Jăng 21

1Atêq kaluh varơuq nưq, Lôôk Jê-xu laay kahnoq kadih xăk ka khơl xatyauq aduq Tahli Ti-bê-ri-at. Kadraq heq kahnoq xăk vlôh đaji luneq: 2toleq dro khơl xatyauq măn kung mamuuyq — Si-môn Phi-e-rơ, Thô-ma, jah taayh laa Đi-đim, Na-tha-na-ên, manih thuôk Ka-na đom dêh Ga-li-lê, kung khơl koot kanau ku Xê-bê-đê, ji vaarq dro kadrơy đom bing khơl xatyauq ku Kadraq. 3Si-môn Phi-e-rơ đnooy dii oot: “Gô hooy rôp kaa.” Oot đnooy dii kơy: “'Wot kung hooy dii ay.” Oot hooy vlôh ji tawaak tok muuyq poop ge, đơu oot heq leh rôp jah kajoq đom klôôy nưq. 4Tuôôy nưq, tuôôy heq laa xaroq meel yôôch, Lôôk Jê-xu dưk tol gah tahli, long anưq, khơl xatyauq leh xet đaneq nưq laa Lôôk Jê-xu. 5Anưq yôôch Lôôk Jê-xu đnooy dii oot: “Êêp koot lơơy, leh e kaa kajoq xôq xa ih?” Oot tơơl apok Kadraq: “Lưp.” 6Bơh Kadraq dăt oot: “Dayh qweek lươyq vlôh pi akoh ge, yôôych êêp ay hnoq axek jah kaa.” Anưq, oot qweek lươyq đơu leh e paraat xôq duuy ni tok vii sôôq kaa thier 'ngưng. 7Atêq nưq, khơl xatyauq hơq, laa adro đơu Lôôk Jê-xu xiaq, đnooy dii Phi-e-rơ: “Nưq laa Lôôk.” Anưq laa, atêq tuôôy Si-môn Phi-e-rơ tameng đaneq nưq laa Lôôk, yôôych gwonq aau gôk rawiit xăk (vii kơy đong măn xăk vok), yôôch katruyh xăk pôôt tahli. 8Măn khơl xatyauq kadrơy yôôych hooy tol ge (vii oot măn kach gah tahli leh xangưưy, vơ đom kaplah vaarq hreek ku-đê), duuy tyauq lươyq viik kaa. 9Atêq nưq, muut tuôôy oot pôôt ge tok gah, oot hloq đum ôôlh kheng đong jaq, kaa ji e tôôp đong vuh tol nưq. 10Lôôk Jê-xu dăt oot: “Dayh taway muuyq axit đom sôôq kaa đơu oh ay đơơu rôp jah truh đnen.” 11Vii anưq, Si-môn Phi-e-rơ hooy tok ji duuy lươyq muut gah, viik ngăk muuyq hreek dăp kưl pe poop kaa kôt. Ji long e thier 'ngưng kaa, lươyq heq leh biq hyaak. 12Lôôk Jê-xu đnooy dii oot: “Dayh truh đnen xa waal xaroq”. Mot kadrơy, be kơyq đom khơl xatyauq hôôk vôôch Kadraq: “Kơy laa kơyq?” Oot raay heq xet đaneq nưq laa Lôôk. 13Lôôk Jê-xu tawaak truh yôôch xok tôôp ji palo ka oot, dii kaa kung anưq. 14Neq heq laa yưk thưq pe Lôôk Jê-xu kahnoq xăk vlôh ka khơl xatyauq, xing tuôôy Kadraq jah riirh hlê xing aduq kaxêêt.

15Yôôch tuôôy oot heq xa waal xaroq, Lôôk Jê-xu đnooy dii Si-môn Phi-e-rơ: “Si-môn, koot ku Jăng, ay xiaq thơy iaq kaluh varơuq neq be?” Kơy đnooy dii Kadraq: “Kuh Lôôk, jơq, Kadraq xet đaneq gô xiaq Kadraq.” Kadraq đnooy dii kơy: “Dayh văch xiap kaluh trưưu koot ku thơy.” 16Kadraq laay đnooy dii kơy yưk thưq vaarq: “Si-môn, koot ku Jăng, ay xiaq thơy be?” Kơy tơơl apok Kadraq: “Kuh Lôôk, e, Kadraq xet đaneq gô xiaq Kadraq,” Kadraq đnooy dii kơy: “Dayh xakaq jư trưưu ku thơy.”

17Kadraq đnooy kung kơy yưk thưq pe: “Si-môn, koot ku Jăng, ay xiaq thơy be?” Phi-e-rơ hlu rơu vii Kadraq vôôch kơy yưk thưq pe: “Ay xiaq thơy be?” Kơy tơơl dii Kadraq: “Kuh Lôôk, Kadraq xet dêq tôôy varơuq; Kadraq xet đaneq gô xiaq Kadraq.” Lôôk Jê-xu đnooy dii kơy: “Dayh văch xiap trưưu ku thơy. 18Dong dik, dong dik, thơy đnooy dii ay, tuôôy ay măn blaay, ay kadih ay hnek katêêk ji hooy aduq leq ay trôôch, bơh tuôôy ay karaq, ay hnoq yaalh ti ay vlôh, ji dro kadrơy hnoq hnek katêêk ka ay yôôch jarooy truh aduq đơu ay leh trôôch.” 19Kadraq đnooy varơuq nưq, xôq pato varơuq kaxêêt luleq đơu kơy hnoq dơơp tađnah tađnaak Kơy Plêêk. Đnooy apok nưq yôôch, Kadraq dăt kơy: “Dayh tyauq thơy.” 20Tuôôy wih hlê, Phi-e-rơ hloq khơl xatyauq đơu Lôôk Jê-xu xiaq đong hooy tyauq atêq, laa adro đom waal xa klôôy heq ganưq muut tada Kadraq yôôch vôôch: “Kuh Lôôk, kơyq laa adro xalih xuum Kadraq?” 21Vii anưq, tuôôy hloq dro nưq, phi-e-rơ đnooy dii Lôôk Jê-xu: “Kuh Lôôk, măn dro neq hnoq luleq?” 22Lôôk Jê-xu đnooy dii kơy: “Atoh thơy trôôch dro neq kưq măn hlê dong truh tuôôy thơy truh, yôôych e tajinq kajoq truh ay? Ay dayh tyauq thơy.” 23Nưq laa apok neq pahêêr vlôh đom katul khơl oh ay đaneq khơl xatyauq nưq hnoq leh kaxêêt. Bơh Lôôk Jê-xu leh đnooy dii kơy đaneq dro nưq hnoq leh kaxêêt, bơh laa: “Atoh thơy trôôch dro nưq kưq măn hlê dong truh tuôôy thơy truh, yôôych e tajinq kajoq truh ay.”

24Neq jơq laa khơl xatyauq dơơp xanưk truh kaluh varơuq neq, ji laa manih valơk hlê kaluh varơuq nưq, đơu haay xet đaneq apok xanưk ku dro nưq laa dong dik. 25Iaq đnoyq, kung e 'ngưng varơuq kadrơy đơu Lôôk Jê-xu heq dơơp, truh kaluh varơuq nưq, atoh valơk xôq dêq tôôy varơuq, yôôych gô biit đaneq dêq ka dêh araak pheq đnooy leh đu aduq xôq dêq kaluh rahlăp jah valơk vlôh.