing khơl adro hooy muut đom hnhư hơu, 3đơu tuôôy hloq Phi-e-rơ ji Jăng xarôp hooy muut đom hnhư hơu, ay apôôy vôôch ăm nhonq jêêt ăm hloh. 4Bơh atêq tuôôy kung dii Jăng 'yo atrêêk muut ay nưq, Phi-e-rơ đnooy: “Dayh 'yo muut 'wot!” 5Nưq yôôch ay 'yo anhinq muut baarq kơy, biit nhonq xok axit kajoq nưq xing oot. 6Lunư, Phi-e-rơ đnooy: “Vajang long baak, be thưq leq e măn aduq gô, bơh varơuq đơu gô e, gô ăm ay neh. Taayh yal Lôôk Wơơt Dêh Jê-xu manih Na-xa-ret, dayh tawaak hooy.” 7Tuôôy heq jư riit ay aduq ti akoh, kơy đơ ay dưk tok, yôôych hloay jơnưq, pla jôôk ji mot kaa ku ay jah găk kalh. 8Atêq tuôôy kaplok tok, ay dưk kajưk ji pa xarôp tawaak hooy, yôôych ay muut đom hnhư hơu dii oot, vơơ hooy vơơ ayuch vơơ ayuôôt laat Kơy Plêêk. 9Dêq hloay manih karôp 'yo hloq ay tawaak hooy ji ayuôôt laat Kơy Plêêk. 10Yôôch oot nhonq vlôh ay nưq, đaneq ay 'miêh laa dro hloay 'ngôôy vôôch jêêt ăm hloh aduq 'Mok Kaxay ku hnhư hơu, lunưq oot biq galôp viik varơuq akêh ji tưng hưng vii varơuq heq xalih vlôh ka ay.

11Tuôôy nưq, tuôôy ay nưq đong hooy tyauq Phi-e-rơ ji Jăng, dêq hloay manih karôp dii viik varơuq tưng hưng, kung ka ung mamuuyq charơơk truh oot ka 'mok ngo, aduq jah taayh laa 'Mok Ngo Sa-lô-môn. 12Bơh tuôôy hloq anưq, Phi-e-rơ tơơl hlê dii manih karôp:

“Wơơy oh ay, laa manih karôp I-sơ-ra-ên lơơy, aleq oh ay xok dơơp akêh truh varơuq neq? Long aleq oh ay 'yo 'wot anhinq đanưq 'wot heq khienq ay nưq tawaak hooy xing taay yaak long varơuq tamaq đêh ku xăk? 13Kơy Plêêk ku Ap-ra-ham, Kơy Plêêk ku I-sak ji Kơy Plêêk ku Ja-kôp, nưq laa Kơy Plêêk ku mo kơy haay, heq vanê ayuôôt Xapok ku Kadraq, laa Lôôk Jê-xu, Kơy đơu oh ay heq rôp nôôp ji wih ka'lăk adroyq kangưưr Phi-lat tuôôy kơy nưq heq đinq tha Kadraq vlôh. 14Bơh oh ay heq chôôyq ka'lăk Kơy Vah ji Hyioh Jăk, đooy vôôch jah tha ka xăk muuyq dro păk kaxêêt manih, 15bơh oh ay heq păk kaxêêt Kơy Kahniq Varơuq Riirh, laa Kơy đơu Kơy Plêêk heq khienq riirh hlê xing aduq kaxêêt, đơu 'wot laa adro xanưk ka varơuq neq. 16Ji xing xuum tuôq aduq yal Kadraq, ay nưq, adro đơu oh ay raay hloq ji xet, yôôych yal Kadraq heq dơơp ăm kalh paraat. Xuum tuôq nưq gamưh aduq Kadraq heq ăm ay nưq varơuq kalh paraat dêq hloay đanưq hloay kangưưr dêq hloay oh ay. 17Juneq, wơơy oh ay, gô xet đaneq oh ay heq dưk dơơp đom varơuq vlô apoop, ji khơl padrok dêh ku oh ay kung dang anưq. 18Bơh kaluh varơuq đơu Kơy Plêêk heq tauq adroyq xing huuy ku dêq hloay khơl hnhư hlit, đaneq Kơy Wơơt Dêh ku Kadraq pheq chiuq jiq jiêh, yôôych Kadraq heq dơơp jah jêêk đanưq. 19Jo anưq, dayh wiit xuum, ji wih wiit hlê, xôq kadrôôp maroh ku oh ay jah pa hlơơp, 20xôq ka tuôôy kawah kaxay đơơu truh xing varơuq rama vlôh ku Lôôk, ji Kadraq patăk dăt Kơy heq jah pato đinq ka oh ay, laa Lôôk Wơơt Dêh Jê-xu, 21laa Kơy duh pheq jư hlê tol daak plêêk dong truh katuôôy 'meq hlê tôôy paroh, laa varơuq đơu Kơy Plêêk heq đnooy xing hnu xing huuy khơl kơy hlit vah ku Kadraq. 22Dik anưq, Môi-se heq đnooy đaneq: ‘Lôôk, Kơy Plêêk ku haay hnoq dưk tok ka oh ay muuyq dro kơy hlit dang đaji gô xing đom katul khơl oh ay ku haay. Oh ay hnoq tameng adro gamưh tyauq dêq hloay paq kê varơuq leq đơu adro đnooy kung oh ay. 23Bơh varơuq hnoq xalih vlôh ka adro leq đơu atoh leh tameng adro Kơy hlit nưq, yôôych adro nưq hnoq biq păk kaxêêt klơlh manih dêh.’ 24Anưq yôôch, dêq hloay khơl kơy hlit xing Sa-mu-ên ji khơl adro xatyauq atêq kơy, atoh oot tok apok đnooy, yôôych oot kung padoh taboon truh kaluh hngơy neq. 25Oh ay laa koot xau ku khơl kơy hlit ji ku tavek đơu Kơy Plêêk heq lăp dii mo kơy haay, tuôôy xanoh dii Ap-ra-ham, đaneq: ‘Ji vii muuyq koot xau ku koot, dêq hloay khơl adrơơk tamooy tol vari hnoq jah vanong.’ 26Adroyq dik dii oh ay, atêq tuôôy dưk tok Xapok xăk, Kơy Plêêk heq patăk dăt Kơy nưq truh kahniq vanong ka oh ay bơơn kach awih ngưưr tôôy adro klơlh varơuq xơk tauq ku oh ay.”