Cua Bible Literal Text
Kông-vuq 2
Tuôôy hngơy Lêh Nguh Twuân heq truh yôôch, dêq hloay oot măn kung dii mamuuyq aduq muuyq kachô. Tưng hưng, muuyq hnưm ahlôôk xing plêêk ahna vlôh, dang đaji đơơt khiel kalh jah klôôp truh, ji ni muut viik loch hloay đom hnhư aduq oot đong 'ngôôy. Yôôch kaluh kapiet đaji bơơn ôôlh rama vlôh dii oot, tuôôy heq paraay loch, yôôych ni 'nharum găp tol tôôy muuyq adro đom oot. Dêq hloay oot jah viik galaay Lôôk Phool Hiel ji pa xarôp đnooy ji kaluh apok xarooy kadrơy, xatyauq Kơy Phool Hiel kahniq ăm oot đnooy.
Tuôôy nưq e khơl manih Jo Thaiq đong măn hlê măn Jê-ru-sa-lem, laa khơl adro tuôq kuh xing tôôy daak ku khơl tamooy 'laarq plêêk. Tuôôy xarooy nưq ahna vlôh, bing karôp tagumq hlê ji biq xôôl dôôl vii tôôy adro raay tameng oot đnooy bơơn apok xarooy ku xăk. Dêq hloay manih karôp raay tưng hưng ji xok dơơp akêh, đnooy đaneq: “'Yo hơq, be aalq dêq hloay khơl manih đong đnooy nưq laa manih Ga-li-lê be aalq? Dơơp đaleq haay tameng tưng adro oot đnooy bơơn apok xarooy đêh ku oot đom dêh đơu haay jah pa iir vlôh? Nee laa manih Bat-thê, manih Mê-đi, manih Ê-la-mit, khơl manih măn hlê aduq Mê-sô-bô-ta-mi, Ju-đê, e hloay Kap-ba-đôk, Bông, A-si, kung đaji Phi-ri-gi, Bam-phi-li, Ai Kâp, kaluh dêh thuôk Li-bi jeq Si-ren, ji khơl manih kadrơy xing Rô-ma truh hlơq, dêq manih Jo Thaiq aluq manih tuôq đaauq Jo Thaiq, manih Kơ-rêt ji manih Ah Râp, haay raay tameng oot đnooy bơơn apok xarooy ku haay truh kaluh varơuq kôt lơyq ku Kơy Plêêk.” Dêq hloay oot raay tưng hưng ji hloq khoq hlolh, manih neq đnooy dii manih hơq: “Varơuq neq e iq laa aleq?” Măn muuyq sôôq kadrơy tache aklêêu heq đnooy đaneq: “Taleq dro nưq laa đong biq vuul lok ngưưm!”
Bơh atêq tuôôy dưk tok, Phi-e-rơ dii kưl muuyq khơl xatyauq heq tok apok ji đnooy dii oot: “Wơơy oh ay, manih tamooy Jo Thaiq ji dêq hloay khơl leq đong măn hlê aduq Jê-ru-sa-lem, varơuq neq pheq vlôh jêêk varơuq qween thuôk đôôyq dii oh ay, ji xiin dayh 'ngiik tôôr iq tameng apok gô. Vii khơl manih neq leh biq vuul đaji oh ay biit, vii đong laa wat thưq pe đom hngơy. Lunư, neq laa varơuq heq jah đnooy vlôh gamưh kơy hlit Jô-ên:
‘Kơy Plêêk xanoh: “Varơuq hnoq xalih truh đom kaluh hngơy lôôch dik,”
“Gô hnoq kahrôq Kơy Phool Hiel Gô tol tôôy xăk xamơk,
koot kanau ji koot kadrê êêp koot hnoq đnooy hlit,
khơl tadăp blaay ku êêp koot hnoq hloq ăm xet adroyq,
ji khơl karaq ku êêp koot hnoq apau hloq đom apau.
Pheq đnooy tol khơl xapok kanau,
xapok kadrê ku Gô đom kaluh hngơy nưq,
Gô hnoq uk pôôt Kơy Phool Hiel Gô, ji oot hnoq đnooy hlit.
Gô hnoq kahniq kaluh varơuq akêh tol plêêk yơơt
ji kaluh dơuq akêh 'laarq vari lêq,
vahaap ji ôôlh kung dii khul 'nhuuy.
Mot hngơy hnoq biq vlôh jêêk kamơng,
măn xiêk yôôych jêêk vahaap,
adroyq tuôôy truh hngơy kôt ji tađnah tađnaak ku Lôôk.
Ji paq kê adro leq taayh apôôy yal Lôôk yôôych hnoq jah wơơt.”’
Wơơy oh ay, khơl manih I-sơ-ra-ên, xiin dayh tameng kaluh apok neq: Lôôk Jê-xu manih Na-xa-ret laa dro jah Kơy Plêêk dơơp xanưk dii oh ay ji kaluh varơuq taay yaak, pheep akêh ji dơuq akêh đơu gamưh Kadraq, Kơy Plêêk heq xanưk dơơp măn katul oh ay, đaji kadih oh ay heq xet. Kơy nưq biq nôôp, tyauq ka varơuq heq jah đinq ji varơuq xet adroyq ku Kơy Plêêk, oh ay heq păk kaxêêt tuôôy đongq tol gay charăk gamưh hlê ti khơl adro leh e ganuun, Kadraq laa Kơy đơu Kơy Plêêk heq khienq riirh hlê, atêq tuôôy xaloot klơlh varơuq pơơl hwơơl ku varơuq kaxêêt, vii ni leh e paraat adrơk jư Kadraq pi 'laarq ni. Vii vuua Đa-vik đnooy truh Kadraq đaneq:
‘Gô hloay hloay hloq Lôôk măn adroyq kangưưr gô
vii Kadraq măn pi akoh gô, xôq gô leh biq anhưh hrưng.
