Skip to content
BibleKenya

Cua Bible Literal Text

Kông-vuq 1

Wơơy kadraq Thê-ô-phi-lơ, gô heq dơơp vlôh phon achih valơk thưq nhưk truh tôôy varơuq đơu Lôôk Jê-xu heq xarôp dưk dơơp ji padoh pato, dong truh hngơy Kadraq jah xagook tok plêêk, tuôôy heq kahniq apok tanưưl xing Lôôk Phool Hiel ka khơl xatyauq đơu Kadraq heq rơơlh, kung laa khơl adro đơu Kadraq heq truh kahnoq vlôh kadih xăk đong riirh ka oot, atêq tuôôy Kadraq heq chiuq pơơl dal, dii 'ngưng bơơn xanưk, vii heq rama vlôh dii oot đom poot kưl hngơy ji đnooy kaluh varơuq truh daak dêh ku Kơy Plêêk. Tuôôy tavơh mot dii oot, Kadraq heq lơh ka oot leh ik chuh klơlh Jê-ru-sa-lem, bơh pheq takôô apok tavek ku Vaq, “laa varơuq đơu oh ay heq tameng xing thơy, đaneq Jăng heq dơơp bap-tem bơơn daak, bơh oh ay hnoq jah bap-tem ji Lôôk Phool Hiel leh xiik atêq kaluh hngơy neq.”

Vii nưq, tuôôy kung mamuuyq hooy truh, oot vôôch Kadraq đaneq: “Kuh Lôôk, jơq be Kadraq panưk hlê dêh ka I-sơ-ra-ên đom tuôôy neq?” Nưq bơh, Kadraq đnooy dii oot: “Varơuq deng ka oh ay jah xet leh aalq laa kawat long katuôôy đơu Vaq heq đinq tyauq qwuyen da uh ku Kadraq. Lunư, oh ay hnoq nhonq xok taay yaak tuôôy Kơy Phool Hiel kahri tol xăk, ji oh ay hnoq laa khơl manih xanưk ku thơy aduq Jê-ru-sa-lem, đom dêq dêh Ju-đê, dêh Sa-ma-ri, ji ăm truh loch dêq play vari.” Atêq tuôôy xanoh kaluh apok nưq, tuôôy oot măn đong 'yo, yôôych Kadraq jah xagook tok, ji muuyq đum kluk đơ kađoq Kadraq klơlh mot oot. Đom tuôôy oot đong tamaak anhinq 'yo tol plêêk tuôôy Kadraq jah xagook tok, yôôych 'yo hơq, vaarq dro khơl kanau hlưp qwuân aau ko truh dưk gah oot. Oot đnooy: “Taleq dro Ga-li-lê hơq, aleq khơl ay dưk 'yo tok plêêk? Lôôk Jê-xu neq, Kơy heq jah xagook tok plêêk klơlh khơl ay, kung hnoq truh đaji kach đơu khơl ay heq hloq Kadraq hooy tok Plêêk.”

Nưq yôôch, xing ngok đoot jah taayh laa Ô-liu, oot wiit xuq truh Jê-ru-sa-lem, đơu đoot nưq măn jeq Jê-ru-sa-lem, e kawat trôôk hooy đom muuyq hngơy Sa-bat. Tuôôy oot heq xuq truh, oot hooy tok tol rawaak yơơt duq oot đong măn hlê, e Phi-e-rơ, ji Jăng, kung Ja-kơ ji Anh-rê, Phi-lip ji Thô-ma, Ba-thê-lê-mi ji Ma-thi-ơ, Ja-kơ koot kanau A-phê ji Si-môn Xê-lôt, kung Ju-đe, koot ku Ja-kơ. Dêq hloay oot raay kajưk raa kach anguk muuyq đom varơuq apôôy, dii khơl mư drê kung Ma-ri, miq ku Lôôk Jê-xu, ji dii khơl ma oh kanau ku Kadraq.

Đom kaluh hngơy nưq, atêq tuôôy dưk tok măn katul đom khơl oh ay kơy (sôôq karôp khơl adro ka aduq neq laa kơh muuyq hreek vaarq kưl), Phi-e-rơ đnooy:

“Wơơy oh ay, khơl adro oh ay, neq laa varơuq băt dăt pheq jah jêêk đom Rahlăp Vah, laa apok đơu Lôôk Phool Hiel heq tauq adroyq xing huuy vuua Đa-vik truh Ju-đa, adro vlôh jêêk dro jarooy trôôk ka bing rôp Lôôk Jê-xu. Vii ni heq jah 'yo achung dii haay ji heq nhonq phon ni truh varơuq dơơp neq.” (Nưq yôôch ni heq root muuyq manay ruôngq xing jêêt kông ku varơuq leh hyioh jăk, ji atêq tuôôy biq gưlh panhuq akoq pôôt, ni hruh klaak, măn dêq klaak ni biq hruh vlôh pi gôk. Varơuq neq vlôh jêêk varơuq qween thuôk đôôyq dii dêq hloay khơl adro đong măn aduq Jê-ru-sa-lem. Vii anưq, manay ruôngq nưq jah taayh bơơn apok athêêk ku oot laa “Hak-en-đa-ma”, iq laa “Manay Ruôngq Vahaap”.) “Vii varơuq nưq heq jah valơk đom rahlăp Thi Thiên:

‘Dayh xôq manay ruôngq ni biq ralưp ralaak,

kung te e kơyq riirh măn đnư,’ ji

‘Dayh xôq adro kadrơy nhonq xok varơuq dơơp ku ni.’

Vii anưq, duh pheq e khơl manih heq kung hooy dii haay đom tuôôt kawat đơu Lôôk Jê-xu hooy hlê katul haay, pa xarôp xing pheep bap-tem ku Jăng ăm truh hngơy đơu Kadraq jah xagook tok klơlh haay — muuyq đom khơl adro nưq pheq vlôh jêêk dro dưk xanưk truh varơuq riirh hlê ku Kadraq kung dii 'wot.” Oot bôk vlôh vaarq dro, Jô-sep jah taayh laa Ba-sa-ba, đơu dro yôôych jah taayh anơng laa Juk-tu, ji Ma-thia. Tuôôy xadrook apôôy, oot tơơl: “Kuh Lôôk, kadih Kadraq, Kơy xet xuum klaak ku tôôy dro, xiin pato vlôh muuyq đom vaarq dro neq đơu Kadraq heq rơơlh laa kơyq xôq ka nhonq xok varơuq dơơp ku varơuq dơơp neq kung adro jah rơơlh đơu Ju-đa heq ka'lăk xôq hooy truh aduq ku ni.” Oot palăk truh vaarq dro nưq, ji palăk rôh muut Ma-thia, nưq laa kơy jah bơu rơơlh achung dii kưl muuyq khơl xatyauq.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.