Vii kơq nưq, xuum gô mưng me ji kapiet gô hlah hlaak.
Bơh măn iaq đnoyq, xăk xamơk gô kung hnoq padơy pado đom varơuq takôô gamưh.
Vii Kadraq hnoq leh ka'lăk phool hiel gô đom aduq karuk adro kaxêêt,
kung hnoq leh xôq ka Kơy Vah Kadraq 'yo hloq varơuq oop hruh.
Kadraq heq kahnoq vlôh ka gô trôôk varơuq riirh;
Kadraq hnoq dơơp ka gô viik galaay xuum hlah hlaak kung dii xăk xamơk ku Kadraq.’
Wơơy oh ay, wơơy oh ay, bơơn varơuq hôôk kajưk, varơuq hnoq ik đnooy dii oh ay truh mo kơy Đa-vik, nưq laa kơy heq kaxêêt ji heq jah up, mô xanưng ku kơy đong măn katul haay ăm truh hngơy neng. Ji yôôch, vii laa kơy hlit ji vii xet đaneq Kơy Plêêk heq dơơp apok paleek dii kơy xôq tol muuyq koot xau thuôk adrơơk kơy tol ngaai kơy, lunưq atêq tuôôy hloq adroyq varơuq neq, vuua heq đnooy truh varơuq riirh hlê ku Lôôk Wơơt Dêh, đaneq Kadraq leh biq ka'lăk đom aduq karuk manih kaxêêt, xăk xamơk kadraq kung leh hloq varơuq oop hruh.
Kơy Plêêk heq khienq Lôôk Jê-xu neq riirh hlê, dêq hloay 'wot laa manih xanưk ka varơuq nưq. Vii nưq, tuôôy heq jah vanê tok pi akoh Kơy Plêêk ji nhonq xok apok tavek truh Lôôk Phool Hiel xing Vaq, yôôych Kadraq heq uk pôôt varơuq đaneq, laa varơuq đơu oh ay đong hloq ji tameng.
Vii Đa-vik heq be hooy tok plêêk, bơh kadih kơy đnooy:
‘Lôôk xanoh dii Lôôk gô: “Dayh 'ngôôy pi akoh Gô,
dong truh tuôôy Gô khienq khơl adro tachơơl ku Koot jêêk đool xôq jôôk ku Koot.”’
Lunưq, dêq hnhư I-sơ-ra-ên pheq xet kach kajưk dik đaneq Kơy Plêêk heq lăp Kadraq dơơp Lôôk ji Kơy Wơơt Dêh, nưq laa Lôôk Jê-xu neq, adro đơu oh ay heq đongq đing.”
Tuôôy heq tameng anưq, oot jiq 'nhok đom xuum, yôôch tơơl dii Phi-e-rơ ji khơl jah rơơlh măn hlê, đaneq: “Nee khơl adro oh ay, 'wot pheq dơơp kajoq?” Lunưq Phi-e-rơ đnooy dii oot: “Dayh wiit xuq ji tôôy dro đom oh ay pheq chiuq pheep bap-tem taayh yal Lôôk Wơơt Dêh Jê-xu xôq jah varơuq ka'lăk kadrôôp maroh ku xăk, yôôch oh ay hnoq nhonq xok kadrool laa Lôôk Phool Hiel. Vii apok tavek nưq laa deng ka oh ay, ka koot xau ku oh ay ji ăm dêq hloay khơl adro măn xangưưy, nưq laa paq kê kơyq đơu Lôôk laa Kơy Plêêk haay hnoq taayh tawooyh.” Bơơn 'ngưng apok đêh đnoyq, kơy heq dơơp xanưk ji ahluk hluul oot, đaneq: “Dayh xôq xăk jah wơơt klơlh adrơơk xơk tauq neq.” Anưq, atêq tuôôy nhonq xok apok ku kơy, oot chiuq bap-tem, kơh pe ravơu phool hiel heq jah athêêp muut Tayuup Vah đom hngơy nưq. Tuôôy nưq, oot kưq dơơp đnoyq đom pato dayq ku khơl jah rơơlh ji đom varơuq tagumq hlê, đom varơuq pleelh tôôp ji đom apok xadrook apôôy.
Varơuq yôq varaal kahri tol tôôy adro, ji 'ngưng varơuq akêh kung dơuq akêh kahnoq vlôh gamưh khơl jah rơơlh. Dêq hloay khơl adro tuôq yôôych tagumq hlê ka muuyq aduq ji jah achung tôôy thưq, oot tek vari hluôôt ji garuh anôôp oot, yôôch ahlook kaluh nưq ka tôôy adro, tyauq đaji tưng adro e duh xung luleq, tôôy hngơy vơơ kưq miet muuyq xuum măn đom hnhư hơu, vơơ pleelh tôôp aduq tưng hnhư, oot heq ahlook aklah tuôông xa đom varơuq hlah hlaak ji xuum klaak dong dik, ayuôôt laat Kơy Plêêk ji e tamaq xuum dii dêq hloay manih karôp, măn Lôôk đong măn athêêp khơl adro jah wơơt muut tayuup nưq tôôy hngơy.
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.